Te Atua i Aroha
Te Atua i Aroha
E aha te Aroha ? te tahi hiòraa no teie taò, e AROHA, o te mea e taìtaìhia mai ra i roto i te tärià i te faarooraa mätamua mau ti ra ia te mäniania o te taò ARO. E parau ia tätou e, te ARO te vahi mua o te tahi taihaa, e aore ra o te taata. Ia parauhia no te taata, o te vahi ia, e vai ra i mua i te mäta, o te òhipahia. Te ìteraa te mäta i te òhipa e tupu, e to na faanahoraa, e aore ra o ta te tärià e faaroo ra, noa atu ä ia te mäta aita e ìte rä. E tià ia parauhia e, te vai nei e piti tuhaa i roto i te AROHA, o te tauturu i te haafatataraa i pihai iho i te tumu o te manaò e hinaarohia ra e faaìte.
- Te ARO, te vahi ia i reira te mäta e òhipa ai i te mau faanahoraa e vai ra i mua i taua taata ra.
- Te HA, e maha ia, oia hoì o mua, o muri, e na pae e piti, i te vahi e tiàhia ra e te taata.
Ia au i teie mau manaò, Te aroha, to te taata ia peàpeà òiòiraa to na âau i mua i te fifi o te tahi, eiaha ra ma te hiò noa, ma te faatoro atoà ra i to na rima no te räve, èi haamämäraa i te àti o te tahi.
Te vai atoà nei te tahi taò aita tätou e faaòhipa pinepine nei, e ÒFA e parau atoà teie no te AROHA, oia hoì, ua faaâö mai, faahaehaa mai, e aore ra ua taupe mai.
A hiò atu ai tätou i teie tumu parau TE ATUA I AROHA, te Taramo 136, ma te ìrava 1 e tae i te 26, te himenehia nei te aroha o te Atua. Tei î i te hämani maitaì e te ora. Ia haapäpühia te hiò, teie himene te vai nei te hoê ta tuhaaraa .
- te ìrava 1 – 3 te òmuaraa e haamaitaì ia Iehova. E tïtauraa ia, ia himene i te mau hämani maitaì o Iehova, e to na aroha i te vai maiteraa.
- Te ìrava 4 – 9 te Atua tei rahu i te ao nei na roto i te mana e te puai.
- Te ìrava 10 – 25 Te Atua tei haamaitaì, e tei faaora e te mau òhipa maere, ta na i räve i mua i te nunaa Iteraèra.
- Te ìrava 26 Te Atua no te mau raì.
Te aroha o te Atua, te ìtehia nei ia i roto i te mau òhipa i rävehia e a na. Mai ta te Taramo e faaìte nei, te haamaitaì nei te taata i te Atua, no to na aroha. E tano ia faaäuhia teie taramo, te Atua i roto i te hanahana o te aroha. No te mea ua haamaitaìhia, te mau òhipa rarahi o ta na i rahu no teie nei ao. Te faaìte nei teie tuhaa te Atua i roto i te raì, e te Atua i te fenua nei. Oia hoì ua î te Atua i te aroha e te ora. Te pii nei ia i te taata na roto i te haamaitaì te Atua tei aroha noa, ma te riàrià i mua i to na puai. ( Nehemia 1, 4 – 6).
Te Atua i Aroha o te hoê ia faaòreraa hara, tei tupu i roto i te Atua e te taata. Te aroha tei òre i ta òtiàhia. Teie hiòraa e Atua ia o Iehova no te aroha, tei tupu i roto i terä uì e terä uì taata. Ma te tuu ia na iho ia mauiui atoà i te mau hara i rävehia e te taata. Te haapeàpeà nei hoì te Atua, ia tiàma te taata i mua i te hara, oia hoì ia ora. E mea tiàma te Atua i aroha, te haamaitaì nei o ia i te taata. Te faaòre nei i ta na hara, ia riro o ia èi ìte no to na aroha. Te faaìte nei te Atua i to na aroha eiaha no te hoê taime poto. Te hoê ra aroha, tei tupu na roto i to na puai faaora i te taata, mai roto mai i te hara. Ia vai te ora i nià i te hoê èà no te hau. Ev. Ruta 1, 78 – 79. Teie ra e ära atoà i roto i te tahi taime no te àamu o te tämarii Iteraèra. Aita te Atua i aroha faahou, ia au i te faaìteraa a te perofeta Hotea i te pene 1, 6 e te vai atu ra. Ua tae i te hoê taime, aita te Atua e tiaì faahou, i te nunaa maìtihia. No ta rätou faaturi, te faateä ê nei te Atua i to na aroha ia rätou. Àreà o Iuta ua haamaitaìhia ia. Teie huru no te Atua te faaära nei ia i te taata tei hahi ê nei o ia i te aroha o te ora.
Eiaha ra no te faautuà no te faafeuri ra, ia òre te èà o tei hämani maitaì ia taa ê, i te ôpuaraa a te Atua. No reira e òre te aroha o te Atua mou, e vai ra e tauätini noa atu te uì . Teuteronomi 7, 9 ; Nehemia 13, 22.
Te titauraa ia noaa te Aroha i te taata, e hinaaro te reira no te Atua, aita anaè e aroha i rotopü te taata e te taata, te faaìte noa ra te reira e aita ä to te Atua parau i tae atu ra e i aahia atu ra i roto i te reira pupu taata. Areà te taata e faatupu i te hau, ua riro ia èi tamarii nä te Atua. To na ìteraa te tahi mai ia na ra te huru e taua huru ra no te Atua ia. Eere änei te huru oraraa teie ta te Atua e hinaaro nei ia noaa i te taata, ia tupu te mea ta te Atua e hinaaro nei, ia heeuri i roto i te àau o te taata atoà te aroha, ia òaòa o ia i te parahiraa i nià teie fenua ta te Atua i püpü mai ia na. Nä roto i te tupuraa te aroha o te Atua, o to te taata ia färiiraa ia parahi fatata mai te Atua, ia riro tätou èi mau taata no te Atua e èi Atua o ia no tätou. Färii atoà tätou e nä na e horoi i to tätou roi mata e faaora i to tätou atoà ra mau àti, e nä te Atua e faaâpï te mau mea atoà i roto ia tätou. Ia fäì tätou e, o te Atua te fatu o te Aroha, te haapäpü ra ia tätou e o te Atua te haamätara e te faahopeàraa, e tei ia na anaè te parau e tupu mau ai te maitaì o te taata i te fenua nei. Oia mau, e parau päpü teie, no te Atua i aroha ai te aroha. E ôpuaraa no to na hinaaro i ìtehia ai e i vai mai ai te aroha, o ta na i faatupu nä roto i ta na parau mana. No reira, te ìte ra tätou e, aita to te aroha e parau i rapae aè i te Atua. Ahiri aita te Atua i ôpua, àhiri aita o ia i hinaaro, e àhiri aita o ia i parau, aita atoà ia to te aroha e parau. E täàmuraa päpü to te aroha i te Atua. Ia faahitihia te parau o te aroha, e faahoì ihoä te reira ia tätou i nià i te parau o te Atua.
Mai te peu, o te Atua te fatu o te aroha, to na hinaaro tumu maòti, ia vai noa to na Aroha i nià i te taata e a muri noa atu.
Haapiiraa i muri nei, Te Here o te Atua.
Teraì òr.