Ruta èv. 9,51-62

Tāpati 26 no Tiunu 2016.

Taiòraa.

Ruta Ev. 9, 51-62.

Aita te hoê ôire no Tämäria i färii ia Ietu

51 E fätata aè ra te mau mahana i te hope e reva ai o ia i nià, ua ôpua mäite iho ra o ia e haere i Ierutarëma. 52 E ua tono atu ra i te veà nä mua ia na, e tomo atu ra rätou i roto i te hoê ôire rii o to Tämäria e faanehenehe i te hoê täpaeraa no na.53 Aita aè ra rä rätou i färii mai ia na, no te mea te haere tià ra o ia i Ierutarëma. 54 Ìte aè ra nä pipi na na ra, o Iatöpo räua o Ioane i te reira, ua nä ô mai ra räua, E te Fatu, e tià änei ia òe ia parau mäua i te auahi ia maìri mai no nià i te raì, ia pau atu rätou, mai ta Èria ra. 55 Ua färiu atu ra rä o ia, àvau atu ra ia räua, nä ô atu ra, Aore òrua i ìte i te huru o to òrua âau. 56 Aore hoì te Tamaiti a te taata nei i haere mai e täparahi i te taata, i haere mai rä e faaora. Haere atu ra rätou i te tahi ôire ïti.

Te peeraa ia Ietu

57 E te haere noa ra rätou nä te èà tià, ua parau mai ra te hoê taata ia na E te Fatu, e pee atu vau ia òe i to òe mau haereà atoà.58 Ua parau atu ra Ietu ia na E ana to te ârope, e täuraa to te manu o te reva, âreà te Tamaiti a te taata nei, aita o na tuäroì.59 Ua parau atu ra o ia i te hoê, A pee mai ia ù. Ua nä ô mai ra o ia E te Fatu, a tuu aè na ia ù e haere au e tänu i taù metua täne.60 Ua parau atu ra Ietu ia na, E vaiiho atu na i tei pohe e tänu i to rätou i pohe ra, e haere rä òe e poro haere i te Pätireia o te Atua. 61 Ua parau atoà mai ra hoì e tahi E te Fatu, e pee atu vau ia òe, e tuu na rä òe ia ù, e poroì na vau i to ù ra fëtii. 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

Manaò

Teie te reo o te Fatu ia tätou, 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua Ua tupu teie parau, i te taime o Ietu, e ta na mau pipi e ôpua ai e haere i Ierutarëma, e na Tämäria ra te èà fatata aè. Te tono nei o Ietu i te mau veà no te faanehenehe te vahi täpaeraa, e te ìteraa te mau taata no teie ôire, te haere nei o Ietu i Ierutarëma, aita aè ra rätou i färii ia na i reira. Aita ra o Ietu i haafifi i teie òhipa i tupu, ua na roto noa o ia i teie ôire i te haere, ma te haapeàpeà òre to na upoo. Âreà o Iatöpo e o Ioane, ua faatupu ia i roto i to raua àau i te manaò tià òre, te hinaaroraa e nina i teie ôire.

Te manaò ra o Ietu, aita e tuàti nei i to teie na pipi. Ua hinaaro teie na pipi e faaäu i teie òhipa i ta Eria i rave i nià i te mau ènemi o te Atua. (II Arii 1, 10). Te manaò rahi o Ietu i roto i teie tere, eita ia i te ninaraa i te mau taata tei òre i färii ia rätou. No te faafariu ra i te nünaa o teie ôire i nià i te Atua te tumu o te hau.

E ua pau to teie mau taata, i te maìriraa mai i te ahi mai nià mai i te raì. Teie e tupu nei i roto i te èvaneria i päpaìhia e Ruta i te pene 9 i te ìrava 51 e tae i te 62. Aita to Tämäria i färii ia Ietu. No Ietu aita o ia e fifi nei i to na manaò, ta na noa e hinaaro nei e faaora i te mau taata atoà, o teie to na tere. Tei ìte e, teie te tere o Ietu i roto i te mau taata. Te reira taata ra, ua ìte ia o ia i te pee ia Ietu, e ua ìte atoà o ia e aita to Ietu e tuäroì no te haamäha i to na rohirohi. To te ârope ra e ana to na no te tapuni, i te ènemi. To te manu e täuraa to na no te haamäha i to na rohirohi. To te Tamaiti ra a te Atua, e tätauro ia to na tuäroì. Tei pee ia Ietu, ua tämahanahana-ê-na-hia ia e te Värua o te Atua. Te parau ru ta Ietu e faaìte nei, ia porohia ia te Patireia o te Atua e tià ai.

I faahiti ai o Ietu i teie parau e, o te taata e tuu i te rima i nià i te ârote a hiò ai i muri, e òre ia e au i te Patireia o te Atua. Teie parau, te tïtau mai ra ia tätou, ia haere tätou i mua, ma te ìte e, te òhipa i maìri eita ia e na nià faahou i te rave. To na auraa eiaha e rü faufaa òre noa i te raveraa i te òhipa, a fifi te faanahoraa. te ìte nei tätou i roto i teie parau ta Ietu e piti tumu parau te tià e faaitoito i to tätou àau.

1) Te rima

2) Te mata.

Te mauhaa ra te ârote ia, oia hoì te täuihaa a te taata faaapu, èi haamäruraa i te repo. Te ârote ia òhipahia, eita e tià e huti i muri e motu, te taata e turaì ra. Mea faahaere noa iho a i mua teie täuihaa, te feiä faaapu ua päpu maitaì rätou te faanahoraa. Te tau o Ietu te ârote, mea täamu ia i muri i te puaatoro, e aore ra i muri i te mau puaahorofenua eita e tano faahou i nià i te mau tahua àroraa. No reira eita e tano e hiò i muri e motu i te ârote, e hiò noa ra i mua te vahi e haerehia ra.

Teie tau te ârote mea matini ia, te vai nei na te taata e turaì, e te vai ra mea paùma i nià iho, to na ra faanahoraa, aita roa ia i täui, eiaha te rima ia hape, eiaha te mata ia nevaneva, e fifi te noaa mai.

Te tahi auraa no te manaò ta Ietu e parau nei, no te ârote tei roto i te rima o te taata te maitaì o te òhipa, e te oti òre. E tei roto i te òriò mata te àveià e here ai i mua te vahi e hinaarohia ra. Ua tupu anaè mai teie te huru e täpae tätou i roto i te Patireia o te Atua, ia òre eita e fatata i pïhaì iho.

Eiaha i roto i tera manaò e, te parau ra o Ietu ia tätou e eiaha e hiò i muri. Eita roa tei reira te manaò o Ietu. Tei roto ra i tera manaò e, ua täpeà anaè te rima i nià i te òhipa a te Atua no te haere ia i mua, eiaha no te hoì i muri. Te hohoà ia o teie na taata e toru.

1) E te Fatu e pee atu vau ia òe, aita ra i haere.

2) E te Fatu e pee atu vau ia òe, e haere ra vau e tänu i ta ù metua tane.

3) E te Fatu e pee atu vau ia òe, e haere ra vau e poroì i ta ù mau fetii.

Noa atu a ia te taupupu o te taata, aita O Ietu e faaea nei i te tïtau i to na mau tävini. I to na revaraa i nià i te raì ua vaiiho mai o ia te ârote, ma te tiàturi e, e tuu tätou i to tätou rima i nià - iho. O te òhipa i tupu i roto i ta te Värua Maitaì faaururaa i te mau tävini o te Atua. Ma te ìte atoà e, e ana to te ârope, e täuraa to te manu o te reva, âreà te Tamaiti a te taata nei, aita o na e tuäroì. Ta tätou ra parau i te ìrava 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua No te faufaa o ta tätou ìrava, mea tià ia haapaòhia te parau e faahitihia ra i roto i te puta Taramo 16 te pure a Tävita, te na ò ra teie i te ìrava 1 e tae i te 11, 1 E faaoraraa ia ù, e te Atua, te tiàturi nei au ia òe.2 Te parau nei au i te Fatu e O taù Fatu òe, aita a òe e faufaa i to ù nei maitaì.3 Âreà te feiä moà i te fenua nei, o te feiä maitataì rätou o ta ù e pöpou nei.4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì taù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra te aò mai ra taù manaò âau ia ù i te ruì.8 Ua tuu vau i te Fatu ei mua ä ia ù, tei taù rima àtau o ia, e òre au e âueue.9 I òaòa ai taù âau, e te òaòa nei taù värua e taòto atoà taù tino nei mä te tiaì.10 E òre hoì òe e vaiiho i taù värua i häte, e òre hoì òe e tuu i te taata moà ra ia ìte i te tähuti.11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

O te taata e tuu i te rima i nià i te ârote a hiò ai i muri, e parau teie no te tiàmäraa e te aroha o te parau maitaì

E ia täpeà tämau mäite i te tiàmä ta te Metia i faatiàma mai ia tätou, e eiaha ia mau faahou i te mau hopoià faufaa òre. I te mea mau taata tätou te Mäòhi tei tämähia e te fenua te taura pito o te pü fenua i Mäòhi Nui nei o te faufaa ia e noaa ia tätou i te Metia. Te faaìte nei teie manaò e mau taata àmutärahu tätou i te faufaa parau tià no te ture o te Aroha e te here a te Atua. O tätou atoà o tei tïtau ia tiàhia i te ture ra, ia òre ia taa ê i te Metia e ia pärahi tämau tätou i te aroha mau. No te Värua Penetetöte i tiaì ai ia tätou i te hinaaro i te parau-tià ia noaa i te faaroo, i te Metia ia Ietu, aore o te faateitei e faufaa, aore hoì to te ìmi òre, o te faaroo rä e faatupu i te Aroha. I horo maitaì na tätou, nä vai tätou i ärai i òre ai tätou i haapaò i te parau mau. E höpue te puèà i te faahöpue ïti haìhaì ra. Ia manaò maitaì rä tätou i te Fatu, e òre tätou e riro ei manaò ê. Âreà tei haapeàpeà mai ia tätou, ei ia na iho ia ta na utuà, eita e haapaòhia to na huru. E au mau taeaè, mau tuahine, te haapiihia nei tätou ia ora i to tätou faaroo ia òre tätou ia topa i roto i te mau hämani-ìno-raa te hinaaro nei ra te manaò ia faataa-ê-hia taua feiä i tiàrepu ia tätou. I parauhia tätou, ia noaa te tiàmä, eiaha rä taua tiàmä ra ei faatupu i ta te tino, ei auraro ra i te aroha te tähi i te tähi. Ua hope roa hoì ta te ture i te parau hoê nei, oia te parau ra e, E aroha òe i to taata-tupu mai to aroha ia òe iho na. Ia faaoooo rä tätou e ia hämani ìno tätou ia tätou iho, e ara, o te mou hoì tätou ia tätou iho. Ia ärataìhia ra tätou e te Värua, e haapaò i ta te Värua ra, e eiaha e faatupu i te mea faufaa òre. No te mea ôpuaraa faaora ta te Atua no to na nünaa tei òre i àueue i mua i te mau faanahoraa tei faatea ia na i to na fenua Mäòhi. Te tiàturi nei teie manaò e, ua vaiiho mai te Atua ia tätou no te ârote i te âau o te taata ia ôteo te parau tià i te hinaaro o te Atua.

Teraì òr.