TE MAHA O TE MAHANA Mahana toru 10 no Tēnuare 2024.

TE MAHA O TE MAHANA
Mahana toru 10 no Tēnuare 2024
Tāramo 34, 15-22 & Ruta 10,31
Papa âti-Iuta : « E ìte atu ra o ia ia na, faahahau ê atu ra na te
tahi pae èà »
Papa Māòhi : « Eiaha te mata e tāpō i te àti o te nūnaa, e auahi âama te reira i roto i te ùtuāfare Māòhi »
Manaò tauturu. E piti atoà rāua, e arataì faaroo âti-Iuta. Te auraa, e piti atoà rāua e tāvini no te Atua. Te tahi, e âti Rēvi e te
tahi e Tahuà. To na tanoraa mau, e ôhie rāua i te tauturu, i te
tauaro atu i teie taata tei taparahihia i nià i te èà e te nana èiā.
Àita rā, ua àpe rāua i teie i hāmani-ìno-hia, ua na te tahi pae èà
rāua i te haere. Te auraa, ua huri tua, e ua tāpō i to rāua mata i mua i te àti o teie taata i hāmani-ìno-hia.
E tumu rā Ietu i tuu ai te parau no te âti Rēvi e te Tahuà i roto i
ta na parapore. No te mea, terā ihoā to rātou huru i roto i te oraraa, i roto i te nūnaa Ìteraèra. Te tāuà-òre-raa te mau arataì
faaroo âti-Iuta i te autā o te nūnaa. Te huri-tua-raa e te tāpōraa rātou i to rātou mata i mua i te àti o te nūnaa. I òre atoà ai rātou e ìte faahou i te parau no te here e te aroha o te Atua. No te mea ua î, e ua apiapi to rātou âau, e ta rātou òhipa i ta rātou iho faanahoraa taata. Moè ê atu ra ta te Atua faatereraa i roto i to
rātou oraraa faaroo. Te mea ia i moè ai te ture no te here e te
aroha i roto i to rātou oraraa.
E ua hinaaro Ietu e tūrama, e faaàraàra i te mata o teie haapii ture. Ia òre atoà o ia e pee i te huru o teie mau arataì faaroo âti-Iuta. Te auraa, aita atoà teie haapii ture i rāpae aè i teie parapore a Ietu. Ua hope ihoā paha te ture i te haapaòhia e ana, ua mau âau roa, tei roto i to na ôpū. Te toe noa rā, te faatupuraa i te mau parau atoà i pāpaìhia i roto i te ture. Ta te haapii ture ia
i manaò e, te haapaòraa aore rā te tāmau-âau-raa i te ture, e fānaò ia o ia i te ora mure òre. E inaha, eere roa atu mai te reira.
Te māramarama ra ia tātou e, ia faahahau ê tātou, aore rā ia
tāpō tātou te mau tāvini o te Atua, i to tātou mata i mua i te àti e te autā o te nūnaa, e auahi âama te reira i roto i te ùtuāfare Māòhi, oia hoì te nūnaa o te Atua.
Nō reira, tātou te mau tāvini o te Atua, tātou te mau arataì faaroo i Māòhi Nui nei, Eiaha to tātou mata e tāpō i te àti o te nūnaa
Māòhi, e auahi âama te reira i roto i te ùtuāfare o te Atua.
PURE
E to mātou nā Metua, i mua i te māuiui e te àti o te nūnaa Māòhi, haapii mai ôrua ia mātou, te mau tāvini e te mau arataì i te faaroo, i te faaàraàra i to mātou mata. Ia òre to mātou mata ia hiò ê i te vāhi e pohe ai mātou, ta ôrua mau tamarii, te nūnaa
Māòhi. Ia òre to mātou mau haereà, ia hāhau ê i to ôrua mau haereà atoà. A faatoro mai ia mātou i te èà e tupu ai te hōêraa o te nūnaa Māòhi, e te hōêraa o te mau nūnaa atoà o teie nei ao. Te faahaèhaa e te tātarahapa nei mātou i mua ia ôrua, no teie huru tāuà-òre-raa to mātou, i te faatupuraa i to ôrua hinaaro i nià
i te fenua nei. Te faahaèhaa e te tātarahapa nei mātou i mua ia ôrua, i te tāpō-noa-raa mātou i to mātou mata, i mua i to mātou Māòhiraa. Inaha hoì, e tupuraa to mātou Māòhiraa no ôrua. Te tumu atoà i topa ai teie nūnaa i roto i te àti e te autā o te oraraa
nei. Te òreraa te nūnaa e ìte e, to na ora teie noa nei i ô nei, i Māòhi Nui nei. A tāhōê ia mātou i roto ia ôrua e to mātou Metua tāne te papa nià
i te raì, e to mātou Metua vahine te papa raro te fenua ra o Māòhi
Nui. I ôrua na to mātou ora, mai teie atu nei e a tau a hiti noa atu. Amene.