Ruta èv. 23,35-43

Tāpati 20 no Novema 2016.

Faafaite

Ruta èv. 23,35-43

35 Te tià noa ra te taata atoà i te hiò-noa-raa atu. Ua tähitohito atu ra te mau tävana e te taata atoà ia na, nä ô aè ra. Ua faaora hoì o ia ia vëtahi ê, o te Metia o ia te here a te Atua ra, a faaora o ia ia na iho  36 Ua tähitohito atoà atu ra te mau faèhau  ia na, e haere atu ra, hopoi atu ra i te vineta na na, 37 nä ô atu ra O te Arii òe o te âti-Iüta ra, a faaora ia òe iho   38 E päpaìhia iho ra te hoê parau i nià aè i ta na upoo, i te parau Herëni, te parau Röma, e ta te Hepera O TE ARII TEIE O TE ÂTI-IUTA. 39 Ua tahito atu ra hoì ia na te hoê i taua puè taata rave parau ìno i faatatäurohia-atoà-hia ra, nä ô atu ra O te Metia òe ra, a faaora ia tätou

40 Ua àvau mai ra rä te tahi, nä ô mai ra Aita o òe mataù i te Atua tei pohe atoà hoì òe hoê ä huru. 41 E mea tià rä to täua pohe, o te utuà mau hoì teie i ta täua i rave, âreà teie nei taata, aita roa a ana e parau ìno.

42 Ua parau atu ra o ia ia Ietu,  E te Fatu, e haamanaò mai òe ia ù ia tae òe i to òe ra Pätireia. 43 Ua parau mai ra Ietu ia na Ei parataito ia òe e o vau atoà i teie nei ä mahana, oia mau ta ù e parau atu ia òe nei.

 Manaò

Ia hau Mäòhi Nui e ia òaòa te nünaa Mäòhi  i te fenua e faanaòhia ra i tià ai te fare o te Atua Nui Tumu Tahi.  Te tià nei to tätou mau âvae i teie nei i roto i to mau ùputa no Mäòhi Nui.  Patuhia ai Mäòhi Nui mai te hei täatiàti-hua-hia e te mau motu no te Moana Nui o Hiva. Mai reira te mau ôpü ia fano, te mau ôpü a te Tumu Nui, ei faaìteraa ia no te mau  fenua no nià Mataì, Raro Mataì, Tuamotu, Mangareva, Tuhaa Pae,  Ènata, Ènana,  ia  haamaitaì i te iòa o te Atua Nui Tumu Tahi. I reira te mau tumu no Mäòhi  Nui i te haamauraahia, te mau hei o te mau ùtuafare te natiraahia.  E pure tätou no Mäòhi Nui ia hau  ia maitaì  te feiä i hinaaro.  Ei hau to roto i te mau fenua e ia Moana Nui O Hiva,  ei maitaì to roto i te mau fare atoà. No te mau taeaè te mau tuahine i parau ai tätou i teie nei  ei hau. No te fare o to tätou Atua Nui Tumu Tahi, e tämau ai tätou i te ìmi i te maitaì.

Te  haere noa  mai ra te mau ôpü  âpï tei horoà ia Mäòhi Nui te hoê hohoà e au i te hinaaro o te fenua, e parau ai, inaha te ivi te ìò te tumu o te tino e te värua o te nünaa. I mütaa iho ra hoì, i nià ia tätou, o te Atua Nui Tumu Tahi tei arataì ia tätou i roto i te ôpuaraa faaora èi faufaa faatupu òhipa. Taua faufaa ra o te tiaì e te haapii, ia hinuhinu o Mäòhi Nui i te faatahinuraa a te Atua Nui Tumu Tahi.  

 Te haamaitaì nei tätou i te Metua Nui Tumu Tahi, o tei faaau mai ia tätou ia au ia tätou te hoê tufaa i te âià o te feiä moà i te ao ra. O tei faaora ia tätou i te värua mana o te pöuri, e ua tähiti ê mai ia tätou i roto i te Hau o ta na Tamaiti here ra, no na i noaa ai to tätou ora, te hara i faaòrehia ra, i to na ra toto. O te huru mau o te Metia o te Atua hiò-òre-hia ra, o tei fänau na i te mau mea atoà i hämanihia ra. Ia na  i rähu i te mau mea atoà nei, o to te raì, e to te fenua nei, o tei ìteä ia hiò ra e tei òre i ìteä, te feiä teröno, e te feiä hau, te hui-arii, e te feiä mana. E mea rähu- anaè-hia ia e ana, e no na anaè. E o mua ä hoì o ia i te mau mea atoà nei, e o ia të mau i te mau mea atoà nei. O Ietu te upoo o te tino ra o te Ètärëtia Porotetani Mäòhi o te mätamua o ia, te mätahiapo o te feiä i pohe ra, ia hau ê atu ä o ia i te mau mea atoà nei. Tei roto ia na te î i te mau mea atoà ra vai mau atu ai i ta te Metua i faatupu. E ia faafaite hoì  o ia i te mau mea atoà ra ia na iho i roto ia na ra, i te hau i noaa i te toto o to na ra tätauro to te raì e to te fenua nei, ia faite ä ia na.

Oia mau ua tià noa te mau taata no te hiò i te Tämaïti  a te Atua Nui Tumu Tahi i te pae tätauro i taua mahana ra i te päpaìraa à Ruta èv. I te pene 23 i te mau ìrava 35 e tae i te 43. Ua tähitohito te mau tävana te ärataì tivira o te nünaa,  ma te parau e ua faaora o ia ia vëtahi ê, o te Metia o ia te here a te Atua ra, a faaora o ia ia na iho. Ua tähitohito atoà te mau faèhau, mau taata i faanahohia  no te paruru i te nünaa  e vineta  te ïnu i höroàhia,  i te parauraa e o te Arii òe o te âti-Iüta ra, a faaora ia òe iho. Päpaìhia iho ra te hoê parau i nià aè i ta na upoo, i te parau Herëni, te parau Röma, te Hepera O TE ARII TEIE O TE ÂTI-IUTA. I nià i te tätauro   tahito atoà  te hoê i taua puè taata rave parau ìno i faatätauro-atoà-hia ra, nä ô atu ra O te Metia òe ra, a faaora ia tätou. Ua àvau atu rä te tahi, nä ô mai ra Aita o òe e mataù i te Atua tei pohe atoà hoì òe hoê ä huru. To täua pohe, o te utuà mau hoì teie i ta täua i rave, âreà teie nei taata, aita roa a ana e parau ìno. E te Fatu, e haamanaò mai òe ia ù ia tae òe i to òe ra Pätireia. Te reo o Ietu ia na Ei parataito ia òe e o vau atoà i teie nei ä mahana, oia mau ta ù e parau atu ia òe nei. E reo faafaite teie to Ietu ia tupu te hau, te faahau nei i te âau o te taata i roto i te peàpeà. Te auraa, e hopoià teie ta Ietu e pähono nei, te taata e rave i ta na òhipa, e ère i te tahi mea mama, e ère i te tahi tere e ori haere, e ère i te tere mataìtaì, e raveà te reira hopoià e àfaro ai te èà o te taata, no te mea, aita atu o ta na, te faaotiraa i te òhipa no reira o na i farii ai teie hopoià i nià ia na. Mea mama  no te mea na te âau i farii, e ère i te mea faautahia. Te taata i faaèrehia i te maa, mea teiaha, e roaa te ìnoìnoraa, te taata ra i farii i te faaère ia na no te tahi tumu, aita te reira mea e riro ra ei mea teiaha, no te mea na na i hinaaro, e, e ôpuaraa ta na e tïtau ra. Faahiti atoà mai ra tätou i te parau, te tahi metua ia tae i te tau fifi, aita o na e peàpeà ia ère o na, ia ite ra o na i ta na tamarii te tämaa ra. Te reira, e ère i te mea teiaha no na, mea mama no na te reira faaèreraa ia na. No reira, ua parau anaè Ietu e, Ei parataito ia òe e o vau atoà i teie nei ä mahana, i roto ihoä i te parau, te vai ra te haapäpüraa e, eiaha e manaò e, te taata e rave i te òhipa na to tätou Fatu te Metia, e tere ori haereraa teie, mea teiaha ihoä, e taumi ihoä te hopoià ia tätou i te vahi manaò-òre-hia e tätou. No te mea ra, e hinaaro teie na te taata o tahi, ua ìte ia te taata tahi, eita te reira mea e riro ei mea teiaha mai tera e faautahia ra i nià i te taata tei hau to na âau, aore ra, mai tera e faautahia ra i nià i te taata tei òre te âau i hau.

Te Mäòhi e färii e ora oia i to na fenua ia  Mäòhi Nui, ua faafaite  o ia i to na âau ma te tiàturi e faufaa te vai a i roto i te parataito, ta reo e parau ra e Rohutunoànoà vahi e mauhia ra e te hau, hotu noa te noànoà mai te tiare Maurua e ùaa noa ra i te mau mahana i te mau fenua atoà i Mäòhi Nui nei.

Ia ora  Mäòhi Nui.

Teraì òr. Faatura.