Ioane 20.19-31.

Täpati 8 no Èperera 2018.

Taramo 118.17-23

17 E òre au e pohe, e ora mau ä vau, e parau faahou ä vau i te òhipa a te Fatu. 18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20 O te ùputa teie na te Fatu, e nä reira te feiä parau tià i te tomo 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave E mea maerehia hoì i mua i to tätou nei mata.

Òhipa 4.32-35

Te ôpereraa taoà a te mau taata faaroo

32 E hoê atu ra âau e hoê hoì värua to taua feiä rahi atoà i faaroo ra, aore roa te hoê i parau i ta na taoà e na na anaè iho, ua âmui-noa-hia na rätou atoà. 33 Ûàna mäite atu ra to te mau âpotetoro faaìteraa atu i te tiàfaahouraa mai o te Fatu ra o Ietu; tura roa atu ra hoì rätou atoà. 34 Aore roa hoì te hoê o rätou i ère, e te feiä atoà hoì e fenua to rätou ra e te fare, hoo atu ra ia, e hopoi mai ra i te hoo i taua mau mea i hoohia ra, 35 tuuhia iho ra i raro i te pae âvae o te mau âpotetoro ra; e tufahia iho ra na rätou atoà e au mäite aè ra.

1 Ioane 5.1-6

To tätou upootiàraa i nià i te ao nei

1 O tei faaroo e, o Ietu te Metia mau ua haafänauhia o ia e te Atua o tei hinaaro i tei haafänau ra, të here atoà ra ia i tei haafänauhia e ana ra. 2 Teie te mea e ìte ai tätou e, te aroha nei tätou i te tamarii a te Atua ia hinaaro tätou i te Atua, e ia haapaò i ta na parau. 3 Teie hoì te hinaaro i te Atua, o te haapaò i ta na ra parau eere hoì ta na parau i te mea teimaha. 4 O ta te Atua hoì i fänau ra, te vï nei teie nei ao ia na; teie hoì te mea e vï ai teie nei ao ia tätou o to tätou faaroo. 5 O vai te taata i vï teie nei ao ia na ra? Mäori rä o tei faaroo e, o Ietu te Tamaiti a te Atua.

Te faaìteraa ia Ietu Metia

6 O tei haere mai ia mä te pape e te toto, o te Metia ra o Ietu; eiaha mä te pape anaè ra, mä te pape rä e te toto. E o te Värua tei faaìte mai, e e parau mau hoì ta te Värua.

Ioane 20.19-31.

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou Ia ora na òutou 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou Ia ora na òutou Mai taù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra A färii i te Värua Maitaì 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na, Ua ìte aè nei mätou i te Fatu Ua parau mai ra o ia ia rätou I òre au i ìte i te puta âuri i ta na rima ra, e aore i tuu i taù rima i taua puta âuri ra, e aore hoì taù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra Ia ora na òutou 27 Ua färiu mai ra ia Toma, ua parau mai ra A faatoro mai na to rima, e a hiò mai na hoì i taù rima nei e a faatoro mai na hoì i to rima e fäfä i taù àoào. Eiaha e faaroo taìàtä, e faaroo rä 28 Ua parau atu ra Toma ia na, nä ô atu ra E taù Fatu, e taù Atua 29 Ua parau mai ra Ietu ia na No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra 30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò.

Ia faaroo tätou i teie mau taiòraa, te hoê pupu taata, aore ra te tahi nünaa te ìtehia, e tano tätou e parau te vai nei te täuruuru òre te manaò e, a moè te reo o te reira taata, te reira pupu taata, aore ra te reira nünaa, a pärahi atoà o ia i roto i te pöiri, e tano ai ia faaäuhia i te tahi matapö. Te rahi noa atu i teie mahana, ia faaroo rätou i te tahi taò, te tahi manaò i te parauraahia nä roto i te reo mäòhi, eere te taò mäòhi ta rätou e faaroo ra, to na rä huriraa i roto i te tahi reo ê. Inaha te reo, te fauraò ia o te ìte e te paari o te hoê nünaa, te fauraò hoì, te tahi ia färii, ia huri te färii, eita änei te mea e vai ra i roto e manii, e aha iho ra të toe mai. Te manaò nei te tahi pae e, no te mea ua märamarama rätou i te mea i parauhia, nä roto noa atu ai i te reo ê, aita e mea ta rätou i ère, e eita teie parau e tano no rätou. E nä ô ia tätou, mai ia òe e òre e  tano e hiò nä roto i te mata o te tahi, eita atoà òe e märamarama i to òe parau nä roto i te reo o te tahi. Maitaì noa ai te tahi huriraa, e huriraa noa ihoä rä, oia hoì te tahi faatanotanoraa ; te tano atu ra te vähi tano, te rara atu ra hoì te vähi tei òre i tano. Ia haamau rä te taata i to na manaò i nià i te rara, i te hea ia taime o ia e tano ai. Te faufaa ia e faaroohia nei i te faaìteraa a taiòraa e maha nei i te reo hoê rau noa atu ta te reira uì parauraa i te ora.

