TE ATUA
TE ATUA
Te iòa o te Atua.
Taiòraa Tenete 1, 1 – 31; 2, 1 – 25
Ia au te ärataìraa a te Pipiria, te faaìte nei ia i te Teiteiraa o te Atua, e O ia te puna e aore ia te Upoo no te mau ora e vai nei. Aita te mau Papaì Moà e faaìte nei nohea mai te Atua, aita to na e Metua tane, aita atoà e Metua vähine.
E Atua rä tei faaìte i to na Iòa “TE VAI NEI AU O VAU E VAI NEI” Etoto 3, 14. Èi Iòa teie tei horoà i te Atua, i te ora e vai rä i roto ia na iho. E tei horoà i roto i te taata, na roto i te haapuaìraa i te äho ora. Tenete 2, 7. i roto i teie Iòa, taa noa atu ai te haapäpüraa no te taui òre te huru o te Atua, te vai atoà rä te manaò no te taui òre te tau, e te tüàti – tämau – raa hoì te tau e te vahi. No reira te Atua, e pärau ia tei riro i te mau tau atoà i te mau vahi atoà èi pärau no teie vahi, e no teie taime, oia hoì no teie taime.E mau täpaò maere teie, tei fafauhia i te taata ia tiàturi na roto i te faaroo päpü i te Atua.
Te Atua tei faaìte i te toru tahi, te METUA, te TÄMAITI, te VARUA MOÀ. E ìtehia teie faaòhiparaa Iòa i te taime i rahuhia ai teie ao. Tenete 1.Te Atua, Te Varua, Te Tamaiti Tenete 1, 3. Te Tamaiti tei roto ia i te märamarama Ioane 8, 12. no reira i roto i te pipiria mea faufaa roa ia ìte päpü i te òhiparaahia tei Iòa o te Atua.
I roto i ta tätou Pipiria ua huri – àfaro- noa – hia tei Iòa o te Atua, teie te mau òhiparaa, Atua, Fatu, Iehova, Iehova Tapaota, Metua. Te pipiria te faaìte nei ia te rauraa o te Iòa o te Atua. I roto i teie rauraa te Atua teie faahitihia nei; o IEHOVA. Èi Iòa teie, tei Moà no te mea èita O ia e taiòhia. Ia ìte te mau Ati – Iuta i teie Iòa e faatura rätou ma te pärau ‚’’ Adonai’’ Te Fatu, no te monoraa te Iòa o IEHOVA. (YHWH).
Teie taua mau Iòa rä ia au i te òhiparaa a te pipiria Hepera.
- Te Atua mana hope : ELOHIM, tei faaìte i te Toru Tahi, e aore rä te rahiraa, teie te Iòa i faahitihia i te òmuaraa o te pipiria Tenete 1, 1……… e 2 500 päha òhiparaahia i roto i te faufaa tahito.
- Te Puai : EL E faaìte teie taò Hepera i te manaò mätamua no te Puai o te Atua.
Na Iòa teie no te Atua tei faaìte i te mau òhipa i rahuhia e te Atua ‚’’ Atua Mau, Tenete 1, 1 – 31, Iopa 5, 8; Taramo 22, 1; Ìtaia 9, 6; Marati 3, 18.
- Te Atua Teitei : EL ELYON Teie tei Iòa ta te Atua i faaìte Ia Na i te mau ètene, Tenete 14, 18, 22; Teuteronomi 33, 8; II Tamuera 22, 14; Taramo 9, 2;21, 7; 47, 2; 82, 6; 83, 18; 91, 9;Ìtaia 14, 14: Taniera 3, 26.
- E Mana Hope to te Atua : EL SHADDAI, Tenete 17, 1; 28, 3; Etoto 6, 3; Iopa 6 ; Taramo 68, 14.
- Te Atua I roto I te mau tau ätoà : EL OLAN. Te faaìte päpü e, e Atua ora i te mea tei roto O ia i te tau
- Te Fatu : ADONAI. Etoto 4, 10 ; Teuteronomi 10, 17 ; Iotua 7, 8.
Àreà tei Iòa IEHOVA, tei òhipahia i roto i na Iòa 14, ua faahitihia e 6 000 e tau tiàhapa taime.
- Iehova Elohim Te mana hope ( Tenete 2,4)
- Iehova El Elyon Te Atua Teitei ( Tenete 14, 22)
- Iehova Adonai te Atua tei faatere ( Tenete 15,2)
- Iehova El Olan Te Atua ìte – òre –hia ( Tenete 21, 33 )
- Iehova Tire Te Atua tei hoo mai ( Tenete 22, 14)
- Iehova Rophi Te Atua tei faaora ( Etoto 15, 26)
- Iehova Nissi te Atua tei àro no tätou ( Etoto 17, 15)
- Iehova Mekaddishkem Te Atua tei maìti, tei faataa ( Etoto 31, 1)
- Iehova Shalom Te Atua tei horoà i te hau ( Tavana 6, 24)
- Iehova Tapaota Te Atua tei faatere i te nuu o te raì ( I Tamuera 1, 3; Taramo 24, 10 )
- Iehova Elyon te Atua tei haamaitaì (Taramo 7, 17)
- Iehova Roi Te Atua tei àtuàtu (Taramo 23, 1)
- Iehova Tsidkenu Te Atua pärau tià (Ieremia 23, 6)
- Iehova Shamma Te Atua i teie mähana ( Etetiera 48, 35)
E mau iòa teie tei horoà i te Atua i to na oraraa i roto i te mau tau ätoà i tera nunaa e i tera nunaa. I roto i te faufaa âpï tei iòa o te Atua tei roto ia i te Metia, Te Tamaiti here, Ietu, Faaora, Emanuera. Te faaìte nei te mau papaì Moà te Atua tei aroha, tei here, I Ioane 4, 8 Te märamarama I Ioane 1, 5; e tei roto te Atua ia Ietu.
Te tahi mau uiuiraa mänaò.
- E aha te mänaò i nià i te rahu a te Atua ? A tatara mai na ?
- Te vai nei o Taaroa, e Atua atoà oia E aha te manaò ?
Te tahi manaò i nià i te uiraa.
- E aha te mänaò i nià i te rahu a te Atua ? A tatara mai na ?
Ua rahu te Atua i teie nei ao, mai roto mai i te aore, i roto i te mea ìtehia, e täpeàhia. Mai roto i ta na faanahoraa e to na hanahana. Te rahu to na auraa, e pärau mana, oia hoì e pärau noa ua tupu te òhipa. E reo tumu teie no tätou, na te tuhuà i nià i te marae e pärau i te rahu, no te faahanahana i te Atua.
Te Atua tei rahu, Nehemia 9, 6 ; Hepera 11, 3 ; Tenete 1, 1 ; Ioane 1, 1 – 18.
Aita te ao nei i tupu noa mai, mai roto mai i te aore, te vai nei rä to na òmuaraa. Ta te mau papaì Moà ia faaìteraa ia tätou. Te òmuaraa TE PÄRAU, na teie taò i faaìte te MANARAA te reo o te Atua, e na te VÄRUA MAITAÌ i faatupu. E aita e taihaa hämani i täpirihia i pihai iho i teie PÄRAU MANA, oia hoì e pärau ànoì òre ; ua pärau te Atua, e ua tupu. No te aha te Atua i rahu ai i teie nei ao ? E aha te faufaa ? no to na hanahana, I tuu ai o ia I te ora, I te vahi ora òre, I faataa ai te pouri, I te märamarama, I haapue ai te repo I te vahi maro, te pape I te vahi rari. I tuu ai I te hotu o te fenua, e to te moana. E mau täpaò teie èi faaìteraa i te mana hope òre o te Atua.
Teie te tahi mau huru no te Atua.
- Èita te Atua e noaa i te àpe, Taramo 139, 7 – 10; Ieremia 23, 24; Òhipa 17, 24 – 28.
- Te Atua pohe òre, Iopa 42, 2; Taramo 38, 6 – 7; Ieremia 32, 17; Nahuma 1, 3; Mataio 19, 26.
- Èita te Atua e tano ia haavarehia, Taramo 139, 1 – 6; Taramo 147, 4 – 5; òhipa 15, 18; I Ioane 3, 20.
- Èita te Atua e topa I muri, Tenete 21, 33; II Parareipomeno 6, 18; I Timoteo 1, 17
- Èita te Atua e taui, Taramo 102, 26 – 28; Iatopo 1, 17
- Te Atua tei faatere, Materi 15, 3; Mataio 10, 30.
- Te Atua tei aroha, Etoto 34, 6;
- E Atua moà, Revetito 19, 2 ; Ìtaia 6, 3.
- E Atua Värua, Ioane 4, 24.
- E Atua märamarama, I Ioane 1, 5.
- E Atua tei here, Ioane 3, 16; Ioane 4, 8.
