Hepetoma Pure Mahana piti no Tenuare 2014
« Tätou päatoà, e òre roa e ère
i te hoê iti noa aè horoà o te maitaì »
Te mau taiòraa
Iöpa 28/20-28 : O te mataù i te Fatu, o te paari ia
Taramo 145/10-21 : Te heheu nei òe i to rima, e te haamäha nei i te mau mea ora atoà nei
Efetia 4/7-13 : Ua horoàhia mai hoì te maitaì ia tätou atoà nei, i ta te Metia i au i te horoà mai
Märeto 8/14-21 : E aha òutou i parau ai e « No te mea aita a tätou e mäa
Te Tatararaa
I to na tau, e taata hau i te rahi o Iöpa i to te hitià o te rä atoà ra : too hitu ana tamarii tamaroa e too toru ana tamarii tamahine fänau, 7000 mämoe, 3000 tamera, 1000 puaatoro, 500 âtini ufa e rave rahi mau rave òhipa. I muri iho rä ua ère o ia i taua mau mea atoà ra : ta na faufaa, ta na mau tamarii e te tauturu a ta na vahine, e ua toe noa mai o ia anaè. Noa atu e ua pärahi o ia i roto i te ère, e täpeà noa ra o ia i te parau o te mataùraa i te Fatu oia hoì, te paari. Eere na te ère e faaätea ia na i te paari. Aita te ère i täpü i to na tüàtiraa i te Atua.
Te mau taeaè e te mau tuahine i roto i te Metia, ärea noa ai i roto ia tätou ta to tätou mau âmahamaha i faatupu, ua fänaò rahi rä tätou i te mau maitaì rau ei faaitoitoraa i te tino o te Metia i roto i to na tupuraa.
Terä rä, noa atu te mau parau a te Atua, te parau no te ora e te aroha horoà noa o te Metia, e moè-atoà-hia na ia tätou, mai te mau pipi ia au i te faatiàraa a Märeto, ta tätou iho mau faufaa mau : te mea e ìtehia nei maori rä e pätoì, färii òre, haapaò-noa-raa ia na iho, pipiri, matara òre ; a parau noa ai, a rave noa ai mai te huru ra e, aita ta tätou e mäa.
Aita te Metia i âmahamaha : te vai ra te horoà i roto ia tätou päatoà e te navaì maitai e të au ia ôperehia ta te tahi e ta te tahi e i te mau mea e ora nei.
I roto i te rururaa a te mau vahine a te EPKNC (Etärëtia Porotetani Kanak) i tupu i te fenua Lifou, ua ìtehia to rätou òaòa. No te mea ua faaìte rätou i te maitaì i noaa ia rätou i to rätou tereraa mai i te fenua nei. I roto i to rätou ère i te tahi mau tuhaa, ua tià ia tätou i te horoà e te ôpere i te ìte e mauhia ra e tätou. Ia haamaitaìhia te Atua no terä manaò horoà e te ôpere i tupu.
Te Pure haamaitaìraa
E te Atua no te here, te haamaitaì nei mätou ia òe no te rahi o te maitaì ta òe i horoà ia mätou : te fenua, te moana, te mau î e te mau mea atoà e ora ai mätou. Aita òe i faaère ia mätou i te maitaì. Tauturu ia mätou i te tiàau e te aupuru i terä rahiraa maitaì ta òe i horoà mai.
Te haamaitaì nei mätou ia òe no te rahiraa maitaì ta òe i faaìte mai, nä roto i ta òe Parau, mai te faufaa i roaa i te hoê taata i to na täpeàraa i to na tiàturiraa ia òe noa atu e ère o ia i te tahi mau maitaì i roto i to na oraraa. Te haamaitaì atoà nei mätou ia òe no te rahiraa tauturu ta òe i faaìte ia mätou.
Te Pure faahaèhaaraa
E te Atua no te here, te faahaèhaa nei mätou i mua ia òe tei haapii ia mätou, nä roto i ta òe Parau i te horoà. Ua ìte mätou i to mätou paruparu i te faatupuraa i teie parau i te tahi taime. Aita mätou i òhie noa i te ora i teie parau. No reira, te faahaèhaa nei mätou i mua ia òe no te fäì i to mätou paruparu e no te ani i ta òe tauturu.
E te Atua no te here, ua ìte mätou, eita mätou e maitaì e e ora mai te peu aita òe. Te faahaèhaa nei mätou i mua ia òe no te täparu ia òe, eiaha òe e faaruè ia mätou. Eiaha òe e vaiiho noa ia mätou, ia haere noa nä nià i to mätou hinaaro. A arataì ia mätou e to mätou Atua.
Te Pure aniraa
Te Atua no te here, te ani nei mätou ia òe, e faarahi mai i to mätou faaroo no te tauturu ia mätou i roto i ta mätou faaìteraa e ta mätou täviniraa. Tauturu òe ia mätou i te ìteraa i to mätou mau hape e to mätou mau hahi. Ia roaa ia mätou i te faaâfaro faahou i to mätou haereà. Amene