Ruta èv 1, 57-80

Täpati 24 no Tiunu 2018.

Taramo 139

1 Na te Mënätehe. Taramo na Tävita. E te Fatu, ua hiòpoàhia vau e òe e ua ìteä. 2 Ua ìte òe i taù pärahiraa i raro e taù tiàraa i nià, ua ìte òe i to ù nei manaò i te ätea ê ra. 3 Ua päheru òe i to ù haereà e taù taòtoraa i raro, e ua ìte òe i taù mau haereà atoà nei. 4 E aita roa e parau o roto i taù vaha i toe i te ìteä-hua-hia e òe, e te Fatu. 5 Ua haapunihia vau i muri e i mua, e ua tuu òe i to rima i nià ia ù. 6 To òe ra ìte, eita ia e noaa ia ù, eita e taeà ia ù i te teitei. 7 E haere tià vau nei i hea e moè ai i to värua? E maùe tià vau i hea e òre ai òe e ìte mai ai? 8 Ia paiùma vau i nià i te mau raì ra, tei reira òe Ia hohora vau i taù roì i häte, inaha, tei reira atoà òe  9 Ia rave au i te pererau o te poìpoì, a pärahi ai i te hopeà mai o te miti ra, 10 na to rima e arataì ia ù i reira, e na to rima àtau e mau mai ia ù. 11 Ia parau vau e: «Na te pöuri e täpoì mai ia ù, e riro te ruì nei ei märamarama i te haaàtiraa mai ia ù 12 Aita rä e mea e moè ia òe i te pöuri; ia òe ra, hoê ä huru ànaana to te ruì e to te ao, hoê ä huru te pöuri e te märamarama. 13 Na òe i hämani i to roto ia ù ra, na òe i täpoì ia ù i roto i te ôpü o taù metua vahine ra. 14 E haamaitaì au ia òe, ua taa ê hoì to ù hämani-raa-hia. E mea maerehia ta òe mau òhipa, e te Fatu, eita hoì e moè ia ù. 15 To ù nei huru, aore ia i moè ia òe, a hämanihia ai au i te vähi moè ra, e a rave-nehenehe-hia ai, i te vähi haèhaa o te fenua nei. 16 Ua ìte to mata ia ù i to ù vai-oti-òre-raa ra, e ua oti to ù mau mero atoà ra i te päpaìhia i roto i te puta na òe, i te mau mahana atoà te rave-raa-hia, e aore roa te hoê i toe 17 O te maitaì o to mau manaò ia ù nei, e te Atua e. E te rahi-roa-raa o to mau manaò ia taiòhia e 18 Ia taiòhia e au ra, e rahi ia te reira i te one tähatai E ua àro anaè au ra, tei pïhaì iho ä vau ia òe 19 E pohe mau ä te feiä paieti-òre ia òe, e te Atua, ia ätea ê atu òutou te feiä rave toto e. 20 O tei märô mai ia ia òe mä te parau ìno, o to òe ra mau ènemi, tei faahiti-faufaa-òre-noa i to òe ra iòa 21 Eere änei tei riri au i te feiä i riri mai ia òe, e te Fatu? E te atäta nei au i te feiä i tià mai e märö ia òe. 22 E riri rahi to ù ia rätou e riri rahi roa, te parau nei au e ènemi ia no ù.  23 E hiòpoà mai òe ia ù, e te Atua, ia ìte hoì òe i taù âau. E tämata hua mai ia ù, e ia ìte òe i taù manaò. 24 E hiò mai, e eiaha ei haamäinaina to roto ia ù ia òe ra. E arataì òe ia ù i te èà e tià i te vai-mäite-raa te maitaì ra.

Ìtaia 49, 1-6

To te Metia aroha i te êtene.

1 E faaroo mai ia ù, e te mau fenua roa e; e haapaò mai, e te mau taata, i ätea ra: ua parau mai ra te Fatu ia ù mai te ôpü mai ä; ua faahiti o ia i to ù iòa mai to ù fänauraa mai ä. 2 Ua faariro o ia i ta ù vaha ei òè òoi; ua huna o ia ia ù i roto i te maru o ta na rima oia ia, ua faariro o ia ia ù ei òhe ànaana; i vaiiho-mäite-hia vau e ana i roto i ta na piha òhe. 3 E ua parau mai ra o ia ia ù, O taù tävini òe, e Ìteraèra, e haamaitaìhia ai au nei. 4 Ua parau atu ra vau: Rohirohi faufaa òre to ù; ua faahope noa vau i to ù püai, ei mea faufaa òre: tei i te Fatu rä tä ù parau, e te utuà o ta ù òhipa, tei taù Atua ia. 5 E teie nei, te nä ô mai ra te Fatu, o tei faatupu mai ia ù mai te ôpü mai ei tävini nö na; e faahoì mai ia Iatöpa ia na ra, e ia putuputu mai Ìteraèra ia na ra: i maitaì ai au i te aro o te Fatu, e ua riro mai taù Atua ra ei itoito nö ù 6 ua parau mai ra o ia ia ù, E mea iti tënä ia ù, òe i riro mai ei tävini nö ù, ei faatià i nià i te mau ôpü o Iatöpa, e ia faahoì mai i to Ìteraèra i faaorahia? e höroà atoà vau ia òe ei tiàrama no te êtene e ei ora nä ù e tae noa atu i te hopeà mai o te fenua nei.

Òhipa 13, 22-26

22 E tuua-ê-hia aè ra o ia e ana, ua faatupu aè ra o ia ia Tävita e arii no rätou; ta na hoì i parau mai ra i te nä-ô-raa mai e Ua ìteä ia ù Tävita te tamaiti a Iete, e taata e au i taù âau, e na na e faatupu i taù mau hinaaro atoà. 23 Ua faatupu iho nei te Atua i te Ora no Ìteraèra ia Ietu, no te huero o teie nei taata, o tei parauhia mai ra. 24 I parau haere na Ioane i te päpetito tätarahapa i te taata atoà o Ìteraèra i haere mai ai o ia. 25 Te faatupu ra Ioane i to na tere, e ua nä ô aè ra o ia: «O vai au nei i to òutou manaòraa? Eere au i te Metia. A hiò na rä, te haere mai ra te hoê i muri iho ia ù, eita vau e au ia tätara noa atu i te tämaa i ta na âvae. 26 E te mau taeaè nei, e te tamarii o te fëtii o Âperahäma, e te feiä atoà e mataù i te Atua i roto ia òutou na, i häponohia mai teie nei parau ora ia òutou nei.

Ruta èv 1, 57-80

Te fänauraa o Ioane päpetito

57 E tae aè ra i to Èritäpeta mahana mau e fänau ai o ia, fänau iho ra o ia e tamaroa. 58 Ìte aè ra to na fëtii e te mau taata-tupu ra, e hämani maitaì rahi to te Fatu ia na, òaòa aè ra rätou e o ia atoà. 59 E tae aè ra i te ruì vaù ra, ua haere mai rätou e peritome i taua tamaiti ra, i hinaaro rätou i te maìri ia na ia Tätäria, i te iòa o to na ra metua. 60 Ua parau mai ra ta na metua vahine, nä ô mai ra Eiaha. E maìri rä ia na ia Ioane. 61 Ua parau atu ra rätou ia na Aore roa o to òe fëtii i maìrihia i te reira iòa. 62 Ua tüòu atu ra rätou i ta na metua täne, i ta na iòa i hinaaro i te maìri ia na. 63 Ua ani mai ra o ia i te hoê ìri iti päpaìraa, e ua päpaì iho ra i nià iho O Ioane to na iòa. «Ua mäere noa iho ra rätou atoà. 64 Àmaha mai ra to na reo i reira ra, matara aè ra to na arero; ua parau iho ra o ia mä te haamaitaì i te Atua. 65 Roohia anaè iho ra to reira iho e te mataù, parau-haere-hia iho ra taua mau parau nei, e àti noa aè te fenua mouà ra o Iutea. 66 E te feiä atoà i ìte i taua mau parau nei, vaiiho mäite iho ra i roto i to rätou âau, nä ô aè ra E riro rä ei aha teie tamaiti a muri atu? E tei ia na te rima o te Fatu.

Te himene tohu a Tätäria

67 Î aè ra ta na metua o Tätäria i te Värua Maitaì, e ua parau iho ra, nä ô aè ra 68 Ia haamaitaìhia te Fatu te Atua o Ìteraèra, ua haapaò mai hoì o ia, e ua faaora i to na taata 69e ua faatupu i te tahi tara faaora no tätou, i te fëtii o ta na tävini ra o Tävita;70 o ta na hoì i parau mai i te vaha o ta na mau perofeta moà mai tahito mai ä 71 ei faaora ia tätou i to tätou mau ènemi, e i te rima o te feiä atoà i riri mai ia tätou nei;72 i te hämani-maitaì-raa i to tätou hui tupuna, i te haapaòraa i te faufaa moà na na ra; 73 i te tapu ta na i tapu i to tätou metua ra ia Âperahäma, 74 e e horoà mai o ia i te mataù òre no tätou, tätou i faaorahia i te rima o to tätou mau ènemi, ia haamori tätou ia na, 75 mä te viivii òre e te parau-tià i mua i ta na aro e hope roa aè o tätou puè mahana.76 E o òe hoì, e teie nei tamaiti, e parauhia òe, e perofeta na Te Teitei; e nä mua hoì òe i te mata o te Fatu i te haere, ei haamaitaì i to na haereà; 77 i te faaìteraa i to na taata i te ora, i ta rätou hara i matara,

78i te aroha rahi o to tätou Atua, i taeà mai ai tätou e te märamarama no nià mai; 79 ei haamäramarama i te feiä e pärahi i te pöuri, i roto i te maru pohe; ei arataì hoì i to tätou âvae nä te èà hau. 80 Tupu aè ra taua tamaiti ra, e itoito atu ra hoì te âau, e tià hoì i te mau vähi moèmoè e tae roa aè ra i te mahana i faaìte-hua-hia ai o ia i to Ìteraèra.

Ìrava Tumu.

Ev. Ruta 1, 57 – 66, 80,  E riro ra eiaha teie tämaïti a muri atu, e tei ia na te rima o te Fatu.

Teie mahana haamoriraa te farerei nei tätou i te parau no Ioane Päpetito, ia au i te faatiàraa a Ruta èvaneria, te huru papaìraa, e to na faanahoraa. Te haafaufaa nei ò ia i te parau no na metua e te fänauraa o Ioane. Te hinaaro nei o Ruta e faaìte te òaòa no teie metua vahine i te färiiraa te haereraa mai o teie àiü.

O ta teie ia mau ìrava e faahiti nei te parau no te fänauraa o Ioane Päpetito, e te òaòa o te mau fetii, e tae noa atu te metua vahine, e töpahia to na iòa ia Ioane, ò ia hoì te HAAMAITAI, No te mea na roto ia na e tae mai ai te Èvaneria o te Metia, e te vai ra i nià ia na te ora a te Atua.

No te Metua tane, o Tätäria, no to na tiàturi òre e tö ta na i here o Eritapeta i taua taime ra ua faaea to na reo i te paaìna no te haamaitaì i te Atua, e ua pärahi ò ia i roto i te ao o te mau taata vavä, a tae roa ai i te mahana e fänau ai ta raua àiü, ia au i te faanahoraa a te Atua. I te taime ra o Tätäria a papaì ai tei iòa i nià i te hoê ìri raaua, no te haapäpü e o Ioane, i reira te hoì faahouraa mai te reo o Tätäria, ma te haamaitaì i te Atua.

I teie òhipa i tupu e rave rahi mau taata i maere i to rätou faaroo faahouraa i to rätou tahuà ia Tätäria i te parauraa, e te haamaitaìraa i te Atua, te naò nei to na reo i te ìrava 68, ia haamaitaìhia te Fatu te Atua no Ìteraèra ua haapaò mai ò ia, e ua faaora i to na taata. Te uiui atoà nei ra te taata te huru no teie àiü, e to na mau faanahoraa i roto i to na oraraa. Te tahi pae taata vai iho maite atu ra teie mau òhipa ta rätou i ìte, e i faaroo i roto i to rätou àau. E te tahi pae ra ua manii teie òhipa maere i räpae i to rätou àau, ua faaìte rätou i te mau vahi atoà e àti noa aè te mau mouà no Iutea. Areà te mau taata i täpeà teie parau i roto i to rätou àau, te paraparau ra ia to rätou värua, E riro ra eiaha teie tämaïti a muri atu, e tei ia na te rima o te Fatu.

Teie atu ra te huru no ta tätou parau i teie taime haamoriraa, 1- Te fänauraa, e te töparaa iòa, 2- Te parau i ìte faahouhia, 3 -Te faaìteraa a te mau taata. Te faufaa e vai nei i te faaìteraa a teie mau tumu parau, mauti ra, te ôpuaraa a te Atua i faaineinehia i roto i te taata, e te haapaò o te taata, i teie mau faanahoraa. E ua turaìhia e te taata te parau o Ioane i roto i te hoê hiòraa atea, e ma te ìte e tei pihai iho te Atua i te mau òhipa e tupu ra no Ioane.

 E riro ra eiaha teie tämaïti a muri atu, e tei ia na te rima o te Fatu, e parau teie no roto mai i te mau taata e rave rahi tei putuputu i roto i te fare o Eritapeta, no te fänauraa o Ioane. Ua faaroo rätou te mau parau tei faatupu i to rätou maere, e hau roa atu ai te reira tei iòa i te mea tei iòa i töpahia te vai nei ia te tahi taa – ê – raa, ia au i te peu a te Iuta tei iòa o te metua tane te tuuhia, e aore ra to fetii. No roto mai teie mau manaò te tupuraa ta tätou ìrava i te 66 i te vahi hopeà. O ta tätou e tià e hiò i te tahi mau parau i faatiàhia na no Ioane Päpetito ia au i te türamaraa a te mau perofeta, e te puta a te paari.

O vai o Ioane Päpetito ? Te taata ia i tohuhia e te perofeta ra Ìtaia i te pene 40 i te ìrava 3, i te naòraa e, te pii mai ra te hoê reo i te mëtëpara, a faanehenehe na i te èà o te Tumu Nui, e faatïtïàifaro na i te fenua märo i te haereraa o te Atua. E te faaìteraa a te Marati i te pene 3, i te ìrava 1, Ìnaha, e tono vau i ta ù veà, e na na e haamaitaì i te èà i mua ia ù ra, e te Fatu ta òutou e ìmi na, o tae vave mai ia i to na ra hiero, te veà a te faufaa ta òutou i òaòa na, ìnaha e tae mai ai, te parau mai ra te Tumu Nui. No reira e ua faahiti – atea – hia te parau o Ioane Päpetito ia au te mau töhuraa a te mau perofeta, e te faaìte a te Materi. To na Metua o Tätäria e tahuà, e te metua vahine o Eritapeta ia. E tià ia parauhia e ùtuafare tävini e te tiàturi Atua, to Ioane.

No reira te naò nei te reo o te mau taata e, E riro ra eiaha teie tamaïti a muri atu, e tei ia na te rima o te Fatu. Teie reo te ìriti nei i te auraa mau no te mau òhipa o ta Ioane, e faaineine no Ietu, òia hoì, te haamatararaa i te ùputa no te Parau Maitaì i roto i te mau taata atoà tei färii  i te mau hinaaro o te Atua. Te parau puai roa o ta Ioane i faaìte ma te maìti òre i te tiàraa vaamateinaa o te taata, mai te mau arii, e tae roa i te nunaa, te naò nei to na reo e TATARAHAPA te fatata mai nei te Patireia o te Atua, e teie reo e, a hiò na te àrenio a te Atua tei hopoì ê i te hara a to teie nei ao. O teie te na parau o ta Ioane i tiàturi ia riro faahou te taata i roto i te aroha o te Atua.

Teraì òr.