Ioane 4, 5-42
TE TUATAPAPARAA - IOANE 4 : 5 - 42
Tapati 23 no Mati 2014
Ioane 4, 5-42
* Irava 5 - 7 v.m.
E tae atu ra Ò ia i te hoê òire i Tämaria o Titara te iòa tei pihaiiho i te maa fenua o Iatopa i horoà atu no ta na tämaiti ra no Iotefa tei reira te àpoo päpe a Iatopa ra ; e roirohi aè ra o Ietu i te haereraa, parahi iho ra i te hiti i taua àpoo päpe ra, ua tae i te ono o te hora ra (12) ua haere mai ra te hoê vahine Tämaria e huti i te pape.
TE APOO PAPE
E rohirohi to Ietu i te haere –noa - raa i raro aè i te hoê mahana puai, mai te poìpoì o na e ta na mau pipi te haere –noa – raa, ua tae i te avatea, te taime puai o te mahana. Ua poìa rätou, ua poiha, èita e tano faahou ia haere i mua, e faaea rii rätou i reira, e aita ta rätou e patete hutiraa i te päpe, e àpoo hohonu hoì teie tei naeàhia e 32 metera.
Teie mai nei te hoê vahine no taua vahi ra no Tämaria, ta na färii päpe i nià i ta na upoo, e ta na patete e te taura i ta na rima. Ua mätau maitaì teie vähine i te haere i teie hora, te taime taata òre, e i taua mahana ra te vai ra te hoê taata i reira tei òre roa ò ia i mätau ia na. E taata âpï i roto i to na òire no Titara, tei äni atu ia na i te päpe. .
* Irava 7 v.h. - 10
Ua parau atu ra Ietu ia na, ho mai na e inu. (Ua reva atu ra hoì ta na mau pipi i roto i te òire e hoo i te maa) ua parau mai ra taua vähine Tämaria ra ,ia na, e aha oe te Àti Iuta na i äni mai ai ia ù i te vähine Tämaria nei i te päpe, èita hoì te Àti Iuta e au maitaì atu i to Tämaria.
TE ANIRAA A IETU
Ietu te taata tiàma, aita to na e ènemi ua ènemihia ra Ò ia. Teie Ò ia e vavahi nei te patu e faataa ê nei te Àti Iuta e to Tämaria. . To Tämaria e feiä ia tei faataa ê ia rätou tei naeàhia e vaù ui taata i maìri a tae atu ai o Ietu i reira. Ta rätou haamoriraa o te mau atua ìtoro ia. Èita hoì e tià ia àparau te taata Tämaria e te Àti Iuta.
No Ietu ra, aita Ò ia e faariro nei teie mau fifi èi fifi, o ta na ra e hinaaro nei ia marua teie patu e faataa ê nei. I tià ai i teie vahine i te parau atu ia Ietu.
* Irava 11 - 15
Ua parau mai ra taua vahine ra ia na, e te Fatu, aita ta oe e patete, e àpoo hohonu teie, eihea ta òe päpe ora e noa ai, E rahi anei òe ia Iatopa i to mätou metua ra, o tei horoà mai na mätou i teie nei àpoo päpe, e ua inu o ia iho, e ta na mau tämarii e te mau puaa. Ua parau atu ra Ietu ia na, na o atu ra o te inu i te na na päpe, e poiha faahou a ia. Àreà te inu i te päpe e horoàhia atu e au nei, e òre roa ia ò ia e poiha faahou, e riro ra taua päpe e horoàhia atu e au na, èi pape pihaa i roto ia na iho, e tià i te pihaaraa e tae noa atu i te ora mure òre. Ua parau mai ra taua vahine ra ia na e te Fatu, ho mai na i taua päpe ra na ù ia òre roa vau ia poiha faahou e ia òre hoì ia haere mai i o nei e huti.
TE ANIRAA A TE VAHINE TAMARIA
Te faaroo ra o Ietu i te manaò mätamua o teie vahine, òre roa aè ra to na poiha e to na poìa. I te mea o ta na e tiaì ra ua parauhia mai ia e teie nei vahine, e àpoo päpe teie na to mätou metua o Iatopa. Päpü maitaì atu ra ia Ietu èita ò ia i te taata ê i teie nei vahine, e teie àpoo päpe e tià atoà ia na ia inu i reira.
Te päpe i ta Ioane faaìteraa e tapaò ia no te ora, e, e horoà hoì te reira na te Atua.
Te pape ora o te hohoà mau ia te reira no te Atua, ia au te faaìteraa a, Ieremia 2 : 13 ; Itaia 12 : 3, 55 : 1 ; Etetiera 47 : 1; Tetaria 14 : 8...
Te pape tei tauihia èi uaina te òroà faaipoiporaa Tana... Ioane 2 : 7...
Te pape hopu no Peteteta... Ioane 5
Te pape tei faaora no Tiroama... Ioane 9 : 7...
Te pape ora no roto mai la Ietu... Ioane 7 : 38
Tei fänau i te päpe e te Värua te parauhia ia Nitotemo. ..Ioane 3 : 5...
Te päpe tei manii mai, mai te àoào o Ietu... Ioane 19 : 34……
Teie te päpe ora pihaa e vai nei i roto i te âau o Ietu, te òre roa e pau.
No te vähine Tämaria te ìte nei ò ia te hohonuraa no te parau a Ietu e, TE INU I TE NA NA PÄPE E POIHA FAAHOU A IA, AREA TE INU I TE PÄPE TA Ù E HOROA ATU E ÒRE ROA IA E POIHA FAAHOU.
o te piti ia o te manaò o teie vähine te äniraa ia Ietu e ho mai na i taua päpe ra, teie päpe èita i te mea täpatete, èita atoà e 32 metera te hohonu, èita atoà i te mea ta taura. Te patete no teie päpe ta Ietu o te âau ia o te taata, te taura huti te Faaroo ia ua oti atu ai, e te àpoo èita atoà i te mea hohonu roa, i roto i te mau taata faaroo atoà te vai ra taua päpe pihaa ra i te taime a päpetitohia òia.
* Irava 16 - 26
Ua parau atu ra Ietu ia na a haere, a tii to tane, e a hoì mai ai, ua parau mai ra taua vahine ra na o mai ra aita à ù tane. Ua parau atu ra Ietu ia na, e parau tià ta òe i parau mai nei e, aita à ù tane. A toopae aè nei hoì a òe tane e te na na ta òe e taòto na e ère ia i te tane na òe, e parau mau ta òe i parau mai nei. Ua parau mai ra taua vahine ra ia na, e te Fatu, e perofeta òe nei, te ìte nei au. I haamori na hoì to mätou hui metua i nià i teie nei mouà e te parau nei òutou tei Ierutarema te vahi e tià ai ia haamori te taata. Ua parau atu ra Ietu ia na, a faaroo mai na, e teie vahine, ua fatata te hora e òre e tae mai ai òutou i teie nei mouà, e òre hoì e haere i Ierutarema, haamori ai i te metua. Aore òutou i ìte i ta òutou e haamori nei, ua ìte mätou i ta mätou e haamori nei no te Àti Iuta mai te ora. Ua fatata rä e teie nei hoì taua hora, e haamori mau ra ma te Värua e te Parau mau o te huru ia o te feiä haamori ta te metua e tïtau nei. E Värua te Atua, te feiä e haamori ia na ra e haamori ia ma te Värua e te parau mau e tià ai. Ua parau mai ra taua vahine ra ia na, ua ìte au e, te haere mai na te Metia (o te faatahinuhia ra ia). E ia tae mai ò ia ra, na na ia e faaìte mai ia mätou i te mau parau atoà ra. Ua parau atu ra Ietu ia na o vau ia e parau atu ia òe na.
1) TUTOTA – PENOTA E atua teie no te mau fare o te mau potii
2) TUTA - NERETARA Na atua ê atoà teie tei òre i päpü te auraa, te parauhia ra e na atua teie
3) HAMATA - ATIMA tiaì i te vahi o te pohe.
5) TARATATA Teie to mau tane ra a te Vahine Tämaria.
E tià ia parauhia 158 matahiti te mäoro te vai –noa - raa to Tämaria mai teie te huru, i te au – òre - raa i te Àti Iuta. Te tumu no nià ia i te oraraa faaroo, ua tutuìhia te fare pureraa a to Tämaria i nià i te faaueraa a te mau tähuà no Ierutarema, ia au te mau tuatatapararaa. O Teretima te mouà i faatiàhia teie fare pure i te 332 hou o Ietu Metia. E i te matahiti 128 hou o Ietu Metia i tutuìhia ai. Na roto i teie mau ìrava 16 e faaèa i te 26, ua mäheu te parau no te haamoriraa ìtoro a te nunaa Tämaria, na roto i teie vahine. Ta rätou vahi haamoriraa i nià i te mouà, ua faa - òre –roa - hia, i te mea aita te reira i au i te mau tähuà no Ierutarema.
Te parau nei ra o Ietu, i teie vahine e haamori i te Atua ma te Parau mau e tià ai. Èita i te mea tià ia haamorihia te Atua na roto i te rave peu – noa - raa. E ua ìte teie vahine, e perofeta o Ietu, e Metia. Te poiha o teie vahine ua haamahahia, te veàveà o te mahana, ua haahaumaruhia e Ietu. Te päpe ta te Vahine Tämaria i hinaaro e poiha faahou a ia ò ia, te päpe ora i noaa ia na, èita ia e tano ia tuuhia i roto i te patete e naìnaì roa te färii, hoê noa färii to teie pape maoti ra ia to tätou âau .Te haapäpü nei o Ietu i te reira, o vau ia e Parau atu ia oe na.
* Irava 27 - 30
I reira te taëraa mai ta na mau pipi, e maere noa iho ra, ò ia i paraparau atu i taua vahine ra ; aita ra te hoê i parau atu e, e aha ta òe e ui na ? E aha òe i paraparau atu ai ia na ? Vai iho atu ra i taua vahine ra i ta na färii pape haere atu ra i roto i te òire, ua parau atu ra i te taata mai haere na e hiò i te taata i faaìte mai ia ù i ta ù mau peu atoà nei, e ère änei tera aè te Metia, Haere atu ra rätou ia na ra mai roto mai i te òire.
TE MAERE O TE MAU PIPI, TE FAAITERAA A TE VAHINE TÄMARIA
No te mau pipi te uiui nei ia rätou te òhipa a Ietu e rave nei. Te àparauraa i teie vahine èita i te mea tià ia au te faanahoraa a te peu Àti Iuta. Aita ra rätou i ui noa atu. No te vahine Tämaria ua vai iho ò ia i ta na patete i pihai iho i te àpoo päpe, te mea ta na i mataü i te rave i te mau mahana atoà, ua hoì ò ia i te òire ma te patete òre, tei roaa ra ia na te päpe ora ia noo mai i te Atua ra, te hoê päpe tei òre roa ò ia e mataü i te inu. E päpe tei faaora ia na, i tià ai ia na i te haere i te òire no te faaìte i ta na i ìte i roto ia Ietu, ma te parau e, E ÈRE ANEI TERA AÈ TE METIA ?
E òaòa i te rahi to te Vahine Tämaria to na ìteraa i to na hape, i roto i te mau parau ta Ietu i faaìte no na. E ua riro te reira èi parau òaòa. Pii haere atu ra ò ia i teie parau òaòa, MAI HAERE NAÈ E HIO I TE TAATA. Ua faaìte o Ietu i te mea tano no teie vahine, e ua färii ò ia, haere mai ra to Tämaria e hiò ia Ietu.
* Irava 31 - 38
Ua parau atu ra ta na mau pipi ia na, na o atu ra, E Rapi, a àmu. Ua parau mai ra o ia ia rätou e maa ta ù ia àmu aita òutou i ìte. Ua parau iho ra i te mau pipi rätou rätou iho. I hopoi mai nei te taata i te maa na na ? Ua parau mai ra Ietu ia rätou, teie ta ù maa, O TE HAAPAÒ I TO NA HINAARO O TO TEI TONO MAI IA Ù NEI E TE FAAOTI I TA NA ÒHIPA. E ère te parau nei òutou, e maha märama toe e àuhune ai ? Ìnaha, e parau atu vau ia òutou, e faateitei i to òutou mata, e hiò i te mau àua ra, ua teatea ia i teie nei, ua àuhune. E te taata e òoti ra, e utuà ta na, e ua haaputu i te maitaì no te ora mure òre ia òaòa àpitipiti o te ueue, e o te òoti. Ua tupu iho nei hoì te maa parau ra e, na te hoê e ueue e na te tahi ê, e òoti. E tono vau ia òutou èi òoti i tei òre i òhipahia e òutou na vëtahi ê i òhipa, e te faaö atu nei òutou i roto i ta rätou òhipa.
