Papa Haamori Täpati 26 no Tiurai 2020.

Tāpati 26 no Tiurai 2020.

Papa Haamori.

Ômuaraa.

Te paroita Ia ora na,

I mua ra te vai nei teie tumu räau te vavai, i teie mahana ua varavara roa, e aore ra ua mou roa paha i Mäòhi Nui nei. Teie to na parau, ia marö te vavai i to na âvaè maröraa e ìtehia ua matahataha maitaì te reva e te  mahana ; e faaitoito ia i te haere e òhi, no te tïtötö i roto i te türuà. E faaìte atoà mai te pätere maa o te tai i te taata e ua horo te tötara ; te âuri ia të faaineine. Te haapii noa mai ra te Atua i te taata i te ora, a tii a rave, ta na terä tauturu ; haamanaò rä i te haamauruüru ia na. Taa noa ai ta te tahi hiòraa, ta na märamaramaraa i ta te tahi, te marö noa ra te vavai i to na maröraa, eita te reira e òre, eita e faaea, eita e tiaì mai i te päpüraa te manaò o te taata. Tei mua te parau i te mata o te taata tei hinaaro i te hiò, e to na tei òre i hinaaro i te haapaò ; tei roto hoì te parau i te tarià o te taata tei hinaaro i te faaroo, e to na tei òre i tiàturi i te reira mau paraparau.

Haamaitaì tätou i te Atua i te hoê reo himene, e tià mai tätou.

Himene.

Pärahi tätou.

Teie te parau no te tävini haapaò maitaì, tei pärahi fatata i pïhaì iho i te vaha o te Atua Nui Tumu Tahi, ia au te faaìteraa a te Taramo 119, i te mau ìrava 121 e tae i te ìrava 136. 121 Ua faatupu vau i te parau tià e te au, eiaha e faaruè noa ia ù i te feiä hämani ìno mai. 122 Ei tauturu òe no to tävini ia maitaì o ia; eiaha te teòteò e hämani ìno mai ia ù. 123 Ua pöuri ta ù mata i te tiaìraa i te ora na òe, e i te parau o ta òe ra parau tià. 124 O ta òe e rave i to tävini nei, ia au ia i to òe ra aroha, e haapii mai hoì ia ù i ta òe ra mau ture.125 O to tävini hoì au, e haapii mai ia ù, ia ìte au i ta òe i faaìte mai ra. 126 O te taime teie, e te Fatu, ia faatupu i te parau au ua faaòre hoì rätou i ta òe ra ture. 127 Hinaaro rahi to ù i ta òe parau i te àuro, i te àuro i mä maitaì ra. 128 E teie nei, te parau nei au i ta òe ra mau parau atoà e mea tià anaè, te riàrià nei rä vau i te mau èà haavare atoà ra. 129 E mea maerehia ta òe ra mau parau i faaìtehia mai, i haapaò ai hoì ta ù värua i te reira. 130 Tei te heheuraa o ta òe ra parau, e noaa ai te märamarama, e noaa ai hoì te ìte i te taata ìte òre ra.131 Ua hämama vau i ta ù vaha mä te ihaiha oia hoì ma te faaihaiha, ua nounou hoì au i ta òe parau. 132 E haapaò mai òe ia ù, e aroha mai hoì ia ù, mai ta òe ra hoì i te feiä i hinaaro mai i to òe ra iòa. 133 E faaau na òe i ta ù haereà i ta òe ra parau, e eiaha te ìno nei ia faahepo mai i nià ia ù. 134 E faaora òe ia ù i te hämani ìno o te taata nei, ei reira vau e haapaò ai i ta òe ra mau parau. 135 E faaanaana mai i to mata i nià i to tävini nei; e haapii mai hoì i ta òe ra mau ture.136 Te manii pape noa nei ta ù roimata, no te mea aore te taata i haapaò i ta òe ra ture. E te Atua e, te tätarahapa atu nei mätou. Âmene.

Himene tätarahapa.

