Overblog Suivre ce blog
Editer l'article Administration Créer mon blog
20 juillet 2017 4 20 /07 /juillet /2017 21:32

Täpati 23 Juillet 2017.

Taiòraa

Mätaio 13,24-43

Te tïtänia

24 Ua tuu atu ra o ia i te tahi ä parapore ia rätou, nä ô atu ra E au te Hau o te raì i te hoê taata i ueue i te huero maitaì i roto i ta na ra âua/faaapu. 25 I te taime te taòto ra te taata, ua haere mai ra to na ènemi, ueue iho ra i te tïtänia i roto i te tïtona, e haere ê atu ra. 26 Ia tupu te mau räau rii e ia faahotu mai i te mäa, ìteä-atoà-hia iho ra te tïtänia. 27 Ua haere mai ra te mau tävini o te fatu fare, ua parau mai ra ia na E te Fatu, eere änei i te huero maitaì ta òe i ueue i roto i ta òe âua no hea iho nei hoì te tïtänia 28  Ua pähono atu ra o ia ia rätou Na te ènemi te reira i rave. Ua parau mai ra te mau tävini ia na E tii änei mätou e hutihuti/huhuti  29 Ua parau atu ra o ia Eiaha, o te taäa atoà òutou i te tïtona ia hutihuti òutou i te tïtänia. 30 E vaiiho noa ia tupu âpipiti noa na e tae noa atu i te ôotiraa tïtona e ia tae i te tau ôotiraa ra, na ù ia e parau atu i te feiä ôoti E mata na nä mua roa i hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa tïtona.

Te huero tïnapi

(Mär 4.30-32; Rut 13.18-19)

31 Ua tuu faahou atu ra o ia i te tahi ä parapore ia rätou, nä ô atu ra E au te Hau o te raì i te hoê huero tïnapi ta te hoê taata i rave e tä na i tanu i roto i ta na âua/faaapu; 32 o te huero iti roa ia i te mau huero atoà nei, ia tupu rä e rahi roa ia i te mau räau tupu atoà, e e riro mai ei tumu räau, e e tau mai te mau manu o te reva no te hämani i to rätou ôfaaraa i nià i to na mau âmaa.

Te faahöpue

(Rut 13.20-21)

33 Ua parau atu ra o ia i te tahi ä parapore ia rätou E au te Hau o te raì i te faahöpue tei ravehia e te hoê vahine e tei ânoìhia i roto i nä fäito färaoa ota e toru, e höpue atu ra te täatoà o taua färaoa ra.

No te aha Ietu i parau parapore ai

(Mär 4.33-34)

34 Taua mau parau atoà ra, ua parau paraporehia ia e Ietu i te tiàa rahi aore roa e parau tä na i parau atu ia rätou tei òre i na-roto-hia i te parapore, 35 ei faatupuraa i tei parauhia e te perofeta E hämama taù vaha no te parau i te parapore, e poro vau i te mau òhipa i hunahia mai te mauraa mai o teie nei ao

Te tätararaa o te tïtänia

36 Vaiiho iho ra Ietu i te tiàa rahi, e tomo atu ra i roto i te fare. Ua haere mai ra ta na mau pipi, nä ô mai ra ia na a tätara mai na ia mätou i te parapore o te tïtänia i roto i te âua/faaapu. 37 Ua pähono atu ra Ietu ia rätou O tei ueue i te huero maitaì ra, o te Tamaiti ia a te taata. 38 Te âua ra, o teie nei ao ia; te huero maitaì ra, o te mau tamarii ia o te Hau; e te tïtänia ra, o te mau tamarii ia a te värua ìno/hämani ìno. 39 Te ènemi i ueue i te tïtänia ra, o te tiàporo ia; te ôotiraa tïtona ra, o te hopeà ia o teie nei ao te feiä ôoti ra, o te mau merahi ia. 40 E mai te tïtänia i haaputuhia e i tähuhia i te auahi ra, òia atoà ia i te hopeà o teie nei ao. 41 E tono mai te Tamaiti a te taata i ta na mau merahi, e na rätou e hutihuti o ia i te mau tumu atoà e turori ai e te feiä e faatupu i te ìno, mai roto atu i to na Hau; 42 a huri atu ai ia rätou i roto i te umu auahi; tei reira te òto e te àuàuraa niho. 43 Ei reira te feiä parau-tià e ànaana mai ai mai te mahana ra, i roto i te Hau o to rätou Metua. E tarià tö na ra, ia faaroo ia.

