Mätaio 13,44-52
Täpati 30 no Tiurai 2017.
Ihaiha
Mau taiòraa.
Taramo 119,121-136
121 Ua faatupu vau i te parau-tià e te au, eiaha e faaruè noa ia ù i te feiä hämani ìno mai.122 Ei tauturu òe no to tävini ia maitaì o ia, eiaha te teòteò e hämani ìno mai ia ù. 123 Ua pöuri taù mata i te tiaìraa i te ora na òe, e i te parau o ta òe ra parau-tià.124 O ta òe e rave i to tävini nei, ia au ia i to òe ra aroha, e haapii mai hoì ia ù i ta òe ra mau ture.125 O to tävini hoì au, e haapii mai ia ù, ia ìte au i ta òe i faaìte mai ra.126 O te taime teie, e te Fatu, ia faatupu i te parau au ua faaòre hoì rätou i ta òe ra ture. 127 Hinaaro rahi to ù i ta òe parau i te àuro, i te àuro i mä maitaì ra.128 E teie nei, te parau nei au i ta òe ra mau parau atoà e mea tià anaè, te riàrià nei rä vau i te mau èà haavare atoà ra.129 E mea maerehia ta òe ra mau parau i faaìtehia mai, i haapaò ai hoì taù värua i te reira.130 Tei te heheuraa o ta òe ra parau, e noaa ai te märamarama, e noaa ai hoì te ìte i te taata ìte òre ra.131 Ua hämama vau i taù vaha mä te ihaiha, ua nounou hoì au i ta òe parau.132 E haapaò mai òe ia ù, e aroha mai hoì ia ù, mai ta òe ra hoì i te feiä i hinaaro mai i to òe ra iòa.133 E faaau na òe i ta ù haereà i ta òe ra parau, e eiaha te ìno nei ia faahepo mai i nià ia ù. 134 E faaora òe ia ù i te hämani ìno o te taata nei, ei reira vau e haapaò ai i ta òe ra mau parau. 135 E faaanaana mai i to mata i nià i to tävini nei e haapii mai hoì i ta òe ra mau ture.136 Te manii pape noa nei taù roimata, no te mea aore te taata i haapaò i ta òe ra ture.
Himene.
1 Te mau Arii 3,5-12
5 I Tipeona to te Fatu färaa mai ia Töromona i te taòto i te pö; ua parau mai ra te Atua, A ani mai i tä ù e höroà atu na òe ra. 6 Ua parau atu ra Töromona, e aroha rahi to òe i taù metua, i to tävini ia Tävita, o ia hoì i haapaò i te tià o ta na âau ia òe, e te parau mau, e te parau tià e ua vaiihohia e òe teie nei maitaì rahi nö na o òe i höroà i te tahi tamaiti nö na ei pärahi i nià i to na teröno, mai tei teie nei ä mahana. 7 E teie nei, e taù Atua, e te Fatu, ua faariro mai òe i to tävini nei ei arii, ei mono aè i taù metua ia Tävita e taata âpï hoì au; aore au i ìte maitaì i ta ù nei haapaòraa. 8 Tei röpü hoì to tävini nei i te mau taata no òe, i mäìtihia e òe ra, ei feiä rahi roa, eita e hope ia tätaù, eita e tià ia taiò i te rahi. 9 E teie nei, ei âau ìte ta òe e hö mai no to tävini ra, ia tià ia parau i teie nei feiä, ia ìte au i te maitaì e te ìno aore ra, o vai te tià ia parau i teie nei feiä rahi no òe ra 10 Tià aè ra taua hinaaro o Töromona ra i te Fatu. 11 Ua parau atu ra te Atua ia na, no te mea i nä reira mai ta òe ani, aore òe i ani mai ia haamaorohia to òe aho aore hoì i ani mai i te taoà rahi na òe iho, aore hoì i ani mai e ia pohe to mau ènemi, ua ani mai rä i te ìte ia ìte òe i te mea tià ra. 12 Inaha, tià ia ù to hinaaro te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu.
Himene
Röma 8,28-30
28 Ua ìte hoì tätou e, te faatupu nei te mau mea atoà i te maitaì no te feiä hinaaro i te Atua, te feiä i parauhia mai i te ôpuaraa na na ra. 29 O ta na i ìte i mütaa iho ra, o ta na atoà ia i haapaò ätea noa ia faaäuhia mai ta na Tamaiti ra te huru, ia riro o ia ei mätahiapo i te mau taeaè atoà e rave rahi ra. 30 E o ta na hoì i haapaò ätea noa ra, o ta na atoà ia i parau mai ra, e o ta na hoì i parau mai ra, o ta na atoà ia i faatià e o ta na hoì i faatià ra, o ta na atoà ia i hopoi i te ao.
Himene
Mätaio 13,44-52
Te taoà e te poe
44 E au ä te Hau o te raì i te taoà hunahia i roto i te hoê âua, e ìteä iho ra e te hoê taata, huna mäite iho ra o ia, e no to na òaòa, hoo atu ra o ia i te täatoà o ta na taoà atoà, hoo mai ra i taua âua ra. 45 E au ä te Hau o te raì i te hoê taata hohoo tei ìmi i te poe maitataì 46 e ìteä iho ra ia na te hoê poe maitaì roa ra haere atu ra o ia hoo atu ra i te täatoà o ta na taoà, hoo mai ra i taua poe ra.
Te ùpeà
47 E au ä hoì te Hau o te raì i te ùpeà i tuuhia i raro i te tai e o tei àti/î i te ià e rave rahi te huru 48 e àti aè ra, ua ùmehia mai ra i uta, pärahi iho ra (te feiä ravaai), haaputu iho ra i te ià maitataì i roto i te färii/àraìri, faaruè atu ra rä i te ià ìino. 49 Oia atoà ia tae i te hopeà o teie nei ao, na te mau merahi e haere mai e faataa i te feiä ìino mai roto atu i te feiä parau tià, 50 a huri atu ai (i te feiä ìino) i roto i te umu auahi; tei reira te òto e te àuàuraa niho.
Püòhuraa
51 Ua märamarama änei òutou i teie atoà nei mau parau. Ua pähono mai ra rätou Ê. 52 Ua parau atu ra o ia ia rätou. No reira, te päpaì parau tei haapiihia i te parau o te Hau o te raì, e au ia i te fatu fare, o tei hopoi mai i te mea âpï e te mea tahito no roto i ta na ra puèraa.
Ei manaò.
Teie mau pene parau e maha te faaìte nei ia i te huru no te tupuraa te Hau o te Atua, ta te mau tävini ìmiraa te mau raveà ia raa te mau ôpuaraa faaora hinaarohia e te Atua Nui Tumu Tahi.
-Taramo 119,131 Ua hämama vau i taù vaha mä te ihaiha, ua nounou hoì au i ta òe parau.
-1 Te Mau Arii 3,12 Inaha, tià ia ù to hinaaro te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu.
-Roma 8,30 E o ta na hoì i haapaò ätea noa ra, o ta na atoà ia i parau mai ra, e o ta na hoì i parau mai ra, o ta na atoà ia i faatià e o ta na hoì i faatià ra, o ta na atoà ia i hopoi i te ao.
-Mataio 13,51 Ua märamarama änei òutou i teie atoà nei mau parau. Ua pähono mai ra rätou Ê.
E tià ia parauhia e maha tumu e vai nei i roto i teie huru faaìteraa, Vaha, Fäito, Faatià, Ê, mau taò faatupu òhipa teie, tei horoàhia e te Atua i roto i te taata, ia ìte te taata e mauhaa puai ta na e mau ra no te Hau i te hinaaro o te Atua. Mai te Ê a te mau pipi, e tià atoà ia tätou teie pähonoraa no te mea e hia taime to tätou faaäpiäpiraa te vaha i te mau parau faufaa òre, ia teiaha te fäito i te ìno, no te faatià ia tupu te àmahamaha, teie huru tupuraa òhipa e parau ia tätou e àita e a tire.
No tätou e te Mäòhi, teie paha ia te poroì, i teie nei, e haere tätou e täuaro i te nünaa, i te faaìteraa ia na e, te faahoì nei te Atua ia òe io òe iho, i roto i ta òe iho, ia riro te Atua ei Atua no òe, e ia riro òe ei nünaa no te Atua, ia Atua te Atua, ia fenua te fenua, ia mäòhi faahou òe, e ia maitaì roa òe i roto i te aroha e te here o to òe Atua ia òe, e parau tätou e, Ê.
Te parau teie, e aha rä te auraa o teie parau, tei riro ei mea märamarama no te tahi, e tei haapeàpeà i te âau o te tahi no to na fifi i te öraa i roto i te parau. E au atu ra e, e pähee noa te parau nä nià i to na tarià mai te taa òre o ia i te mea ta na i faaroo, e tauturu rahi hoì te tarià no te taata i te fäito te teimaha o te parau. Te haamataraa teie o te faaroo, te tahi ia parau tei tae mai ia òe ra, ua ìte òe i taua parau ra, ua märamarama, e ua färii. Ua riro te färiiraa ei täpaò faaìte e, ua hau to òe manaò e te âau atoà. Ei parau ihoä rä i te ômuaraa, no te mea na te parau e ìriti i te ùputa o te märamarama e te ìte, e no te mea ua ìte, i òhie ai i te färii. Te auraa o teie parau färii, teie ia, tuu i roto i te tahi vairaa, mai te tahi mea tei òre i hinaarohia ia moè, aore ra mai te tahi huero tei tuuhia i roto i te repo. E no te mea ua täpeà òe i teie parau i roto i to òe âau, e òhipa atu teie parau i roto i to òe âau, oia hoì e tämau noa òe i te tütonu i nià i teie parau, e i nià i te mau ùputa âpï ta na e ìriti rii mäite noa atu, no reira e haamata to òe manaò e to òe âau i te täamu i nià i teie parau e te taata na na taua parau ra, e i te pae hopeà, e riro mai te taata na na te parau e te parau i färiihia ei hoê i roto i te âau o te taata i färii i taua parau ra. Ma te feruri maite, ia ìtehia te märamarama, te teatea, e te òhie. I mua i te pöiri, e tuu mai i te märamarama, i mua i te peàpeà, e tuu mai i te hau.
Hiò na tätou i te tahi ià i mua i te tahi ùpeà, e nä hea te ià, e faaü i te ùpeà, aore ra e hoì i muri. Ua manaò tätou e, e tano tätou e haere i roto i te oraraa mai te haapae roa i te Atua. Ia ihu, ia mau, aore ra ia fifi, mai te ià, e manaò te tahi e haere i mua, âreà te tahi, ua faaoti ia te manaò e, e hoì. Te hoìraa, te haereraa ia i te vähi i nä reirahia mai. Aita te tahi i ìte faahou, aore ra aita e haamanaò faahou ra e, no hea mai o ia. Te taime mau te reira e hinaaro ai tätou i te tauturu, eiaha i nià i te manaò e, te tahi taata e haere mai no te rave i te òhipa tei òre tätou i ìte i te rave, aore ra tei òre tätou i hinaaro i te rave, te tahi rä taata e haere mai e paraparau ia tätou, ei taata rä ta tätou e färii i te faaroo, mai te ìte maitaì tätou e, tei ia tätou ihoä te faaotiraa hopeà. Ia au rii i te faaìteraa a te Taramo 119 i te ìrava 131 Ua hämama vau i taù vaha mä te ihaiha, ua nounou hoì au i ta òe parau. Oia atoà ia ta Mau Arii 1 faaìteraa i te pene 3 i te ìrava 12 Inaha, tià ia ù to hinaaro te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu.
Te reo ia o te Atua i nià i te taata. No reira, ia hinaaro òe i te ora, e haere ia i te vähi tei reira te ora, ia hinaaro òe i te here, e haere ia i te vähi tei reira te here. Haamanaò e, ua hämani te Atua ia òe i to na huru e to na hohoà, ua hämanihia òe i te repo fenua. No reira, tei te fenua ra te tahi vähi no to òe parau, tei te Atua ra te tahi e here te fenua, e here te Atua ; e metua te fenua, e Metua te Atua. Aita òe i anihia e mäìti, e parau rä. Aita te Atua, aita atoà te fenua e mau ra i to òe vaha, tei ia òe noa ra ihoä to òe vaha, aita atoà hoì te Atua i ìriti i te märamarama ta na i horoà no òe. I teie nei ua ìte òe i te fäito, haamanaò e, ia hinaaro òe i te ora, e ora òe ; ia hinaaro òe i te here, e ìte òe i te here, e here hoì te fenua, e here te Atua a faatià, e a parau e Ê.
Mai te taata tätou tei ora noa mai na e to na turutootoo, e tei anihia e faaruè i teie nei no te mea e maraa noa tätou ia haere mai te haapae roa i teie räau. Aita atu to tätou türuìraa, aita atu e uruaìraa maoti rä, te parau e anihia ra ia tätou e faaruè i to tätou turutootoo. E parau teie ta tätou i färii mai te feàa òre te manaò, te täatoàraa o to tätou âau, to tätou manaò, e to tätou värua ua hope roa i nià i te parau i parauhia ia tätou.
Ia ora na.
Teraì òr. Faatura.
Puta turu, Te Here, Päpaìhia e Turo a Raapoto.