Ioane 9, 1-41
Tapati 30 no Mati 2014
MAU TAIORAA.
1 Tämuera 16 : 1 - 13.
Taura i faaruèhia e Iehova.
Tämuera i faauehia èi maìti i te arii âpï.
Te òpu o Iete tei au ia Iehova.
Tavita tei tiaì ia Iehova. .
Te hiòraa tià a Iehova.
Täramo 23
Pure no te täuturu
O Iehova te tiaì
Te ärataì a Iehova
Te tiaìtururaa o te paieti
Efetia 5 : 8 - 14.
Te pouri e te märamarama
Ta te Värua e faatupu
E ara, tei taòto.
Ioane 9 : 1 - 41.
Te tämaïti fänau mätäpohia.
Ietu te märamarama o te ao.
Te pöuri o te tahi pae.
Te faaìteraa a te matapö
EI HIÒRAA ÂMUI.
E mau taiòraa teie e faaìte nei te tumu no te märamarama e vai i te Atua ra. Te riro nei teie tumu parau èi reni arataì no te mau manaò o te Atua, o ta na e horoà i to na mau tävini èi faaìteraa i to na parahi tämauraa i roto i ta na i maìti. E ua maìti Ò ia i ta na i ìte te hau e vai i roto i taua tino ra. Aita te Atua i hiò noa te maitaì o te mata e te nehenehe o te tino, maite maìtiraa puroturu ra te huru, hau roa atu ai te maìtiraa a te Atua mauti ra ia e hiò atoà te nehenehe o te âau o te reira taata. Ua maitaì anaè te âau, e maitaì ai te mau mea atoà i reira e noaa ai i te taata maìtihia te märamarama o te Värua no o mai i te Atua ra.
Te märamarama, o te òhipa mätamua ia ta te Atua i pii i roto i te mau maitaì atoà o ta na i rahu. Ua märamarama, märamarama iho ra. Na teie tiàraa i faataa i te pouri i to na vairaa. No te faufaa teie òhipa ta te Atua i rave i tià ai, ia tätou i te haere na nià i teie èà, tei türamahia e te ànaana no te märamarama o te Värua Moà. Teie ia ta Ietu e parau nei e, O VAU TE MÄRAMARAMA O TEIE NEI AO. E parau ia teie ta Ietu i faahiti i roto i te taiòraa no te Èvaneria i päpaìhia e Ioane i te pene 9 ìrava 5.E parau atoà ra tei faaìte i te taatoàraa no te huru o te tupuraa o teie nei pene parau tei haamata ma te ìrava 1 e tae i te ìrava 41. E tià ra ia haapotohia teie taiòraa e haamata i te ìrava 25 e tae i te ìrava 33. No te mea tei roto i teie tuhaa te puairaa te mätapo i te faaìteraa e ua ora to na mata i te hoê taata, ta na i òre i mätau.
EI MANAÒ TATARA.
Te reo o ta Ietu e parau nei e, O VAU TE MÄRAMARAMA O TEIE NEI AO. No roto mai ia i te hoê uiraa a te mau pipi i te ìrava 2, e Rapi, na vai te hara na na iho anei, e na na metua anei, i fänau mätapo mai ai ò ia?
Ia au i te uiraa e faatupu ta tätou taiòraa, i te hoê täpura òhipa faahiahia i ravehia i mua i te mau taata e rave rahi. I to Ietu faaìteraa e Ò ia te märamarama o teie nei ao. Na teie tumu parau e arataì ta tätou pene parau, ma te ìrava 1 e tae i te ìrava 41, no te Ioane pene 9. E tià ra ia tätou ia tuha teie pene parau 10 aè tuhaa.
1) ir.1 - 5 te mätapo i faaorahia e Ietu.
2) ir.6 - 7 te huare, te repo, te pape te raveà ia a Ietu.
3) ir.8 - 14 ta te taata hiòraa i te ora a Ietu.
4) ir.15-16 ta te Faritea hiòraa i te ora a Ietu.
5) ir.17-18 te faaìteraa a tei faaorahia, Ietu e perofeta.
6) ir.19-23 te manaò o na metua i te ora o teie tämaiti.
7) ir.24-28 èi ìte tei faaorahia no Ietu.
8) ir.29-34 te haapäpüraa o Ietu te tumu o te ora.
9) ir.35-38 te fäìraa parau tià a tei märamarama.
10) ir.39-41 Ietu e te hara a te mau Faritea.
Te faaìte nei teie mau tumu parau o Ietu teie e arataì nei i te taata i nià i te òhipa ta na i rave, i nià i te tämaiti fänau mätapohia mai. Te mau maroraa parau e tupu, e haamata te reira mai roto mai i te mau taata e rave rahi. I te maere i te ìteraa i teie tämaiti i te ori haere - noa - raa mai te mau taata atoà, te òre - raa e perehahu i te èà ia haere ò ia. To rätou manaòraa ra ua haavare mätapo na ò ia, aita ra teie mau taata e ìte nei e te ora o teie tämaiti no o mai ia i te Atua ra. Te pouri nei teie mau taata i te òhipa ta te Atua i rave na roto i teie tämaiti. E i te tahi aè pae te mau Faritea ia, e ta rätou hiòraa, i te ora o teie tämaiti.
