Ev. Ruta 23, 35-43.
Tapati 24 no Novema 2013
Taiòraa : Ruta : 23 : 35 - 43
Ìrava tumu : 42 e te 43 : «E te Fatu, e haamanaò mai òe ia ù ia tae òe i to òe ra pätireia. »
« Ei parataito ia òe e o vau atoà i teie nei ä mahana, oia mau ta ù e parau atu ia òe na », te reo o Ietu i nià i teie taata.
To te päroita nei, noa atu e mahana haamanaòraa noa teie no te poheraa o Ietu, te Tamaiti a te Atua, e mahana rahi mäuiui atoà rä i te mea, e mahana teie e haamanaò mai ra ia tätou i te ôpuaraa faaora a te Atua nä roto i ta na Tamaiti. No te mea rä e ôpuaraa faaora, aita ia e taata i faataahia no te pohe, te täatoà o te taata e ta na atoà iho Tamaiti, ua faanahohia ia i roto i terä ôpuaraa faaora a te Atua. Te uiraa e tano ia tätou ia ui : « No te aha ia te Tamaiti i pohe ai mai te peu aita e taata i faataahia no te pohe. Na te ìrava 34 e pähono poto noa mai ia tätou i mua i teie uiraa, terä ia reo i to te Fatu e, «E taù Metua, e faaòre mai òe i ta rätou hara, aore hoì rätou i ìte i ta rätou e rave nei.»
Mea püai te manaò itoito o Ietu ia faaorahia ihoä te taata, noa atu ia te òhipa ta te taata e rave nei i nià ia na i teie taime, te vai päutuutu noa ra i roto ia na, te manaò no te òhipa ta to na Metua i tono mai e ia faatupu o na i nià i te fenua nei, te parau ia no te ora. Te ora o to te ao atoà nei.
I mua i te mata taata, e au ihoä aita e òhipa ta te Fatu i rave. Ia nä roto rä tätou i te mata värua i te hiò, i reira tätou e ìte ai i te òhipa rahi ta te Fatu i faatupu no tätou e te taata nei i mua i to na Metua.
E te reira òhipa , teie ia ta Ietu e faaìte roa nei i mua i te mata taata i teie mahana . To na pohe tätauro.
To te päroita nei, eiaha e manaò i tono mai ihoä te Atua i ta na Tamaiti ia pohe ihoä, ia rave rä i te mea ta na i tono mai e rave. Aita te Atua i tono mai i ta na Tamaiti no te haapohe, “haamanaò na tätou i terä parapore, terä parau faaau i ta te Fatu no te fatu ô vine tei faanaho i te mau mea atoà, te nahonahoraa, püpü atu ra i roto i te rima o te tahi feiä, tiaì atu ra i te tau mau ra e tïtau mai ra i ta na. Ua tonohia te mau tävini, pauroa i te taparahihia. E i te pae hopeà tono atu ra i ta na Tamaiti ma te manaò e, o te faaturatura mai taua feiä ra i ta na Tamaiti . Ravehia e taua feiä ra, taparahi pohe-roa-atoà-hia te Tamaiti. Ua tono o ia i ta na Tamaiti no te faaìte i taua feiä ra i to na hinaaro, eere rä no te haapohe atoà i ta na Tamaiti”.
Te òhipa i ìtehia, aita rätou i märamarama mai i te hinaaro o te Metua, ua taparahi mai rä rätou i taua Tamaiti ra. Teie ia e tupu nei i roto i to tätou parau i teie mahana.
Eere te Atua mea tono mai ia pohe ta na Tamaiti, mea tono mai rä o ia e faaara, faaìte i te taata i to na hinaaro.
O vai hoê metua i roto ia tätou e tono i ta na tamarii ei veà, e no te haapohe atoà i ta na tamarii. Ua pohe terä e tono faahou ä ia. Te mea päpü e tono noa tätou i ta tätou tamarii ei veà, ia hoì faahou mai rä mai terä i ta na i haere atu ra.
Hoê ä ia e te Atua, mea tono mai o ia i ta na Tamaiti no te faaìte ia tätou i to na hinaaro. E to na hinaaro, ia haamanaò rii aè ia tätou i te tahi oho na na, no te mau maitaì ta tätou e fänaò nei nä roto i te mau mea atoà ta na i püpü mai i roto i to tätou rima. Te mea i ìtehia, te haereraa mai te Tamaiti, ua hiò tätou ia na mai te tahi taata ìmi peàpeà ra te huru, mai te tahi taata ôrure hau ra, e no to tätou ìnoìno i ta na parau mau, mau aè ra ia tätou i te pätiti i nià i te tätauro. O vai ia Metua eita e mäuiui ia haapohehia ta na tamarii.
Te vähi nehenehe roa i roto i to tätou ìrava , teie ia vähi e nä ô ra e, (42) « E te Fatu, e haamanaò mai òe ia ù ia tae òe i to òe ra pätireia. »
(43) Ua parau mai ra Ietu ia na, « Ei parataito ia òe e o vau atoà i teie nei ä mahana, oia mau ta ù e parau atu ia òe nei. »
Te auraa, te ùputa, te taata te tumu i piri ai i te ômuaraa ra, e ta te Atua i hinaaro nä te taata atoà e tatara i taua ôpani ra, ua matara ia nä roto ia Ietu Metia. Ua matara taua ôpani ra no te mau nünaa atoà o te ao nei. Eere rä mea nä roto i te pohe i matara ai taua ôpani ra, mea nä roto i te aroha e te here o te Atua i ta na Tamaiti, tei ani atu ia na e « e faaòre ia ta rätou hara , aita hoì rätou i ìte i te òhipa ta rätou e rave ra. »
Te pohe o Ietu , te faaìte noa mai ra ia i te ètaèta o te âau taata i te raveraa i te hape.
Ìno roa atu ai e pohe hämani-ìno-hia.
Noa atu rä te reira huru ìno i to te taata , ua noaa roa i te Atua i te ùùmi i to na mäuiui , e i te ìriti i te ùputa o te ora i te taata nei.
(42) « E te Fatu, e haamanaò mai òe ia ù ia tae òe i to òe ra pätireia. »
(43) Ua parau mai ra Ietu ia na, « Ei parataito ia òe e o vau atoà i teie nei ä mahana, oia mau ta ù e parau atu ia òe nei. »
Tamu :
Ua tae mai te ora i teie mahana i roto i teie fare. e Atua no teie taime. Ietu e Atua no teie mahana.
Ua haere mai e ìmi i terä i moè. Hoê te riro, hoê te ère.
Te ö-noa-raa i roto i terä manaò. Terä fäìraa hara. I roto i terä manaònaòraa e òaòa to te raì i te taata hoê ia tatarahapa.
Ua fäì teie taata tana hara, e te tumu Ietu i haere mai ai. Te taata aore ra te pupu taata i manaòhia na rätou terä òhipa, aita e maraa ra ta rätou tuhaa. I roto i teie taata rave hara, haamanaò mai òe, te ö noa raa atu i roto i to òe manaò.
Na te taata rave hara, e haapii atu i te taata rave hara òre. Eita e tano terä huru.
Tamu :
Pätireia : teie ä mahana, teie ao. Haamanaò te taata i teie mahana, tei ao i tuuhia mai o ia, teie fenua tei horoàhia ia na. Ia roaa i te taata ia faatere i teie fenua. Ua färii anaè i ta te Atua faatereraa, e roaa i te taata ia faatupu i te hau, te òaòa, te here.
Färii paì, färii anaè i terä faatereraa i ta te Atua i horoà mai, e faatupu iho.
Taata rave hara na na, ia ìmi o ia ia tatara ia na. Hinaaro ra òe, tiàturi rii atoà ia òe. A tià i nià, e ora òe i te parau a Ietu, e ora atoà rä òe i ta òe tuhaa.
E tuhaa ta te Atua. E tuhaa atoà rä ta te taata iho.