Hpetoma Pure Mahana maa 11 no Tenuare 2014

Mahana mäa 11 no Tënuare 2014

ÂMUITAHI … NO TE RIRO
EI TINO NO TE METIA

Te mau taiòraa

Itaia 19,19-25 : Ua tono atu o ia i te tahi ora e te tahi faatià.

Taramo 139,1-12 : E haere tià vau nei i hea e moè ai i to värua.

1 Torinetia 12,12-26 : Ia mäuiui te hoê mero ra, …, e ia faateiteihia te hoê mero ra, …

Märeto 9,38-41 : Eere o ia i to ô mai ra, no tätou ia.

Te Tatararaa

I te mau tau atoà, ua riro te hoêraa o te mau nünaa o teie nei ao, ei ôpuaraa tumu e ei hinaaro tumu no te Atua. Ua hinaaro mau te Atua e, ia riro te mau hau atoà ei nünaa no na, tei tähoêhia i raro aè i to na mana no te haamori e no te tiàturi ia na.

I to na tau, ua tohu te perofeta ra o Itaia i to te fenua Àifiti e to Atura riroraa i te hoê mahana ei nünaa no te Atua. I taua mahana ra, e fäì ai taua nä nünaa i te Atua hoê ei Atua atoà no rätou mai ia Iteraera ra. E färii to Àifiti e to Atura e rave e to Iteraera atoà i te haamoriraa i te Atua mä te püpüraa ö. E ineine teie nä fenua e taui mä te färiu i te Atua e te âmui e to Iteraera no te faaìte i te fafauraa a te Atua. E e riro rätou, nä hau tootoru, ei mau taata e ei mau ìte no te Atua, no te faatupu i ta na ôpuaraa tumu.

Te haapäpü atoà ra te päpaì Taramo i to te Atua tuuraa i to na rima i nià iho i te mau taata atoà o ta na i mäìti. Te pehe-pehe nei o ia i te hinaaro rahi o te Atua i te feiä tei färii i te tuu ia rätou i raro aè i ta na arataìraa. Te fafau nei o ia i to na haamauraa i to na mau taata i roto i to na àpu rima püai, ia òre rätou ia moè i mua i to na aro. E âuahaaàti o ia ia rätou i te ànaàna o to na märamarama, ia òre rätou ia täpoìhia e te pöuri, te fifi e te ìno. E pärahi tämau o ia i pihaì ia rätou i te mau vähi atoà o ta rätou e haere e e haafänaò o ia ia rätou i ta na mau hämani maitaì.

Âreà o Pauro, te haamanaò nei o ia i te ètärëtia no Torinetia i to rätou riroraa ei tino hoê no te Metia. Te tïtau nei o ia i te mau nünaa rau e vai ra i roto i teie ètärëtia ia faatupu i te hoêraa. Te pii nei o ia i te mau àti-Iuta, te mau Herëni, te mau tïtï e te mau taata tiàmä ia färii i te faaâpïraa a te värua hoê. Ia täamu päpü ia rätou i nià i te Metia, te upoo o te ètärëtia e ia färii i te mau horoà tei faataahia no rätou tätaìtahi. Ia riro rätou ei mau mero tei haafaufaa i te tahi, rau noa atu to rätou mau taa-ê-raa, to rätou nünaa, to rätou ìte, to rätou huru e to rätou tiàraa. Te âmuitahi nei rätou päatoà te mau mero o te tino o te Metia, no te faaruru i te mäuiui, aore rä, i te òaòa.

I roto i te hiòraa a Märeto, te faaìte nei o Ioane ia Ietu i to rätou au òre i te tahi taata tei tataì i te temoni i to na ra iòa. Te haapeàpeà nei rätou i te ìteraa ia na i te raveraa i terä òhipa tei faataahia na rätou e rave. E no te mea hoì e, eere teie taata i te pipi mai ia rätou ra te huru. Te auraa, te ôpani nei rätou i teie taata ia faatupu i te maitaì, no te mea, eere o ia no roto i ta rätou pupu. Aita rä te Fatu i faatano i ta rätou hiòraa, to rätou manaò e ta rätou òhipa i rave no terä taata. No Ietu, te taata tei rave i terä òhipa maere, e taata ia tei tuu i to na tiàturiraa i roto ia na e te Atua. E taata teie tei tiàturi i te mana faaora a te Atua e na to na faaroo i türaì ia na ia riro ei pipi na Ietu, noa atu e aita o ia i âpee noa aè ia na i roto i to na mau tere. E mauruuru rahi to te Atua, ia faatupu anaè te tahi taata i to na hinaaro e e haafänaò o ia i te utuà.

Te Pure haamaitaìraa

Te haamaitaì nei mätou ia òe e to mätou Atua, tei färii ia âmuitahi mätou, ta òe mau tamarii, no te haamori ia òe ia au i to òe hinaaro. Te faateitei nei mätou ia òe no to òe faariroraa ia mätou ei nünaa atoà no òe e no te ora o ta òe i faaìte i to òe ra mau taata.

E te Atua o te mau nünaa atoà, te faahanahana nei mätou ia òe tei âpee tämau ia mätou i roto i to mätou nei oraraa, i te mau vähi e te  mau tau atoà. Mauruuru ia òe no to òe mauraa ia mätou i roto i to òe rima àtau e to òe âuahaaàtiraa ia mätou i to òe here e to òe aroha. Ei ia òe anaè ta mätou faateiteiraa e ta mätou faahanahanaraa, te tumu o te rahu e te mau taata atoà.

Te Pure faahaèhaaraa

Te faahaèhaa nei rä mätou i mua ia òe e te Atua teitei e no to mätou faaätearaa ia òe e te haamoèraa ia mätou i mua i to òe aro. Te tatarahapa nei mätou i mua ia òe no to mätou onoono i te ìmiraa i te maitaì i te vähi e fifi ai mätou. Te piò nei mätou i mua i to òe hanahana no to mätou ètaèta rahi i te haapaò-noa-raa ia mätou anaè e te haafaufaa-òre-raa i te tahi pae. Te tuu nei mätou ia mätou i raro aè i ta òe arataìraa no ta mätou räveà òre i te faatupu i to òe hinaaro.

E te Atua mana e, a haamau ia mätou, te mau mero rau i nià i te tino hoê o to mätou Fatu e a âmui ia mätou i roto i to òe òaòaraa.

Te Pure aniraa

Te ani nei mätou ia òe e te Atua püai e, ia niinii mai ta òe haamaitaìraa i nià ia mätou päatoà te mau mero o te tino o te Metia. A haapii ia mätou i te turu te tahi e te tahi i roto i to mätou oraraa noa atu to mätou rauraa. A tauturu ia mätou i te faatura i to mätou mau taa-ê-raa, rau noa atu ai to mätou tiàturiraa, to mätou huru e to mätou tiàraa. A arataì ia mätou no te faatupu i te hoêraa o te feiä atoà tei taù ia Ietu, ei Fatu no rätou.

E te Atua maitaì e, a horoà mai ia mätou i te utuà e au ia mätou no te òhipa o ta mätou e rave nei no te tupuraa to òe hau i nià i te fenua nei. Âmene.