Eita to rätou manaòraa e tià ia rave i teie òhipa, i te mea e taata hara ò ia. Te auraa ra, èita o Ietu i te tämaiti na te Atua, e te òhipa ta na e rave ra, èita ia no o mai i te Atua ra Te mohimohi nei te mata o te mau Faritea, i te ìteraa i te mana o te Atua te tupuraa na roto ia Ietu. Ua vai noa rätou i roto i to rätou ao pouri, türama – òre - hia e te hihi no te märamarama o te Èvaneria. Àreà ra i te tahi pae te na metua ia, na raua teie tämaiti fänau mätapohia mai, e vaiiho ra na metua i te tiàmaraa i te pähonoraa i te tämaiti. Eiaha ra i roto i te manaò èi faatearaa i ta raua tämaiti, i tera ra manaò e ò ia anaè tei ìte, i te òhipa ta Ietu i rave i nià ia na, i àraara ai to na mata.
Te mau manaò i faaroohia aè nei e tätou, e mau haapäpüraa ia i te òhipa maere i faatupuhia e Ietu. A faaroo na ra tätou i te mau fäìraa parau tià a teie tämaiti i mua i te mau taata e rave rahi, i mua i te mau Faritea, e i mua ia Ietu.
- Te parau nei ò ia, i oihia te repo e te hoê taata o Ietu te iòa. (Ìr. 11).
- Ma te parau atoà, àore au i ìte. (Ìr. 12).
- E te haapäpü nei e, i parai mai ò ia i te repo i ta ù mata, e horoi iho ra hoì au, e te ìte nei au.( ìr. 15).
- E horoà teie tämaiti i te tiàraa o Ietu, e Perofeta Ò ia. (Ìr 17).
- I teie manaò e, aore au i ìte e, e taata hara o ia, hoê roa a ù parau i
Ìte, mätapo to ù i muta iho, e teie nei te ìte nei au. (Ìr. 25).
- Ua fäì atu hoì au ia òutou, aore òutou i faaroo, e aha ra hoì òutou
i hinaaro faahou ai i te faaroo? Èi pipi anei òutou atoà na na? (ir.27).
- E mea huru ê hoì te na aore òutou i ìte i te vahi no reira mai O ia, e ìnaha, ua faaora hoì ò ia i ta ù mata nei.(ìr. 30).
- A hiri teie taata e ère i to o i te Atua ra, èita roa ta na raveà e tià. (Ìr. 33).
- E te Fatu, o vai ò ia ia faaroo atu vau ia na ? (Ìr. 36).
- E te Fatu, ua faaroo vau. (ir.37).
I mua i te Fäìraa parau tià a teie tämaiti, e àmaha te nunaa, e te mau Faritea, e tiàturi te tahi pae, èita te tahi pae e tiàturi. Òia hoì, e faaea noa te tahi i raro aè i te faanahoraa a te pouri tei tutauhia e te hara. Tei fäì ra e, E TE FATU, UA FAAROO VAU, ua naeàhia ia ò ia i te märamarama no te faaòreraa hara. O teie mau te hinaaro o Ietu ia tatou atoà, ia riro tätou mau tämarii no te märamarama, èi türamaraa i te hihi o te Èvaneria i te mau vahi atoà. E märamarama ora teie ta te Fatu e parau nei, tei horoà i te òaòa i roto i te feiä atoà tei färii i taua maitaì ra .Te maitaì o teie märamarama, noa atu te faahemaraa, te mau faaöoöoraa, te mau faahaparaa, e te mau tiàvaruraa, èita rätou e òtohe. I te mea te ora ra te märamarama o te Atua i roto ia na, e ò ia to na arataì. Ia pohe anaè ra teie märamarama i reira e o mai ai, te faariri, te ìmi peàpeà, te faatau e te vai atu ra. Ia i te ra tätou i teie märamarama e ìmi ò ia i te mau taime atoà, te hau, te aroha, te here e te faaòromaì. I tïtauhia ai tätou i te mau tämarii no te märamarama i te patireia o te Atua.
Te märamarama i te faaìteraa a Ioane, te ìmiraa i te mau raveà atoà ia ìte te taata e o vai rä Ietu. Oia hoì, o te Tämaiti ia a te Atua. E ère e no te mea, tei pihai iho ò ia i to na mau taeaè e òhie ai rätou te ìte i te reira parau. Te auraa, ìte noa ai te mata, aita rä te âau e räveà e ìte ai, aita e räveà e färii ai i te ora a te Atua i haere roa mai mä te huru o te taata.
Te Tämaiti a te Atua ta na e hinaaro nei i te faaìte, o te märamarama iho ia o teie nei ao, i te parauraa e, O VAU TE MÄRAMARAMA O TEIE NEI AO,
I roto i teie reo no Ietu, te vai nei to na tuàtiraa, te märamarama e te ora o te taata, no te mea ua faatupu te märamarama i te òhipa i roto i teie nei ao, i to tätou ìteraa i te nehenehe no te mau rahu a te Atua.
Terai or.