Òhipa 2, 1-11. Penetetöte Ôroà o te reo

Poroì no te täpati 19 no Aunuunu / Më 2024
Ôroà Penetetöte / Ôroà o te reo
Taiòraa : Òhipa 2, 1-11.
Poroì : Òhipa 2, 8 : « E aha rä hoì teie i ìte ai tätou atoà nei i to tätou iho reo mau i te parau-raa-hia mai ? »

Aroharaa : Te mau tamarii a te Atua i Mäòhi Nui nei, ia ora na i te here e te aroha o te Atua i te färereiraa.
Manaò tauturu : E mahana taa ê teie no te mau pipi, o rätou tei âmui i te vähi hoê. Mahana atoà rä tei faaarahia mai ia rätou, òre noa atu ai e faaìtehia mai te taime tupuraa, ua ìte rä rätou e, e òhipa të tupu no rätou. Ua faaineinehia e ua faaarahia rätou e to rätou Fatu, i te taeraa mai no te Värua Maitaì. Parau-noa-hia ai rätou, e tonohia mai te Värua Maitaì, aita rätou e märamarama ra, e aha teie òhipa. No reira rätou i te faaea noa atoà ai i roto i te tiaìraa e, e aha te òhipa e tupu mai, mai të hea rä te huru no teie òhipa e tae mai. I ô nei, te haapäpūhia ra, te hohoà ta te Värua i rave, e auahi, e arero maa. Te auraa, ua ìtehia te auahi i te tororaa i nià i te reira, e hope aè te mau pipi i te tauhia mai e te Värua Maitaì. Te haapäpüraa mätämua e höroàhia ra, teie ia parau no te îraa rätou i te Värua. E î aè ra rätou i te Värua, haamata atoà atu ra rätou i te parau, eita e mau faahou i te täpeà.
Eere nä rätou e feruri ra, eere nä rätou e faanaho ra i ta rätou parau. Mai terä ihoä e haapäpühia ra, nä te Värua e höroà ia rätou i te parau e au i te taata tätaì tahi. Teie Värua, te Värua ia o te Tumu Nui, te Värua Maitaì hoì ta te Tamaiti i faaau, e i faaara mai i ta na mau pipi, e tono mai o ia i nià ia rätou. Te ururaahia rätou e te Värua, te haamata-atoà-raa rätou i te parau. E au i te pape pïhaa aita e mauraa, pïhaa noa mai, manii noa mai. Ua parau teie mau taata, e te ìte mai ra te mau taata i âmui mai i te reira mahana, nö ù terä reo tä na e parau ra, te ìte ra hoì te tahi i to na reo, e te ìte atu ra te tahi i tö na.
Î aè ra rätou… teie î e parauhia nei, aita to na e parau mai te peu, aita to te pau. I faaîhia ai te tahi òhipa, no te mea ia ua pau, aita e mäa faahou to roto. Mai te tahi häpaina pau, te inu-raa-hia atu te pape o taua häpaina ra, te ö faahou mai nei i te pape âpï atoà i roto. Te auraa ra, aita to te pau faahou e ìtehia ra.
Te auraa ra, i roto i te parau a te Tumu Nui, te vai ra ihoä te parau, te vai ra rä te taime e höroàhia ai te märamarama. E ua nä reira anaè tätou i te parau, te märamarama ra ia tätou e, aita te märamarama i te parau a te Atua i höroàhia i te mau huru taata atoà. Te huru ta te Värua e faatupu ra i nià i te mau pipi, to rätou ia matararaa e te parauraa i te reo e rave rahi. Terä rauraa te reo o te taata, ua nä roto mai i teie nei mau taata tei mätauhia no to rätou märamarama òre i te parau. E feiä parau i teie nei

Teie Värua e arataì nei e, e ìriti nei ia rätou i te ùputa o to rätou vaha, te ùputa o to rätou âau e roaa ai ta rätou parauraa i teie nei. E värua atoà e faaineine ra ia rätou i mua i te mau taata atoà, faaineine ra ia rätou no te tere e no te òhipa atu a muri aè. Ua î i te parau. To rätou huru nä mua atu, e feiä parau òre rätou, i teie taime, ua î i te mea ta teie täpaò no te parauraa i te reo e rave rahi e faaìte mai ra, e ua riro ia ei faaìteraa ia rätou, terä ta te Atua Tumu Tahi e hinaaro ra ia rätou e te hinaaro atoà ia tatou i teie mahana ia faaauhia. Te faaitoito-atoà-hia nei rätou, ia haere e faaìte i terä parau i te mau vähi atoà, i te mau fenua atoà e taata to reira, noa atu te huru o to rätou reo.
Ia hiò anaè tätou i te parau o te mau mītionare, te reira te mea o ta rätou i ora mai. Aita rätou i ìte i te reo o te fenua o ta rätou e haere ra. Ua haere rä rätou, e te òhipa mätamua ta ratou i rave, te haapiiraa ia i te reo, ei räveà, e nä roto atoà i te reira reo, to te taata ìteraa i te hinaaro o te Atua. Nä te märamarama o te Värua e arataì ia rätou i teie nei, aita ta rätou e ìmi faahouraa e aha te mea e parau. No te mea, nä te Värua iho e tätara i te mau parau i vai noa na, i riro noa na ei mea pöiri no rätou.
No reira, tätou tei hinaaro e tomo i roto i te faaauraa a te Fatu nä roto i teie ôroà Penetetöte, e färii atoà tätou i terä märamarama òre, terä huru riàrià, terä huru paruparu, no te ani ia ia faaîhia tätou e te Värua Maitaì, ia roaa atoà hoì ta tätou parauraa i teie mahana mä te haamä òre i te parau maitaì a te Atua. Ia matara te ùputa o to tatou âau no te faaìteraa i te hinaaro hoê o to tätou Fatu. Ua ìte tätou e, te vai ra te tahi mau haapaòraa, tei haamau i ta rätou peu i nià i te paraparauraa i te taata nä roto i te reo e rave rahi. Eere faahou atu ra nä te Atua iho e höroà mai i te parau, teie nei, nä te taata e faanaho i te haaparaparau i te Värua o te Atua.
Te vähi e ara, te hinaaro atoà tätou e haaparaparau i te Värua e te òreraa e vaiiho i te Tumu Nui ia parau i te mea tä na e hinaaro nei i te höroà ia tätou to Mäòhi Nui. Teie Atua e parau nei nä roto i to na Värua, o ia teie e faaìte nei i te auraa o ta na parau. No reira, e vaiiho rä tätou i te Atua ia arataì ia Mäòhi Nui. No te Atua te hinaaro, no te Atua te mana e òhipa ra i roto ia tätou te nünaa mäòhi, nä te Atua te parau o ta tätou e parau.
Mea maitaì te taata i teie mahana i mua i teie parau ia haamanaò, ua höroà mai te Atua i to na Värua, ua faatupu te reira Värua i roto i te Mäòhi i te märamarama e te ôhie o te parau. Te faufaa i reira, te riroraa ia ei reo tumu no tätou te parau no te Here e te Aroha. Ia ora na
Rudy, Raìhei a CASTELLANI, òrometua