Overblog Suivre ce blog
Editer l'article Administration Créer mon blog
27 juin 2012 3 27 /06 /juin /2012 22:06

Tapati 05 no Àtete 2012.

Ioane 6,24-35

24 E ia hiò aè ra taua mau taata ra e aore Ietu e ta na mau pipi atoà i reira, paùma atoà atu ra rätou i nià i te pahï, hoê atu ra i Täperenaumi i te ìmiraa atu ia Ietu. 25 E ìte atu ra rätou ia na i te tahi paeàu i taua roto ra, ua parau atu ra rätou ia na, E Rapi, i nä fea mai òe i ô nei? 26 Ua parau mai ra Ietu ia rätou, nä ô mai ra:

«Âmene, âmene, e parau atu vau ia òutou: eere rä no te mea ua ìte òutou i te mau täpaò ra, te ìmi nei rä òutou ia ù, no te mea i àmu òutou i te mäa ra e paìa aè ra. 27 Eiaha e òhipa i te mäa tähuti noa, i te mäa rä e tià i te vairaa e tae noa atu i te ora mure-òre-ra, o ta te Tamaiti a te taata e horoà mai na òutou na: oia hoì tei haapaòhia e te Atua e ta na Metua ra. 28 Ua ui atu ra rätou ia na: «E aha ta te Atua òhipa i hinaaro ia rave mätou. 29 Ua parau mai ra Ietu ia rätou, nä ô mai ra: «Teie ta te Atua òhipa hinaaro, ia faaroo òutou ia na i ta na i tono mai. 30 Ua parau atu ra rätou ia na: «E aha ta òe täpaò e rave, ia hiò atu mätou a faaroo atu ai mätou ia òe. E aha ta òe räveà. 31 I àmu na to mätou hui-metua i te mäna i te mëtëpara ra, o tei päpaìhia ra e: «I horoà mai na o ia i te päne o te raì na rätou ei àmuraa. 32 Ua parau mai ra Ietu ia rätou: «Âmene, âmene, e parau atu vau ia òutou: aore Möte i horoà mai i te päne o te raì na òutou, ua horoà mai rä taù Metua i te päne mau o te raì no òutou. 33 Terä ta te Atua päne, o tei pou mai mai te raì ra, e o të horoà i te ora no to te ao ra. 34 Ua parau atu ra rätou ia na: «E te Fatu, eiaha òe e faaea i te horoà mai i taua päne ra na mätou.

35 Ua parau mai ra Ietu ia rätou: «O vau te päne ora. O të haere mai ia ù nei, e òre roa ia e poìa, e të faaroo mai ia ù nei, e òre roa ia e poìha.

Te òroà a te Fatu, e mauhaa ia ta te Atua i maìti e ta na e rave nei no te nenei maitaìraa i ta na parau i fafau mai i roto i to tätou mau ààu, na roto i te horoàraa ia tätou i te hoê tapaò hiòhia e te mata no to na mau maitaì hiò – òre – hia. E ara maitaì ra tätou, no te mea e ère o te tapaò hiòhia e te mata tei òhipa i roto ia tätou, o te maitaì hiò – òre – hia ra no te Atua, na roto i to na Varua Moà. Te òroà moà e papaìraa iòa ia, e titiro, e tapaò na te Atua, tei hiòhia e te mata, e tei haapäpu mai i te mau faaìteraa no to na aroha ta te èvaneria e parau nei ia tätou.

Na roto i te òroà moà, te faaìte nei te Atua ia tätou e, te mau parau ta na i fafau mai, e mau parau mau anaè ia, e e tano ia tätou ia päpu maitaì i te reira, mai teie mau tapaò tei hiòhia e to tätou mata e tei fafahia e to tätou rima. No te tauturu  ia tätou e to tätou mau hinaaro varua i haamau ai te Atua i te òroà moà. No reira, e ara tätou, o te maìri tätou i roto i te hape na roto i te parauraa e, e tano noa vau ia òre ia färii i te òroà moà. Te taata tei ìte i te auraa no te òroà moà, e tei òpua i te haapae i taua òroà ra, mai te manaò e, aita e faufaa no na taua òroà ra, te vahavaha nei ia o ia ia Ietu Metia, te faatere nei ia  i to na aroha, e te tinai nei i te Varua Moà.

I roto i te òroà a te Fatu, aita te pane e te uaina e faahohoà noa nei ia Ietu Metia, te faaìte nei ra ia na ia tätou e färii nei ia na, na roto te faaroo. Te faafariu nei te pane e te uaina ia tätou i nià i te Fatu, ia faaamuhia to tätou varua. No reira, tei roto i te òroà te fafauraahia mai to te Fatu àmuiraa mai ia tätou, aita te pane e te uaina e faaìte nei ia tätou i te hoê taata, te taata Atua o Ietu Metia. Na roto i na tapaò no te òroà, te hinaaro nei te Fatu e haapäpu ia tätou e, ua faarirohia tätou ei àpiti no to na tino e to na toto, na roto i te òhipa a te Varua Maitaì, mai to tätou vaha e färii nei i na tapaò moà, teie na tapaò tei hiòhia e te mata ei manaòraa ia na. Te hinaaro nei o ai i reira, e haapäpu ia tätou e, to na pohe e te auraroraa ta na i auraro, no tätou ia, mai te mea e, o tätou iho tei mauiui i roto i to tätou tino i te mau mea atoà ta na i mauiui no ta tätou mau hara.

No reira, te riro nei te òroà Eufari, ei òroà moà tei faatae mai, i roto ia tätou i te ora o te Metia, haapäpuhia na roto i na tapaò hiòhia e te mata. Te feia atoà e àmui nei i te òroà a te Fatu ma te faaroo, te färii nei ia rätou i te ora o te Metia i roto ia rätou, e te ora nei rätou, eiaha i to rätou iho ora, i te ora ra o to rätou Fatu.

Te riro atoà nei te òroà Eufari ei tohu no te hoìraa mai o te Metia e te taeraa mai o te patireia. Te faafariu nei o ia i to tätou mata i nià i te tau mau. Te parau tei parauhia e, « ua àmu anaè òutou i teie nei pane, e ua inu anaè òutou i teie auà ua faaìte a ia òutou i te pohe o te Fatu e tae noa mai o ia ra ». Te haamanaò nei ia tätou e, e upootià o Ietu, e te faaìte mai nei ia tätou i te hoê mahana ei reira te hara e te pohe e haamou – roa - hia ai.

Na roto i te raveraa i te òroà, te fäì nei au i reira i te tiàturiraa o te Etaretia, ta na e faaìte noa nei na roto i te fäìraa faaroo na te mau Apotetoro, e o ta ù atoà e fäì nei e, e haere faahou mai o ia e haava i tei ora ra e tei pohe. Te faaroo nei au i te tiàfaahouraa o te tino e te ora mure – òre.

Te òroà a te Fatu, o te àmuraa maa moà ia tei haamanaò ia ù i te faaòreraa hara tei noaa ia ù mai ò mai ia Ietu ra na roto i to na toto. Te haapäpu nei o ia ia ù i to na faaearaa mai i pihaiiho ia ù, e te faaamu nei o ia i to ù faaroo.

Te faatahoê nei o ia ia ù i to ù mau taeaè e i to ù mau tuahine i te faaroo no te faariro ia ù e o rätou ei tino no te Metia i nià i te fenua nei.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens