Overblog Suivre ce blog
Editer l'article Administration Créer mon blog
21 novembre 2013 4 21 /11 /novembre /2013 13:13

Täpati 12 no Tënuare 2014

ÂMUITAHI … NO TE FAAÌTE I TE ÈVANERIA

Te mau taiòraa

Itaia 61, 1-4 : Ua tono mai o ia ia ù ei faaìte i te parau òaòa.

Taramo 145, 1-7 : Te mau uì atoà të faarahi i ta òe òhipa.

1 Torinetia 15, 1-8 : Ua tuu atu hoì au ia òutou i mutaa iho ra, i tei noaa na ia ù ra.

Ruta Èv 4, 14-21 : Teie nei parau i päpaìhia ta òutou i faaroo iho nei, ua tupu ia i teie nei mahana.

 

Te Tatararaa

I roto i te mau pupu taata atoà tei tiàturi i te Atua, ua riro te faaìteraa i te parau maitaì, ei òhipa tumu na te mau veà a te Atua, e ei tauturu rahi i to rätou oraraa e to rätou faaroo. I to na tau, ua tohu te perofeta ra o Itaia i to te Atua tuuraa i to na värua i nià i te taata o ta na i faatähinu no të faatupu i to na hinaaro. E mäìti te Atua i te tahi tävini päpü no te rave i te òhipa tei faataahia na na. E tono o ia i teie taata i roto i to na nünaa no te poro i te tahi parau âpï e te òaòa tei taui i to rätou oraraa. E riro o ia ei veà tei faaineinehia no te âfaì i te parau tei faaòaòa i te feiä marü, tei faatià i te feiä òto, tei faatiàmä te feiä tïtï e tei tatara i te feiä tei täpeàhia. E tïtau te Atua i teie tävini ia faaìte i ta na ôpuaraa faaora no to na nünaa e te mau fafauraa o ta na e faatupu no rätou. E faaìte atu o ia ia rätou i te parau tei tähoo i te feiä tei hämani ìno ia rätou, tei tämähanahana i te feiä mihi e tei faareàreà i te feiä tei topa. E riro taua parau ra i te faatupu i te tahi mau tauiraa rahi i roto i to rätou oraraa e to rätou faaroo. E parau hoì tei faaâpï faahou i to rätou oraraa, tei patu faahou i to rätou faaroo e tei faaora ia rätou.

Te pehepehe atoà ra te päpaì Taramo i te Atua, no to na iòa moà, ta na òhipa mana, ta na räveà mataùtaù e ta na parau tià. Te himene ra o ia i to na Atua no te rahi o te òaòa e manii mai ra no roto mai i te hohonuraa o to na âau. Te faatae nei o ia i to na arii i ta na faateiteiraa mure òre no to na ra iòa hau ê e ta na haamaitaìraa tuutuu òre no to na aroha fäito òre. Te tïtau nei rä o ia i te mau uì atoà ia faahanahana i ta na òhipa taa ê e ia faaìte i ta na parau mana. Te tämau nei o ia i te haamanaò ia rätou i ta na mau räveà püai, to na hämani maitaì rahi e ta na parau tià tei haavä, tei faatià e tei faaora i to na mau taata atoà.

Âreà o Pauro, te haamanaò nei o ia i te Ètärëtia no Torinetia i te Èvaneria o ta na i faaìte na ia rätou i mutaa ra. Te peàpeà nei o ia i te päpü òre o to rätou faaroo, te tano òre o to rätou manaò e te paruparu o to rätou faaroo. Te haapeàpeà nei o ia i to rätou faarooraa i te mau parau hape tei porohia e te tahi mau taata e te ruri-ê-raahia to rätou tiàturiraa. Te tiàoro nei o ia ia rätou ia färii ä i te parau maitaì a te Fatu o ta na i faaìte na ia rätou. Te tïtau nei o ia i to na mau taeaè ia täpeà mäite i taua parau o ta na i tuu na ia rätou e tei noaa atoà hoì ia na. Te haapäpü faahou nei o ia ia rätou i te mau haapiiraa o ta na i horoà ia rätou tei haamauhia i nià i te ôpuaraa faaora a te Atua e tei faatupuhia e te Metia. Te parau maitaì tei päpaìhia e tei riro mai ei taata nä roto i te Metia, tei pohe e tei tiàfaahou mai no rätou päatoà. Te parau mau tei tupu e tei fäìhia e te rahiraa o te mau ìte mai te mau pipi a Ietu e tae roa mai ia na atoà.

