Overblog Suivre ce blog
Editer l'article Administration Créer mon blog
3 août 2017 4 03 /08 /août /2017 00:02

Täpati 6 no Âtete 2017.

Faatiàià

Ôroà

Mau  Taiòraa

Taramo 97

1 O te Fatu te arii, ia ôuàuà te fenua, e te mau fenua rii e rave rahi ra, ia òaòa ia. 2 Te haaàtihia ra o ia i te mau ata e te pöuri. O te parau-tià rä e te au, o te tumu ia o to na teröno. 3 Te haere ra te auahi nä mua ia na, e te àma ra to na mau ènemi e àti noa aè. 4 Te märamarama ra te fenua i to na ra uira, te hiò ra te fenua mä te rürütaina. 5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra. 6 Te faaìte mai ra te mau raì i te parau-tià na na, e te ìte ra te taata atoà i to na hanahana.7 Ia haamä te feiä atoà i haamori i te mau atua òtiòtihia ra, o tei teòteò i to rätou iho mau îtoro. E haamori ia na, e te mau atua ra. 8 Ua ìte Tiona e ua òaòa, e te fänaò nei te mau tamahine o Iüta i te parau au na òe, e te Fatu. 9 E teitei rahi to òe, e te Fatu, i te mau fenua atoà nei, tei nià ê ä òe i te mau atua atoà ra. 10 O òutou o tei hinaaro i te Fatu ra, ia riàrià òutou i te ìno, te tiaì ra o ia i te värua o to na feiä moà ra, e te faaora ra o ia ia rätou i te rima o te paieti-òre ra. 11 Ua ueuehia te märamarama na te feiä parau-tià ra, e te òaòa na te feiä i tià te âau ra. 12 E òaòa òutou, e te feiä parau-tià, i te Fatu, e e haamaitaì atu mä te haamanaò i to na ra maitaì.

Himene

Täniera 7,9-14

9 Te hiò ra vau, e haamauhia iho ra te mau teröno e ua pärahi mai ra To te mau mahana tahito ra, o tei au to na àhu i te hiona i te teatea, e te rouru o ta na upoo, mai te huruhuru mämoe maitaì ra ia, e auahi ùra to na teröno, e to na pereoo e auahi àma ia. 10 Puroro noa mai ra te auahi tärapape mai mua mai ia na, e ua tautani hoì i te tautaniraa i te täviniraa ia na ra, e ua àhuru hoì te tautaniraa i te manotini i te tiàraa i mua i ta na aro, pärahi iho ra te haaväraa, e ua heheuhia te mau puta. 11 Ua hiò iho ra vau e no te parau rahi i parauhia e taua tara ra hiò iho ra vau, e taparahihia taua mea ora ra, e pau aè ra to na pera, e tuuhia atu ra i te auahi àma ra. 12 Âreà te tahi pae i taua mau mea ora rarahi ra, ravehia aè ra to rätou mana; i haamaorohia rä to rätou aho e ia tae i te tau e te taime. 13 Hiò iho ra vau i taua ôrama i te ruì ra, e inaha, te hoê mai te Tamaiti a te taata ra i te haereà mai nä roto i te mau ata o te raì ra; e ua haafätata atu ra o ia i To te mau mahana tahito ra, e tuuhia iho ra i pïhaì iho ia na. 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

Himene

2 Pëtero 1,16-19

Te ìteraa i te hanahana o te Atua

16 Eere hoì ta mätou i te fäpura i faatupuhia e te paari ra, a faaìte atu ai mätou ia òutou i te mana e te haereà mai o to tätou Fatu ra o Ietu Metia, ua ìte hua rä to mätou mata i to na hanahana. 17 I noaa hoì ia na i te Atua Metua ra te haamaitaì e te faateitei, a tae mai ai ia na taua reo no roto mai i te ànaana rahi ra e O taù Tamaiti here teie, ua mauruüru roa vau ia na. 18 Ua faaroo mätou i taua reo no te raì mai ra, ia mätou e o ia atoà i nià i te mouà moà ra.19 Tei ia tätou atoà te parau a te mau perofeta tià rahi roa atu ra i teie nei o te mea maitaì ia ia òutou ia haapaò i te reira, mai te rämepa e ànaana i te vähi pöuri ra, e ia tai ao, e ia hiti te fetià poìpoì i roto i to òutou na âau.

Himene.

