Ruta èv. 10,1-20

Tāpati 3 no Tiurai 2016.

ÔROÀ

Mau taiòraa

Taramo 66

1 Na te Mënätehe. E Himene, e Taramo. E pii hua i te òaòa i te Atua, e te mau fenua e. 2 E himene ei haamaitaì i to na iòa, e faariro i to na hanahana ei haamaitaìraa ia na. 3 E parau atu i te Atua e mau räveà mataùtaù ta òe no to òe ra mana rahi i auraro mai ai to mau ènemi ia òe ra. 4 E haamori te mau fenua atoà nei ia òe, e himene ia òe, e himene i to òe ra iòa. Tera. 5 E haere mai e hiò i te mau òhipa a te Atua E mea mataùtaù ta na i rave i te taata nei. 6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na. 7 Te mana nei o ia i to na püai e a muri noa atu. Te tiàtonu ra to na mata i te mau êtene; eiaha tei haùti ra e faateitei ia rätou iho Tera. 8 E haamaitaì i to tätou Atua, e te mau taata nei e Ia ìteä hoì te reo i te haamaitaìraa ia na. 9 O o ia tei tiaì ia tätou e ora ai, e o tei faaitoito i to tätou âvae ia òre ia pähee. 10 Ua tämata-mau-hia mätou e òe, e te Atua e Ua tämä òe ia mätou mai te ârio i tämähia ra, 11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu.

12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua ärataì rä òe ia mätou i te fenua taoà. 13 E tomo vau i to fare mä te tutia-täauahi, e faatupu vau i taù mau èuhe ia òe ra,

14 tei parauhia e taù vaha, e na taù vaha i faaìte i taù àtiraa ra. 15 Te tutia-täauahi poria ra ta ù e hopoi atu ia òe ra te mämoe oni, e te mea noànoà atoà te puaatoro e te puaaniho ta ù e faatütia. Tera. 16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua. 17 Ua pii atu ra taù vaha ia na, e ua faateitei taù arero ia na. 18 Ahiri rä te faatià ra taù âau i te ìno, e òre au e faaroohia mai e te Fatu. 19 Ua faaroo mau rä te Atua ia ù, e ua haapaò mai i ta ù i ani atu. 20 Ia haamaitaìhia hoì te Atua O ia aore i haapae i ta ù nei pure, e aore hoì i faahoì i to na aroharaa ia ù nei.

Ìtaia 66,10-14

10 E òaòa òutou, e Ierutarëma atoà, e ôuàuà noa i te òaòa ia na òutou, e te feiä atoà e aroha ia na, ia rahi to òutou òaòa ia na, òutou atoà o tei òto ia na. 11 ia ôte òutou e ia fiu, i te ü ra i te haamähanahana nä na ra, ia noaa mai ia òutou i te ü, e ia òaòa i te rahi o to na ra hanahana. 12 Te nä ô mai ra hoì te Fatu ìnaha, te höhora nei au i te maitaì i nià ia na mai te pape ra; e te taoà o te mau fenua mai te pape puè ra e ôte òutou i te ü, e tütähia i te èê; e ei nià i te hümaha òutou e ueuehia ai. 13 Mai tei haamauruüruhia e to na ra metua vahine; o to ù ia haamauruüruhia ia òutou ei Ierutarëma hoì òutou e haamauruüruhia ai. 14 E ìte òutou i teie nei mau parau, e òaòa hoì to òutou âau; e ruperupe hoì to òutou mau ivi mai te räau rii âpï ra e ìteä te rima o te Fatu i to na ra mau tävini, e to na riri i to na ra mau ènemi.

Ruta èv.10, 1-20

Te tono-raa-hia te tino hitu àhuru mä piti

1 E muri aè ra, ua haapaò atu ra te Fatu i e hitu àhuru mä piti, e tätoopiti atu ra i te tonoraa ia rätou nä mua ia na, i te mau ôire e te mau vähi atoà ta na i ôpua ra e e haere atoà o ia i reira. 2 Ua parau atu ra o ia ia rätou

Te rahi mau nei te àuhune tïtona, te ïti nei rä te feiä e ôoti. E teie nei, e pure òutou i te Fatu o te òhipa, ia tono ä o ia i te rave-òhipa ei ôoti. 3 A haere, ìnaha te tono nei au ia òutou mai te ârënio i rotopü i te mau ruto ra. 4 Eiaha ei färii moni e hopoihia, eiaha ei pütë, eiaha ei tämaa hopoi noa, eiaha roa e aroha atu i te taata i te äratià. 5 E te fare ta òutou e tomo ra, e mata na i te parau atu Ei hau to teie nei ùtuafare. 6 E tei reira te hoê tämaïti no te hau, e vai ä taua hau ra i nià iho ia na aore rä, e hoì mai ia i nià iho ia òutou. 7 Ei taua fare ra pärahi ai, e àmu hoì e e ïnu i ta rätou e horoà mai ra, e au hoì i te rave òhipa ta na ra utuà. Eiaha e haere i tërä fare, i tërä fare. 8 E te ôire ta òutou e tomo ra, e i ìte mai rätou ia òutou, e àmu i ta rätou e tuu mai i mua i to òutou aro ra 9 e faaora hoì i to reira maì, e parau atu hoì ia rätou Te fätata mai ra te Pätireia o te Atua ia òutou nei. 10 Âreà te ôire ta òutou e tomo ra, e aore rätou i ìte mai ia òutou, e haere òutou i te aroä i taua ôire ra, a parau atu ai 11 Te repo o to òutou ôire e piri mai ia mätou nei, te horoi atu na mätou. Te fätata mai nei rä te Pätireia o te Atua ia òutou, ia ìte hoì òutou. 12 Teie rä ta ù parau ia òutou: e huru tià aè Totoma ia haamahu ia tae i te reira mahana ra, i te reira ôire.

Te àti o te mau ôire tiàturi òre ia Ietu

(Mät 11,20-24)

13 Âuë òe, e Toratina e Auë hoì òe, e Petetaita Ahiri hoì te mau temeio i rävehia i roto ia òrua na, i rävehia i Turia e Titona, ua tätarahapa ê na rätou, ua pärahi i te rehu auahi mä te àhu paau. 14 E huru tià aè ra Turia e Titona ia haamahu ia òrua na, ia tae i te mahana haaväraa ra. 15 E o òe na hoì, e Taperenaumi i faateiteihia i nià i te raì na, e höparahia òe i raro roa i häte. 16 O tei faaroo mai ia òutou na, ua faaroo mai ia ia ù; e o tei vahavaha mai ia òutou na, ua vahavaha mai ia ia ù e o tei vahavaha mai ia ù ra, ua vahavaha ia ia na i tei tono mai ia ù nei.

Te hoìraa mai te tino hitu àhuru mä piti

17 Ua hoì faahou mai ra taua hitu àhuru mä piti ra mä te òaòa, nä ô mai ra E te Fatu, ua vï atoà te mau tëmoni ia mätou i to iòa na 18 Ua parau atu ra o ia ia rätou Ua ìte au ia Tätani i te maìriraa, mai te uira no nià i te raì ra. 19 E ìnaha, e haamana atu vau ia òutou, ia taahi noa atu i te ôfï, e te pata, e te mana atoà o te ènemi e aore roa e mea e pohe ai òutou. 20 Eiaha rä e òaòa i te mea ua vï te mau värua ìno ia òutou e òaòa rä i to òutou iòa i päpaìhia i nià i te raì ra.

Èv. Ruta 10, 1 – 20

Te parau o teie täpati, to Ietu tonoraa na pipi e 70, i te mau vahi atoà no te o ôire no Ierutarëma e tae noa atu i te mau fenua atoà. I teie nei mahana te tävevo noa teie reo to Ietu i te ìrava 3 i te naòraa e,

A HAERE, ÌNAHA TE TONO NEI AU IA ÒUTOU MAI TE ÀRENIO I ROTOPU I TE MAU RUTO RA.

Ua tupu teie reo to Ietu ia au te mau òhipa i ìtehia i roto i te mau aroä no te mau vahi i haerehia, e tià ia faahitihia na tuhaa e toru, 1 Te tono-raa-hia te tino hitu àhuru mä piti, 2 Te àti o te mau ôire tiàturi òre ia Ietu 3 Te hoìraa mai te tino hitu àhuru mä piti.

E, e piti tau ànimara e faahiti-atià-hia ra i roto i tätou taiòraa.

1- Te ârenio, ànimara maru, haehaa, mauhaa òre no te paruru ia na i te mau taime fifi, òia hoì, aita ta na e raveà i mua i to na mau ènemi. 2 ‑ Te ruto, ànimara taehae, àravihi, taiä òre i te mau taime àroraa, no te mea te vai ra ta na mauhaa.

Te ìte ra ia tätou i to raua taa – ê - raa e to raua tuàti – òre - raa. Te paruparu o te hoê e te puai e te àravihi o te tahi.­

O te huru atoà ia o Ietu te Tämaïti here a te Atua i te haereraa mai i roto i teie nei ao. Ua rave mai oia i te huru no te tävini haehaa. Oia mau, ua rave mau o Ietu i te huru o te ârenio e tae noa atu ra i te hopeà òia hoì i te taime a täparahi pohe-roa-hia ai. Te faaìte ra Ìtaia: Ua rave-ìno-hia ò ia, ua faahaèhaahia mai ra, aita ra to na vaha i parau i ärataìhia ò ia mai te fänauà mämoe i te täparahiraa ra, e mai te mämoe e mämü i te aro o te feiä e paòti i to na ra huruhuru aita to na vaha i parau. Ìtaia 53, 7.

E nahea e noaa ai te itoito i te mämoe, te parau nei Ietu, ia paari òutou mai te òfi e te hapa òre mai te ùuàiraò. Mat. 10, 16. Teie hoì te auraa, eiaha òutou ia teòteò i te mea ua vï ia òutou te mau tëmoni, e òaòa rä i to òutou iòa i päpaìhia i nià i te raì ra. Eiaha atoà òutou ia teòteò i te mea e na te Fatu òutou i tono mai, E ära ra, o te reo ia o Ietu i nià i ta na mau pipi. E ära ia òutou i te mau taata i te tuu ia òutou i te haavare. E papaì hoì rätou ia òutou i roto i te tunato, eiaha ra òutou e taiä ia rätou, ia haamanaò maite ra òutou e tei pïhaì iho vau ia òutou i to òutou tere. Te hinaaro nei o Ietu e na roto i teie tere ia ìtehia to rätou haehaa e to rätou faaòromaì, ia haere rätou ma te mauhaa òre e te veve rahi, Eiaha rätou ia rave i te mau mea e fifi ai rätou, ia haamanaò maite ra rätou e, te mau mea atoà no ô mai ia, ia na ra. E noaa hoì ia rätou te mau mea atoà i roto i te mau ùtuafare e färii mai ia rätou. Ua haamäramarama Ietu ia rätou ma te faaìte ia rätou e aita ò ia e tono ia rätou i te mau vahi ìteä-òre-hia e rätou. Eiaha rätou ia haama i te tomo i roto i te mau fare tei färii ia rätou no te mea e tià ia Ietu ia haamaitaì mai i taua mau fare. E mea tià roa ia faaìtehia na mua roa teie mau parau i te ùtuafare no Ìteraèra, ia au te parau a Pauro i roto i te puta Òhipa i te pene 2, 22. Teie rä, maite peu aita o Ìteraèra i färii i taua mau parau òaòa eiaha roa ia rätou e märo atu, e ère ia o te ora te noaa mai ia rätou, o te pohe ia, tei hau roa atu ia i te riàrià, o täpeàhia ia te Patireia o te Atua ia rätou, e horoàhia i te nünaa tei färii.

No reira te parau no te tonoraa e aore ia te parau no te haereraa na roto i teie nei ao, mai te ârenio te huru, e ère roa tu ia i te mea òhie. Te tumu, ua riro teie nei ao èi haapüraa no te mau ruto. Tei roto i teie nei ao te mau raveà rau atoà e fifi ai te òhipa faaìteraa i te parau âpï òaòa no te taeraa mai no te patireia o te Atua. Noa atu rä taua mau peu ra, ua ìte päpü o Ietu i te mau fifi e färereihia e ta na mau pipi i horoà ai òia i te hohoà no teie na ànimara e piti nei. No reira òia i parau ai, èita vau e vaiiho ôtare noa ia òutou, e hoì mai ä vau ia òutou nei. Ioane 14, 18. Na te faaaò ra, na te Värua Maitaì o ta te Metua e tono mai ma to ù nei iòa ra nana e haapii mai ia òutou i te mau parau atoà ta ù i parau atu ia òutou ra. Ioane 14, 26.

Te tonohia nei te ârenio te hoê ànimara paruparu i mua i te ànimara puai. Riro atu ai teie parau èi parau faufaa rahi i te mea e, na roto i te paruparu e faufaahia ai te òpuaraa faaora a te Atua, mai te parau no te upootiàraa no te maitaì i nià i te ìno, e te upootiàraa no te ora i nià i te pohe. Na roto i te paruparu e ìtehia ai te puai, riro noa ai èi mämoe i te hiòraa räpae, ua paari ra mai te òfi ra te huru e te hapa òre mai te ùuàiraò.

No reira te hinaaro nei tätou i te Atua, ia òre hoì tätou ia mätaù i te ìno, te parau-tià-òre, te haavare, te manaò ìno, aore ia e vai iho noa tätou ia tupu ruperupe noa na taua mau ìno atoà ra, ia òre hoì tätou ia horoà i to tätou püai no te haapaò i te reira mau mea atoà e nahea ia te Atua e riro faahou ai, ei Atua no tätou, e nahea ia tätou e riro mau ai ei tamarii atoà nä na. E nahea ta na parau e riro ai ei parau maitaì no te ärataì ia tätou i nià i te èà e tupu ai te hau, te maitaì e te ora. Te färerei nei tätou i teie mahana haamoriraa i te parau faufaa no te mau haapii parau maitaì.

Te mau haapii parau maitaì, e tuhaa òhipa rahi atoà ta rätou e fautua nei i roto i te paroita, e te tuhaa e te Ètärëtia. I te färereiraa i te mau ùtuafare, e te färiiraa i to rätou mau manaò, e i te ìmiraa i te mau raveà atoà ia ìtehia te parau no te hau. Mea tià roa ia haapuaihia teie täpura òhipa, èi tururaa i te mau taeaè, mau tuahine e vai noa nei i roto i te moèmoè, tei täiva, e tei faaea i roto i te mau ùtuafare no te tahi mau tumu tei haafifi ia rätou i te oraraa i to rätou faaroo ma te tiàma. Ia ìmihia te mau raveà atoà no te haafaufaaraa i teie täpura òhipa ia tupu te färereiraa i te huru no te mau ùtuafare, ma te mäìti òre. Teie ra, ma te haapaò atoà ra i te huru o te oraraa o te paroita, i te mea aita e tuea nei te mau faanahoraa e vai nei i roto i tera e tera paroita. Mau taa-ê-raa teie o te tià ia tuatapapahia no te ìteraa i te maitaì e vai nei ia au i te oraraa o te paroita, o te täuturu te tahi e te tahi. Oia hoì, o te täpeà mai mau ti ra ia te maitaì e vai ra tei horoà i te ora e te hau i roto i te òhiparaa.

I mua i te Atua, e tià i teie mau haapii parau maitaì i roto i te mau paroita, e horoà i te tahi hohoà òaòa no te Ètärëtia. I te mea o teie te tahi mau tävini tei faataa ia rätou no te turu i te mau òhipa a te paroita. O rätou o tei faaroo i te tïtauraa a te Atua, ia tomo i roto, èi haamaitaìraa i te tiàturiraa o te taata ta täìtahi. O teie te tahi mau tuhaa, ia rave päpühia èi faaìteraa te ora mau ra te Ètärëtia, tei poro haere i te mau hinaaro o te Atua, no te faahauraa i te mau tamarii i roto i te Metia. Èi tururaa i teie reo to Ietu i päpaìhia e Ioane i te pene 10 i te ìrava 10 i te vahi hopeà, i haere mai nei au ia noaa to rätou ora, e ia rahi atu ä te ora. Oia hoì, teie mau haapii parau maitaì e tano atoà ia parauhia e, e òhipa faufaa teie ta rätou e rave nei. I te mea te faaineinehia nei rätou èi faaìteraa i mua i te Atua te hoturaa o te faaroo. O tei horoà i te tiàraa päpü o te Ètärëtia i roto i te oraraa vaamataeinaa, ma te mata ara i te maitaìraa o te nünaa o te Atua.

Te faatupuraa i te aroha e te autaeaèraa ia riro ei hiòraa nehenehe na roto i le hoêraa. Te haapiiraa ia na iho, ia märamarama o ia e ia mä ta na haapaòraa. Te tiaì-noa-raa, ma te ära e te ineine, i te hoìraa mai o te Fatu. Mai ta Pauro e parau ra i to Torota i te pene 3 i te ìrava l 5 E èi te hau a te Atua ra te mana i roto i to òutou àau, i parauhia ai hoì òutou èi tino hoê, e ia mauruüru roa òutou i te Atua.

Hou ra te hoìraa mai no te Fatu ta tätou e tiaì nei, e tià roa i te Ètärëtia ia òhipa i to na toroà na roto i te haapii e te haamaramaramaraa ia na iho na roto i te mau toroà e rave rahi i roto ia na, mai ta Pauro e parau ra i to Efetia i te pene 4 ìrava 11 e te ìrava 12 e ua haapaò O ia te tahi pae èi âpotetoro, e te tahi e perofeta, e te tahi pae e haapii èvaneria, e te tahi pae èi tiaì e èi òrometua, èi faaäu i te feiä moà i te òhipa ra e òrometua, ia tupu i te maitaì te tino o te Metia ra. Oia hoì, e tiaì te Ètärëtia i te hoìraa o te Fatu na roto i te raveraa i te toroà, eiaha e hunahia mai te tävini tei huna i ta na täreni, ia faaìte ra te Ètärëtia i ta na täreni e tià ai.

Oia hoì, to te taata ìteraa i te faufaa e vai ra i roto ia na ia tià i te faanahohia ia au i te tïtauraa e vai ra i te vahi te reira to na täviniraa, o ta na e horoà ma te au maitaì. Ua tupu anaè mai teie te huru, e noaa i te taatoàraa te ìritiraa manaò i nià i te hoê tiàturi èi täutururaa i te tahi e te tahi. I reira te parau no te oraraa âmui, e vai ai i roto i te hau, i te mea te farerei nei, te àparau nei e te aroha nei. E teie mau manaò, tei te âau ta täìtahi i te òhiparaa, i roto ia na iho, i te mea te taata, te vai nei ihoä ta na tuhaa, no tera e tera täpura òhipa, ia âmuimui anaè to te reira e te reira mau fëruriraa manaò e horoà ia i te hoê oraraa faahiahia. I te mea te noaa nei i te haapaòhia te taa-ê- raa o te tahi, tei haafaufaahia na roto i te ìteraa i to na iho taata tupu. O teie te tuhaa ia noaa i te taata, e taua taoà ra tei roto ia, ia na iho, eita ra tei räpae aè i te tino o te taata, tei roto i te âau, e i to na värua.

