Mahana mātāmua Tāpati 3 no Tēnuare 2021 Te tumu parau : Eere na òutou i hinaaro mai ia ù, na ù rā i hinaaro atu ia òutou. (Ioane 15, 16)

Mahana mātāmua

Tāpati 3 no Tēnuare 2021

Te tumu parau :

Eere na òutou i hinaaro mai ia ù, na ù rā i hinaaro atu ia òutou. (Ioane 15, 16)

Te pehepehe :

Kai kaia.

Ka kai ä e e e

Te reo tumu ia o te fenua, e faaära ra i te tama,

A kai… àmu…, e ia paìa òe i to òe parau,

A faateni i to âià here, ta te Tumu Nui i hōroà mai no òe,

A parau, e, a ora i roto i to òe reo,

E fenua to òe, tei nià i te tua raì, tē pāpaìraahia te mau òhipa, tē tià i tē faatupu i te fenua.

A kai ā… i te reira haapiiraa, e ta ù tama,

A kai e ia paìa òe, i ta òe i tanu,

Kakaia e e e…

kakaia kai a kai e…

A ara e ta ù Tama, eiaha e vaiho na verā e kai i to òe parau,

A ara, tē matamatahia mai ra òe,

E hinaaro rahi to rātou i to òe àpu,

Eiaha e faarirohia to òe àpu, mai te pataraa pōro ra te huru,

Ta òe te reira pirū, ta te Tumu Nui i faaherehere no òe,

E ta ù tama e…

Kakaia kaia kai e…

Te mau taiòraa :

Tenete 12, 1-4 : Te tītauraahia o Âperahäma.

Ioane 1, 35-51 : Te tītauraahia te mau pipi.

Te manaò tauturu

E ôpuaraa teie na te Atua e haere e fārerei i te taata, no te tāpura òhipa e tīaì mai ra ia na. I tae mai ai te reo ia Âperahäma, e faaruè i te ùtuafare o to na mau metua, e haere i te fenua o ta te Atua e hōroà no na. E èà roa teie, e i mua i teie tāvini tei fārii i tē tomo i roto i teie ôpuaraa âpī, ta te Tumu Nui e hinaaro nei i tē haamau, e fenua âpī, e faanahoraa âpī, e arataìraa âpī. Aita te Atua i huna i to na hiaai, e mea māramarama maitaì te faaauraa i roto ia rāua, e nūnaa rahi tē matara mai no roto ia na. Te auraa, tē faaâpī nei te Atua i te uì taata tē na roto atu ia Âperahäma, eere no tē haafaufaa òre i te ùtuāfare o ta na i faaruè atu i Ùra i te Tarataio, eere roa atu i te reira. No te mea, ua tae i te tau, tē hinaaro e tē òre e hinaaro, e tupu ihoā ta te Tumu Nui faaâpīraa. I roto i teie haereraa âpī, aita te Atua e ôpua nei e taui te oraraa o teie nūnaa, e tīaì ânimara, e feiā faaàpu, e feiā piri roa i te fenua, feiā tei here e tei faatura i te fenua e tae noa atu i ta te fenua i faahotu mai. Ia hiò-anaè-hia, te faaauraa ta te Atua i faaau ia Âperahäma, ta te Atua atoà ia i faaau i to tātou mau tupuna. E ta ù nūnaa iti e, ua tīpee òe i ta verā, te oraraa ta to òe mau metua i faanaho no òe, e ùtuāfare hoê, e oraraa fētii. Mea nahonaho maitaì to òe oraraa, fare taòtoraa, fare tāmāaraa, ahimāa ta òe, e faaàpu ta òe, e ânimara ta òe, e vaa to òe. Tei roto òe i te uru maitaì, te vāhi ia ta te Atua i haapārahi ia òe. E oraraa fānaò to òe, aita te Atua, aita te fenua i faaère ia òe. E māa ta òe, e rāau ta òe, ua riro te fenua ei òrometua haapii nūmera hoê no òe e te taata. Ia hinaaro òe e àmu i terā fāito ià, a hiò i te âvaè, a hiò i te mau tāpaò ta te fenua e faaìte mai ra. Te tänuraa i te māa hotu, a hiò i te âvaè, e mau tāpaò anaè terā no te ora. E ta ù nūnaa iti e, tē nounou mai ra o verā i to òe oraraa e ta òe faufaa. Tē haere noa ra te tau i to na haereraa, tē haere noa atoà atu ra i te tūmā marū-noa-raa ia òe, ua haamata i tē tūraìraì ia òe, eita òe e tano faahou i terā vāhi, e tano rā òe i ô. Tē riro nei òe ei ôvere iō òe iho, tē nūnaahia ra te mau aroā i te òire pū. I teie mahana, tē ihu nei tātou. E aha te tahi rāveà. E pārahi i raro, e tuu i te tohe i raro, a hiò atu ai i te èà o ta òe i haere mai, e aha te huru.

E ta ù nūnaa iti e, e turaraa to òe, â tirē i tē haafaufaa òre ia òe, e parau nehenehe roa to òe. Te moni e e e, ha ! ha ! Faaruè roa te metua vahine faatupu ora, o te papa ia o to òe ora. Haamanaòhia atu ra te parau o te ûrī e tāpeà ra i te ivi i roto i to na vaha, na nià i te èà turu, ìte atu ra i to na hohoà i roto i te pape, tē mau ra i te ivi rahi atu ā, faaruè atu ra i terā i roto i te vaha, ôuà iho nei i roto i te pape, o to na ia pohe.

Te uiraa i ô nei : E aha paì ta te māramarama e te paari o te taata, e hōroà mai na òe. E aha ta na e vaiho mai na òe.

I teie mahana, ua tāpiri terā taiete, terā taiete, âreà te fenua, aita to na ùputa i piri, tē tīaì mai ra ia òe. Eiaha e mataù i tē hoì i te fenua, te papa terā no to òe ora. E aha ta òe e tīaì ra, e ora òe ia òe iho, eere òe te nūnaa tāparu, a tiàturi ia òe, e a tiàturi i to òe Atua, a haere, o òe e to òe fenua, o òe e to òe Atua.

Te pure

Haamaitaì mātou ia òe e te Atua Nui Tumu Tahi, fenua no mātou, fenua Māòhi no to mātou Māòhiraa, reo no ta mātou faateniteniraa, te iho tumu no to mātou ora, uruaìraa no mātou i roto i te àti e te fifi. Metua faaroo i to mātou reo tātarahapa, monoì tāvai i to mātou mau māuiui. Mai te tamarii i aòhia e to na metua, tē hoì mai nei mātou mā te âau tātarahapa no tē ani ia Òe, ia haamāhorahora mai ā Òe i to Òe rima metua, e ia fārii ia mātou i roto i to Òe here.

Âmene.