- Te vai nei o Taaroa, e Atua atoà oia E aha te manaò ?
O Taaroa, o ta te tahi mau motu e pärau nei o Tangaroa, o te tupuna ia no te mau atua. Na na te mau mea atoà i rahu, o ia iho to na metua, aore to na metua vahine, aore to na metua tane. I pii na o ia I roto I te aore, aita roa te hoê reo I ìte- a – hia, mau ti rä ia I to na iho reo tei pinaì mai. Ìte aè rä Taaroa, oia anaè teie e vai nei. Ia au I teie mau mänaò e òhipa atoà ta Taaroa i rave no te ao nei, no te mea tei roto oia i te faanahoraa Atua tei rahu.
No reira te vai rä te tiàturi atua, hou te mau mitionare a tae mai ai I ô tätou nei, tei taìtaì mai I te hoê faanahoraa no te tahi Atua. I roto I te pipiria te vai nei te tahi mau vahi e faaìtehia no te mau atua. O ta te papaì Taramo Ia e faaìte, Taramo 82, I te ìrava 1, te naò r ä e, Te tià noa rä te Atua I te àmuiraa o te fëia mana rä, te haava ra o ia I rotopu I te mau atua rä. Ia au I teie faaìteraa a te Taramo, te vai atoà nei te tahi atu mau atua, tei ìtehia e te hoê Atua. To na auraa rä, te vai ra te Atua o te reira nunaa e te reira nunaa.
Ia pärau tätou no Taaroa, o te iòa ia o te Atua, I horoàhia I mua rä, e te fëia tiàturi hou te mau mitionare a tae mai ai. Te mea rä I ravehia te faaòreraahia te mau ìtoro I roto I te mau haamoriraa. No Taaroa, aita roa te hoê tii hamanihia, oia hoì, aita to na e hohoà päpü. Ta te pipiria rä, e pärau nei no te mau atua ìtoro ia, eiaha ia haamorihia, o ta te Teuteronomi ia e faaìte nei, I te pene 5 I te ìrava 7 e te 8, te naò rä, Eiaha roa to òe e Atua ê atu ia ù nei, Eiaha roa òe e hamani I te ìtoro tärai no òe.
Teie haafatataraa Taaroa, e o Iehova, no te ìmi ia I hea roa e farerei ai, te pärau no rahu. Ia au te faatiàraa a te pipiria, e ta te iho, e te hiroà tumu mäòhi e faaìte rä. No te mea e reo to tätou, e e fenua to tätou. O to tätou ia fâriiraa e nunaa tätou, èi nünaa rä tei huti I te aho ora no roto mai I te repo fenua tei hii ia na, e tei ìte ia na ei tämarii aïà.
Na teie mau faanahoraa e faaìte ia tätou e, te pärau o te Atua i roto ia na iho te vai ra te tahi ìritiraa, I te ùputa no te tuatapaparaa. Te pärau o te Atua tei te taata ra, I te vairaa. Ia ìte te taata e, I roto I te Atua e tupu ai te mau mea atoà. Te vai ra te tahi àpärauraa I tupu I roto ia Ietu e te mau àti Iuta, Ia au I te faahitiraa a Ioane I te pene 10 I te ìrava 33 e tae I te 36, Ua pärau mai ra te àti Iuta ia na, na ò mai rä, èere I to te òhipa maitaì e täora atu ai mätou ia òe I te òfaì, no te tuhi ra òe o te taata na I faa – Atua ia òe iho. Ua pârau atu rä o Ietu ia rätou, èere anei ua papaìhia I roto I ta òutou ture na e, ua pärau na vau e atua òutou. I pärau te ture I te fëia I pärauhia atu I te pärau a te Atua ra e, e atua rätou, e aore I hapa te pärau I papaìhia rä. I pari mai hoì òutou I te tuhi I ta te Metua I faataa e I tono mai I te ao nei, o vau I pärau ia ù iho e, e Tamaiti na te Atua.
Te horoà noa mai nei teie mau reo o Ietu, I te hoê tiaìtururaa I nià I te pärau o te Atua, I haamorihia na e te mau tupuna. E tià ia tätou ia àpärau, no te mea aita o Ietu I òpani, ia tätou I te hiò I te Atua I haamorihia na hou te mau mitionare a tae mai ai.
No teie mâhana pae I muri nei, e hiò mai ia tätou I te pärau, no te RIRI O TE ATUA. Taiòraa Etetiera 20, 32 –34.
Teraì òr