Ev. Ruta 24, 13-35

Tapati 31 no Mati 2013

Ev. Ruta 24, 13-35

Ei parau paari.

Ei taata perenina tätou tei ineine i te mau taime atoà, no te haere i mua i te tumu no te vahi e ìtehia ai te faanaò o te hinaaro. No te faaruè i te mau vahi moà ra, e tae noa atu i te tatararaa i te terono o te Atua, no te haere. Teie ra aita tätou e färii i te reira. Te hinaaro nei ra tätou i te haapoàraa, i te tiàturi i te mau hinaaro o te Atua, ta na i faaineine no tätou.

Ei manaò matamua.

Te parau e farereihia nei, na pîpî ia no Emauta hoìraa i Ierutarema, tei nià i teie èà te tupuraa te mau manaò, i orahia e raua i te faraite a pohe ai o Ietu. E huru peàpeà to teie na taata, hoê o Tereopa, Aita i pee te òto o teie na taata. Te manaò nei raua e, e faaea te parau o Ietu i Natareta i te menema no Arimataio mai tei ìtehia ia pohe te hoê taata. Teie ra aita o Ietu, i haere mai no te parau i roto i te menema, ua haere mai ra O ia no te huaì i te mau menema, ia ìtehia te parau no te tiàfaahouraa. Ia noaa i te mau taata atoà te parau no te haafatataraa i te Atua.

Ei tuatapaparaa.

Te mau mahana atoà no to tätou oraraa, mea haere pinepine tätou na nià i te èà. E rave rahi mau taata, ta tätou e farerei, mau fetii, mau hoa, e àparau tätou ia rätou, no te ui ia rätou e aha te huru. Àreà ra te feia aita tätou i matau ra aita ia tätou e àparau, e aore e aroha.

No reira te Èvaneria i papaìhia e Ruta i te pene 24 i te mau ìrava  13 e tae i te 35, te faaìte nei ia i te tahi huru farereiraa e tupu i nia i te èà, to na auraraa ua tupu ta tätou taiòraa i nià i te èà no te hoìraa fare, no te òhipa rahi i tupu i nià ia Ietu. I te mea i roto i to raua manaòraa, aita e òhipa faahou to Ierutarema. E na taata perenina teie, tei tiàturi i te mau òhipa tei ravehia e te Fatu e Ietu no Iteraera. Teie taua  mau rave òhipa ra tei rave i te mau temeio i te iòa o te Fatu.

Ietu i te àmuiraa.

Tei nià raua i te èà, no te haapae i te tiàraa perenina, a hoì atu ai i nià i te toroà, tei matarohia i te mau mahana tataitahi. Teie atoà mai ra te Fatu, ta raua i manaò eita e farerei faahou, te àmui nei i teie tere. E farereiraa taa ê mau teie, no te mea to raua ìte na roto i te mata varua ua faaòrehia ia, ua rupehu roa ia te reira. I ui maere ai te Fatu iho ia raua, no tei mau parau e faahitihia nei. Na te pahonoraa i faaìte i te Fatu e, ua marau te mau òhipa ta na i ravehia i roto i te mau pîpî. Àreà no teie na taata perenina, te vai noa nei ia te tahi aveave, no te òhipa i tupu i te faraite poheraa, e i te òroà pata.

I te parauraa e, o Ietu i Natareta, e perofeta mana i mua i te aro o te Atua, e taata teie e ora ai Iteraera. Te vai nei ra te hitimauè i roto i roto i to raua ààu, no te mea, ua ora O ia ia au i te ìrava 23, aita ra rätou i ìte ia na ia au i te ìrava 24. O raua atoà, aita i ìte e, o te Fatu mau teie i roto pu i teie àparauraa, i parau noa atu ai raua e, na te mau tahuà rarahi, e te mau haava i faautuà pohe ia Ietu. I faahapa ai o Ietu, i te maoro o to raua faaroo, e to raua ìte òre. Ma te auë, i te faaroo taìata o na pue taata perenina.

Te haapiiraa a tei Tiàfaahou.

I horoà faahou ai o Ietu i te haapiiraa i te mau Papaì Moà, ma te faahiti mai a Mote mai, e tae roa i te mau perofeta. Ia fatata ra i te òire no Emauta, te manaò nei o Ietu e haere i mua. Te tapeà nei ra  teie na pîpî, i te mea ua ahiahi ua mure te mahana. I àmui ai rätou i te àiraa i te maa, e na te Fatu iho i vahi ta rätou pane, e te haamaitaìraa, i reira atoà to teie na pîpî ìteraa o te Metia teie, ta raua i àparau i te roaraa, o teie èà e 32 kirometera.

Ei faaitoitoraa.

E 32 kirometera te àparau – noa – raa na taata perenina e o Ietu, e mahana taatoà ia. No te aha o Ietu aita i faaruè i teie na taata ? E aha te tumu ? No te mea ia, aita ta raua òhipa i oti i Ierutarema, e hoì faahou i reira no te tiai i te Varua Maitai. I tupu ai te Ànaanatae i roto i teie na pîpî i te hoì i Ierutarema

Ei parau feruriraa.

E aha te ànaanatae ?  

  Terai or.