Mätaio 17,1-9

To Ietu faahuru-ê-raa-hia

(Mär 9.2-9; Rut 9.28-36)

1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua ärataì atu ra ia rätou i nià i te hoê mouà teitei. 2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra. 3 E inaha, ua fä mai ra Möte räua o Èria ia rätou ra, e täuàparau anaè iho ra räua e o Ietu. 4 Ua parau atu ra Pëtero ia Ietu, nä ô atu ra E te Fatu, e mea maitaì ia pärahi tätou i ô nei. E ia tià ia òe ra, e faatià vau i ô nei e toru aè fare autä no òe te tahi, no Möte te tahi, no Èria hoì e tahi. 5 E te parau noa ra o ia, e inaha, täpoìhia mai ra rätou e te hoê ata ànaana e inaha, te hoê reo mai ra no roto i te ata, i te nä-ô-raa mai e O taù Tamaiti here teie, ua mauruüru roa vau ia na. A faaroo ia na 6 E ia faaroo aè ra te mau pipi i te reira, ua tïpapa iho ra rätou i raro, mä te mataù rahi. 7 Ua haafätata mai ra Ietu i pïhaì iho, faatiàià mai ra ia rätou, nä ô mai ra A tià, eiaha e mataù. 8 E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra. 9 E tei to rätou pouraa mai mai nià i te mouà, ua faaue mai ra Ietu ia rätou Eiaha roa atu òutou e faaìte i te taata i ta òutou i ìte aè nei/ôrama, e tae noa atu i te taime e tiàfaahou mai ai te Tamaiti a te taata mai te pohe mai.

Manaò

Teie mau taiòraa, te ìriti nei te mau parau tei faaìte i te mau ôpuaraa faaora a te Atua Nui Tumu Tahi tei tïtau i te mau taata atoà i te ìteraa i te mau hopoià e tupu ai te ora. E tià ia parauhia te vai nei te tahi mau parau tumu e tauturu ia tätou i te haafatataraa i pïhaì iho i te mau hinaaro o te Atua Nui Tumu Tahi. Te huru o teie mau tävini, e huru ia no te taata mata ära tei ìte i te rima faatupu òhipa o te Atua i te faatiàrepuraa i to rätou ôpü ia tärapape te hupehupe, te faatau, te ìno, te àmahamaha, e rau noa atu te mau haaäpiäpiraa te òre e au i te tupuraa te hanahana o te hau o te Atua.

Teie taua mau ìrava ra,  

-Taramo 97, 5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra.

-Taniera7, 10 Puroro noa mai ra te auahi tärapape mai mua mai ia na

-2 Pëtero1, 18 Ua faaroo mätou i taua reo no te raì mai ra, ia mätou e o ia atoà i nià i te

mouà moà ra.

-Mätaio 17, 1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua ärataì atu ra ia rätou i nià i te hoê mouà teitei. 

E maha ìrava teie, tei òre roa i mäheahea i roto i te tau, tei òre atoà i marau te päpaìraa tei matahataha noa to na parauraa. Tei ärataì i te mau nünaa o te Atua Nui Tumu Tahi i roto i te märamarama o te parau i te türamaraa a te fenua te reva e te mau tiàrama. Teie mau puta ua päpaìhia i roto i te mau tau taaè te tahi i te tahi, te vai nei te pehepehe, te tau no te tïtïraa, te tau o Ietu, e te tau no te Ètärëtia. Hoê rä parau e tià e âmui teie mau manaò e faahitihia ra teie ia, Te Rima Puai o te Atua. No te aha, no te mea na te Rima o te Atua i ìpopo i te taata i te vari o te fenua i parauhia ai to te taata. E ia faahitihia te parau o te fenua, no te mea ia ua färii hope roa tätou i to na parau, oia te mau mea atoà e faaìte mai ra i te tupuraa o te ora ta na e mau ra, nä reira hoì te mau mea atoà ta na i amo e tei riro o ia ei ìte, ua färii hoì i ta te fenua iho parauraa i to na parau, to na reo, ta na peu, e ta na hoì faaìteraa i te Atua.

E parau ia  tätou e ua varihia Te Rima Puai o te Atua i to na Aroha e to na Here ia tätou te taata nei. No reira,

E rave rahi te feiä haavare tei tärapape e faahiti nei i te parau o te fenua, mai te tähitohito ûàna rä i ta te fenua parau i nià ia na iho, mai te haafaufaa òre i to na reo, ta na peu, e te värua e faaora ra i te fenua. Mea tano ia haamanaòhia i teie feiä e, eere te fenua no roto mai i te taata, eere te taata te metua o te fenua, te taata rä tei ravehia no roto mai i te fenua. No reira, e tamarii te taata na te fenua ra, te fenua atoà ia të mau ra i to na parau. Aita ta te taata e haapiiraa i te fenua, aita ta na e faaravaìraa i te parau a te fenua. Te taata paari, te taata ia tei färii i te haapiiraa e te arataìraa a te fenua ; te maamaa rä e te aoaoa, ua hinaaro ia na na aè e haapii i te fenua i te maitaì e te ìno.

