Mareto 14,12-26
ÈTÄRËTIA POROTETANI MÄOHI
Mau taioraa.
Etoto 24 Te hanahana o te Atua.
Taramo 116 :12-19 Te euhe
Hepera 9 : 11-15 Te mä o te aau
Mareto 14: 12-26 Te àmuraa maa a Ietu.
Ei parau tumu Mareto 14 : 12-26 Te àmuraa maa a Ietu.
Ei irava tumu Mareto 14 : ir.22 vh. A rave mai a àmu o ta ù tino teie.
ir.24 vm O ta ù toto teie,no te faufaa àpi i haamniihia no te taata e rave rahi.
Ei manaò tatara.
E parau teie no te haamauraahia te òroà Moà matamua roa,o ta Ietu i faatupu i te ahiahi hou te òroà pata àti Iuta ra,tei parauhia te òroà no te maa faahopue-ore-hia ra.Teie òroà ei faahaamanaòraa ia,i te mau vahi i faatîtîhia ai te nunaa àti Iuta,e to ratou faatiàmaraahia e te Atua na roto i to na hanahana.E te haamanaò ätoà nei teie òroà i to te nunaa àti Iuta öiraa i te vari àreä ei paturaa i te äorai o Faraò.I te mea ua tuuhia e te Atua to na nunaa i raro äè i te faanahoraa no te aroha,ia tià i to na nunaa i te haamori,e te àrue i te mau maitai ätoà tei faanaòhia na roto i te mau faaoraraa tei ravehia no ratou.
Ta Ietu ra e faahiti nei i roto i ta tatou taioraa,o ta tatou i faaroo äe nei,o te faaàpiraa ia i te parau no teie òroà,eita ätu ra no te faaora noa i te hoê pae,no te faaora ra i te mau taata ätoà o te ao nei tei ite i ta ratou tuhaa òhipa i roto i te titauraa a te Atua.Ua faanahohia teie àmuraa maa i roto i te piha teitei,e fare färiiraa manihini teie.I roto i teie fare e haamata ai te parau no te amuraa maa a te Fatu,e àmuraa maa ei faatauiraa i te parau no te oraraa faaroo o te àti Iuta e tae noa ätu i to te ao nei.Ua faaineine maitehia teie òroà,e ta na na pîpî i faataahia no teie tapura òhipa,e mahana taatoà i te faanahoraa,aita roa te hoê äè mau tauihaa i haamoèhia.E tià ia parauhia e,eita ia teie òroà i te hoê òroà tei mataü-noa-hia e te mau pîpî i te faanaho.
Tei Ierutarema te tupuraa teie òhipa,i roto i te fare no te hoê taata tei òre i faahitihia to na ioa,ua faataa teie taata i te piha nehenehe roa äè o to na fare,eita teie fare i te hotera,e fare te tià e färii i te manihini mai ia Ietu te huru.Teie te parau â na pîpî toopiti i tonohia no teie òhipa i parau ätu i te fatu o te fare,TE PARAU MAI RA TE OROMETUA,TEIHEA TE PIHA NO TE MANIHINI ,EI AMURAA MAA PATA NA U E TA U MAU PÎPÎ ATOA.E parau teie tei horoà i te fatu fare,i te hoê òaòa,i te mea te ite nei te manihini i te faufaa no to na fare,ei faatiàraa i te parau no te pata.O teie mau te mau òhipa ia tae i te mau òroà ra rarhi e tupu nei i Ierutarema,e faaineine te taata ùtuafare i to ratou mau fare ei färiiraa i te mau manihini te manii mai,mai roto mai i tera òire e tera òire.Teie ra fare i faaineinehia no te färii ia Ietu e ta na mau pîpî,mai roto ätu i te piha no teie fare e taui ai te mau mea ätoà,e fanau ai te parau no te FAAROO TERETETIANO,e fanau ätoa ai te parau no te ÒROÀ EUFARI.E parauhia teie òroà i mua ra,e òroà tämaaraa ahiahi.
No te mea ua tupu te òroà Eufari matamua roa i te ahiahi,e ahiahi to Ietu faatiàraa i teie òroà no te taime matamua roa,i mua ta na mau pîpî hoê àhuru mä piti.Te maa ta ratou i àmu e pane ia,e te inu e uaina ia teie noa na maa e piti,e aita ätu ai.E teie ätoa àïraa maa o Ietu e faaite ai i te huru no te mau òhipa e tupu à muri äè,e te taata e tuu ia na i roto i te pohe.Te parau nei ia o Ietu no teie taata,e mea maitai i te reira taata àhiri aita roa i fanau.Oia hoi te hinaaro nei o Ietu e faaite i ta na faaòreraa hara i te taata e rave i teie òhipa,e ma te faaite ätoà e,te ô nei O ia i roto i te mau ìno ätoa o te ao nei.Te auraa o teie parau,eita ätu ra na te toto o te mau ànimara e tama i te hara a te taata,na Ietu ra,eita ätoà na te tahuà e pupu i te tutia no te faaoreraa hara,o Ietu ra taua tahuà ra e taua tutia ra.Mai te taime o Ietu i rave ai teie òroà i te ähiähi,ua tupu i roto i te mau pîpî i te hoê hiòraa àpi i muri äè i te penetetote.E faatià te mau pîpî a Ietu i teie òroà i te mau ähiähi ätoà i roto i te mau ùtuafare o tera e tera taata e tiàturi nei i te mau òhipa tei faatupuhia e Ietu.E ua naeàhia e 300 matahiti i te faatià-noa-raa-hia teie òroà i te ähiähi.E i muri äè faanahohia ätu ra i te poìpoì tapati,e i te ävateä,e i muri äè i te mau tapati matamua ätoà o te àvaè,e te mau òroà ra rahi e vai i roto i te Etaretia o te ao nei,e tia ia parauhia te fatata nei e 2.000 matahiti i teie nei.
E hoa here maä e,
E i teie â mahana te parau mai nei â o Ietu ia tatou e, à rave mai a àmu o ta ù tino teie,o ta ù toto teie no te faufaa àpi tei haamanihia no te taata e rave rahi.I teie taime te haamau nei te Fatu i ta na àmuraa maa,ei monoraa i te àmuraraa maa no te pata matamua,tei riro noa e àmuraa maa na te hoê noa nunaa.Ta te Fatu ra e faatià nei,no te mau taata ätoà tei ite i te ora i roto i te mau òhipa i faatupuhia no na.Eiaha ra no te tahi noa pae,no te mau nunaa ätoà ra o te ao nei.O teie te raveà e matara ai te ùputa no te tatarahapa,ei faaôraa i te nunaa i roto i te hanahana o te Atua.I te mea o Ietu tera e horoà ra i to na tino,ei faatiàraa i te i te euhe a te Atua i mua i te mau taata ätoà.Ma te horoà ätoà i to na toto ei tamaraa i te mau aau ätoà o te taata tei ite i te òhipa i ravehia no na.Na roto i teie parau te riro nei o Ietu ei ärai no te faufaa àpi,i te faaoreraa hara ra,ei tuuraa i te taata faaroo i te ora mure ore.I te mea,e ere hoi na te toto puaaniho e te toto tafa,ma to na iho ra toto,i te tomoraa hoê i roto i te vahi moà roa ra e ma te ora mure òre te noaaraa no tatou.I riro ai hoì ò ia ei ärai i te faufaa àpi nei,ia noaa te àià mure òre i parauhia mai ra,i te feiä i parauhia ra,i to na ra pohe,ei faaore i te hara i te faufaa mätamua ra.(Hepera 9:12,15).
Teraì òr.