Märeto 6,30-34
ÈTÄRËTIA POROTETANI MÄOHI
Mau taioraa.
Ieremia 23:1-6 Iehova ta tätou parautià.
Taramo 23 Te maitai e te aroha.
Efetia 2:13-18 Te faafatataraa.
Mareto 6:30-34 Aroha atu ra.
Ei parau tumu Mareto 6:30-34 Aroha atu ra.
Ei irava tumu Mareto 6:34 vr Aroha atu ra ia rätou.
Ei manaò tatara.
No teie hora paieti teie ia te parau o tei manaòhia mai ei parau farereiraa na tätou i te Atua,i roto i teie Evaneria no Ietu papaihia e Mareto i te pene 6 ma te irava 30 e tae i te irava 34.Ua tupu ia ta tätou nei parau i muri iti noa äè te tonoraa o Ietu i ta na mau pîpî i nià i te èà,te mau äroa,e iroto i te mau ùtuafare no te poro i te parau àro no te tatarahapa,ia tatarahapa,e te parau àro no te patireia o te Atua ia tiàturihia.Teie te tahi tumu i faaineine maite ai te Fatu i ta na mau pîpî,ia papu te faaiteraa,e te pororaa,no te parautià a te Atua,tonohia no te faafariu faahou i nià i te Atua,tonohia no te horoà i te parau hau a te Atua,tonohia no te àmui i roto i te pupu taata o te Atua.I muri ïti noa äè teie tonoraa,teie ä te mau apotetoro e àmui faahou nei ia Ietu,no te vauvau ia i ta rätou mau parau tuatapaparaa no te òhipa i tonohia ai rätou,no te òhipa a te Atua,ua manuia;te òhipa no te tiàvararuraa i te mau varua faufau,te òhipa no te faaoraraa maì,te òhipa no te faatahinuraa,e te haapiiraa ia taui te taata to na huru na roto i te faîraa hara.
Ia öti aè ta Ietu faaroo maitairaa teie mau parau tuatapaparaa,teie o Ietu e parau nei i ta na mau Apotetoro ia haere rätou i te hoê vahi moèmoè,eiaha ra no te tapuni,e àore no te faaruè i teie rahiraa taata,e àore ra ua fiu rätou i te faaiteraa i te hinaaro o te Atua.No te haere rä e haamaha i to rätou rohirohi,e haamaha i roto i te pure,ia iho faahou mai te hoê puai àpi no te àroraa i te mau haafifiraa i te mau mea ite-ore-hia no te pororaa Evaneria.Haamaharaa rohirohi teie i roto i te Atua,haamaharaa rohirohi no te faaineine faahou i te faaiteraa i te parau a te Atua.Te haamaharaa rohirohi a Ietu e te mau Apotetoro e haafifihia ia e te rahiraa taata e àpee nei ia rätou.Te tapepe ra hoi te mahana,teie rahiraa taata aita e hoi nei i te mau vahi no reira mai rätou,teie ia o Ietu e ta na mau Apotetoro e hôe huna nei i te hoê vahi moèmoè e faaea ai,teie ra aita i nahonaho i te mea ua itehia rätou i te fanoraa i te tahi pae,te horo nei ia teie feia e rave rahi no te tapapa i te vahi tipaeraa, no te tiai ia Ietu e te mau Apotetoro.
(Ia horo na te hiti o te roto no Tiperia e 7 e àore ra e 8 km,ia fano ra e 4 ia e àore e 5 km).No te mau vahi atoà mai te maniiraa mai teie feia,mai te mau mamoe tiai ore ra te huru e tei ìmi i te hoê tiai.Ia tipae ra o Ietu i te vahi ta rätou i manao,te ite nei O ia eita rätou,anaè to reira,te mau taata e rave rahi rä tei tae mai no te färii ia rätou.Aroha-roa-aè ra o Ietu i tei nahoà tei tapapa ia rätou ma te rohirohi ore.Ua aroha o Ietu i teie mau taata no te mea,te ite noa ra O ia, ia rätou i te hororaa mai nià mai i te poti.Te reru nei te miti i te vahi i horohia e teie feia.No Ietu e ta na mau Apotetoro,te haamaharaa rohirohi ua ore ia,ua riro ia te reira ei òhiparaa na rätou i roto i te òaòaraa, haapii atu ra o Ietu ia rätou i te mau parau e rave rahi.
Hiò atu ra O ia i taua feia rahi rä aroha atu ra ia rätou.
Teie patu no te rohirohi ua marua,ua purehu na roto i te aroha i teie feia e rave rahi, eita ra na roto i te peu aroha noa,na roto ra i te parau tohu a te perofeta ra a Ieremia i te pene 23 irava 5
Te na o mai ra Iehova,inaha te fatata mai ra te tau,e faatupu ai au i te tahi àmaa parautià no Tavita e riro hoi te hoê taata ei arii e te haapaò maitai,e te faatupu hoi i te parau au e te parautià i te fenua nei.
Te faatupu nei o Ietu i teie parau tohu,ma te färii i te hinaaro o te feia e rave rahi,ua moè te parau no te rohirohi i roto i te aroha.Teie a o Ietu e haapii nei i teie feia no te faataahuri i te patu no te hara,teie patu no te hara i te mau mahana atoà,i teie a mahana,e ite mau vahi atoà te aua haaàti nei te taata i to na faaora,na teie patu e faatupu nei i te àmahamaha i roto i te taata e i rapae mai.Na teie a patu,te patu o te teòteò e faataa ê nei te mau taeaè e te mau tuahine i roto i te Metia. Teie mau patu no te faataa-ê-raa,ua faaàueuehia ia e teie feia e rave rahi na roto i te faaroo ia Ietu,na Ietu rä i vahivahi ma te färii poupou i teie feia,te mau tane,e te mau vahine,te taureàreà,tamaroa e tamahine,i roto i te aroha.
No te mea mai te nana mamoe tiai òre ra rätou.
Ietu tei aroha,te faatupu nei ia O ia i te hoê vahi faufaa no ta tätou nei taioraa,ua moè te rohirohi,ua monohia e rätou i te hau e te here,te iteraa o Ietu i teie nana i te ìmiraa i te hoê tiai.Hoê nana teie tei ìmi i te aveia no te tiaitururaa,ia ite-a-hia e rätou i roto i te mau haapiiraa tei haamahanahana.Te tiaituru òre o te feia e rave rahi,te horoà faahou nei ia o Ietu ia rätou i te tiaitururaa,na roto i te aroha.Te hinaaro atoà nei rä o Ietu i teie taime e faaite papu atoà i te mau apotetoro i teie vahi faufaa no te òhipa a te Atua.
I roto i te aroha,teie parau e farerei pinepinehia e tätou i roto i to tätou oraraa.Teie-â-ia o Ietu e faahaamanaò nei ia tätou i teie mahana,i roto i te hoê auraa e au no te taata teretetiano.
Te aroha i roto i te haehaa,ma te färii te tahi,i to te tahi huru.
Te aroha i roto i te faahauraa,ia ite-a-hia te parau fafau no te Patireia o te Atua.
Te aroha i roto i te tiàturiraa,ia ite-a-hia te parautià a te Atua no te hoê nunaa ora,i te hanahana o te Atua.
Te aroha i roto i te tonoraa,ia parare te hau o te Evaneria,ia parauhia,e ia haapiihia.
Haapii atu ra ia rätou i te parau e rave rahi.
Ietu tei aroha,te haapii mai nei ia,ia tätou i te aroha o te Atua i te mau taata atoà ma te maiti òre i to na huru,ia au i te hohoà ora ta te Metia e faaite nei i roto i ta tätou irava.Te horoà nei O ia i te haamaitairaa ia ora te mau taata e rave rahi,te puòhu nei ia te Atua i taua haamaitairaa i roto i te faaòreraa hara,(o te parau fafau ia teie no te Papetitoraa).
Te mau taeaè,te mau tuahine,
Ta tätou parau no teie taime paieti,te pii nei ia,ia hiò papu i teie tumu parau,Ietu tei aroha i roto i te Etaretia no Porinetia nei (Mäòhi).
Te itehia rä nei taua aroha ra ?
Te aroha nei rä te Etaretia ?
E piti tau uiraa teie te tià i te taata teretetiano ia hiò faahou i teie mahana.
Ietu tei aroha,no te faaite ia i to na here i ta te Atua i Rahu.
Ietu tei aroha,no to na ia hinaaro e rave i te òhipa e te Etaretia.
Ietu tei aroha,no to na ia hinaaro e àparau i te òhipa a te Atua i te taata.
Ietu tei aroha,no te mea ua aroha te Atua i to te ao nei.
Te aroha nei,o te faahaehaaraa ia i mua i te òto,te mauiui,e te hiai to taeaè,to tuahine.
E te Atua e,aroha mai ia mätou ...............
Terai òr.
(ua aohia teie parau,i Punaauia i te 17-o7-1988).