-Taramo 118, 17 E òre e pohe, e ora.

 -Òhipa 4, 33 Ûàna i te faaìteraa i te tiàfaahouraa o te Fatu o Ietu.

-1 Ioane 5, 1 tei faaroo, o Ietu te Metia e haafänauhia e te Atua.

-Ioane 20, 31 Ietu te Metia te Tamaiti a te Atua, e noaa te ora i to na iòa.

Hiò maitaì anaè tätou teie mau parau maite tahi mörï ra te huru e nä räpae i te àma mai i nià ia tätou, eere te mörï maitaì, no te mea e pö to te mata i to na ànaana, òre atu ai  e ìte faahou i te èà te mörï rä e nä roto mai i te haere i räpae, te reira te mörï e türaì i te pöiri, märamarama maitaì ai. Ia ìte atoà mai rä tätou, eere na te mörï e faaìte mai ia tätou i te èà e rave, te faaotiraa te rave. Aita ä rä tätou i tae i reira. I teie taime, hoê noa te ra e parau ra tei faaroo, o Ietu te Metia e haafänauhia e te Atua. Te manaò tumu e vai ra i roto i teie huru parauraa no te ora ia, te tahi ia raveà e tià e arataì te manaò ia faanaho i te faaìteraa i te taata, tei ìtehia e tei färiihia te mea atoà te reira e horoà i to na püai e to na mana. Te auraa, te maitaì o te ora, aita to roto i te mau faanahoraa ta na e faataa ra, tei roto rä i te mea ta na e tïtau ra, te oraraa maitaì, te òaòa, e te hau no te täatoà. Te ora ta tätou e parau nei, e faanahoraa, e faaheporaa te tïtauhia ia haapaò i te faufaa e horoàhia, aita hoì e faautuàraa e tiaì ra i te taime e hapa ai te taata, tei nià aè te ora i te mau parau atoà i päpaìhia, e eere hoì no te mea i päpaìhia i mana ai. E roaa ia na te ìte i te reira, ia hiòpoà mäite ra i te mau mea e haaàti ra ia na. Rave na tätou i te parau o te aru, e parau tumu na tätou te fäìraa e, nä roto i te fenua, te haapii noa nei te Atua i te taata i te ora, oia hoì te mea maitaì no to na oraraa.

No te mea te ìte nei tätou i te maitaì o teie mau arataìraa tei noaa ia tätou na roto i te hiòpoàraa e te faaau-haere-raa i te tupuraa o te òhipa, e faatupu hoì te reira i te òaòa, te maitaì, e te hau i roto i te oraraa, i haapaò mäite ai tätou i te reira. Ia ìte mai ra tätou, eere teie parau no te taata hoê noa. I roto i te hoê pupu taata, te hoê nünaa, aita te maitaì e ìtehia i te tahi, të òre e ìte-atoà-hia atu i te tahi pae, no reira, ia òre te mea e faatupu i te maitaì o te täatoà ia fifi, e ara te täatoà ia òre te tahi ia riro ei tumu e fifi ai tätou, te auraa ra, te vai ra ia te tahi huru e hinaarohia ra i te taata atoà ia faaìte mai. To te taata tätaì tahi te reira ìteraa e, e tuhaa ta na i roto i te ora o te täuaro, e tae noa atu i to te âmuiraa taata, eiaha no te mea no tätou i maitaì ai, no to tätou rä òreraa e rave i te òhipa e fifi ai tätou, ua vai mai te ora ei tuhaa no te täatoà. Te vähi âpï ta tätou e täpeà mai i roto i teie manaò, to te taata tätaì tahi ia ìteraa i te faufaa ia ora te tahi pae, aore ra ia òre te tahi òhipa ta na e rave atu ia riro ei fifi no tätou, ei faaère hoì ia tätou i te maitaì, te auraa ra, e tuhaa atoà ia ta te taata tätaì tahi i roto i te ora o te tahi pae. Eiaha mai te mea e, ta na ia òhipa, te ìmiraa i to tätou maitaì, te ìteraa rä i te hinaaro tià o te taata i te ora. Aita faahou tätou i roto i te arataìraa manaò e ìmi ai au i to ù noa ora, mai te ara ia òre au ia topa i roto i te faahaparaa. E ia rave noa atu hoì au i te maitaì, eere ia no te hinaaro i te maitaì, no te mataù rä i te faahaparaa, Oia mau te parau ta Ietu ia Toma 29 Ua parau mai ra Ietu ia na No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra.

E reo teie no tei Tiàfaahou, àita i täui, àita i parare, hoê noa reo te ora ei fäìhia i te parauraa e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Èi tururaa i ta tätou parau, Taramo 118, 17 E òre au e pohe, e ora mau ä vau, e parau faahou ä vau i te òhipa a te Fatu. 18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20 O te ùputa teie na te Fatu, e nä reira te feiä parau tià i te tomo 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave E mea maerehia hoì i mua i to tätou nei mata.

Teraì òr. Faatura.