A faaroo tätou i teie nei i te huru no te hoê tävini tei tuu ia na i roto i te faanahoraa a te Atua Nui Tumu Tahi ia au te faaìteraa a te puta mau Arii hoê i te pene 3 i te mau ìrava 5 e tae i te ìrava 12. 5  I Tipeona to te Fatu färaa mai ia Töromona i te taòto i te pö; ua parau mai ra te Atua, A ani mai i ta ù e höroà atu na òe ra. 6 Ua parau atu ra Töromona, e aroha rahi to òe i ta ù metua, i to tävini ia Tävita, o ia hoì i haapaò i te tià o ta na âau ia òe, e te parau mau, e te parau tià; e ua vaiihohia e òe teie nei maitaì rahi nö na o òe i höroà i te tahi tamaiti nö na ei pärahi i nià i to na teröno, mai tei teie nei ä mahana. 7 E teie nei, e ta ù Atua, e te Fatu, ua faariro mai òe i to tävini nei ei arii, ei mono aè i ta ù metua ia Tävita: e taata âpï hoì au; aore au i ìte maitaì i ta ù nei haapaòraa. 8 Tei röpü hoì to tävini nei i te mau taata no òe, i mäìtihia e òe ra, ei feiä rahi roa, eita e hope ia tataù, eita e tià ia taiò i te rahi. 9 E teie nei, ei âau ìte ta òe e hö mai no to tävini ra, ia tià ia parau i teie nei feiä, ia ìte au i te maitaì e te ìno: aore ra, o vai te tià ia parau i teie nei feiä rahi no òe ra? 10 Tià aè ra taua hinaaro o Töromona ra i te Fatu. 11 Ua parau atu ra te Atua ia na, no te mea i nä reira mai ta òe ani, aore òe i ani mai ia haamaorohia to òe aho; aore hoì i ani mai i te taoà rahi na òe iho; aore hoì i ani mai e ia pohe to mau ènemi; ua ani mai rä i te ìte ia ìte òe i te mea tià ra; 12 Inaha, tià ia ù to hinaaro: inaha, ua tià ia ù to hinaaro: inaha, te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu. Haamaitaì tätou i te Atua i te hoê reo himene e tià ai.

Himene òaòa.

Teie ta tätou fäìraa parau maitaì i te hinaaro i te Atua, i ta Pauro faaìteraa Rōma i te pene 8, i te mau ìrava 28 e tae i te ìrava 30, 28 Ua ìte hoì tätou e, te faatupu nei te mau mea atoà i te maitaì no te feiä hinaaro i te Atua, te feiä i parauhia mai i te ôpuaraa na na ra. 29 O ta na i ìte i mütaa iho ra, o ta na atoà ia i haapaò ätea noa ia faaäuhia mai ta na Tamaiti ra te huru, ia riro o ia ei mätahiapo i te mau taeaè atoà e rave rahi ra. 30 E o ta na hoì i haapaò ätea noa ra, o ta na atoà ia i parau mai ra, e o ta na hoì i parau mai ra, o ta na atoà ia i faatià; e o ta na hoì i faatià ra, o ta na atoà ia i hopoi i te ao. E te Fatu e Ietu e a faarahi mai to mätou faaroo. Âmene.

Haamaitaì tätou i te Atua i te hoê reo himene na tätou e haapaò mai.

Himene.

Pure

Pure tätou i te Atua, e te Atua e, te faaineine nei mätou i te taiòraa i ta òe parau ta mätou äniraa mai ta Toromona ia i te hinaaroraa i te ìte, te märamarama e te paari a tauturu mai ia mätou. Âmene.

Taiòraa

Ta tätou taiòraa tei roto ia i te Parau Maitaì no Ietu i te päpaìraa a Mātaio i te pene 13 i te mau ìrava 44 e tae i te ìrava 52, teie te faanahoraa o ta tätou taiòraa, te taoà e te poe, ìrava 44 e tae 46, na ù, Te ùpeà ìrava 47 e tae i te 50 na òutou, te püòhuraa ìrava 51 e te 52 âmui tätou, te haamata nei au.  

Te taoà e te poe

44 E au ä te Hau o te raì i te taoà hunahia i roto i te hoê âua, e ìteä iho ra e te hoê taata, huna mäite iho ra o ia, e no to na òaòa, hoo atu ra o ia i te täatoà o ta na taoà atoà, hoo mai ra i taua âua ra. 45 E au ä te Hau o te raì i te hoê taata hohoo tei ìmi i te poe maitataì: 46 e ìteä iho ra ia na te hoê poe maitaì roa ra; haere atu ra o ia hoo atu ra i te täatoà o ta na taoà, hoo mai ra i taua poe ra.

