Ruta èv 24.35-48

Täpati 15 No Èperera 2018

Taramo 4

1 Na te Mënätehe nä nià i te Netinota. Taramo na Tävita. 2 Ia tiàoro atu vau ra, e faaroo mai, e te Atua o ta ù parau-tià ra, ua faaorahia mai au e òe i taù àtiraa ra. E tënä na, e aroha mai ia ù, e faaroo mai i ta ù pure. 3 Mai te aha te roa, e te mau taata na, to òutou haapaò i taù hinuhinu nei ei mea haamä? E to òutou hinaaroraa i te faufaa òre e te ìmiraa i te haavare Tera. 4 Ia ìte mai rä òutou, ua mäìtihia e te Fatu ta na taata paieti ra te faaroo mai ra te Fatu ia tiàoro atu vau ia na. 5 E mataù òutou, eiaha rä e rave i te hara, a feàfeà na to òutou âau i nià i to òutou mau roì, a faaea noa ai. Tera. 6 Ei tütia parau-tià ta òutou e hopoi, a tiàturi atu ai i te Fatu.  7 Rave rahi të parau e Nä vai e faaìte mai i te maitaì ia tätou nei, E nänä mai, e te Fatu, i te märamarama o to mata i nià ia mätou nei 8 Ua horoà mai òe i te òaòa i roto i ta ù âau,  e ua hau i to rätou, ia faarahihia ta rätou tïtona e te uaina ra. 9 E tïraha vau i raro mä te ora, e e taòto hoì na òe anaè rä, e te Fatu, i pärahi ai au mä te ora.

Òhipa 3.13-19

13 Na te Atua o Âperahäma, e o Ìtaata, e o Iatöpa, na te Atua o to tätou hui tupuna ra i haamana i ta na Tamaiti ia Ietu, o ta òutou i püpü nei, e ua faaruè i mua i te aro o Pirato, ia na i märô ra e, e tuu. 14 Faaruè iho nei rä òutou i te Taata Moà e te Parau tià ra, e ani atu ra hoì i te täparahi taata ia tuuhia mai ia òutou na; 15 täparahi iho nei hoì i te Tumu o te ora, i ta te Atua i faatià mai te pohe mai ra, o mätou nei ä hoì te ìte. 16 Na na i faaètaèta i teie nei taata i te faarooraa i to na iòa, i ta òutou e hiò nei, e ta òutou hoì i ìte nei oia ia, na te faaroo hoì ia na i roaa ai ia na teie nei ora rahi mau i mua ia òutou atoà nei.17 E teie nei, e aù mau taeaè, ua ìte au e, e hoê ä ìte òre to òutou, e to òutou hui raatira i nä reira ai. 18 O te mau parau rä a te Atua i faaìte mai i mütaa iho i te vaha o ta na mau perofeta atoà ra, e e pohe te Metia, o ta na ia i faatupu iho nei. 19 E teie nei, e tätarahapa òutou, e e färiu mai, ia päraihia ta òutou hara, ia ìteä mai te ànotau haumärü no ô mai i te aro o te Fatu ra;

1 Ioane 2.1-5

E tauturu mai te Metia ia tätou

1 E aù mau tamarii ra, te päpaì nei au i teie nei mau parau ia òutou, ia òre òutou ia rave i te hara. Ia roohia atu rä te hoê taata i te hara, e tià to tätou tei ô i te Metua ra, o Ietu Metia, o te taata parau-tià ra; 2 e o ia hoì te täraèhara i ta tätou nei hara eere hoì i ta tätou anaè ra, i ta to te ao atoà nei rä. 3 Teie te mea e ìte ai tätou e, ua ìte tätou ia na ia haapaò tätou i ta na parau. 4 O tei parau e Ua ìte au ia na, e aore o ia i haapaò i ta na parau, e haavare o ia, aore te parau mau i roto ia na. 5 O tei haapaò rä i ta na ra parau, ua maitaì roa mau ä te hinaaro o te Atua ia na. O te mea ia e ìte ai tätou e, tei roto tätou ia na ra  6 o tei parau e, te àti ra o ia ia na, e faaäu o ia i to na iho haereà e mai to na atoà ra haereà e tià ai.

Ruta èv 24.35-48

35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Te färaa mai Ietu i nä pii àhuru mä hoê

(Mät 28,16-20; Mär 16,14-18; Ioane 20,19-23; Òhipa 1,6-8)

36 E tei te parauraa räua i taua parau ra, ua tià noa mai ra Ietu i rotopü ia rätou, nä ô mai ra Ia ora na òutou  37 Hitimaùe atu ra rätou, e te mehameha, parau aè ra e värua ta rätou i hiò ra. 38 Ua parau mai ra o ia ia rätou E aha òutou i hitimaùe ai E aha i tupu ai te manaò i to òutou âau 39 A hiò mai na i taù rima e taù âvae o vau mau ä  A fäfä mai na ia ìte; aita o te värua e ìò e te ivi mai to ù nei, ta òutou e hiò mai nei. 40 Nä reira mai ra o ia e oti aè ra, ua faaìte mai ra ia rätou i ta na rima e ta na âvae. 41 E aore ä rätou i faaroo i te òaòa e te mäere, ua parau mai ra o ia ia rätou E mäa ta òutou e vai nei 42 Ua hopoi atu ra rätou i te tahi maa ià tunu na na e te meriterio. 43 Ua rave iho ra o ia, àmu iho ra i mua i to rätou aro. 44 E ua parau mai ra o ia ia rätou Oia teie ta ù i parau atu ia òutou a pärahi atoà ai tätou ra, e ia hope te mau parau atoà no ù i päpaìhia i roto i te ture a Möte, e te mau perofeta, e te taramo i te faatupuhia e tià ai.45 Ua faaìte mai ra o ia i to rätou âau ia ìte rätou i te parau i päpaìhia ra. 46 Ua nä ô mai ra o ia ia rätou I nä-reira-hia taua parau ra i te päpaì, e ia nä-reira-hia to te Metia pohe e tià ai, e ia tiàfaahou mai te pohe mai i te ruì toru; 47 e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai. 48 E teie nei, ei ìte òutou i teie nei mau parau. 49 E inaha, na ù e tono mai ia òutou nei ta taù Metua i parau mai ra. E pärahi rä òutou i te ôire nei i Ierutarëma, e ia noaa mai to òutou itoito no nià mai.

Manaò.

E parau mau, ua hämani te Atua i te taata mä te mata, te tarià, e te ìri, tei riro ei tauturu maitaì no te taata i roto i te oraraa, e ta na atoà e faaòhipa nei i roto i ta na tïtauraa i te ìte. No te mata, te nä ô ra Ietu A hiò mai na, te mata to te tino nei rämepa te maitaì ra to mata, e märamarama ia to tino atoà ; ia maìhia rä to mata, e  pöuri atoà ia to tino e te mea hoì ta tätou i hiò e ta tätou i ìte, te nä ô nei tätou e  te vai ra. Eita e òre e, te nä reira nei tätou i te hiò-atoà-raa i te faufaa o te tarià. Mai te peu e tano te mata e te tarià ia faaäuhia i te ùputa o te ìte, e rahi aè to te taata tiàturi i te tahi mea ìte-mata-hia, i te tahi tei faaroo-tarià-noa-hia. Te ätearaa o te vähi e naeàhia i to tätou mata i te hiò, aore ra te naìnaìraa o te mea e noaa ia tätou i te hiò, te püairaa hoì, aore ra te naìnaìraa o te maniania e noaa i to tätou tarià i te faaroo, te ôtià atoà ia ta tätou i faataa e ta tätou i färii ei ôtià no to tätou ìte. Faaoti atu ra tätou e, i räpae aè i te mea ta tätou i faaroo, aore ra ta tätou i hiò, aita to te ìte e parau, e fifi hoì tätou i te färiiraa i te tahi manaò ê atu i te reira. Ia parau anaè Ietu 39 A hiò mai na i ta ù rima e ta ù âvae o vau mau ä  A fäfä mai na ia ìte; aita o te värua e ìò e te ivi mai to ù nei, ta òutou e hiò mai nei. 41 E aore ä rätou i faaroo i te òaòa e te mäere, ua parau mai ra o ia ia rätou E mäa ta òutou e vai nei. Mai te mea atu ra ua haamauhia te ôtià o te tupuraa te ôpuaraa faaora a te Atua Nui Tumu Tahi i nià i to tätou tarià e to tätou mata. Eiaha rä e manaò e, te faahiti nei tätou i teie mau parau ei faateiaha-faahou-raa atu i te faahaparaa i mätauhia i te huri i nià i te mau pipi, ei haamanaòraa noa rä e, o tätou atoà iho teie e panipani nei ia tätou i roto i te ôtià i haamauhia e to tätou mata, aore ra o tätou teie e fifi nei i te färiiraa e, aita to tätou parau i täôtiàhia e te mea i hiòhia e to tätou mata, aore ra te mea i faaroohia e to tätou tarià. Te tïtauraa ia o na taiòraa e maha no teie mahana.

-Taramo 4, 8 Ua horoà i te òaòa i ta ù âau, ua hau ia rahi te tïtona e te uaina ra.

-Òhipa 3, 19 ia ìteä te ànotau haumärü i te aro o te Fatu ra.

-1 Ioane 2, 6 tei parau, te àti ia na, e faaäu te haereà mai e tià ai.

- Ruta èv 24, 47 poro-haere-hia te tätarahapa te faaòreraa hara tei iòa o te Fatu.

Te taata tei faaea fätata e tei ora tämau i roto i te fenua, ua horoà te fenua ia na i te haapiiraa e tano atoà ai o ia e taiò i te mau mea të òre te mata o te tahi atu e ìte. Mai te reira atoà te tarià. Ia taì te manu i te pö, ua ìte roa te tahi e, e taata të haere mai ia na ra ia poìpoì aè ; âreà te tahi ra, e âhoahoa roa ia to na tarià i te reira maniania, aita rä o ia e hiroà ra e, te vai ra te tahi faaäraraa i roto i te mea i faaroohia. E tano ia parauhia e, nä roto i te fenua, te haapii noa nei te Atua i te taata i te ora. Te vähi ta te taata i hiroà, te haapiiraa ia e te ìte e noaa mai ra ia na no roto i te fenua. Te toe ra rä i te taata te haapäpüraa i te tüàtiraa e vai ra i roto i te fenua e te Atua, mai teie ta te päpaì Taramo e türama nei i te ìrava 8 Ua horoà mai òe i te òaòa i roto i ta ù âau,  e ua hau i to rätou, ia faarahihia ta rätou tïtona e te uaina ra. Tei haapaò i te haapiiraa e horoàhia ra e te fenua, e rahi te ìte e te paari e noaa ia na tei òre rä i haapaò, te taata vaha maniania roa aè ia e te faahapahapa, fätata e, i te vähi aita e parau, e parau noa ta na. Te tanoraa mau, aita e ôtià to te ìte, aore ra aita tätou i ìte i to na ôtià. Rave na tätou ei hiòraa, te mau òhipa ta Ietu i rave i to na tiàfaahouraa, te nä ô ra o ia i ta na mau pipi hoê àhuru mä hoê Ia ora na òutou  37 Hitimaùe atu ra rätou, e te mehameha, parau aè ra e värua ta rätou i hiò ra. 38 Ua parau mai ra o ia ia rätou E aha òutou i hitimaùe ai E aha i tupu ai te manaò i to òutou âau. Te auraa, aita e ùputa eita e matara i te faaroo, e tae noa atu i tei òre i manaòhia e tätou. Te reira mau te vähi tätou i fifi ai, no te mea ua mätau roa tätou i te faaea fätata noa i te mau vähi ìtehia e tätou, te vai noa ra i roto ia tätou te mataùtaù e te mehameha i te haere nä te mau vähi ìte-òre-hia e tätou, e inaha, te tanoraa mau, aita e ôtià, aita e ùputa të òre e matara i te faaroo, e tae noa atu i te ora, ia au i te mea ta Ietu e parau ra i ta na mau pipi. Te vähi e hope ai ta te taata räveà, te vähi e haamata ai te mata taata i te paruparu, te vai ra te faaroo. Te täviri te reira no te mau ùputa atoà tei òre ä te manaò taata i hiroà aè nei. Te vai  ra i roto i te faaroo te manaò e, te mea i tae mai i roto i te tarià, ua oti i te faarirohia e tätou ei òhipa ìtehia e te mata, tano atu ai tätou e hiò i te tüàtiraa, aore ra te tüàti-òre-raa e ìtehia ra i roto i te mea i faaroohia, e te òhipa i ravehia.Te taata haapaò, e taata ia tei ìmi tämau i te räveà ia riro te mea i parauhia ei òhipa ; âreà te taata haapaò òre, no te mea aita i mau mai ia na te mea i parauhia, e aha o ia e manaò ai i te òhipa e rave, ta na noa i ìte, te òhipa ia e mauruüru ai o ia. Te vai nei ä te tahi auraa no te taò faaroo, taa ê rii atu i nä auraa mätamua, inaha aita te manaò i nià i te parau i tae mai i roto i te tarià ; aita atoà rä i nià i ta te taata faariroraa mai i te reira parau ei òhipa, inaha aita e òhipa ta te taata e rave, eere hoì na na e faariro mai i te reira parau ei òhipa, e tuhaa rahi rä ta na i roto i te riroraa mai, aore ra te òreraa te tahi parau e riro mai ei òhipa. Te manaò i ô nei, tei nià ia i ta te taata pähonoraa i te parau i tae ia na ra, e parau no te tiàturiraa, tei parau atoà tätou, e faaroo. Te parau atoà nei tätou i teie riroraa mai te parau ei òhipa e, faaroo. E au noa rä teie parau no te taata tei haapäpü mai e, ua tae te parau ia na ra, ta na faariroraa i te reira parau ei òhipa të taiòhia ei faaroo. Hiò na tätou i teie parau to Ietu tei tiàfaahou 47 e ia poro-haere-hia te tätarahapa e te faaòreraa i te hara i to na ra iòa, e parau teie mai te  hoê  metua ia faanaho i te òhipa na te tamarii, ia ani te metua e  Ua faaroo, no to na ia hinaaro ia haapäpü mai te tamarii e, ua tae maitaì änei te parau i roto i te tarià. Ia parau rä te metua i te tamarii e  Aita òe i faaroo i ta ù parau, no te aò ia i te tamarii i te òreraa i faariro i ta na parau ei òhipa. Nä roto i te òreraa te parau i riro mai ei òhipa, hiòhia atu ra mai te mea, ua faufaa òre atoà te mea i parauhia.

Teraì òr. Faatura.