Overblog Suivre ce blog
Editer l'article Administration Créer mon blog
13 février 2013 3 13 /02 /février /2013 17:34

Tapati 24 no Mati 2013

Ev. Ruta 19, 28-44

Ei manao tatara.

Mai te mau matahiti ätoà,te faahaamanao nei te hui teretetiano i te parau no teie mahana,o te ore roa e tano ia na ia haamoè.Te parau no te tomoraa te Arii o Tiona i roto i te oire moà,e o tei mataro-noa-hia e tatou i te parau ê,te Tapati no te mau àmaa.Oia hoi to te hui faaroo ia ôraa i roto i te mau mauiui i farereihia e te Metia.To na hooraahia,To na haavareraahia,To na motoraahia,To na vahavaharaahia,To na tairiraahia e te taura huï, To na tuharaahia e te huäre e te vai ätu ra.E tapati ätoà teie ei faahanahanaraa,arueraa i te Arii no te mau Arii.

I teie mahana o Ietu i te faatiàraa i tei opuahia na e te nunaa ia ite O ia iho,te faa-Arii-raa Ia na,a faaàmu temeio ai O ia i na taata e 5000,aita ra i tiàhia i to ratou manao i te reira mahana,te tumu aita i tae i te hora no te reira ohipa.I teie nei ra,ua tae i taua hora ra,te hora i reira Ierutarema e àueue ai,te ora i reira te mau vaha ätoà e pii ai i te ioa o te Fatu.

No reira ua maitihia mai teie parau,ei parau àmui no tatou i teie mahana,te parau ta te papai Evaneria o Mareto e faahiti nei i te na-o-raa e,E ua umure iho ra te feia i haere na mua e tei pee mai i muri iho,ia ora o ia.

Tera o Ietu e ta na mau pîpî i nià i te èà mai Ierito ätu i Ierutarema,e èà o tei na roto ätu i na oire iti ra o Petefate e Petania.E èà teie o tei rave pinepinehia e te mau tere  perenina no to ratou mau tere i Ierutarema no te tapapa i te mau oroà.E ia fatata mai te mau tere perenina i te oire moà,te himene nei ratou i te mau reo haamaitairaa i te mau tiàhapa o te Fatu no te mau nuu.No ratou hoê mahana i te parahiraa i roto i to na Hetere e au ia i te tauatini mahana ia au i te faaiteraa a te Taramo 84 i te irava 10.Te o nei i Ierutarema te vahi e tiai ai i te Fatu,tei o nei te vairaa te ioa o Iehova,o ta na i parau ia Mote e te tamarii a Iteraera,e ta na ätoà mau haapaoraa Taramo 103 irava 7.I o nei e haaputuputuhia mai ai te mau opu ätoà o Iteraera no te haamaitai,e no te himene i te Atua,Taramo 122:4.

Teie o Ietu e ta na mau pîpî,e haere mai ra na nià i te èà,e ere o ratou änaè,e mau taata Tarirea ätoà tei àmui mai i roto ia ratou no teie tere,ua riro teie mahana ei mahana taaê roa,i te mea e te himene nei teie mau taata na nia i te èà,eita paha e ore ohipa matarohia teie e ratou i te taime e tapapa ai i Ierutarema no te mau oroà ra rahi e tupu i reira.No te mau pîpî,tei matarohia e ratou ia haere na nia i te èà te faatere nei o Ietu i te tahi haapiiraa na ratou,i teie mahana ua taui,ua monohia te haapiiraa e te mau reo himene.E oaoaraa rahi mau tei ite-ä-hia i roto i te aau o te mau taata tei àpee mai ia Ietu i tera mahana,e ta ratou mau himene i tera mahana,ua hau ätu ia to na nehenehe i to te mau matahiti i mairi.

Ia tae mai ratou i nià i te mouà iti ra o Oriveta,te tono nei o Ietu e piti pue pîpî,eiaha e,no te haere faahou e poro i te patireia o te Metia,tonohia ra no te tahi ohipa maramarama-ore-hia e te taatoàraa o te mau pîpî,oia hoi e tii i te tahi atini ei faurao no na no te faatupuraa i te tohu a te perofeta Tetaria.Te na o nei taua tohu ra,I NAHA TE HAERE MAI RA TO ARII IA OE RA, HAEHAA TO NA I TE PARAHIRAA I NIA I TE ATINI .....(Tetaria 9:9,14:4).E TIA TA NA AVAE IA TAE I TAUA MAHANA RA I NIA I TE MOUA RA I ORIVETA I MUA MAI IA IERUTAREMA.

I nià i teie nei mouà o Oriveta te tupuraa te faaineineraa hopeà tomo ätu ai i roto i te oire o te Atua.E aita hoi Ietu i maiti i te puaahorofenua,te faurao no te puai,ua maiti ra O ia i te faurao no te haehaa,faurao paruparu,taua-ore-hia eita hoi te reira huru animara e au i te tahi arii no teie nei ao,no Ietu o te haehaa mau ta na i maiti i teie mahana,ei faatupuraa mau i te mau parau tei tohuhia no na.

Teie mai nei na pîpî i tonohia e tii i te Atini.Ua ineine te tere i teie nei,ia hiohia ätu te oire no Ierutarema mai nià ätu i te mouà no Orivveta,ua faanehenehehia no teie oroà,ua taui to na huru,to na hohoà e au oia i teie mahana i te vahine faaipoipo àpi o tei tiai i te haerea mai no ta na tane.

Mai te mea ua ineine,eiaha ia e haamarirau,e haere ia,haamata iho ra te reo pii no te mau taata,tei haere na mua e tei pee mai i muri iho,aita ratou i pii noa,no ratou iho,na ratou ra i horoà i te hioraa nehenehe,ia tià i te taatoà o te taata ia rave mai ta ratou mau vauvau,mau àmaa raau ei tuuraa i nià i te èà.E te horo ra hoi te tahi na mua ma te pii,fatea no te Arii.Aita te taata i nounou i ta ratou mau àhu i teie mahana,i teie ätoà mahana aita te paaina àvae o te atini i faaroo faahouhia.E ohipa rahi nehenehe mau tei tupu,e ohipa faahiahia.Ahiri pai tera ohipa i tera mahana,e no teie tau eita paha e tauàhia,e faarirohia i te ohipa na te maamaa.

Na roto i te fatataraa mai no Ietu i te oire moà,o te hau e te üpootiàraa rahi hanahana o te Metia teie e fatata mai nei.Mai te mea ätoà atu ra ia e ua haafatata faahou mai te Atua ia na i te taata nei.Teie taua mahana ra,tei tiai maorohia e te nunaa Iteraera.I teie mahana te tupu-mau-raa te pure a te mau tere perenina.I teie hoi hora,te faaroo nei te tamahine o Tiona i te mau piiraa hanahana ia au i ta Itaia i parau i roto i te pene 62 i te iarava 11 e te 12,INAHA,UA FAAITEHIA E IEHOVA,E UA TAE I TE HOPEA MAI O TE FENUA RA,A PARAU OUTOU I TE TAMAHINE A TIONA INAHA TE HAERE MAI RA TO OE ORA.INAH A TEI IA NA IHO TE ÜTUA TA NA E HOPOI E TE HOO TA NA E HOROA RA,TEI MUA IA I TA NA ARO.E PARAUHIA HOI RATOU O TE FEIA MOA RA,TEI FAAORAHIA E IEHOVA RA E PARAUHIA HOI OE O TEI HERE-ROA-HIA RA,TE OIRE EITA E FAARUEHIA RA.

E au ätoà te arueraa i teie mahana tei faatupuhia e te nunaa i te arueraa tei ite-a-hia i te mahana no to na fanauraa.E a tahi roa ra ohipa mai teie te huru a tupu ai i roto i te oraraa no Ietu,oia te piiraa te taatoà o te nunaa i teie reo Hotana,Hotana,tei haereraa mai no te Arii o te mau arii.

Te oire no Ierutarema,te oire no Tavita,te oire pû no Iteraera,o o ia ta te mau perofeta i tohu na,te tamahine no Tiona,te reva no te mau nunaa,tei reira te hiero te tapao no te faufaa i rotopû i te Atua e to na nunaa maitihia no te faaite i to te ao i te parau no to na faaora.

No tatou te feia Teretetiano,te oire ta Ietu e tomo atu ra i teie mahana,te mahana no te mau àmaa,e tià ia parau e, o tatou tera oire, te ETARETIA,te nunaa no te faufaa àpi.E mai te mea e o tatou tera,a pii ätoà tatou i te reo faahotana,eiaha e i roto noa i te fare pure,i te mau vahi ätoà ra,ia riro teie mahana,ei faaiteraa na tatou e ere to tatou Arii i te arii pohe e Arii o tei mana i nià iho ia tatou,i roto ia tatou i te mau mahana ätoà.A iriti i to tatou mau ùputa aau,e apii änaè,ma te reo puai A HAERE MAI E TO MATOU FAAORA.

      ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens