Piti o te mahana Monirē 4 no Tēnuare 2021 Te tumu parau : E àti mai Ia ù, e Na ù e àti atu ia òutou. (Ioane èv 15, 4)

Piti o te mahana

Monirē 4 no Tēnuare 2021

Te tumu parau :

E àti mai Ia ù, e Na ù e àti atu ia òutou. (Ioane èv 15, 4)

Te pehepehe :

E te Māòhi e

Te Māòhi inanahi ra

I teie mahana e a tau a hitu noa atu

E aha to òe huru i teie mahana

E aha to òe manaò i teie taime

Ua ìte ānei òe, tē haere ra òe i hea

Ua ìte ānei òe i te mau maitaì e âuahāàti nei ia òe

E te tama e, e te tama herehia e te Tumu

Mau ia òe i To na here e To na aroha

Mau ia òe i Ta na mau maitaì

E te tama e, eiaha e fāriu ê i te mau mea e haaäpiäpi nei ia òe

E faaātea ia òe i te ora

A ìmi, a ìmi i to Atua ia ora òe

A ìmi, ia tià faahou mai òe i nià i to òe Māòhiraa

Tama òe no te here

Tama òe na te Tumu

E te Māòhi e, ia ora pāpū òe i roto Ia na

Aita atu to òe ora, to Atua ia.

Te mau taiòraa :

Èfetia 3, 14- 21 : « Ia pārahi te Metia i roto i to òutou âau i te faaroo ».

Ruta èv 2, 41- 51 : « Vaiiho atu ra Māria i taua mau mea atoà ra i roto i to na âau ».

Te manaò tauturu

Ta tātou tumu parau no teie mahana « E àti mai Ia ù, e Na ù e àti atu ia òutou », e parau faaitoito terā na Ietu i Ta na mau Pipi, i roto i ta tātou taiòraa Ioane. Tē faahohoà nei Ietu Ia na mai te tahi tumu vine, e te mau Pipi mai te tahi âmaa. Te Atua te faaàpu, Ietu te tumu e te mau Pipi te âmaa. I roto i terā faahohoàraa ta Ietu, tē parau nei O ia e, e tāpūhia te mau âmaa hotu òre e e topehia te mau âmaa hotu, ia rahi faahou ā te hotu. Mai terā atoà no te tahi taata faaàpu, ia tanu anaè o na i te tahi māa aore ia tumu rāau, e tāpūhia te mau âmaa hotu òre e e topehia te tahi mau âmaa ia rahi faahou ā te hotu. Ua riro te reira faahohoàraa, ei faaìteraa i te mau Pipi e, mai te peu eita rātou e ìmi i te tahi rāveà no tē tāpiri ia rātou i nià i te tumu rāau, oia hoì ia Ietu, e tāpūhia te reira mau âmaa hotu òre, e mai te peu ra e, e piri rātou i nià i te tumu, i te reira taime e topetopehia te âmaa ia rahi te hotu. Te auraa, e topetopehia te tahi mau vāhi tē faaapiapi nei ia rātou, to rātou huru, ia au i ta te Atua ôpuaraa. E tuhaa ta te mau Pipi tātaìtahi e rave, e e tuhaa atoà ta Ietu e rave atu ia tūàti maitaì rātou e ia riro rātou ei hoê. I mua i terā tumu vine e faaìtehia ra e Ioane, te parau no te tūàtiraa, te àtiraa i roto i te mau Pipi e Ietu, ua arataì-atoà-hia te reira manaò e Pauro, na roto i ta na rata i te nūnaa no Èfetia. Mai te rahu e hoê nei, tē tītau-atoà-hia ra i te nūnaa, ia hoê te taata na roto i te hoêraa ia Ietu. Ia pārahi te Metia i roto i to òutou âau i te faaroo, no teie nūnaa Èfetia e te oraraa i orahia mai e ana, tē haapāpū nei o Pauro i ô nei, i te hinaaro o te Atua ia na, na hea te reira nūnaa e ora ai, e e aha te rāveà, ia haapāpū te nūnaa no Èfetia i to na faaroo, na roto i te vaiihoraa ia na ia ärataìhia e te Vārua Maitaì, vaiiho ia na ia pārahi te Vārua faaroo i roto i to na âau no tē haapāutuutu atu i to na oraraa faaroo. Mai te peu e faatupu te reira nūnaa i te hoêraa i roto ia rātou e i roto i te Metia, e ìtehia te reira i roto i to rātou oraraa âmui. No te mea, e parau rahi to te hoêraa, aita ana e faataaraa i te taata, i te huru o te taata. E mai te peu e ìriti te nūnaa i to na âau no tē vaiiho atu i te Atua, te Tamaiti e te Vārua Maitaì ia pārahi i roto, no te mea te reira ihoā te pārahiraa o te Atua, tē roto i te âau o te taata, ua ora ia nūnaa. Na roto atoà i te reira hoêraa, ua faatupu ia te taata i te hinaaro o te Atua. Parau pāpū ia te reira ta Pauro e hinaaro nei e tuu i roto i te nūnaa no Èfetia e ia tātou atoà.

Te tumu vine, te hoêraa, te tahi te reira mau tuhaa òhipa ta Ietu i haere mai e faaìte i te nūnaa, ua faaìte e ua ora atoà no tē faaìte atu i te taata e, e maraa atoà ia na i tē rave na roto ihoā ia i te tahi huru taata. Tē faahope nei ta tātou tumu parau rahi na roto i te Èvaneria a Ruta, te parau no te Pāta, te parau no te tahi òhipa tē tupu i taua taime ra. Ia au te faatiàraa a Ruta, ua haere o Ietu, To na metua Vāhine o Māria e o Iotëfa i te tahi ôroà Pāta tē tupu i Ierutarëma. No te rahi ihoā o te taata, tei âmui, ua moè o Ietu, ua ìmi nā metua, e aita i ìtehia mai e rāua.

I te reira taime, ua haamanaò atu ra o Māria i te òhipa e auhia e Ietu i tē rave aore ra, ua haamanaò atu ra Māria, e aha te tītauraa a te Atua ia Ietu i nià i te fenua nei, haere atu ra nā metua i te Fare Pure, vāhi pāpū ai ia rāua e, to ô te Tamaiti ra. Aita ihoā te manaò i hape, tē roto te Tamaiti i te nūnaa, tē parauparau ra, tē hōroà ra te haapiiraa i nià i te parau a te Atua, faaìte i te nūnaa, o vai te Atua. I mua i te aniraa a Māria e te pāhonoraa a Ietu, e putapü ihoā te âau o te metua vahine, no to na rā here i to na Atua e no te mea ua ìte o na i te tuhaa tē horoàhia i roto i ta na Tamaiti, ua vai muhu noa o na. E au ra e, tē faaìte nei te reira tupuraa òhipa i te taata, i te tahi huru ia hoê anaè te taata i te Atua. E au ra e, aita o Māria i haataupupū i to na manaò, ua tuu ra o na ta na mau manaònaòraa, haapeàpeàraa i roto i te rima a te Atua. E nā roto i to na raveraa i te reira tuhaa, ua māmā te feruriraa, ua māmā te âau, noa atu terā âau metua vahine to na.

Ua tiàturi o ia e, e na te Atua e tīaì i ta na Tama. Na roto i to Māria tiàturiraa, na roto i te hoêraa i te nūnaa

i roto i te Metia e na roto i te àtiraa o te mau Pipi ia Ietu, ua riro te reira mau taiòraa no teie mahana ei haamanaòraa ia tāua, te nūnaa Māòhi, i te tītauraa ta te Atua e hinaaro nei ia tupu i roto ia tātou. Ua âpī te reira nūnaa i terā ra tau, na roto i te mau faaìteraa, mau haapiiraa ta Ietu i rave i rotopū ia rātou, ua âpī atoà rā tāua e te nūnaa Māòhi, i mua i te mau haapiiraa ta te metua, ta te mau tupuna i faaìte ia tātou no tē haafātata atu ia tātou i te Atua. Na roto i te fāriiraa i te mau maitaì atoà i vaiihohia mai e te Atua, tē faaìte nei te Atua i To na nūnaa i te mau mea atoà e ora ai o ia. Ta tātou tuhaa, te haamanaòraa i tē tiàau māite atu i te reira, mā te òre atoà e haamoè e, ia vai ìriti noa to tātou mau âau no tē fārii atu te parau maitaì a te Atua e no tē faaìte, i te tauturu i to tātou nūnaa i mua i te reira mau maitaì. No reira, teie ia te tahi mau manaò i mua i ta tātou parau no teie mahana. Ua ìte òe e, ua here te Atua ia òe, a faaitoito anaè ia. Ia ora na.

Te pure

Atua tē î i te here Metua, Fatu o te raì e te fenua, te moana e to na mau î atoà. Tē mauruüru nei to mātou âau no te mau maitaì atoà tē fānaòhia nei e mātou. I mua i to Òe here e to Òe aroha ia mātou, tē faahaèhaa atu nei mātou i mua ia Òe. Te Atua, e haapiiraa rahi tē noaa mai ia mātou na roto i teie mau tumu parau tē heheuhia e mātou, o ta mātou e tuu pāpū nei i roto i to mātou mau âau, ia ìmi mātou te rāveà ia tūàti faahou mātou ia Òe. Te Atua, ua ìte atoà mātou e, eita te reira e tupu aita anaè mātou e tuu i to mātou tāatoàraa i roto i ta Òe parau. Tauturu faahou mai ia mātou i tē ìteraa e, o Òe te Fatu o to mātou ora, a nīnii mai to Òe Vārua no tē faaìte ia mātou i te vāhi ta Òe i faaineine no mātou. Teie te pure ta mātou e pūpū nei i roto i to Òe rima, na roto i te iòa o ta Òe Tamaiti here o Ietu Metia. Âmene.