TE TURE A TE ATUA (6)
TE TURE A TE ATUA(6)
No te aha te taata i parauhia ai e te Atua ia faatura atu to na metua tane e to na metua vahine ?
Te tumu te Atua i parau ai i te tamarii ia faatura i to rätou mau metua no te mea, te metua i te pae tino nei,
1) Te hopoià a te metua o tei noaa i te taata nei, na te Atua ia i horoà mai. Oia mau, te hopoià a te metua e mea horoàhia mai ia e te Atua i te taata. Na te metua e faatere i te oraraa ùtuafare. Na te metua atoà hoì e faatere i ta raua tamarii i roto i to raua ùtuafare, è ère ra na te tamarii e faatere atu i te metua. Te tahi hiòraa nehenehe roa, o Ietu iho e to na Metua i te ao ra. E Tamaiti o Ietu na te Atua, aita roa o Ietu i faatere atu i to na Metua, e aita atoà O ia i haru i te Toroà o to na Metua, ia au iho – a i te Firipi pene 2, i te ìrava 6 e te 7, O te huru ia O ia no te Atua, e aore O ia i parau e haru toroà ia faito atoà O ia i te Atua. Haapae atu ra i to na iho, rave atu ra i to te tavini ra huru, i te fanauraa mai ma te huru o te taata nei.
Ua faatura maite o Ietu i to na Metua, aore atoà O ia i rave i te hoê òhipa na nià i to na iho hinaaro, no reira o Ietu i parau ai i te ô no Tetetemane o tei papaìhia i roto i te Ruta evaneria i te pene 22, i te ìrava 42, E ta ù Metua, ia tià ia Òe ra, e hopoi ê atu i teie nei àuà ia tupu ra to Òe hinaaro eiaha to ù.
No reira te hopoià a te Metua, e hopoià horoàhia ia e te Atua i te taata nei. Ua riro te metua ei haapaò, ei arataì, ei faaamu, ei haapii, ei ara i nià iho i te mau tamarii o ta te Atua iho i horoà mai ai raua ra.
2) Te metua e tià ia no te Atua i pihaiiho i te mau tamarii.
Oia mau, te metua i te pae tino nei, e tià o ia no te Atua i pihaiiho i te mau tamarii. Te mau tamarii atoà o tei horoàhia mai i na metua ra, è ère o raua iho te fatu ia rätou, è ère atoà hoì te metua mau no taua tamarii ra, o te Atua iho ra te Metua mau e te Fatu mau no rätou. Ua haapäpü mai te Pipiria ia tätou i taua parau ta i roto i te Taramo 127 i te ìrava 3 Inaha hoì te tamarii ra, e tufaa ia no o ia Iehova ra, e ta te òpu i fanau ra, e utuà ia.
Ua riro te metua fanau ei tiààu noa i te mau tamarii o ta te Atua i horoà mai ia raua. E tiààu na pue metua i ta te Atua mau tamarii, ia arataì raua ia rätou, ia haapii hoì ia faaamu, ia faaahu, ia tiaì, ia ara, e aore ra, ia au i to te Atua hinaaro, eiaha ra ia au i to na pue metua hinaaro, e aore ra, ia au i to te Tiàporo hinaaro.
Te horoà nei te Atua i teie tau tamarii i roto i te rima o na pue metua, ma te tiàturi e e haapaò na metua i to raua toroà e to raua tiàraa metua. Hoê a huru e, i roto i teie nei horoàraa, te horoà nei te Atua i na pue metua ra, te hoê o e aore ra te hoê faaapu, e aore ia te hoê tareni, na na pue metua e òhipa ia faufaahia, e ia hotu mai. Ia rave tätou i te Parapore no te mau tareni ei hiòraa na tätou, te vai ra tei horoàhia hoê tareni, e toru tareni e pae tareni. Te taata e toru tareni e te pae tareni, ua òhipa raua i ta raua tareni e ua noaa faahou mai te mau tareni âpï. Teie na taata e piti tei òhipa i ta raua tareni e tei horoàhia ia raua, e parau tätou e, o na taata ia o tei horoàhia ia raua e 3 tamarii, e e 5 tamarii, e o tei faatere ia rätou ia au i to te Atua hinaaro. I ravehia mai ai teie huru hiòraa no nià ia i te faanahoraa a teie na taata itoito i te òhiparaa i ta raua tareni. O te huru atoà ia te reira no te metua tei òhipa ia ora te ùtuafare. Areà te taata o tei huna i ta na tareni e o tei òre i òhipa, e parau tätou e, te taata ia o tei òre i haapaò i ta na tamarii o ta te Atua i horoà mai ia na. Ua vaiiho noa oia i taua tamarii ra, ia rave mai ta na i hinaaro. E aore te metua i arataì ia na ia au i to te Atua mau hinaaro. Te metua o tei haapaò e tei tiààu maitaì i teie mau tamarii o ta te Atua i horoà, e mauruuru roa te Atua ia rätou. Àreà te metua o tei òre i haapaò i ta rätou mau tamarii eita roa te Atua e mauruuru ia rätou.
Eiaha tätou e manaò, eita te Atua e titau mai ia tätou, e ua haapaò anei tätou i ta na mau tamarii i horoà mai ia tätou, e aore ra aita. Oia, te vai ra ta te Atua titauraa ia tätou ia tae i te hopeà o teie nei ao. Eita atoà ra e òre te Atua i te titau mai ia tätou i teie nei a. e mea nafea ta tätou arataìraa i ta na mau tamarii i horoà mai ia tätou. Taua vahi ra, na tätou tataì tahi ia e pahono atu i te Atua.
Ta te metua tuhaa, o te arataìraa ia i ta rätou mau tamarii ia au i te hinaaro o te Atua, e ia òre hoì te tamarii e faaroo mai ra e òhipa ia, na te reira tamarii. Àreà ra ta te mau metua tuhaa ra, ua haapaò ia rätou. I taua taime ra, eita ia ta te Atua faahaparaa e iri mai i nià iho ia rätou.
Ta te tamarii e tuhaa atoà ta na, e rave i mua i te metua. Ta na tuhaa, o te faaturaraa ia i to na metua. Ia faatura anaè te tamarii i to na na pue metua taua taime ra, e òaòa te Atua ia na e e haamaoro atoà te Atua i to na puè mahana i te oraraa i te fenua nei. Ia òre ra o ia ia faatura i to na puè metua e haapoto te Atua i to na oraraa i te fenua nei. Ia òre te tamarii e faatura i to na puè metua, e aha ta na òhipa e rave ra ?
a) Te faafaufaa – òre ra i te Atua tei horoà i te hopoià a te metua i to na na puè metua ra.
e) Te faafaufaa – òre ra i te Atua tei horoà i taua tamarii ra i roto i te tiààuraa a to na na puè metua.
f) Te faafaufaa – òre ra o ia i te oraraa ùtuafare ta te Atua i haamau.
3) Te ùtuafare na te Atua ia i haamau. Oia mau, te ùtuafare na te Atua ia i haamau, è ère na te taata iho, è ère atoà hoì na te tahi mea ê atu i roto i teie nei ao, na te Atua ra i haamau i te mau ùtuafare atoà. Ia au iho – a i te parau no te faaipoiporaa o ta te puta Tenete i haapii mai ia tätou i roto i te pene 2 i te ìrava 24, no reira e faaruê ai te taata i ta na metua tane e ta na metua vahine, a àti atu ai i ta na vahine, e e riro hoì raua ei hoê. Teie te ùtuafare matamua, teie atoà te faaipoiporaa matamua roa o ta te Atua i haamau i rotopu i te taata matamua, ia Atamu e o Eva.
Na tumu atoà e toru i faahitihia i nià nei, o tei haapäpü mai ia tätou i te mau tumu mau.
E tià ai i te mau tamarii ia faatura i to rätou mau metua. Ia ìte atoà hoì te mau tamarii e to rätou mau metua na te Atua ia i horoà mai ei arataì ia rätou, no te arataì ia rätou, no te haapii, no te haapaò, no te tiaì, no te ara e no te faatere ia rätou i roto i teie nei ao. Ia òre anaè te tamarii e faatura i to rätou mau metua ra, hoê a huru e, o te Atua iho ta rätou e na reira ra, te METUA, no te mau metua, e te METUA no te mau tamarii atoà.
I roto i te oraraa nei, e parau tätou e, te vai nei e piti huru metua,
1) Te metua faaroo
2) Te metua faaroo – òre.
Ia hiò mai tätou i te parau no te metua faaroo, i reira, te ìte nei tätou e te metua faaroo,
o te mau taata ia o tei ìte i te parau na te Atua e o tei haapii ia rätou e nafea rätou i te arataìraa i ta rätou mau tamarii ia au i to te Atua hinaaro. Taua mau metua ra, eita rätou e faaruê i ta rätou mau tamarii i te hoê faaruêraa tià – òre, eita atoà hoì rätou e faatere i ta rätou mau tamarii i te hoê faatereraa ìno. E aha ra te mea o ta na e rave ? e faatere maitaì o ia i ta na mau tamarii ia au i ta te parau a te Atua i haapii ia na.
Te metua faaroo – òre, o te metua ia aore roa e parau na te Atua i roto i to na ààu. Aore o ia i ìte i te mea o ta te Atua i titau ia na ia rave i nià iho i te mau tamarii o ta te Atua i horoà ia na. E aha ia te mea e ìtehia i reira ? e parau tätou e, e faaue o ia i ta na mau tamarii i te mau faaueraa ìno e te tano – òre, e aore ra, eita o ia e faatere i ta na mau tamarii, e vaiiho ra o ia na te tamarii rätou iho e faatere. I nià i teie huru metua e tano ai ta tätou uiraa i nià nei. E nahea te tamarii ia faaue anaè to na metua ia na i te òhipa ìno ?
I roto i te hiòraa no te ture 5, to na tià mau, ia faatura ia te tamarii i te faaueraa a to na metua. I taua taime ra, aita ia te tamarii i hapa i mua i teie Ture, e i mua hoì i te Atua, ua haapaò maitaì ra o ia i taua ture ra. O vai ra tei hapa i taua taime ra, e parau tätou e, o te metua ia. Ua hapa o ia i mua i te Atua, o ia i arataì i ta na tamarii i roto i te ìno.
E tià atoà i te tamarii i te patoì i te metua o tei faaue mai ia na i te hoê faaueraa ìno roa, mai te peu taua faaueraa ra, te òfati atoà ra i te Ture a te Atua, eita o ia e faahapahia i taua taime ra. O vai ra te faahapahia , o te metua ia, o ia o tei faaue i ta na tamarii i te faaueraa o tei òfati i ta te Atua Ture.
I mua i te Atua, te metua e te tamarii ua riro ei mau tamarii anaè na te Atua. E tià raua e piti atoà ra i mua i te aro o te Atua ia tae i te hopeà o teie nei ao, no te faaìte i te òhipa i ravehia e raua i roto i teie nei ao.
E aha ta Ietu haapiiraa ia tätou no te metua e te tamarii ? ta Ietu haapiiraa no te metua e te tamarii o teie ia,
a) Ia hau atu to raua hinaaro, here, faatura i te Atua tei riro ei metua no raua. Ia au iho – a i te Mataio pene 10, i te ìrava 37, o tei rahi ta na hinaaro i ta na metua tane e ta na metua vahine, iti ia ù, aita o ia i au ia ù, e o tei rahi to na hinaaro i te tamaiti e te tamahine, iti ia ù, aita o ia i au ia ù.
e) E tupu te tamaì i roto i te metua e te tamarii no te parau a te Atua. Ia au i ta Ruta evaneria faaìteraa i te pene 12, i te ìrava 53, i faaìte mai i te naòraa e, e tamaì te metua tane i te tamaiti, e te tamaiti i te metua tane, e tamaì te metua vahine, i te tamahine, e te tamahine i te metua vahine, e tamaì te metua vahine i te hunoà vahine, e te hunoà vahine i te metua hoovai vahine.
Te ìte nei tätou i te faanahoraa no teie Ture ia au i te haapaparaa no te mau manaò o ta te pipiria e horoà nei, e to na faufaa. Tei titau ia tätou i te feia metua ia ara i nià i ta tätou mau tamarii, ia riro tätou ei metua tei horoà i te ora i roto i te mau tamarii.
I teie mahana te ìtehia nei te fifiraa teie tiàraa metua na roto ia i te faarooraahia te tahi mau òhipa tano òre i rotopu i te metua e te mau tamarii tamahine iho - a ra. Ino roa atu ai te reira to te tahi ia mau metua vahine tururaa i teie mau òhipa tano – òre rahi roa atu ai te faufaa – òre – raa teie tiàraa nehenehe roa te METUA.
No reira te titauhia nei ia tätou e faatupu i te parahi fatataraa i pihaiiho i ta tätou mau tamarii ma te turu ia rätou ei faaìteraa i to tätou tiàraa metua horoà ora.
E teie ta Pauro faaìteraa, no te metua e te mau tamarii, o te himene – atoà - hia i teie mahana, ia au i te Efetia pene 6, i te ìrava 1 e faaea i te 4, e te mau tamarii ra, e faaroo i to òutou mau metua i te Fatu ra, e parau tià hoì te reira. E faatura atu i to metua tane e to metua vahine, o te ture matamua ia i pahonohia i te maitaì i faaìtehia mai. Ia maitaì hoì òe, e ia maoro to parahiraa i te ao nei. O òutou hoì, e te fëia metua ra, eiaha e faaoooo atu i ta òutou tamarii rii , e haapii ra ia rätou e ia paari ma te aò a te Fatu ra.
Te Ture 5 te horoà nei ia tätou i te hoê faanahoraa hau atu i te faufaa ta te Atua e titau mai nei ia tätou. I rotopu i te metua e te tamarii, ei faaìteraa e tià i te hoê taata tei î i te maitaì e riro ei metua no te mau taata atoà. Eere roa ra na te fanauraa e haapäpü ia tätou ei metua, na te àravihi ra i te amoraa i ta tätou mau hopoià e tià ai. Oia hoì terä taata i färii i te faariro i te parau o to òe oraraa, to òe maitaì, to òe òaòa ei òhipa na na. I parauhia ai teie taata e metua, no te mea ia, e faaineineraa tei faatupuhia e taua òhipa ra, no te mea atoà tei roto i taua taata ra, te ìte, te paari, e te àravihi, e òhie ai te tupuraa o taua parau ra. E ia faaitoito atoà te tamarii i to na pae i te amoraa i ta na tuhaa i reira e hau roa atu ai te maitaì.
Te taata rä tei ineine maitaì, oia hoì tei òre i haapaò i te huru o te taata, e maraa ia na te faatupuraa i te ora no te tahi, i te raveraa i te mau òhipa atoà e au ia ravehia ia òre te tahi ia ö e ia mau roa atu i roto i te fifi, te huru o te fifi, e metua te reira taata. Hoê ra Metua no te mau METUA atoà o te Atua anaè tei rahu i te mau ora atoà.
Terai or.