Märeto 5, 21-43

Täpati 01 no Tiurai 2018.

ÔROÀ

Àramöina.

Mai te mau mätahiti atoà, te haamanaò nei tätou te Ètärëtia Porotetani Mäòhi. Te mau faatupuraa òhipa tei haaviivii ia Mäòhi Nui e to na nünaa o ta te täatiraa Moruroa e tätou e tautoo noa nei e tae roa mai teie mahana ma te tuutuu òre. Ua päpü i teie nei i huna-noa-hia na te parau mau te parau tià no te mau òhipa i tupu na i Moruroa, Hao, e Fangataufa.

O ia atoà no te tätauro nïnamu èi pärururaa i te ïnu hua i te àva, te àvaava taèro, te ice, e tae noa atu i te mau taèro atoà e faaìno te èa o te nünaa. E aha te tätauro nïnamu, o te raveà teie no te tinairaa na roto i te pure i te mau maa taèro atoà.  

Te àti o te Nünaa e te Rahu i te taèro âtömï, e viivii tuatau teie e àai noa nei i Mäòhi Nui nei ma te ìte-òre-hia e te mata taata. Teie mau àti e raveà òre ta te taata, tei teie  vahi i anihia ai i te Ètärëtia Porotetani Mäòhi ia pärahi i roto i te pure e haapaeraa maa.

Mau taiòraa

Taramo 30

1 E Taramo, e e himene no te haoraa fare o Tävita.2 E haamaitaì au ia òe, e te Fatu, ua faatià hoì òe ia ù i nià, e aita òe i vaiiho noa atu i taù mau ènemi ia òaòa noa na ia ù. 3 E te Fatu, e taù Atua, i tiàoro noa na vau ia òe, e ua faaora òe ia ù. 4 Ua faahoì mai òe, e te Fatu i taù värua mai häte mai ä, e ua faaora òe ia ù ia òre au ia tae i raro i te âpoo ra. 5 E himene i te Fatu, e te feiä moà e, e ârue i to na maitaì, ei manaòraa. 6 Mai te àmoraa mata nei to na riri i te poto, âreà to na hereraa mai, e tià ia i te vairaa e mure noa atu te aho. Ia täpae noa mai te òto i te ahiahi; e riro rä i te òaòa ia poìpoì. 7 Taua maitaìraa no ù ra, ua parau ä hoì au e, E òre roa vau nei e âueue. 8 No to hereraa mai, e te Fatu, i haamau päpü ai òe i to ù mouà. Ua huna iho ra òe i to mata,

mäheahea aè ra vau. 9 Ua pure iho ra vau ia òe, e te Fatu, i reira e ua faaìte atu ra vau i ta ù aniraa i te Fatu. 10 E aha te faufaa ia rave-pohe-roa-hia vau, e ia hopoi-roa-hia vau i raro i te âpoo. E haamaitaì änei te repo ia òe, e faaìte änei ia i te parau mau na òe ra. 11 E faaroo mai, e te Fatu, e aroha mai òe ia ù; e te Fatu, ei tauturu òe ia ù. 12 Ua faariro òe i te òto no ù ra ei òaòa, e na òe i tätara i te àhu òto no ù ra, e ua faaàhu mai òe ia ù i te àhu òaòa.13 E teie nei, e haamaitaì au ia òe mä taù hinuhinu, e òre roa vau e mämü. E te Fatu, e ta ù Atua, e haamaitaì ä vau ia òe e a muri noa atu.

Ètetiera 18.21-32

21 Ia färiu mai ra te taata parau ìno i te mau parau ìno atoà nä na ra, e ua haapaò i ta ù ra mau haapaòraa, e ua rave i te parau au e te mea tià, e ora ia o ia, e òre ia e pohe. 22 Te mau hara atoà ta na i rave ra, e òre ia e manaò-faahou-hia atu ei hara nä na i te parau tià ta na i rave ra, e ora ia o ia i te reira. 23  Huru mauruüru iti aè änei tö ù i te pohe o te taata ìno  të nä reira mai ra te ATUA ra o te Fatu e eiaha o ia ia färiu mai i ta na èà ia ora. 24 Ia färiu ê rä te taata parau tià e ua faaruè i te parau tià nä na, e ua rave iho ra i te parau ìno, e ua rave i te mau parau faufau atoà i ravehia e te taata ìno ra, e ora änei o ia, te mau parau tià atoà i ravehia e ana ra, e òre ia e manaòhia o ta na ra hapa i hapa ai o ia ra, e ta na hoì parau ìno ta na i rave ra, e pohe ia o ia i te reira. 25 E te parau na hoì òutou e, Aore te parau a te Fatu nei i au. E faaroo mai na, e te ùtuafare o Ìteraèra nei, O tä ù änei te parau aore i au, eere änei o ta òutou te parau aore i au. 26 Ia faaruè te taata parau tià i te parau tià nä na ra, e ua rave i te parau ìno ra, e pohe hoì o ia i te reira; i te parau ìno i ravehia e ana ra e pohe ai o ia. 27 E ia färiu mai hoì te taata parau ìno i ta na ra parau ìno, i ravehia e ana ra, e ua rave i te mea au, e te parau tià, e ora ia o ia. 28 No te mea, ua manaò o ia, e ua färiu ê mai i te mau hapa tä na i rave ra, e ora ia o ia, e òre o ia e pohe. 29 E te parau mai ra te ùtuafare o Ìteraèra, Aore te parau a te Fatu ra i au. E te ùtuafare o Ìteraèra e, o tä ù änei te parau aore i au, eere änei ta òutou te parau aore i au. 30 E teie nei, e haavä atu vau ia òutou, e te ùtuafare o Ìteraèra, i te taata atoà ra i ta òutou mau parau, të nä reira mai ra te ATUA ra o te Fatu. A tätarahapa, e färiu mai i ta òutou atoà ra mau hara: e eiaha òutou ia hià i ta òutou mau parau ìno ra. 31 E faaruè ê atu òutou i to òutou mau ìno atoà ra, i hara ai òutou na e faaâau âpï e te värua âpï, e aha hoì òutou i hinaaro ai i te pohe, e te ùtuafare o Ìteraèra. 32 Aore roa hoì o ù e mauruüruraa i te pohe o te taata e pohe ra  te parau mai ra te ATUA ra o te Fatu: e tënä na, e färiu mai ia ora.

2 Torinetia 8.7-15

8 I faaòto na vau ia òutou i ta ù reta na, aore au i tätarahapa i teie nei, i tätarahapa rä vau i mütaa iho te ìte nei hoì au e, hoê o òutou hora i te òtoraa i taua reta na ù ra. 9 Te òaòa nei au, eere rä no te mea i faaòtohia òutou, no te mea rä i òto òutou mä te tätarahapa i au hoì to òutou òto i te Atua ia òre roa òutou ia ìno ia mätou. 10 O te òto hoì e au i te Atua ra e faatupu ia i te tätarahapa e tae noa atu i te ora, eita ia e tätarahapahia; âreà te òto o teie nei ao, e faatupu ia i te pohe. 11 A hiò na hoì i taua mea nei ä, i te mea i au to òutou òto i te Atua ra, o te haapaò maitaì hoì ta te reira ia faatupu i roto ia òutou na, e te faatià ia òutou iho, e te ìnoìno, e te mataù, e te hinaaro ûàna, e te itoito, e te tähoo. Ua faaìte hua mai òutou e, aita o òutou viivii i taua mea nei.12 E teie nei, i päpaì noa vau i te parau ia òutou, eere hua i to taua taata i rave i te ìno ra i nä reira ai au, eere atoà i to tei hämani-ìno-hia ra, ei faaìteraa atu rä ia òutou i to mätou haapaò-maitaì-raa atu ia òutou, i mua i te aro o te Atua ra. 13 I mähanahana ai hoì mätou i to òutou na mähanahana. E rahi roa atu ra hoì to mätou òaòa i te òaòa o Tito ra, no te mea ua mauruüru to na âau ia òutou atoà. 14 Ua ârue hoì au ia òutou ia na ra, aore au i haamä. Mai ia mätou ä hoì i parau atu ia òutou i te mau parau atoà mä te parau mau, oia atoà ta mätou ârueraa i te aro o Tito ra, ua riro ia ei parau mau. 15 E te rahi roa nei to na òto âau ia òutou; i te manaòraa o ia i to òutou atoà na faaroo, e to òutou hoì ìteraa mai ia na mä te mataù e te rürütaina. 16 E teie nei, te òaòa nei au, i te mea e tià ia manaò maitaì atu vau ia òutou i te mau mea atoà nei.

Märeto 5.21-43

Te tamahine a Iaeiro e te vahine i täpeà i te àhu o Ietu

(Mät 9,18-26; Ruta èv 8,40-56)

21 E ia hoì faahou Ietu i te tahi paeàu nä nià i te poti, e feiä rahi tei taìruru mai i te hiti ä o taua roto ra. 22 E inaha, ua haere mai ra te hoê tävana o te tunato ra, o Iaeiro te iòa; e ìte mai ra o ia ia na, ua haamaìri iho ra i ta na pae âvae, 23 täparu hua mai ra ia na, nä ô mai ra. Ua fätata roa ta ù tamahine iti i te pohe e haere mai òe e tuu i to rima i nià iho ia na ia ora o ia i reira. 24 Haere atu ra Ietu räua atoà, e rave rahi taata tei âpee ia na e tei nëneì atu ia na. 25 E te hoê vahine hoì, hoê àhuru e ma piti mätahiti i te poheraa i te täpahi 26 e mauiui rahi to na i te mau räpaauraa a te mau täote e rave rahi, e ua pau roa ta na faufaa e aore e ora i noaa, te rahi noa atu ra rä to na maì. 27 Faaroo aè ra o ia i te parau i nià ia Ietu, ua nä muri mai ra i te haere nä roto mai i te nahoà rahi taata, täpeà atu ra i to na àhu, 28 ua nä ô aè ra hoì o ia. Ia täpeà anaè au i to na àhu, e ora ia vau. 29 Òre roa iho ra taua täpahi no na ra i reira, ìte iho ra o ia i roto ia na iho e, ua ora o ia i taua maì no na ra. 30 Ìte aè ra Ietu i roto ia na iho, e mana tei püpü atu no roto ia na. i reira ra. Ua färiu aè ra i roto i taua feiä i neneì mai ra, nä ô aè ra O vai tei täpeà mai i ta ù àhu nei.31 Ua parau atu ra ta na mau pipi ia na. Te ìte mai nei hoì òe i teie nei feiä rahi i te neneìraa atu ia òe, e e parau mai hoì òe O vai tei täpeà mai ia ù. 32 Ua hiò atu ra Ietu e àti noa aè, ia ìte o ia i te taata i nä reira mai ia na ra. 33 Ua haere mai ra taua vahine mä te mataù e te rürütaina, ua ìte iho ra i te huru ê i tupu i roto ia na ra, ua tïpapa iho ra i raro i mua ia na, ua faaìte fäì mai ra i te parau mau. 34 Ua parau atu ra rä o ia ia na, E ta ù tamahine, i ora òe i to faaroo. A haere mä te hau, e ia ora roa òe i to maì. 35 E aita i hope roa taua parau na na ra, o te veà mai ra, mai te ùtuafare mai o te tävana o te tunato ra, e ua parau mai ra. Ua pohe roa to tamahine, e aha òe i haapeàpeà atu ai ä i te òrometua. 36 Aita ra o Ietu i tauà noa atu i taua parau ra, ua nä ô atu ra i te tävana o te tunato ra. Eiaha e mataù, e faaroo noa mai.37 E aore roa o ia i faatià i te taata ia pee mai ia na, maori rä o Pëtero, o Iatöpo, e o Ioane, te taeaè o Iatöpo ra. 38 E tae atu ra rätou i te fare o te tävana o te tunato ra, e ìte aè ra o ia i te huehueraa, te òtoraa e te hevaraa a te taata. 39 E ia tomo atu o ia i roto i te fare, ua parau atu ra o ia ia rätou No te aha òutou i huhue noa ai e i òto ai hoì. Aore taua tamahine nei i pohe, ua taòto rä. 40 Ua vahavaha mai ra rätou ia na. Ua tuu atu ra rä o ia ia rätou atoà i räpae, arataì atu ra i te metua täne e te metua vahine o taua tamahine ra e te feiä i pee mai ia na ra, tomo atu ra i roto i te piha i te vairaa o taua tamahine ra. 41 Ua rave atu ra i te rima o taua tamahine ra, nä ô atu ra, Tarita tumi, Te auraa, E teie nei tamahine, te faaue atu nei au ia òe, a tià. 42 Ua tià mai ra taua tamahine ra i nià i reira ra, hähaere iho ra, hoê àhuru ma piti hoì o na mätahiti, mäere roa atu ra rätou. 43 Ua aò hua atu ra o ia ia rätou e eiaha roa e faaìte noa atu i te hoê taata. Ua faaue atu ra o ia e hopoi mai i te mäa na taua tamahine ra.

Manaò.

Ìrava 30 vh. O vai tei faatiàià mai i ta ù àhu.

Te piti te ìrava 34 E taù tamahine i ora òe i to faaroo e haere ma te hau, e ma te ora i to maì.

Te toru te ìrava 36 vh. Eiaha e mataù e faaroo noa mai.

Teie ta tätou parau no teie hora paieti, te ìrava 30 vahi hopeà, te 34, e te 36 vahi hopeà. No roto mai ia teie mau tumu parau i te taiòraa o tei taiòhia atu i mua i te Atua, e i mua atoà ia tätou i te pene 5.

No teie taime haamoriraa, àrueraa e faateiteiraa na tätou i te Atua. Ei faaìteraa i to tätou faaroo, e to tätou tiàturiraa i ta te Atua i faatupu i te ora horoà noa, te hau tei faatupu i te haehaa, te here tei faatupu i te òaòaraa, i roto i tera taeaè, tera tuahine, te âmuiraa, e tera ùtuafare. O ta teie na ìrava e toru e hinaaro nei e heheu i te âau o te fëia paieti.

Ei ômuaraa.

Ua tupu teie parau i muri noa aè i te hoê tere àrepurepu mau no te mau pipi i ropu i te roto no Tarirea, te roto i faahoì faahouhia ai te tiàturiraa o te mau pipi, e te ìteraa te mau taata o te pahï, i ta te Atua i faafäite na roto i te puai o te mana o te parau.

I te hiti roto no Tatara, te vahi i tipaehia e to rätou pahï, te tupu faahou nei ia te tahi òhipa, o ta Ietu ä i faatupu no te ora a te Atua, ma te tiàvaru i te värua faufau  tei haafifi i te òpuaraa a te Atua. Aita ra te reira ei taupupuraa no Ietu, ua riro ra te reira ei pororaa na Ietu  i te värua faufau ma te faaìte, o te Atua te tumu o te taata, na te Värua Moà i faatià mai i te taata mai te repo mai. Te tià nei o Ietu i roto i teie pororaa na na, ei taata  faaroo päpu ma te ara i te mau mahana atoà i ta te ènemi òpuaraa. I faaìte ai te reo o te paari i te naòraa e, e ao to te taata e faaroo mai ia ù ra o tei ara maite i te mau mahana atoà i te mau ùputa no ù ra (Materi 8, 34). 

O Ietu, tei ara i te ùputa no te ora, ia òre te ora ia fati i raro aè i te pohe.

O Ietu, tei ara i te ùputa no te hau, ia òre te hau ia fati i raro aè i te àmahamaha.

O Ietu, tei ara i te ùputa no te mataù, ia òre ia tupu te faateäraa, e te òre o te faaroo.

Ta tätou ra parau no teie hora paieti tei mua ia o Ietu i na àti maì e piti nei, hoê te tamahine a te tävana no te tunato tei maìhia e pohe-roa-atu ra manaò iho ra to te ùtuafare e aita e raveà faahou, ua pohe tei te pohe ra ia. Te piti te vahine ia tei maìhia i te täpahi tei nià o Ietu i te èà no te haere i te ùtuafare o te tävana  no te tunato. Te faarooraa teie vahine teie mai nei o Ietu, i roto i te rahiraa taata, te ìteraa o Ietu e mana tei püpü atu no roto ia na i reira ra, e hiti àhu noa tei faatiàiàhia, e aore ra tei haruhia, oia hoì ua haru te vahine i te ora, te ora tei haere i te mau vahi atoà, tei pärahi i pïhaìiho i te mau pipi, tei ora i ropu i te rahiraa taata. E piti maì teie, tei faafäriuhia te tiàturiraa i nià ia Ietu e ta na òhipa. I ui ai o Ietu i te ìrava 30 O vai tei faatiàià mai i ta ù àhu? o tei hinaaro i te ora, oia mau i te mea noa atu ua àua haaàtihia o Ietu e te mau taata, no te itoito te vahine täpahi i te tïtau i te ora i te haereraa na nià i te èà, ua itoito atoà i te faaö-haere-raa noa atu te apiapi o te èà. E puai rahi to teie vahine i te mau taata atoà i taua mahana ra, ua faatiàià roa atu o ia i te hiti àhu o Ietu, ma te tiàturi päpu i te ora a te Atua, ora iho ra te maì o taua vahine ra i reira. I te ora faaroo, o ta Ietu ia faaoraraa, o ta te ìrava 34 ia e faaìte nei. E ta ù tamahine i ora òe i to faaroo e haere ma te hau, e ma te ora i to maì. Te haapäpü nei ia o Ietu, te ora o teie vahine ma te horoà i te ora, te hau, i roto i to na faaroo na te maì i haafatata i pïhaìiho i te Atua ma te ìmi i te mau raveà. Tei nià i te èà to Ietu faaoraraa i teie vahine.

Àreà ra te piti o te maì, te tamahine ia a Iaeiro, te faaroo nei o Ietu te manaò òto, te peàpeà no te ùtuafare, e te ahoaho o te fetii, ua fati te tino o teie pötii i raro aè i te pohe, ua atea te ora i to na tino, ua vai ei tino tähuti. Eiaha e mataù e faaroo noa mai. Te reo o Ietu i nià i te veà no te ùtuafare àti. E reo tei faaìte te vai ra te hoê tiaìtururaa o ta te Atua e faatupu no teie ùtuafare. Te manaò o Pëtero, o Iatöpo, o Ioane, te fetii, e na metua, ua pohe teie pötii ua taere roa o Ietu. Te manaò ra o Ietu aita i pohe, ua taòto ra. Aue ia reo mähanahana e, e te poupou. Ietu i mua i te pohe, mea faufaa-òre ia te pohe i te ora a te Atua. Teie mai nei o Ietu i roto i te ùtuafare àti, no te faaära tei taòto e tià mai, e tià ma te ora. Te ìte nei ia tätou i roto i teie taiòraa e piti vaehaa ta Ietu i faaora i te maì.

1. i nià i te èà no te vahine täpahi ia.
2. Te tamahine a Iaeiro i roto i te ùtuafare.

E täpaò faaìte teie e, te ora a te Atua eita o ia e maìti nei te vaehaa, ua itoito te vahine täpahi i te tïtau, ua itoito atoà o Iaeiro i te ani. Oia hoì te ora tei haruhia i nià i te èà , e te ora tei tomo i roto i te ùtuafare.

E hoa here ma e,

Te riro nei te maì i roto i ta tätou taiòraa ei faaìteraa te ora o te faaroo i roto i te Atua. E faaoraraa ta Ietu, eiaha te maì tino noa, te räpaau atoà nei ra O ia i te värua ia tiàturi, ua ora òe i to faaroo haere ma te hau. Eita anei teie i te mea òaòa no te taata faaroo, aita nei te taata paieti e tano nei, i te tano ora, e tano to te taata teretetiano i ta te Atua i ôpua. Ia faaära o Ietu i tei pohe, e täpaò te reira no te tiàfaahouraa no te taata, i roto i te Metia. E òhipa rahi teie i ravehia e Ietu, te naò nei to na reo i te ìrava 30 vh, o vai tei faatiàià mai i ta ù àhu ? i te ìrava 34 e ta ù tamahine ia ora òe i to faaroo e haere ma te hau, e ora i to maì. E i te ìrava 36 vh, eiaha e mataù e faaroo noa mai. E mau reo teie, o tei au atoà ia tätou i teie mahana, te faaitoito mai nei ia i te Ètärëtia. Ia itoito i te faatiàià-noa-raa i te ora a te Atua. Ia itoito te oraraa i te faaroo ma te hau. Ia itoito te faaroo-noa-raa ma te mataù òre. Ia itoito ia te Ètärëtia i te pororaa te ora a te Atua i teie mahana i Mäòhi Nui nei, no te faaroo, te hau, no te faatupu i te hoê ora poupou e te maitaì i roto i ta te Atua i faanaho no te ao nei. Ietu te tumu ia te reira no te ora, Ietu te tumu ia tei reira no te faaroo, Ietu te tumu ia te reira no te hau, eita na te reira i te mea hanahana ia ìte i te faaora a te Atua i nià i te èà, e i roto i te ùtuafare. No reira mea tià roa ia i te taata paieti ia haamaitaì, ia ârue i te Atua i te mea e tià to na aroha i te vai mäiteraa.

-          No te faaìte i te ora, te ora a te Atua.

-          No te faaitoito i te faaroo, te tiàturiraa i te Atua.

-          No te poro haere i te hau, te hau a te Atua.

Ua vai mai te hau te ora, te faaroo, te hau i roto i teie òhipa ta Ietu i rave, no reira i teie mahana e na tumu parau ia teie, te au no tätou, no te Ètärëtia e to tätou mau ùtuafare.

Ei ôpaniraa, tei roto ia ta tätou ìrava i te Hapatuta pene 2, 3vh, o tei tiàhia ra i te faaroo ra, e ora ia .

Terai or. Faatura.