No te mea te faaìte atoà ra te fenua i te Atua, e tano ai tätou e parau e, ta te taata märamaramaraa i te parau o te Atua, ua haamäramarama atoà mai ia i ta na huru hiòraa i te parau o te fenua ; te huru auraa hoì e faanaho ra i te oraraa o te tata e to na fenua, te horoà atoà mai ra ia i te tahi türamaraa i nià i te mau auraa e täamu ra i te taata i to na Atua. Rau noa atu ai ta te mau nünaa hiòraa i teie parau, eita te parau o te taata e tano ia faataa-ê-hia i to te fenua e to te Atua. Te auraa, ia färii hope roa te taata i te fenua e te Atua, e märamarama ai o ia i to na parau ei taata ; te mea atoà rä te reira e horoà i te auraa i to na oraraa.

I roto i te mau taiòraa Pïpïria i faataahia no teie mahana ua faaroo tätou i te parau o te mouà e te mau òhipa i tupu, e tärapape te mouà mai te täpau ra te huru i mua i te aro o te Atua. I nià atoà i te mouà te tupuraa te färereiraa te faaäuraa mätamua tiàhia e Möte o te ture ia, e Èria te tià ia o te mau perofeta, e te faaäuraa âpï tiàhia e Ietu, Pëtero, Iatöpo, e o Ioane faahuruèhia iho ra o Ietu i mua i te mau tià o te fenua. Te ìte i teie mau òhipa faahiahia, ànaana aè ra ta na mata mai te mahana ra, e teatea aè ra to na àhu mai te märamarama ra. Faaroohia iho ra te reo o te Atua, O taù Tamaiti here teie, ua mauruüru roa vau ia na. A faaroo ia na, ia faaroo te mau pipi i teie reo, ua tïpapa iho ra rätou i raro, mä te mataù rahi, faatiàià mai ra te rima o Ietu ia rätou, a tià eiaha e mataù pou mai rätou mai nià i te mouà.

Te faaìte noa mai ra teie mau parau, te märamarama o te òhipa e tià ia faatupu i te hinaaro o te Atua, i te mea e täpura òhipa ta te fenua i mua i te Atua, e täpura òhipa ta te Tamaiti i mua i te Atua, ua mauruüru te Atua i te Tamaiti i ta na parauraa e, O taù Tamaiti here teie, ua mauruüru roa vau ia na, A faaroo ia na, ua mauruüru atoà  te fenua. Te Rima Puai o te Atua, no te faatupu i te òhipa e tïtauhia ra i te taata to na mau tävini te haapäpü noa mai ra te reira e, e täpura òhipa rahi ä ta te Atua e tiaì mai ra ia tätou, aita ä ta na ôpuaraa i hope, ia au i te manaò e, te ôpuaraa, e manaò ia tei òre ä i riro mai ei òhipa. Ua tupu te taata nä roto i te rima mana no te Parau a te Atua, no te faatupu rä i ta na ôpuaraa, e hinaaro ia te Atua ia hoì te taata ta na i hämani ia na ra, ia tauturu te taata i te Atua i te faatupuraa i ta na ôpuaraa faaora, no te mea e ora rahi ta te Atua i faaineine no te taata. Ia âmui te taata i te Atua, i reira teie ora e matara ai. Aita teie manaònaòraa to te Atua i  ätea roa atu i te mea ta na i faaìte i te päpaìraa a Täniera i te pene 7 i te ìrava 10 Puroro noa mai ra te auahi tärapape mai mua mai ia na, e ua tautani hoì i te tautaniraa i te täviniraa ia na ra, e ua àhuru hoì te tautaniraa i te manotini i te tiàraa i mua i ta na aro, pärahi iho ra te haaväraa, e ua heheuhia te mau puta.

No reira, mai te peu e faaäuraa ta te Atua i rave, e ua faaìte mai hoì o ia i te reira, aita e òhipa ta te Atua i huna, te auraa, ua ineine te Atua i te horoà i te märamarama i te feiä tei ineine i te färii ia tuuhia te àma o ta na Parau i roto i to rätou âau.

Faatiàià mai, Te Rima Puai o te Atua ia tätou.

 

Teraì òr. Faatura.

 

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens