Mataio 28, 16-20
Mau taiòraa.
Teuteronomi 4, 32 – 40 Taramo 33.
Te roo o te Atua. Te òaòa i te Atua.
Te rima puai o te Atua. Ia mataùhia te Atua.
Te reo o te Atua tei haapii E ao to te fenua.
O Iehova te Atua. Te mata o te Atua.
Roma 8, 14 – 17 Mataio 28, 16 – 20.
Te varua faatamarii. Te mau pipi i Tarirea.
Te metua o te Varua Maitaì Te mana o te raì e te Fenua.
Te Varua tei faaìte Te faaueraa a te Metia.
Te tufaa tei àpitihia i te haamaitaì. Te päpetitoraa Teretetiano.
Ei manaò haapapa.
Te faufaa e vai nei ia au i na taiòraa e mahana nei, te horoà nei te mau taata paieti i te puai o to rätou tiàturiraa ia ìtehia te hanahana o te Atua. I ta rätou faanahoraa i te tauturu a te Atua ei taìtaìraa i mau maitaì i roto i te mau fenua atoà tei òre i naeàhia i te mau haapiiraa. Tei ravehia taua mau òpuaraa ra na roto i te òaòa, i te mea no te roo o te Atua teie e faahaerehia nei. Ma te haapäpü e o te rima puai teie o te Atua e arataì nei ia rätou, ia mataù te mau taata atoà i te mau òhipa e tupu nei.
E tuuhia nei te taata ia ö i roto i te parau no te Varua faatamarii, tei horoà i te faufaa no te mau titauraa e titauhia nei i te taata. I te mea te mana o te raì e te fenua tei te Metia ra ia, e te faaue nei O ia i ta na Etaretia ia päpetitohia te mau taata atoà i te iòa o Metua, te Tamaiti, e te Varua Maitaì. O teie ia e tupu nei i roto i te Mataio pene 28, i te mau ìrava 16 e tae i te 20, o tei parauhia teie pene parau, i te Parau Tono a te Metia, e aore ra te Parau Mitionare a te Metia. I te mea te faahiti nei O ia te reira i te ìrava 19.
E teie nei, e haere òutou e faariro i te mau fenua atoà ei pîpî, a Päpetito atu ai ia rätou i roto i te iòa o te Metua e no te Tamaiti, e no te Varua Mataì.
Teie ta tätou ìrava no teie hora paieti, tei ropu maitaì ia tätou i te parau faufaa rahi no te òroà Moà o te päpetitoraa. Tei faatupu i te päpetitoraa evaneria no te toru tahi, tei niuhia i nià i te pohe e te tiàfaahouraa o te Metia. O te Metia iho teie e parau nei i ta na mau pîpî tino hoê àhuru ma hoê, e haere i Tarirea i nià i te hoê mouà tei òre i faahitihia te iòa i roto i ta tätou taiòraa. Te mea ra e ìtehia nei ua faahoì – faahou o Ietu i te mau pîpî i te vahi i titauhia ai rätou, ia au i te faaìteraa, a na Evaneria hiò àmui tei Tarirea te Metia, te òmuaraa e te titauraa i te mau pîpî no te òhipa a te Atua. E tei taua tuhaa fenua noa ra to te Metia faaìte päpuraa e, o te mana atoà o te raì e te ao atoà nei ua pupuhia mai tei ia ù a na äè ia. Teie parau ta te Metia aore roa ia, O ia i faahiti i te taime i òhipa ai O ia no te patireia o te Atua.
Ua faaìnohia O ia, aore O ia i faahiti i teie parau, ua tahitohitohia aore atoà i faahiti i teie parau, ua haamauiuihia, aore atoà, ua patitihia i nià i te tatauro, aita atoà i faahiti i teie parau, i roto i na faahitiraa parau e hitu no te mauiui o te hara a to te ao nei, aita atoà. No te aha i òre ai O ia e faahiti teie parau i roto i to na mau taime ahoaho e te peàpeà rahi ? No te mea noa ia, ai – ti – ä te òhipa no te faaòreraa hara i nahonaho atu ra i te porohia. Te taime ra i faaroohia ai teie reo te taime ia, i uihia ai e, e te pohe e, teihea to òe tara ? E hate e teihea to òe rë ? ( I Torinetia 15, 55).
Te mana o te pohe ua paruparu ia i mua i te òhipa faaora, a te Metia, i tià ai i te Fatu na roto i te puai o te mana i te faaue i te mau pîpî,
E teie nei, e haere òutou e faariro i te mau fenua atoà ei pîpî, a Päpetito atu ai ia rätou i roto i te iòa o te Metua e no te Tamaiti, e no te Varua Mataì.
E faaueraa teie ta te Fatu, tei titau ia tätou ia haapaò, i te mea te vai nei te tahi mau tuhaa fenua i roto i teie ao, e orahia nei e tätou, aita ia te tapaò o te toru tahi i nià iho, ei faaìteraa i te aroha o te Atua tei heheu i te ààu o te feia faaroo. Ia riro ia te mau taata o te fenua atoà nei ei fëia tei amo i teie tapaò hanahana no te Atua ora, te Atua tei faaìte i te puai o to na mana, i roto i ta na mau òhipa maere tei faatupu no to na nunaa. O tei täpaòhia, ua ö ia i roto i te òpuaraa ora no te ora mure òre, te titauhia nei ia ei mero päpu no te òroà eufari, e ei mero no te Etaretia. Àreà ra tei òre ä i tapae i nià i teie reni, te faaue noa nei ia ta tätou ìrava e, ia faarirohia te mau fenua atoà ei pîpî, tei päpetitohia i te iòa o te toru tahi moà.
Ta tätou ìrava nei e parau pinepine teie te faaroohia e tätou i te òroà päpetitoraa Tamarii, taata paari, e te haapäpuraa, no te pinepine to tätou faarooraa mau ààu roa atu ra, i te etaretia aita atu ra tätou e haapaò faahou, e vai noa atu ra teie parau ei faamanaòraa i te òroà moà no te päpetitoraa. Te reira anei te manaò ta te Fatu e hinaaro nei e faaìte ?
Eita roa ia, te hinaaro nei te Fatu e faaìte päpu e te òroà moà no te päpetitoraa, o te öraa ia te tamarii, te taata paari, i roto i te haamaitaìraa a te Atua tei ravehia e te tamäraa hara, e te faaòreraa hara a te Metia.
Te faaoraraa ia tei ravehia e te Atua no to na nunaa, tei fati i raro aè i te faatîtîraa i Àifiti, ua tamähia te viivii i raro i te miti ùteùte, ua haapaarihia te tiàturiraa i te metepara e 40 matahiti, ua arataì na roto i te pape i Ioritana hou te fenua o te tapu. O te päpetitoraa ia teie na te Atua ei tamäraa i to na nunaa.
Àreà ra ta Ioane Päpetito, o te päpetitoraa tatarahapa ia, tei pou i raro i te pape, ei faaìteraa te ààu haehaa, e te tatarahapa mau, o ta te Metia i färii atoà. Ia tae mai ra i nià i ta tätou ìrava, o ta Ietu e faaue nei i ta na mau pîpî ia päpetito, i te iòa o te Metua, te Tamaiti, te Varua – Mataì o te hoê faanahoraa âpï ia tei àmuihia i roto i te Toru Tahi, tei faatupu i te päpetitoraa Evaneria no te mahana Penetetote. I ù nei tätou e ìte päpu ai e, o Ietu tei amo mai te tiaìtururaa, te hau, te aroha, te here, ia vai i roto i te ààu o te tiàturiraa e te faaroo aueue – òre.
Ia hanahana te Evaneria a te Atua.
Teraì or.