Te ùpeà

47 E au ä hoì te Hau o te raì i te ùpeà i tuuhia i raro i te tai e o tei àti/î i te ià e rave rahi te huru: 48 e àti aè ra, ua ùmehia mai ra i uta, pärahi iho ra te feiä ravaai, haaputu iho ra i te ià maitataì i roto i te färii, faaruè atu ra rä i te ià ìino. 49 Oia atoà ia tae i te hopeà o teie nei ao, na te mau merahi e haere mai e faataa i te feiä ìino mai roto atu i te feiä parau tià, 50 a huri atu ai i te feiä ìino i roto i te umu auahi; tei reira te òto e te àuàuraa niho.

Püòhuraa

51 Ua märamarama änei òutou i teie atoà nei mau parau? Ua pähono mai ra rätou: Ê. 52 Ua parau atu ra o ia ia rätou: No reira, te päpaì parau tei haapiihia i te parau o te Hau o te raì, e au ia i te fatu fare, o tei hopoi mai i te mea âpï e te mea tahito no roto i ta na ra puèraa.

Ia vai mai te hau o te Atua i nià ia tätou, i te ìteraa i ta na parau.

Pure

Pure tätou i te Atua, E faaanaana mai i to mata i nià i to mau tävini nei; e ia haapii mai hoì i ta òe ra mau ture ia mätou e tià ai, Te manii pape noa nei ta ù roimata, no te mea aore te taata i haapaò i ta òe ra ture, e te Atua aroha mai ia mätou. Âmene.

Haamaitaì tätou i te Atua i te hoê reo himene, na tätou e haapaò mai e tià ai.

Himene.

Faaitoitoraa

Himene

Parau faaära

Himene pupuraa moni.

Pure ärai

Pure tätou,

E te Atua Metua, te ani atu nei mātou ia òe, a tauturu mai ia mātou i te tāmāraa i ta mātou mau hara, ia tià atu mätou i mua ia òe ma te tiàmā. Tauturu mai òe to mātou faaroo, ia papahia te reira i nià i te faufaa no te ora, te riro hoì te rahu ei ìte, e ei tāpaò. Ia aa-faahou-hia ta òe parau tei mau-māite-hia mai e te mau tupuna i roto i to mātou mau âau, ia tià faahou ia mātou ia faariro i te rahu ei täuaro no mātou. I teie mahana, eere te rahu noa terā e fifi ra, o mātou atoà rā, e teie maì e tupu nei i roto ia Mäòhi Nui, tei haafifi i to mätou oraraa tiàma. Ta mātou peu, te iho, te hīroà tumu e to mātou iho reo, ua riro atoà ia i roto i te ôpape o teie tau hepohepo ; o mātou iho hoì te tumu. Te òaòa nei rā te âau, no te faaroo o te feiā e pātoì noa nei ia òre te turaraa o te taata no Māòhi Nui nei ia taataahihia. E te Atua Metua e, a faariro ia mātou ei mauhaa no te faatupuraa i ta òe ôpuaraa no te ora o teie nūnaa i Māòhi Nui nei, a fārii mai i ta mātou pure. Amene

Haamaitaì tätou i te Atua i te reo Himene âmui e tià mai tätou.

Himene âmui.

Pure a te Fatu

Faaitoitoraa.

51 Ua märamarama änei òutou i teie atoà nei mau parau? Ua pähono mai ra rätou: Ê. 52 Ua parau atu ra o ia ia rätou: No reira, te päpaì parau tei haapiihia i te parau o te Hau o te raì, e au ia i te fatu fare, o tei hopoi mai i te mea âpï e te mea tahito no roto i ta na ra puèraa.

Haamaitaìraa.

44 E au ä te Hau o te raì i te taoà hunahia i roto i te hoê âua, e ìteä iho ra e te hoê taata, huna mäite iho ra o ia, e no to na òaòa, hoo atu ra o ia i te täatoà o ta na taoà atoà, hoo mai ra i taua âua ra. Âmene.

Teraì òr. Faatura.