Papa Haamori Tāpati 19 no Tiurai 2020.

Tāpati 19 no Tiurai 2020.

Papa Haamori

E vaiiho noa

Ômuaraa.

I te roaraa o te tau ta tätou i haere mai, aita änei tätou i faaea noa i nià i te paa, te püòhu, e i faaruè i te mäa. Aita änei tätou e ìte noa ra e, ua pau ê na te mäa, e ua tae i te taime no te faaâpï i te mäa no te mea aita e faufaa ia täpeà noa i te paa e aita o roto e mäa. E faaamuhia te moa i te ota haari, te taata rä, te rito të au ia na. Ua ìte maitaì tätou i nià i te räau e, no te tupu i te rahi, aita te räau i fifi i te täuiraa i to na huru, te faaruèraa i te paa tahito mai te mono mai i te paa âpï, te faaruèraa i te rauère para, te rauère tahito, no te mono mai i te mea âpï. No te aha ia tätou aita i täpeà mai i te haapiiraa a te räau. Aita tätou e parau nei e, mea faufaa òre te paa tahito e te rauère tahito, ua riro te taa-ê-raa te paa e te rauère tahito i te tumu ei täpaò no te tupu-maitaì-raa o te hoê räau. Haamaitaì tätou i te Atua i te hoê reo himene, e tià mai tätou.

Himene

Pärahi tätou.

Faaroo mai tätou i te pure a te taata Taramo 86, 1 E pure na Tävita. A färiu mai i to tarià, e te Fatu, a faaroo mai ia mätou, ua haèhaa mätou e te faufaa òre. 2 E faaora hoì òe i to mätou värua, te arohahia mai nei hoì mätou e òe ia ora, e te Atua, to tävini e tiàturi ia òe nei. 3 E aroha mai òe ia mätou, e te Fatu, te tiàoro nei mätou ia òe, aita e mahana tuua. 4 E faaòaòa mai i te värua o to tävini, te faaäraära atu nei mätou i to mätou värua ia òe, e te Fatu e. 5 Te maitaì ra hoì òe, e te Fatu, e ua tià ia òe te faaòre mai i te hara nei e te aroha rahi i te feiä atoà e tiàoro atu ia òe ra. 6 E faaroo mai, e te Fatu, i ta mätou pure, e haapaò mai i ta mätou e ani nei.7 Ia tae i te mahana e àti ai mätou ra, ua tiàoro mätou ia òe ra, e faaroo mai hoì òe ia mätou nei. 8 Aore o òe e fäito, e te Fatu, i roto i te mau atua atoà ra, aore hoì e òhipa e au i ta òe ra òhipa. 9 Te mau fenua atoà i hämanihia e òe ra, e tae atoà mai e haamori i mua ia òe, e te Fatu, a faateitei ai i to òe ra iòa. 10 E Atua rahi hoì òe, e te òhipa taa ê ta òe e rave ra O òe anaè ra te Atua mau 11 E haapii mai òe, e te Fatu, i to òe ra èà, e haapaò mätou i ta òe ra parau mau: ia rötahi mäite hoì to mätou âau i te mataùraa i to iòa na. 12 E haamaitaì ä mätou ia òe, e te Fatu, e to mätou Atua, mä to mätou âau atoà ra; e faarahi tämau ä mätou i to òe ra iòa. 13 Ua rahi hoì to òe aroha ia mätou, ua faaora hoì òe ia mätou i häte i raro roa ra. 14 Te feiä teòteò tei tià mai, e te Atua, e märô mai ia mätou; e te âmuiraa o te feiä àito ra, tei tïtau mai ia mätou ia pohe: aore hoì rätou i tuu ia òe i mua ia rätou ra. 15 O òe rä, e te Fatu, e Atua hämani maitaì òe, e te aroha, e te faaòromaìraa roa, e te rahi hoì i te faaherehere, e te parau mau. 16 E haapaò mai ä òe ia mätou, e hämani maitaì mai; hö mai na i to òe ra itoito i to mau tävini nei, e faaora hoì te tamaiti a to tävini vahine. 17 E faaìte mai ia mätou i te tahi täpaò maitaì, ia ìte mai te feiä i riri mai ia mätou nei a haamä atu ai, ia tauturu mai òe, e te Fatu, e ia haamähanahana mai ia mätou. Âmene.

Himene tätarahapa.

Tei te faaìteraa a te Atua Nui Tumu Tahi i ta Ìtaia päpaìraa i te pene 4, i te mau ìrava 6 e tae i te ìrava 8, 6 Te nä ô mai ra te Arii o Ìteraèra ra, o te Fatu e to na ora, o te Fatu manahope ra: O vau te mätamua, e o vau hoì te faahopeà, e aita atu Atua mäori rä o vau. 7 O vai tei faaìte mai i te parau, tei faaìte ätea noa, e ua faatupu i taua parau ra mai ia ù nei, mai te ànotau mai ä i faatupu ai au i taua feiä tahito ra? i te mau parau e tupu nei i teie nei, e te tupu a muri aè, e faaìte rätou ia rätou nei. 8 Eiaha òutou e mataù, eiaha òutou e taiä; eere au tei faaìte ia òutou mai te mätamua mai ä? E ua faaìte ätea noa hoì au, e o òutou to ù ìte. Te taa ra i te Atua eiaha atu ä vau? Aore ia, aita ä atu e pare haapüraa; aore roa i ìteä atu e au, e te Atua a faarahi mai i to mätou faaroo. Haamaitaì tätou i te Atua i te himene e tià ai.

Himene òaòa

Na te parau a Pauro i to Rōma e tauturu i to tätou tiàturiraa i te pene 8 i te mau ìrava 26 e tae i te ìrava 27, 26 Te turu atoà mai nei hoì te Värua i to tätou nei paruparu, aore hoì tätou i ìte maitaì i te mea au ia pure tätou; na te Värua iho i ani i ta tätou mä te ûuru e òre e tià ia parau ra. 27 Ua ìte rä o ia o tei päheru i te âau ra i to te Värua hinaaro, o tei ani i ta te feiä moà ra, i tei au i to te Atua ra hinaaro. Âmene.

Haamaitaì tätou i te Atua i te hoê reo himene.

Himene.

Pure

Pure tätou i te Atua, Te Atua Nui Tumu Tahi ua faaroo iho nei Òe i to mätou paparaa i ta mätou haamoriraa ia au i to Òe mau hinaaro i faaìtehia e to Òe mau tävini i mua ra. I teie ra taime nei e taiò mätou i te Parau Maitaì i päpaìhia e Mätaio i te pene 13, i te mau ìrava 24 e tae i te 43, a tauturu mai ia mätou i te ìteraa i to òe mau hinaaro. Âmene.

Taiòraa.

Mātaio 13.24-43

Te tïtänia

24 Ua tuu atu ra o ia i te tahi ä parapore ia rätou, nä ô atu ra: E au te Hau o te raì i te hoê taata i ueue i te huero maitaì i roto i ta na ra âua/faaapu. 25 I te taime te taòto ra te taata, ua haere mai ra to na ènemi, ueue iho ra i te tïtänia i roto i te tïtona, e haere ê atu ra. 26 Ia tupu te mau räau rii e ia faahotu mai i te mäa, ìteä-atoà-hia iho ra te tïtänia. 27 Ua haere mai ra te mau tävini o te fatu fare, ua parau mai ra ia na: E te Fatu, eere änei i te huero maitaì ta òe i ueue i roto i ta òe âua: no hea iho nei hoì te tïtänia? 28 Ua pähono atu ra o ia ia rätou: Na te ènemi te reira i rave. Ua parau mai ra te mau tävini ia na: E tii änei mätou e hutihuti/huhuti? 29 Ua parau atu ra o ia: Eiaha, o te taäa atoà òutou i te tïtona ia hutihuti òutou i te tïtänia. 30 E vaiiho noa ia tupu âpipiti noa na e tae noa atu i te ôotiraa tïtona; e ia tae i te tau ôotiraa ra, na ù ia e parau atu i te feiä ôoti: E mata na nä mua roa i hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa tïtona.

Te huero tïnapi

(Mär 4.30-32; Rut 13.18-19)

31 Ua tuu faahou atu ra o ia i te tahi ä parapore ia rätou, nä ô atu ra: E au te Hau o te raì i te hoê huero tïnapi ta te hoê taata i rave e tä na i tanu i roto i ta na âua/faaapu; 32 o te huero iti roa ia i te mau huero atoà nei, ia tupu rä e rahi roa ia i te mau räau tupu atoà, e e riro mai ei tumu räau, e e tau mai te mau manu o te reva no te hämani i to rätou ôfaaraa i nià i to na mau âmaa.

Te faahöpue

(Rut 13.20-21)

33 Ua parau atu ra o ia i te tahi ä parapore ia rätou: E au te Hau o te raì i te faahöpue tei ravehia e te hoê vahine e tei ânoìhia i roto i nä fäito färaoa ota e toru, e höpue atu ra te täatoà o taua färaoa ra.

No te aha Ietu i parau parapore ai

(Mär 4.33-34)

34 Taua mau parau atoà ra, ua parau-parapore-hia ia e Ietu i te tiàaa rahi; aore roa e parau tä na i parau atu ia rätou tei òre i na-roto-hia i te parapore, 35 ei faatupuraa i tei parauhia e te perofeta: E hämama ta ù vaha no te parau i te parapore, e poro vau i te mau òhipa i hunahia mai te mauraa mai o teie nei ao.

Te tätararaa o te tïtänia

36 Vaiiho iho ra Ietu i te tiàa rahi, e tomo atu ra i roto i te fare. Ua haere mai ra ta na mau pipi, nä ô mai ra ia na: A tätara mai na ia mätou i te parapore o te tïtänia i roto i te âua/faaapu. 37 Ua pähono atu ra Ietu ia rätou: O tei ueue i te huero maitaì ra, o te Tamaiti ia a te taata. 38 Te âua ra, o teie nei ao ia; te huero maitaì ra, o te mau tamarii ia o te Hau; e te tïtänia ra, o te mau tamarii ia a te värua ìno/hämani ìno. 39 Te ènemi i ueue i te tïtänia ra, o te tiàporo ia; te ôotiraa tïtona ra, o te hopeà ia o teie nei ao; te feiä ôoti ra, o te mau merahi ia. 40 E mai te tïtänia i haaputuhia e i tähuhia i te auahi ra, òia atoà ia i te hopeà o teie nei ao. 41 E tono mai te Tamaiti a te taata i ta na mau merahi, e na rätou e hutihuti o ia i te mau tumu atoà e turori ai e te feiä e faatupu i te ìno, mai roto atu i to na Hau; 42 a huri atu ai ia rätou i roto i te umu auahi; tei reira te òto e te àuàuraa niho. 43 Ei reira te feiä parau tià e ànaana mai ai mai te mahana ra, i roto i te Hau o to rätou Metua. E tarià tö na ra, ia faaroo ia.

Na te Atua Hau i te aroha e te here e haamaitaì mai i te taiòraa ta na parau.

Pure

Pure tätou i te Atua, te Atua Nui Tumu Tahi  te tuu nei to mätou Fatu o te Metia ia mätou i mua i ta Òe ôpuaraa faaora no ta Òe faaapu tei faaäpiäpihia e te ènemi, a tauturu mai ia mätou ta Òe mau tamarii. Âmene. Haamaitaì tätou i te Atua i te hoê reo himene.

Himene.

Faaitoitoraa.

Parau faaära.

Püpüraa moni.

Pure ärai

Pure tätou i te Atua Nui Tumu Tahi Ia parau te Atua ia Ìtaia te ìte ra tätou e, te Atua te haamataraa o te parau o te taata, âreà te fenua, aore ra te püfenua, te vähi tupuraa ia no te reira parau, te vähi te reira parau e riro mai ai ei òhipa. O vai tei faaìte mai i te parau, tei faaìte ätea noa, e ua faatupu i taua parau ra mai ia tätou nei, mai te ànotau mai ä i faatupu ai au i taua feiä tahito ra, i te mau parau e tupu nei i teie nei, e te tupu a muri aè, e faaìte rätou ia rätou nei. i ei taata. Mai te peu e ìtehia te räau i to na iho huero, oia hoì i to na mäa, aita e òhipa ta te reira räau e faaìte mai ia òre o ia ia tänuhia i roto i te fenua, ia òre o ia i rave i to na ora i roto i te vairaa o te ora, oia te fenua. Te parau ia i haapiihia e ta Òe Tämaïti ia mätou i teie poìpoì, ia ueue mätou i te ìno e pähono mai te fenua i te ìno, ia itoito ra mätou i te ueue i te maitaì e ôtohe te ìno, e te Atua Nui Tumu Tahi aroha mai ia mätou. Âmene.

Haamaitaì tätou i te Atua i te hoê reo himene âmui.

Himene âmui. 

Faaitoitoraa.

30 E vaiiho noa ia tupu âpipiti noa na e tae noa atu i te ôotiraa tïtona; e ia tae i te tau ôotiraa ra, na ù ia e parau atu i te feiä ôoti: E mata na nä mua roa i hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa tïtona.

Haamaitaìraa.

27 Ua ìte rä o ia o tei päheru i te âau ra i to te Värua hinaaro, o tei ani i ta te feiä moà ra, i tei au i to te Atua ra hinaaro. Âmene.

Teraì òr. Faatura.