Te òhipa a te Ètärëtia i mua i to te ao, o te rave ia i te mau òhipa e maitaì ai te taata tupu, te mau ùtuafare e tae noa atu i te fenua, na roto i te poro haereraa i te parau no te Èvaneria ei raveà hoê roa e ora ai to teie nei ao, e na roto i te räpaau i te mau maì e te tifai i te mau vahi parari. Oia hoì, ia riro mau te Ètärëtia, èi hiòraa na to te ao, na roto i to na oraraa âmui ia hiaai teie nei ao, eiaha ra no te faaìno i teie nei ao, ia riro ra èi ùmeraa mai i teie nei ao i te Metia ra, eiaha ra, no te tute i räpae i te Metia, no te mea to te Metia ia hinaaro, ia ìmihia te mau mämoe, tei moè, e tei haamoè ia faahoìhia i roto i te àua. Èvaneria a Ruta i te pene 19 i te ìrava 10 I haere mai nei hoì te Tamaiti a te taata nei e ìmi i tei moè e faaora. E tae noa atu i te mau vahi tei reira te fifi e te àmahamaha, ia riro O ia ei tifai i te mau vahi paparari, e, no te tamata i te faaàfaro i teie mau parari i te iòa no Ietu-Metia. la au i te faaueraa a te Metia, Mataio i te pene 20 i te ìrava 19 e tae i te ìrava 20 E tuu hoì ia na i te Ètene ia tähitohitohia O ia, e ia päpaìhia, e ia faatataurohia hoì e tiàfaahou mai ra O ia ia tae i te ruì toru ra. Ua haere mai ra te metua vahine o na tamarii a Tepetaio ra ia na, e ta na pue tamarii atoà, ua tähopu mai ra oia ia na e ua äni mai ra i to na hinaaro. Oia hoì, ia noaa i te tävini i te ärataì i teie nei ao i roto i te mau faanahoraa e ìtehia ai te hanahana o te Atua. Ia pärahi anaè te tävini o te Atua, i te pae àui, e te tahi i te pae àtau, o vai atu ra ia te òhipa i te mau hinaaro o te Fatu ra o te Metia, i te mau vahi e nohohia ra e to te ao. E vai noa ai teie ao, èi ao faanahohia i nià i te mau täpihooraa faufaa, ma te ìte-òre- hia te oraraa te tiàturiraa o te taata.

Ua horoà te Fatu i te ora ia tätou e ua tuu i to tatou àai i mua ia tätou, e tei tïtau ia tätou ia horoà, ia ôpere, e taua mau mea atoà ra, ia haamauhia ia i nià i te hinaaro o tei Tiàfaahou.

I mua i to teie ao, ua rau ia te huru, te manaò, te faanahoraa o te taata, e ta na tiaìraa mai i te tïtauraa a te Ètärëtia. Eiaha ra ia moèhia i teie mahana, ua püpühia te mau taata ia au i ta rätou ma hiaairaa no te oraraa. Teie parauhia te mau täatiraa, tei ù nei te tahi pae o te nünaa i te ìmiraa i te òaòa. Ia noaa ia rätou te haamäharaa rohirohi i te hopeà hepetoma, ia oti te mahana òhipa. Âreà ra te fare âmuiraa, no te mau òhipa noa ai no te oraraa faaroo, eiaha no te tahi atu mau faanahoraa. E ìnaha hoì e mau fare teie, tei faataahia no te haaputuputuraa i te taata, no te tururaa i roto i teie nei ao.

No reira eiaha e taiä, te feiä faaroo e ìmi nei i te faaìteraa i te mau hinaaro o te Atua na roto i te tiàturiraa, e vai ineine noa tätou i te mau taime atoà, e noa atu te huru o ta tätou mau hopoià. Aita to tätou mau manaò e haafifi nei i te rauraa o te mau faanahoraa, to tätou ra manaò rahi ia ineine maitaì tätou i te mahana, te ruì e te hora e tae mai ai te Atua. Na to na haehaa, e to na veve e faaitoito ia òre o ia e maìri i muri. Te tiàturiraa i te iòa o te Atua, e òre ia e haavare, e vai maite ia te reira. I te mea te ìtehia nei te aroha e te ora tei roto ia i te Atua, tei horoà ia tätou i te itoito i te äraraa ma te taiä òre A tupu atu ai te pätoìraa, te faaìnoraa, na roto i te mau òhipa e ìtehia ai te maitaì. Na te reira e horoà i te feiä faaroo te òaòa, tei pärahi tämau noa i roto i te mau poroìraa a te Atua. Ei faaìteraa i te upootiàraa te aroha o te Atua. Te upootiàraa o te feiä faaroo o to rätou ia vai ineineraa, noa atu ua vareà tätou i te taòto, ua ineine, oia hoì to na auraa teie manaò, e taòto ma te vai ineine noa. E aha ia e noaa ai te taiäraa, e ìnaha ua ineine, âreà ra tei òre i ineine ra e noaa ia te taiäraa.

Te mau Haapii Parau Maitaì, e püpü taata ia tei fäì to na faaroo, i te Fatu ra ia Ietu - Metia, èi ATUA no na, e èi Faaora, ia au te faaìteraa a te mau Papaì Moà, èi pähonoraa i te tïtauraa a te ATUA, ta na e faahanahana nei, te Metua, te Tamaiti e te Värua Maitaì.

Te manaònaòraa tei roto ia e toru tuhaa òhipa :

1 - Te Faaroo e te Faaìteraa.

2 - Te Parau tià e te Täviniraa.

3 - Te Haapiiraa e te Faaâpïraa.

a) Teie na tuhaa òhipa e toru, o te färiiraa ia i te òhipa no te pororaa i te Èvaneria ora a te Atua, o ta te Metia i faaìte èi tururaa i te faaroo o te taata e tiàturi nei i te ora mure òre.

e) E tuatapaparaa i te taa- ê-raa e vai i roto i te mau faaìteraa rau e vai nei i roto ia tätou, e te tahi atu mau taeaè faaroo e tiàturi nei i te Metia tei tiàfaahou. Ia noaa mai te tahi haafaufaaraa e vai ra i roto i tera e tera püpü taata faaroo.

f) Ia haamaitaìhia te parau a te mau Haapii Parau Maitaì, teie e rave-noa-hia nei e tätou, te tere färerei i te mau ùtuafare, te tere fare maì, te fä te haapäpüraa i te päpetitoraa, e te täatiraa. Mea tià i teie mahana ia hiò- atoà-hia te tahi atu mau tuhaa pororaa, te faaöraa ia i roto i te faahoturaa o te fenua.

h) Te faaitoitoraa ia, i te pororaa no te faufaa o te Èvaneria ia tämu mai te parau no te hau i roto i te Ètärëtia.

Teie te tahi mau hiaairaa, no te tururaa i te nünaa o te Atua e ora nei i to rätou faaroo. O te täpaò teie no ìteraa e te ora nei te Etärëtia, èi faaäraraa i to te ao i te mau tïtauraa a te Atua, tei vai noa i roto i te ära.

Èi faaotiraa te vai nei teie manaò to Pauro i to Taratia i te pene 6, i te mau ìrava14 e tae i te ìrava18 ìrava 14 Eiaha roa rä vau ia ârue, maori rä i te tätauro o to tätou Fatu ra o Ietu Metia, i riro ai teie nei ao ei mea faatatäurohia ia ù, e o vau hoì ei mea faatatäurohia i teie nei ao. 1 5 Ia Ietu Metia nei hoì, aore o te peritome, e aore atoà o te peritome òre e faufaa, ei taata âpï rä. 16 E te feiä atoà e haere nä teie nei èà, ei hau to rätou, e te aroha, i nià atoà i te Ìteraèra atoà o te Atua ra. 17 Teie nei, eiaha roa ei taata e haapeàpeà mai ia ù, te vai nei hoì te mau täpaò a te Fatu ra a Ietu i nià i taù tino nei.18 E aù mau taeaè, ei to òutou värua te aroha mau o to tätou Fatu ra o Ietu Metia ra. Âmene.

A HAERE, ÌNAHA TE TONO NEI AU IA ÒUTOU MAI TE ÀRENIO I ROTOPU I TE MAU RUTO RA.

Teraì òr.