Ev.Ruta 1, 39-45
Tapati 23 no Titema 2012 Tiaìraa 4
Ei manaò matamua.
I teie mahana, te Atua, to tätou Metua, o tei tono mai i ta na Tamaiti here i te ao nei. O te tumu hoê ia no teie nei farereiraa. Te faaìte nei ra tätou i to tätou òaòa e te haamauruuru i te Atua i te rahi hau ê o to na here o ta na i heheu mai na roto i te fanauraa no ta na Tamaiti. To tätou òaòa, o te òaòa atoà ia o Maria i ora i to na tau, ia au i ta tätou parau no teie mahana o tei haapii mai i te na – ò – raa e, ua faarahi ta ù varua i te Fatu, E ua òaòa ta ù varua i te Atua o to ù ora.
Ei tuatapaparaa.
Ua tupu teie nei parau i roto i te ùtuafare no Tataria e to na hoa vahine o Eritapeta. I roto i teie farereiraa no Maria e te ùtuafare no Tataria mä, aita te parau no Tataria i faarahihia i te tuatapapa, to Eritapeta ra. Na Eritapeta iho i ìte i te òhipa moè a te Atua, na roto i to na tavini vahine ia Maria, ia ua i te ìrava 41, î aè ra Eritapeta i te Varua Maitaì, no te faaìte i te òaòa e vai ra i roto ia na, e ua pii hua atu ra to na reo i te na ò raa e, o òe tei hau i te maitaì i te vahine, nei e e maitaì hoì te huaaì o to òe òpu.
No reira faatupu teie farereiraa i te òaòa, eiaha noa no Maria anaè. Ua riro atoà ra ei òaòaraa no Eritapeta. E na vahine Faaroo e te paieti Mau, no te haapurororaa i te òhipa ta te merahi i faaìte mai. Oia hoì te pororaa i te òhipa rahi e te maere ta te Atua i rave no te faaora i te taata na roto i te fanauraa o te Metia.
Ei tatararaa.
Ua hinaaro o Ruta i te haapapu i ô nei i te tuhaa faufaa i ravehia e te vahine. Te ìte nei tätou i te reira i te òmuaraa – iho – a o ta na parau maitaì, e na reira atoà oia i te pae hopeà, i te taime iho – a – ra no te tiàfaahouraa no Ietu. A hiò na ra tätou i ô nei i te faufaa o te parau no te òpuaraa faaora a te Atua, o tei heheuhia mai na roto mai i teie na vahine.
I muri aè i to Eritapeta faaìteraa i te òhipa ta to na ààu i faatupu, na roto i to na faateniteniraa i te aroha faaora a te Atua i rave na roto ia Maria. I teie taime ra, eita atoà e tano ia Maria ia tapeà i tera òaòa no na anaè, e mea tià atoà ia faaìte, ia huaì mai i rapae, e teie to na reo, Ua faarahi ta ù varua i te Fatu.
Te vahi i reira te faatumuraahia ta tätou parau, tei roto ia tuhaa no te himene a Maria, i te Mau ìrava 46 e tae i te ìrava 55. Oia Mau, ua haamata ta na himene na roto i teie parau, ua faarahi ta ù varua i te Fatu. E aha te auraa o teie parau, FAARAHI, te vai nei teie na parau, FAA e aore ia HAA, teie te auraa, no te haapuai anei, e aore ra no te haapautuutu i te parau i muri mai. Te parau i muri mai teie ia te RAHI. No reira, ia parau anaè – hia teie parau RAHI e o mai te parau no te teitei, te ààno, te roaraa, e te vai atu ra. Teie atu ra ia ta tätou e tapeà mai, FAARAHI, o te faateiteiraa ia e aore ra te amoraa, te faahanahanaraa i te Mau maitaì a te hoê taata.
Ia au i ta tätou parau , ua faarahi ta ù varua i te Fatu, Te ìte ra tätou e, o te Fatu teie ta Maria e faaìte nei. E na o ia tätou i te parau e, Faarahi i te Fatu ; o te faateiteiraa ia, e aore ra o te faahotanaraa i te Fatu. O te amoraa, e te paèpaèraa i te Fatu i nià. O te mea ia ta Maria e hinaaro nei i te faaìte ia tätou. A ui ai to tätou manaò, i te na ò raa e, E AIFAITO ANEI TE MEA E VAI RA I ROTO I TO TÄTOU ÀÀU , I TEIE MAHANA NO TE FAAÌTE I TE HANAHANA E AORE RA TE TEITEI O TE FATU, IA AU MAI TA MARIA I HIMENE I TO NA RA TAU. UA ÌTE Mau ANEI TÄTOU , NA ROTO I TO TE FATU TAËRAA MAI I TE AO NEI, E E Ö TEIE NO Ò MAI I TE ATUA RA ?
I naha hoì, ua faaìte mai te Atua i te hohonu, te teitei, te ààno no to na aroha na roto i te aiu e fänauhia mai, no te haapapuraa i te hanahana o te Atua. E ta te Atua i faariro i te aiu ei taeaè i ropu i te Mau taeaè, e te Mau tuahine atoà.
Te heheu mai nei te Atua ia tätou mai roto mai i teie aiu, aita O ia i taui noa aè i ta na parau. Ietu atoà, oia tei ora mai te taime no te fatene, e tae noa atu i te tatauro, ai ta roa atu i taui iti noa aè i to na tiàturiraa i to na Metua e tae noa atu i te taata ta to na Metua i ho mai. Ua vavahi ra i te Mau patu tei faataaê te tahi i te tahi, aore o ia i haere mai no te haava e aore no te faautuà i te taata e i to te ao nei. Ua haere mai te Metia e faaora, na roto i to na pupuraa ia na iho ei taraèhara no to te ao nei. Oia Mau, na roto i te aroha faito òre o te Atua i to te ao nei, i himene ai o Maria i te Fatu i te na o raa e, ua faarahi ta ù varua i te Fatu, e ua òaòa ta ù ààu i te Atua to ù ora.
Ei poroìraa.
Oia Mau, e te Atua, te hinaaro Mau nei to mätou ààu e himene no te faahotana e faateniteni, e ia Òe ia faariro ia mätou ei Mau tavini Mau no Òe, e ia riro mätou ei Mau ìte no to Òe Here e no to Òe Aroha, e ia tià ia mätou ia òpere no te feia atoà i ère e ia riro mätou ei Mau veà no te Hau ta Òe iho i ho mai no mätou. Ia riro ta matou taviniraa ei òaòaraa e ei hihi no to Oe here, no te mea o Òe tei here mai ia mätou na mua roa.
Ia ora na.