Märeto 6,7-13
ÈTÄRËTIA POROTETANI MÄÒHI
Mau Taioraa.
Amota 7 : 10-15 Amota i maìtihia e te Atua.
Taramo 85 Te faaòreraa hara.
Efetia 1 : 3-14 Te àmuiraa i te Metia.
Mareto 6 : 7 - 13 Te tonoraa a Ietu.
Ei taiòraa tumu Mareto 6 : 7 - 13 Te tonoraa a Ietu.
Ei irava tumu Mareto 6 : 7vh Ua tuu atu ra i te mana ia rätou ia vi te mau varau faufau ra.
Ei ômuaraa.
Te faaite nei ta tätou taiòraa i to Ietu tonoraa ta na mau pîpî hoê àhuru mä piti,o ta na i titau aè nei.Pupu taata teie i faaineinehia e Ietu,ei haaparareraa i te mau hinaaro o te Atua,ei ia tupu atoà te tautururaa i te feia i roto i te fifi.A tahi roa ra o Ietu i tono ai i ta na mau pîpî,i roto i te mau vahi nohoraa o te taata,i te mea te ite nei o Ietu i te faufaa o teie òhipa ia tià i te mau taata atoà ia tuu i to rätou tiàturiraa i roto i te Atua.Te òhipa e ravehia nei e Ietu,ei haapapuraa ia i te mau pîpî te faufaa o te taata i te ôpuaraa a te Atua.I roto iho i tera manaò e,eiaha te taata ia faaea noa ma te tauà òre i te Atua.E aore ra ia, ia òre te taata ia faaea noa i roto i te mau faanahoraa te òre roa e au i te Atua.
Ua tuu atu ra i te mana ia rätou ia vi te mau varua faufau ra.
Hou o Ietu a tono ai i ta na mau pîpî,te tuu nei O ia i roto ia rätou i te mana e te òhipa e tià ia rätou ia rave.A tahi roa o Ietu a horoà ai i te parau no te mana i ta na mau pîpî,e teie faufaa ta te mau pîpî e färii nei,ei faatupu ra ia te parau ia tatarahapa te taata.Te tono nei o Ietu i ta na mau pîpî,e piti taata i te pupu.Te tumu i na reira ai,ia tià te tahi ia tauturu i te tahi ia farerei i te fifi ite-òre-hia i nià i te eà no te pororaa Evaneria.E aòre ra e piti ite e faufaahia ai te parau e hinaarohia nei e tuu i mua i te taata noo mai i te Atua ra.Teie ia e faahitihia nei e te Teuteronomi i te pene 19 i te irava 15 vh,tei te parau rä a na ite toopiti,e tei te parau a na ite tootoru ra,e riro ai taua mea ra ei parau mau. Te haapapu nei o Ietu na mua roa,e nahea e faufaahia ai te ohipa pororaa Evaneria e ravehia e ta na mau pîpî.I to rätou haereraa na roto i te mau ùtuafare,e te mau aroa o te mau oire.Ia hiò maitai anaè tätou i te òhipa e faanahohia nei e Ietu,mauti ra ia te ta pupuraa ia i te feia tonohia,e piti taata i te pupu.To na auraa ra,te parau no te òhipa a te Atua,eita i te òhipa na te taata hoê,e òhipa ra ia rave àmuihia,ia ora àmuihia,e ia tuatapapa àmuihia.Tei reira te hiòraa a Ietu, i horoà ai O ia i te mana haavi,ma te faaite i to na tiàturi i te mau veà tono e haere nei e faaite i te parau no te tatarahapa.Te faaiteraa Teretetiano ia tano ia i nià i te oraraa àmui o te taata,tei faatupu i te parau no te Etaretia,ia au i te hinaaro o Ietu.Te tuu nei o Ietu i te veà tono i mua i to na iho parau,ei ia ite o ia e,oia te hiò maramarama o te Evaneria ora a te Atua.
I horoà ai o Ietu i ta na mau pîpî,i te hoê faanahoraa ia haapaohia e rätou i nià i teie tere faaiteraa i ta te Atua titauraa i te taata.
Hoê raau turutootoo,
Eiaha ei pute,
Eiaha ei maa,
Eiaha ei moni,
Ei tamaa hoi,
E eiaha ia taipiti te pereue ia àhu.
Teie te huru no te tere o te mau veà tono,te faanaho nei o Ietu ia rätou eiaha rätou e faaäpiäpi ia rätou,i te mau òhipa e tià e haafifi ia rätou i nià i te èà no te pororaa,oia hoi ia mama noa rätou i roto i to rätou tere.Ia vaiiho rätou i te mau hopoià e orahia e rätou i te mau mahana atoà.E Ia matara ra rätou i mua i te mau òhipa ta rätou e rave nei i te ioa o te Atua,e ia òre atoà ia faufaa òre te mana haavi i horoàhia ia rätou.Te ite nei tätou,aita o Ietu,e haapii nei ia rätou e nahea i te parauraa i te Evaneria i roto i tera e tera ùtuafare.Te mea ra ta Ietu i parau maitai,eiaha rätou e faataupupu ia rätou i nià i te mau mea e òre te parau no te pororaa Evaneria,i te mea te Evaneria eita oia e tapihoohia,e faaitehia ra oia e tià ai.Te tuu nei o Ietu i mua i ta na mau pîpî,te òhipa faufaa roa te faafaiteraa ia i te ora,ia itehia e te mau taata atoà,e tià e faaroo ia rätou.Ia haere te mau pîpî ia rave noa ia rätou i te mau òhipa e tià ia rätou ia rave ia faufaahia ta ratou faaiteraa.Teie huru faaineineraa e horoàhia nei i te mau pîpî ia tià ia,ia rätou ia aro ia rätou iho i te mau taime atoà.Te faanahoraa ta Ietu e horoà nei,te mau taata atoà tei faataa ia rätou no teie òhipa,e mau taata matara ia i te mau taime atoà e piihia ai o ia.Ia vai ineine noa o ia i te mau taime atoà,noa atu i te huru o te òhipa e tiai ra ia na,eita atoà o ia e faateiaha noa ia na i te mau peu tei haataupupu i to na tere.Ia tià ra ia na i te tatara i te mau haafifiraa atoà,e haafifi ra ia na iho.Oia hoi te ôraa i roto i te haapaeraa ia na iho,ia noaa te mana haavi,ei faaitereaa i te parau no te tatarahapa.
Ia òre outou ia itehia mai,ia òre ia faaroohia,tutu atu i te repo o to outou àvae.
Te ite atoà nei o Ietu i te fifi e farereihia e ta na mau pîpî i roto i teie tonoraa e tonohia nei rätou.Ia faahoi te mau pîpî teie färii-òre-raa i nià i te feia e rave i teie òhipa.Te ite nei tätou i ù nei te teiaha no te òhipa e ravehia e te mau pîpî i roto i teie tere.Ma te faaara atoà i te faahaparaa e topa i nià i teie feia,e maitai aè te pohe o Totoma,e o Tomora,tei mua atu ia teie,tei òre i färii i te Evaneria.Te auraa ia o teie parau e,tutu atu i te repo o to outou avae.E parau teimaha roa teie,ta Ietu e faaite nei.Te hinaaro nei ra O ia ia ite ta na mau pîpî te òhipa e tiai mai ra ia rätou,ia òre rätou ia hitimahuta i mua i te mau taata aita e tiàturi nei i te Evaneria.Teie ra te ani nei o Ietu i te mau taata atoà e tiàturi nei i te Evaneria,eiaha ia haaparuparuhia ia vai noa ra i roto i te oraraa i te parau tei faaite i te ora.Aita anaè i färii mai rä,eiaha ia e faataerehia,e haere a e farerei i te tahi atu mau taata te tià e färii mai i te Evaneria ora a te Atua.
No reira te pororaa i te Evaneria,eita ia i te haapii-noa-raa i te taata,o te faatiàmaraa atoà ra i te taata,i te mau fifi rau e farereihia nei e rätou i roto i te oraraa.Te tumu ia i horoà ai o Ietu i te mana haavi i roto i to na mau tavini.I teie mahana te pure nei,te parau nei te taata i te manaò o te Evaneria,aita ra e faaroohia rä.
Eita te mana matamua i te manaò tiahi,ia tià ra ia oe ia paruru ia iho i mua i te Temoni,e farereihia atu e oe.Oia hoi eita te manaò,faahapa teie ta Ietu e parau nei,e titauraa ra i te taata ia tatarahapa,ia òre te repo o te avae ia tutuhia i nià ia rätou,a riro atu ai te reira ei utuà teimaha na tei òre i färii i te parau ora a te Atua.Ia tià ia i te taata faaroo i te haavi ia na i mua i te mau òhipa te haaparuparu i ta na taviniraa.
Teraì òr.