TE ÒOTIRAA
Aita te Vahine Tämaria i pihai iho ia rätou, ua haere e faaìte i ta na i òoti mai roto atu i te Fatu o te faaàpu. Te mau pipi ra te poìa ra ia, pii atu ra ia Ietu ia tämaa âmui rätou. Riro atu ra teie reo, èi reo no te faaìte i te mau pipi e maa tei àmuhia e Ietu. Eita ra mai te maa ta rätou i tii na i te òire, e maa ra tei faatupu i te hinaaro o te Atua. Òia hoì te òaòaraa i te täviniraa i tei tono mai e faaoti te òhipa. Te manaò tumu o Ietu i ù nei, mea ru teie òhipa, aita e taime no te tämaa, aita e taime no te faaea noa, te rahi nei te àuhune. Te poto nei te taime no te òotiraa. Teie parau te òotiraa tei roto i te faauraa âpï e te faauraa mätamua, e hohoà ia no te hora o te haavaraa, e hora no te haamaitaìraa. No te nunaa Tämaria te piri mai ra taua hora ra no te taata òoti. I te mea e faaàpu atoà teie na te Atua i ueue i te huero maitaì, ua tae ra i te hora òotiraa o ta te Vahine Tämaria ia i rave i o na iho. No te mau pipi ra te toe rahi noa nei te faaàpu a te Atua tei òre a i òotihia atu ra, o ta Ietu e hinaaro nei ia ìte atoà te mau pipi i te reira, o rätou atoà te haere e òoti e mea ru, eiaha e faataerehia, i tonohia mai ai o Ietu e te Metua, o ta na atoà ia e tono nei i ta na mau pipi e ia tätou i teie mahana.
Irava 39 - 42 :
E rave rahi mai ra i taua òire ra to Tämaria i faaroo ia na i te parau a te Vahine i parau atu ra e, ua faaìte mai òia ia ù i te mau peu atoà na ù nei. E tae mai ra to Tämaria ia na ra, ua täpeà mai ra rätou ia na e parahi i o rätou ra, ua parahi iho ra ò ia i reira ia piti ruì. E rave rahi hoì tei faaroo i ta na iho parau. Ua parau aè ra rätou i taua vahine ra, e ère atu ra i to te parau ta òe i parau mai ra i faaroo ai mätou, ìte hua aè nei mätou ia na iho : ua ìte atu ra mätou e. O te ora mau teie o to te ao o te Metia.
NA RUÌ E PITI O IETU I TÄMARIA E TA RÄTOU FÄÌRAA FAAROO.
Te mau tuatapaparaa ta tätou i hiò mai, aita aè i te hoê taataahiraa àvae o ta Ioane i haapou ia tätou i roto i teie àpoo päpe e 32 taahiraa. O ta Ietu i horoà ia tätou i te hoê òhipa maere rahi e te moè i mua i to tätou tiàturiraa. Te òhipa ra ta Ietu i rave te ìriti nei ò ia i mua i to Tämaria te hoê òhipa tei òre roa teie nunaa e ìte e, e tupu. Òia hoì to rätou ìteraa e o Ietu te Metia, tei ìte i roto i te hohonuraa o te âau o te taata, mai teie Vahine Tämaria. Eita ra i te faaìteraa a teie vahine i tiàturi ai to Tämaria, i to Ietu ra faaeraa i reira e piti ruì i tiàturi ai to Tämaria, teie Metia ta rätou e ìte nei, o te Fatu âpï ia noo roa mai i te Atua ra. Tei haapihaa i te päpe ora i roto i to rätou âau. E taua pihaa päpe ra ua tupu ia i roto i te âau o to Tämaria i te parauraa ia Ietu e, o te Ora mau teie o to te ao o te Metia. Te riro nei teie parau èi Fäìraa Faaroo àmui na te nunaa Tämaria. Hoê Fäìraa tei huri i te mau mea tähito i raro, teie Metia o ta rätou i faaìte hua i to rätou tiàturiraa, tei haapihaa i te ora âpï ia riro mau rätou èi ìte no te mau òhipa atoà a Ietu i rave e piti ruì i ropu ia rätou. Te vahi faahiahia i roto i teie nei Fäìraa Faaroo, aita to Tämaria i Fäì noa, no rätou, no to te ao atoà ra.
... Ia pihaa te Puna Ora i roto ia tatou ...
Terai òr