Manaò

No teie mahana haamoriraa,  e haamata te manaò na roto i teie Taramo 86 1 E pure na Tävita. A färiu mai i to tarià, e te Fatu, a faaroo mai ia ù, ua haèhaa vau e te faufaa òre. 2 E faaora hoì òe i taù värua, te arohahia mai nei hoì au e òe ia ora, e taù Atua, to tävini e tiàturi ia òe nei.3 E aroha mai òe ia ù, e te Fatu, te tiàoro nei au ia òe, aita e mahana tuua. 4 E faaòaòa mai i te värua o to tävini, te faaàraàra atu nei au i taù värua ia òe, e te Fatu e. 5 Te maitaì ra hoì òe, e te Fatu, e ua tià ia òe te faaòre mai i te hara nei e te aroha rahi i te feiä atoà e tiàoro atu ia òe ra. 6 E faaroo mai, e te Fatu, i taù pure, e haapaò mai i ta ù e ani nei.7 Ia tae i te mahana e àti ai au ra, ua tiàoro vau ia òe ra, e faaroo mai hoì òe ia ù nei. 8 Aore o òe e fäito, e te Fatu, i roto i te mau atua atoà ra, aore hoì e òhipa e au i ta òe ra òhipa. 9 Te mau fenua atoà i hämanihia e òe ra, e tae atoà mai e haamori i mua ia òe, e te Fatu, a faateitei ai i to òe ra iòa. 10 E Atua rahi hoì òe, e te òhipa taa ê ta òe e rave ra O òe anaè ra te Atua mau 11 E haapii mai òe, e te Fatu, i to òe ra èà, e haapaò vau i ta òe ra parau mau, ia rötahi mäite hoì taù âau i te mataùraa i to iòa na. 12 E haamaitaì ä vau ia òe, e te Fatu, e taù Atua, mä taù âau atoà ra e faarahi tämau ä vau i to òe ra iòa. 13 Ua rahi hoì to òe aroha ia ù, ua faaora hoì òe ia ù i häte i raro roa ra. 14 Te feiä teòteò tei tià mai, e te Atua, e märô mai ia ù e te âmuiraa o te feiä àito ra, tei tïtau mai ia ù ia pohe aore hoì rätou i tuu ia òe i mua ia rätou ra.15 O òe rä, e te Fatu, e Atua hämani maitaì òe, e te aroha, e te faaòromaìraa roa, e te rahi hoì i te faaherehere, e te parau mau.16 E haapaò mai ä òe ia ù, e hämani maitaì mai hö mai na i to òe ra itoito i to tävini nei, e faaora hoì te tamaiti a to tävini vahine.17 E faaìte mai ia ù i te tahi täpaò maitaì, ia ìte mai te feiä i riri mai ia ù nei a haamä atu ai, ia tauturu mai òe, e te Fatu, e ia haamähanahana mai ia ù.

Tätou parau no teie mahana haamoriraa e parau ia tei päpaìhia e Mätaio i te faatiàraa a Ietu i te pene 13 i te mau ìrava 24 e tae i te 43. Tei tuhahia e toru tuhaa i roto i teie mau huru parauraa ia ìtehia te faufaa o te  türamaraa e tïtauhia ra Ietu i te faatiàraa na roto i te parapore.

- E au te Hau o te raì i te hoê taata i ueue i te huero maitaì i roto i ta na ra faaapu. Ia tupu te mau räau rii e ia faahotu mai i te mäa, ìteä-atoà-hia iho ra te tïtänia, e hutihuti, vaiiho noa ia tupu âpipiti noa na e tae noa atu i te ôotiraa tïtona e ia tae i te tau ôotiraa ra, na ù ia e parau atu i te feiä ôoti E mata na nä mua roa i te hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa.

-E au te Hau o te raì i te hoê huero tïnapi ta te hoê taata i rave e tä na i tanu i roto i ta na faaapu, huero iti roa ia i te mau huero atoà, ia tupu rä e rahi roa ia i te mau räau tupu atoà, e riro mai ei tumu räau, e tau mai te mau manu o te reva no te hämani i to rätou ôfaaraa i nià i to na mau âmaa.

-E au te Hau o te raì i te faahöpue tei ravehia e te hoê vahine e tei ânoìhia i roto i nä fäito färaoa ota e toru, e höpue atu ra te täatoà o taua färaoa ra.

No te aha Ietu i parau parapore ai no te faatupuraa i tei parauhia e te perofeta E hämama taù vaha no te parau i te parapore, e poro vau i te mau òhipa i hunahia mai te mauraa mai o teie nei ao

Te tätararaa a Ietu, O tei ueue i te huero maitaì ra, o te Tamaiti ia a te taata. Te âua ra, o teie nei ia ao te huero maitaì ra, o te mau tamarii ia o te Hau; e te tïtänia ra, o te mau tamarii ia a te värua hämani ìno. Te ènemi i ueue i te tïtänia ra, o te tiàporo ia te ôotiraa tïtona ra, o te hopeà ia o teie nei ao te feiä ôoti ra, o te mau merahi ia. E mai te tïtänia i haaputuhia e i tähuhia i te auahi ra, òia atoà ia i te hopeà o teie nei ao. E tono mai te Tamaiti a te taata i ta na mau merahi, e na rätou e hutihuti o ia i te mau tumu atoà e turori ai e te àuàuraa niho. Ei reira te feiä parau tià e ànaana mai ai mai te mahana ra, i roto i te Hau o to rätou Metua. E tarià tö na ra, ia faaroo ia.

I to tätou faaroo i teie mau parau te naò nei ia te manaò, te Atua Nui Tumu Tahi e te fenua i te mea  o te Atua

te mätamua, e o te Atua te faahopeà, e aita atu Atua ê atu i te Atua. Te turu nei te Värua Parau Mau i to tätou nei paruparu, ma te päheru i to tätou âau i to te Värua hinaaro, tei au i to te Atua ra hinaaro. Ei reira tätou e ànaana ai mai te mahana ra, i roto i te Hau o to tätou Fenua no te ao Mäòhi i Mäòhi Nui nei. E tarià tö na ra, ia faaroo ia.

Te Atua Nui Tumu Tahi e te fenua, ua ìte ia tätou e, te huru o te fenua, te huru atoà ia o te taata. Rau noa atu ai te huru o te taata, rau noa atu ai ta rätou hiòraa i to rätou iho parau, te parau o te fenua, e te parau o te Atua. Eiaha tätou e tiàturi e, e hoê ta rätou hiòraa i teie nä parau. Ia manaò tätou e faahapa i te tahi nünaa te mea o ia i òre i hiò i te parau o te fenua e to te Atua mai ta te nünaa Ìteraèra e hiò ra, te faahapa atoà ra ia tätou i te tiàmäraa o te Atua i hinaaro ia taa ê te tahi nünaa i te tahi, e te haafaufaa òre ra hoì i te tiàmäraa ta te Atua i horoà i te reira e te reira nünaa no te faaìte i te märamarama ta te Värua Moà i horoà ia rätou i nià i te Atua. Aita roa atu i roto ia tätou te manaò parau e, te vai ra te mea tano, te vai ra te mea hape, aore ra ta vai te mea tano e ta vai te mea hape. No te reira huru manaò i rahi ai te ìno i te ravehia i nià i terä e terä nünaa, àti aè te ao nei, no te hinaaro faahepo e te faautuà i te taata ia òre noa atu ia färii i te parau mau a te tahi nünaa. Eita paha tätou e hape ia parau tätou e, ua tuu te Atua i te tahi pura märamarama i roto i te mau nünaa atoà, aita rä e nünaa tei hope te märamarama o te Atua i roto ia na. Ia färii tätou i te reo o te Atua e parau ra e  No ù te mau fenua o te ao nei e te feiä atoà e pärahi i reira, eita e tià ia tätou ia òre ia ìte i te tiàmäraa o te mau nünaa atoà i te horoà mai i ta rätou hiòraa i nià i te fenua e te Atua. Te ineineraa hoì tätou i te hiò e te faaroo i te manaò o te tahi e te tahi, eere ia i te täpaò färii, eere atoà rä i te manaò pätoì, e ìteraa noa rä i te tiàmäraa ta te Atua i horoà i te mau nünaa. Te rahi o te hoê nünaa, aita to roto i te faaäuraa ia na e te ìmiraa hoì i te räveà ia riro o ia mai te tahi atu nünaa. Te fifi e riro i te tupu mai, to te tahi ia nünaa ìmiraa i te räveà ia fäito o ia i te nünaa ta na i faariro ei hiòraa e ei faahinaaroraa na na; âreà te mea faufaa, te faatupuraa ia te nünaa tätaì tahi i to na iho parau, ia au i te haapiiraa ta te värua o te fenua e faaìte ra ia na. To tätou àti rahi i teie mahana i roto i te faatereraa o te Etärëtia, e i roto atoà i te faatereraa o te fenua, te mea ia tätou i faahinaaro i te huru, te peu, te manaò, e te hiòraa a te Papaâ, mai te haafaufaa òre ia tätou iho. Ia ìno tätou, i reira tätou e pari ai i te Papaâ. Ua hape. No te aha. No te mea aita e ìno e haere to na tupuraa i te rahi mai te peu aita tätou i faaòhie i to na tupuraa. Mai te peu e tiàmäraa no tätou, mai ta tätou i faahiti noa mai na, eere ia no te färii noa i te tupuraa o te ìno, no te pätoì atoà rä i to na mauraa mai e no te ìmi i te räveà ia morohi roa atu. E tano ia parauhia e, ua hape ta tätou taiòraa e ta tätou märamaramaraa i te tatararaa o Ietu no te Tïtänia mea tià ia taiò faahouhia.

Te ìte ra tätou e, ua färii hope roa Ietu i te täpaò no te ora ta te fenua e faaìte ra, no te mea ia ua färii hope roa o ia i te tumu o te ora, oia te fenua, e ua färii hope roa hoì i te Atua, te tumu o te ora. Te Atua Nui Tumu Tahi e te fenua, hoê ä ia, i roto i te mea ta tätou e parau nei e, te ôroà a te Fatu, te haapäpü atoà ra Ietu i to na hoêraa i te fenua, te mea atoà ia o ia i rave ai i teie iòa, Tamaiti na te taata, oia hoì e tamaiti na te fenua, Aita Ietu i huna, aita hoì i haafaufaa òre i te fenua, ua faateniteni rä o ia i te parau o te fenua. Haamanaò atoà rä tätou e, ia òre tätou ia färii i te horoà a te fenua, ia òre hoì ia ìte i te reira ei horoà na te Atua, ua tärahu tätou i te fenua, e ua tärahu hoì i te Atua. Eere rä e, o te reira anaè, te mea atoà rä te reira e faaère ia tätou i te ora. No reira, aita atu e räveà e matara ai ia tätou te ùputa o te ora maoti rä, ia vaiiho i te Atua ia  hämani faahou i to tätou tarià. Te auraa, ia òre tätou ia ìmi i te räveà ia matara te ùputa o te ora, te vai matara noa ra te ùputa o te àti e te pohe. Etärëtia noa ai tätou, eita tätou e tano e nä nià aè i te Atua, eita hoì e tano i te tahi noa paturaa rima, e haamoè i ta te Atua tïtauraa ia tätou i teie mahana. Ahiri e parau teie no te pohe o te taata hoê, eere ia i te mea peàpeà roa, no te mea rä e, e parau teie no te pohe, aore ra te ora o te nünaa faaroo, eita e tià ia tätou ia haameremere e ia tähitohito i te hinaaro o te Atua. E tià roa rä ia haapäpühia, ia òre to tätou manaò ia rara  te färiiraa i te fenua, eere te färii-noa-raa i te mäa no roto mai i te fenua, no te mea eere te reira anaè te horoà a te fenua, noa atu ia e, ta na te reira horoà faufaa roa aè i maitaì ai e i òhie ai te oraraa o te taata, e tae noa atu i te mau mea oraora atoà e nee nei e të hähaere nei nä nià i te tua o te fenua. No tätou te taata nei, te färiiraa i te fenua, te färiiraa ia e Tumu te mäòhi nä mua roa. Te fenua ta te Atua i haamaitaì e ta na i haamoà, te fenua atoà ia no reira tätou i te raveraahia mai, tätou, e te mau Tupuna ta teie fenua i faaàmu, ta na i haapii, ta na i arataì i roto i te oraraa, e ta na i faaìte i te parau o te Atua.

 

Teraì òr. Faatura.

 

Puta turu, Te Atua e te  Fenua a Turo a Raapoto.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens