Mahana mätamua pureraa tau 2017
Mahana mätamua
Täpati, 1 no Tënuare 2017.
« Te oraraa i roto i te Hau, e hinaaro tumu te reira no te Fatu ia tätou »
TUMU PARAU Ua pohe O Ia no te täatoà. (2 Tor 5. 14)
TE MAU TAIÒRAA
• Ìtaia 53. 4-12
• Taramo 118. 14-29
• 1 Ioane 2. 1-2
• Ioane 5. 13-17
TÄTARARAA Ia au i ta na tiàturiraa, e i to na faaroo ia Ietu, aita atu e mea o ta Pauro i haafaufaa e i poro no te ora o te taata mäoti, te pohe o te Metia i nià i te räau tärava. I roto i ta na tiàturi, aita o Ietu i pohe no na iho, aita o ia i pohe no te tahi noa nünaa, i pohe rä te Metia no te mau taata atoà e no te mau nünaa atoà o teie nei ao.
E fäìraa te reira na Pauro, òia te tahi taata o ta te Fatu i färerei e o ta na iho i faariro ei tävini no na. Te auraa, te mau taata atoà o tei pähono i te tïtauraa a te Fatu, aita atu ta na, mäoti, te amoamoraa i te parau o te reira Fatu ta na i färii i te pee, i te faatupu i to na hinaaro na te mau vähi atoà e taahihia e to na nau âvae.
I roto i te roaraa o te tau ta tätou i rätere mai, te heheu-noa-hia nei i mua ia tätou te parau o te tahi mau toa no te tahi mau fenua, te tahi mau nünaa o te ao nei, o tei höroà atoà i to rätou oraraa no te ora o te fenua e te ora o te nünaa.
Ia faaroo hoì tätou ia Ietu ia parau i ta na mau pipi e, e aroha òutou ia òutou iho mai ia ù i aroha atu ia òutou na, e ia höroà te taata i to na iho ora no to na ra mau täuà, aita roa atu e taata aroha ê atu i te reira.
I mua i te reira huru parauraa ta te Fatu, te haamanaò noa ra tätou i te tahi mau àito tei höroà atoà i to rätou ora no to tätou iho nünaa. Päkoko i te àroraa i te nuu färani no te pärururaa i te Henua Ènana, Opuhara i te àroraa ia Pömare i te hooraa i te nünaa Mäòhi i te Hau Färani. Te haamanaò atoà ra tätou ia Matahi tei àro atoà no te päruru ia Raro Mataì. E te vai noa atu ra te mau àito i nä reira i te raveraa no te päruru i te nünaa.
Haamanaò atoà nei tätou i te rahiraa o te mau tamarii Mäòhi o tei faaruè mai i te fenua no te haere e àro i te nuu purutia no te faaora ia färani iho. No te haapäpü ia tätou e, tau Mäòhi atoà o tei pohepohe na no te tahi, mai ia Ietu hoì tei òre i pohe no na, no te ao nei rä.
Parau noa atu ai tätou i te parau no teie mau àito e ta rätou mau àroraa, hoê anaè rä fä, ia ora te nünaa ta te Tumu Nui i haapärahi i nià i te tua o te fenua nei.
Ta tätou tumu parau no teie mätahiti, teie ia : « Te oraraa i roto i te Hau, e hinaaro tumu te reira no te Fatu ia tätou ». E aha te mea e topa ai te Hau i roto i te pü o te nünaa Mäòhi i teie mahana, inaha te vauvau e faahau nei i to na oraraa, ua hutihia e ua riro ia verä mä.
I teie mätahiti 2017, e haamanaò ai te mau Ètärëtia Porotetani atoà o teie nei ao i te 500raa o te mätahiti to Taravino mä faatïtïàifaroraa, te tahi faahoì-faahou-raa i te taata i nià mau i te mea ta te märamarama o te parau a te Atua e haapii maitaì mai ra ia na i te mau taime atoà.
Ua riro te òhipa i ravehia e te reira mau taata o taua tau ra ei räveà e tiàmä ai te taata tätaì tahi i te pae o to na feruriraa, te paeàu o ta na faaìteraa i to na manaò, e i te paeàu o ta na oraraa i te hinaaro o te Tumu Nui ia na.
Te reira rä mau faaâpïraa, mau faatïtïàifaroraa, mau faatiàmaraa, ua faatupu atoà i te mau âmahamaharaa i roto i te Ètärëtia, e i roto atoà i te nünaa. E mai te mea i teie mahana, te ìriti nei tätou i te hepetoma pure no te hoêraa o te mau maru metia o teie nei ao, a ìte tätou e, aita roa e noaa ia tätou, te faatupu i te hoêraa, mai te mea, eita tätou e nä roto te faatupuraa e te oraraa i te hau hinaarohia e to tätou Fatu. Ia ora na.
PURE
Te Atua to mätou Metua, Nä roto ia Ietu, ua höroà mai òe ia na no te täatoà. Ua ora mai o ia mai ia mätou, e ua pohe o ia mai ia mätou. Ua färii òe i te reira e ua faateitei òe ia na i te oraraa âpï i pïhaì iho ia òe. Färii atoà mai òe ia mätou, o tei pohe mai ia na. E te ìmiraa i te hoêraa o te Värua Maitaì, mä te ìte i te hotu o to òe hanahana, mai teie nei e a tau e a hiti noa atu. Amene.