TE TORU O TE MAHANA Mahana piti 9 no Tēnuare 2024.

TE TORU O TE MAHANA
Mahana piti 9 no Tēnuare 2024
Roma 13 : 8-10 & Ruta èv. 10 : 29
PAPA ÂTI-IUTA: Te aroharaa i to tauaro, te tāpaò ia o te taata no te hau o te Atua.
PAPA MĀÒHI :
Tahi ture a Tetunaè : Eiaha òutou e hiò mata noa i te taata ia haere noa na to òutou pae fare, mai te pii òre atu e, a tāpae mai i te fare nei e tāmāa.
Manaò tauturu. I roto i te manaò faatià ia na iho, teie ā te
haapii ture e ui faahou nei ia Ietu : « O vai to ù tauaro » ? Eìta e òre e, ia au tei haapiihia ia na aore ra ta na e ora ra, te tauaro e tītauhia ra ia na e aroha, o te taata ia nō roto noa i to na nūnaa e
ta na haapaòraa âti-Iuta. Te auraa, ua tāôtiàhia ta na aroharaa i nià noa i te mau taata no to na nūnaa e ta na haapaòraa, tīrā rā
atu ai. Tahi teie huru tumu no to tātou oraraa taata, oia hoì te
aroha-noa-raa tātou i te taata hōê ā o tātou ùtuāfare, ôpū fētii,
fenua, haapaòraa, òhipa, e te vai atu ra. Te auraa, tē tāôtiàtià nei
tātou i te feiā ta tātou e aroha nei. E tano roa ia parau e, te aroha
noa nei tātou ia tātou iho, tīrā rā atu ai. Eiaha no te mea, ua hape
aore ra mea ìno te reira. Aita, te tano noa ra e mea maitaì roa.
Hamanaò na tātou i te tahi mau parau ta Ietu i ta na mau pipi :
« Teie ta ù parau ia òutou, ia aroha òutou ia òutou iho, mai ia ù e
aroha atu ia òutou na » (Ioane 15:12). Haamata ihoā ta tātou aroharaa na nià ia tātou iho na mua roa.
Te fifi rā, ia faaea e ia mau noa ta tātou aroharaa i nià ia tātou iho. I reira mau tātou e hahi ai i mua i to tātou Atua e to na
hinaaro ia tātou. Ìnaha, te Atua ta tātou e tiàturi nei, e Atua ia no te here e te aroha ôtià òre. To na hau, e hau faatau aroha, e terā
te ture e arataì ra i to na hau, oia te here e te aroha. Te mea mau ia Ietu i faaitoito ai i ta na mau pipi e i te taata atoà e aroha atu i to rātou mau ènemi, e faaora atu i tei tuhi mai ia rātou, e hāmani
maitaì atu i tei riri mai ia rātou, e e pure no tei parau ìno mai e
tei hāmani ìno mai ia rātou. Terā te èà hōê roa e aita atu, e riro te tahi ei taata no te hau o te Atua. Terā te tāpaò e ìtehia ai, e taata òe no te hau o te Atua. Nō reira, hinaaro òe ia pārahi òe i roto i te hau o te Atua, faaitoito
ia i te haere nā nià i taua èà ra, te hinaaro òe e te òre òe e
hinaaro, aita e àperaa.
E te tama Māòhi, i te tau o to tātou hui tupuna, e rāau tupu
ruperupe e te hotu ùmu te here e te aroha i roto i to rātou âau e
to rātou oraraa, e terā ta rātou māa tumu. Nō reira i maitaì e i hau noa ai to rātou oraraa, te mea atoà ia i tupu noa ai te hōêraa i rotopū ia rātou. E no to na mānaònaò ia òre te taura o te here e te aroha ia àriàri i roto i te oraraa o te Māòhi, e no to na hinaaro
ia riro noa te here e te aroha ei papa no te oraraa o to na nūnaa,
i haamau ai te arii Tetunaè i teie ture arataì i te nā ôraa e,
« Eiaha òutou e hiò mata noa i te taata ia haere noa na to òutou
pae fare mai te pii òre atu e, haere mai i te fare nei e tāmāa ».
E ua riro roa te reira, ei peu tumu na to tātou mau metua i raro roa ra, te ìteraa e te fāriiraa i te taata mai te māìti òre o vai o ia e
mā te hoo òre. E terā to rātou huru tumu, âau māhorahora noa i te fārii aroharaa i te taata. Tià-maitaì-hia rātou i to rātou Atua i te âau faatau aroha. E te uiui ra te manaò e, e aha te huru te
tupuraa te here e te aroha i roto ia tātou i teie mahana, aita i
mārōhia ? Te nā ô ra te 1 Ioane 4, 20 « Ia parau te hōê taata e,
te here nei au i te Atua, e aore o ia i aroha i ta na taeaè, e haavare o ia. O tei òre i aroha i ta na taeaè tei hiòhia e ana ra, e
aha e tià ai ia na ia here i te Atua, tei òre i hiòhia e ana ra ».
Te mea rā e tià ia tātou ia pāpū, te aroha ta tātou e parau nei,
eere te faatiàtiàraa i te hinaaro tià òre o te taata, eere atoà te
tururaa i te tupuraa o te mau peu tià òre o teie nei ao. Te aroha o ta tātou e parau nei, o te ìmiraa i te rāveà ia tià faahou te taata i
roto i to na tiàmāraa e to na turaraa no te faatupu i te parau mau e te parau tià.
E aù nūnaa e, te tauaroraa i te tahi, i to taata tupu o ta Ietu e
haapii mai ra ia tātou, eere te tautururaa noa i te taata e tau mai
i mua i to tātou aro, i reira e tauturu ai. Mai ia Ietu tei haere no te tau atu i mua i te aro o te taata i roto i te fifi, oia atoà òe, a tià
a haere fārerei i te taata, e a nā reira atoà.
Nō reira, ia here te here e ia aroha te aroha, ua maitaì roa. Tīrā
rā parau.
PURE
E te Atua no te here e te aroha, ta òe i hinaaro ei huru e ei hohoà
aè no mātou i roto i to mātou oraraa, faatiàmā mai òe ia mātou i
te ìteraa e, aita to mātou oraraa i papahia i nià i te hereraa e te haapaò-noa-raa mātou ia mātou iho.
Nō reira, a nanaò faahou òe i to here e to aroha i nià i te papa o to mātou âau, ia puru faahou mātou i te reira e ia māhorahora
faahou to mātou âau no te tauaroraa i to mātou mau taeaè e
tuahine tei topa e te autā noa nei i te rave a te parau tià òre e te òhipa piò e ta mātou atoà e àtuàtu nei i roto i to mātou oraraa.
Te Atua Metua e, haapii mai e a tauturu mai ā ia mātou tātaì tahi
i te ìteraa e te raveraa i ta mātou tuhaa no te maitaì o te
tāâtoàraa e no to mātou oraraa âmui. Ia uru-faahou-hia mātou i
te vārua o to mātou mau tupuna i hau e i hōê noa ai to rātou oraraa. Amene.