I roto i te hiòraa a Ruta, te haapäpü nei Ietu i te mau taata no Natareta i te tupuraa o te mau parau o ta na i taiò i taua mahana ra. Te faaìte nei hoì o ia ia rätou i to na faatupuraa i te mau parau tei tohuhia e te perofeta ra o Itaia i to na ra tau. Te hinaaro nei o ia ia riro rätou ei mau ìte no te mau parau o ta na i haapii i reira. Te riro mau nei o ia ei tupuraa no te ôpuaraa faaora a te Atua, no te taata e no te parau i päpaìhia. Te faatupu nei te Atua, nä roto ia na, te taata tei faatähinuhia, ei mauhaa no te faaìte i to na hinaaro i to te ao. O ia iho ä te parau tei riro mai ei taata no te faaìte i te parau maitaì, tei rapaau i te mau pëpë, tei faaora i te mau maì, tei faatiàmä i te mau tïtï, tei tatara i tei täpeàhia e no te haamaitaì i te oraraa o te taata.

Te Pure haamaitaìraa

 

E te Atua mure òre, te hinaaro nei mätou i te haamaitaì ia òe i te mau mahana atoà no to òe maitaì rahi ia mätou nei. Te faateitei nei mätou i to òe iòa hanahana no te mau òhipa taa ê o ta òe e rave noa nei no mätou. Te âmui nei mätou i to mätou mau reo no te ârue i ta òe parau maitaì tei faaìtehia e ta òe mau veà. Te faahanahana nei e te himene neni mätou päatoà i ta òe mau räveà mana i roto i to mätou oraraa e ta mätou täviniraa. Ei ia òe anaè e te Atua maitaì roa ta mätou haamaitaìraa mure òre e ta mätou ârueraa tuutuu òre.

 

Te Pure faahaèhaaraa

 

E te Atua aroha noa, te hinaaro nei mätou i te faahaèhaa ia mätou i mua i to òe aro no te päpü òre to mätou huru, te tano òre o to mätou manaò e te paruparu o to mätou faaroo. Te tatarahapa nei mätou ia òe no to mätou riroraa e to mätou tävereraahia e te tahi mau parau hape tei ruri ê i to mätou tiàturiraa. Te faahapa nei mätou ia mätou iho no to mätou haafifiraa i ta òe mau veà i roto i ta rätou faaìteraa i ta òe parau maitaì. Te piò atoà nei mätou i mua i to òe hanahana no to mätou haafaufaa-òre-raa i te tahi mau taime i to mätou tiàraa e te faaòhipa-òre-raa i to òe hinaaro.

 

Te Pure aniraa

 

E te Atua teitei roa e, te hinaaro nei mätou i te ani ia òe ia haapii mai ä ia mätou i te àtuàtu i to mätou faaroo. Te pii nei mätou ia òe, ia âmuitahi ia mätou päatoà, noa atu te rauraa o ta mätou haamoriraa no te faaìte âmui i ta òe parau maitaì i to te ao nei. Te tiàoro nei mätou ia òe ia tono mai i te Värua maitaì no te tauturu ia mätou i roto i ta mätou faaìteraa. Te tiàturi atoà nei mätou ia òe no te faaitoito i ta mätou täviniraa e ta mätou tiaìraa no te tupuraa to òe hau. Âmene. 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens