Märeto 1.40-45

Täpati 11 no Fëpuare 2018.

Taramo 102

1 E pure na te taata e òto ra ia roohia o ia e te àti rahi, e te ninii ra i ta na parau taiä i mua i te aro o te Fatu. 2 E te Fatu e, e faaroo mai i taù pure, e ia tae atu hoì taù reo ia òe ra. 3 Eiaha òe e huna i to mata ia ù ia tae i te mahana e àti ai au ra. E färiu mai i to tarià ia ù nei ia tae i te mahana e tiàoro atu ai au ra, e faaroo ènaèna mai òe ia ù. 4 Ua mou o ù nei puè mahana mai te au auahi ra, e ua viu o ù nei puè ivi mai te ômoì ra. 5 Ua täìrihia taù âau mai te àihere ôriorio ra, e te moè noa nei ia ù ta ù nei àmuraa mäa. 6 Ua piri taù mau ivi i to ù nei ìri i to ù autä-noa-raa. 7 Mai te tata o te mëtëpara ra vau, e mai te tuta o te vähi ano ra. 8 Te tiaì nei au, e mai te manu iti ra vau, mai te manu iti o ia anaè ra i nià i te fare. 9 Te faaìno mai nei taù mau ènemi ia ù e pö noa atu te mahana; e no te rahi o te riri, ua tapu rätou ia ù. 10 No te mea te àmu nei au i te rehu auahi mai te mäa ra, e ua ânoì i ta ù e inu nei i te roimata.11 No to òe rä mäinaina e te riri, ua hopoi hoì òe ia ù i nià, e ua faaruè òe ia ù i raro. 12 Mai te maru ata e pee ra to ù nei puè mahana, e ua riro vau mai te àihere e mae ra. 13 Âreà òe, e te Fatu, e tià ia i te vai-mäite-raa e a muri noa atu, e te manaòraa ia òe e ia hope noa atu te mau uì atoà ra. 14 E riro òe i te tià mai i nià e aroha ia Tiona. Ua tae hoì i te tau, te ànotau mau e ìtehia mai ai o ia ra.15 Te pöpou nei hoì to mau tävini i te mau ôfaì atoà no na nei, e te aroha nei ia na e tae noa atu i te repo ra. 16 Ei reira te mau êtene e mataù ai i te iòa ra, o te Fatu, e te hui-arii atoà o te ao nei i to òe ra hanahana 17 Ia patu faahou te Fatu ia Tiona, e ìteä mai o ia mä to na iho ra hanahana,18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra.19 E päpaìhia teie no te tahi uì atu, e e haamaitaì te feiä e fänau ra i te Fatu, 20 no te mea ua hiò mai o ia i raro i to na vähi moà teitei ra; i nià i te raì to te Fatu hiòraa mai i te fenua nei, 21 e faaroo i te autä o te feiä i täpeàhia ra, e ia tuu hoì i te feiä i haapaòhia no te pohe. 22 Ia faaìtehia to te Fatu iòa i Tiona, e ia haruru faahou te haamaitaì ia na i Ierutarëma, 23 ia âmui atoà mai te taata atoà ra, e te mau pätireia e haamori i te Fatu. 24 Ua faaòrehia taù püai i te èà tià ra, ua haamure o ia i o ù puè mahana. 25 Ua parau hoì au e E taù Atua, eiaha vau e hopoi-ê-hia i röpü i to ù nei puè mahana, e vai ä hoì to òe ra mätahiti e hope roa aè te mau uì atoà ra. 26 Na òe i haamau i te fenua, e te Fatu, i tahito ê ra, e te mau raì hoì na to òe rima ia i hämani. 27 E riro rä te reira i te mou, e toe ä òe. E e marau rätou mai te àhu e marau ra, e e haapaehia rätou e òe mai te àhu ra.28 Haapae noa ä iho rätou, o òe ä òe, e òre roa to òe ra mätahiti e hope. 29 E haamauhia te mau tamarii a to mau tävini, e to rätou ra huaai e haapäpühia ia i mua ia òe ra.

 Revitito 13.1-2  

1 Ua parau mai ra hoì te Fatu ia Möte räua o Àarona, nä ô mai ra, 2 E uiui to te hoê taata, e te paa, e te vähi iti teatea i nià i to na iri, mai te maì ra e rëpera te huru i nià i to na ìri e ärataìhia te reira taata i te tahuà ra ia Àarona, e aore ra, i te hoê tamaiti tahuà na na ra.

45-46.

45 E te taata i pohe i te rëpera ra, e pii noa o ia, Ua viivii, ua viivii, ma te ahu mähae, e te täupoo òre, e ma te täpoìhia to na taa 46 e taua poheraa atoà no na i te rëpera, e parauhia o ia e, ua viivii o ia o ia anaè ra i to na pärahiraa; ei räpaeàu mai i te pühapa o ia e pärahi ai.

1 Torinetia 10.31- 32, 31 E teie nei, te àmu ra e te inu ra hoì, e te mau mea atoà ta òutou e rave na, e rave ia mä te haamaitaì i te Atua. 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua. 33 Mai ia ù atoà e haamauruüru i te taata atoà i te mau mea atoà nei, aore au i ìmi i te maitaì no ù iho, no te taata atoà rä e rave rahi, ia ora rätou.

11.1

1 Ei pee mai òutou ia ù mai ia ù atoà e pee i te Metia nei.   

Märeto 1.40-45

Te tämäraahia te hoê taata rëpera

(Mät 8,1-4; Ruta èv 5,12-16)

40 Ua haere mai ra te hoê rëpera ia na ra, tuu mai ra i te turi i raro i mua ia na, mä te parau maitaì mai ia na, nä ô mai ra. Ia tià ia òe ra, e mä vau ia òe. 41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra Ua tià ia ia ù, ia mä òe 42 E tei te parauraa atu o ia ra, pee atu ra te rëpera o taua taata ra i reira ra, mä atu ra o ia. 43 Ua aò hua atu ra Ietu ia na, e tuu atu ra ia na ia haere na 44 nä ô atu ra ia na Eiaha roa òe e parau noa atu i te hoê taata. E haere rä e faaìte ia òe iho i te tahuà, e hopoi atu no te tämäraa ia òe i te mau mea ta Möte i parau mai ra, ei faaìte atu i te taata. 45 Haere atu ra rä taua taata ra, faaìte haere atu ra i taua parau ra, e haaparare haere atu ra. Aita atu ra e tià ia haere faaìte Ietu i taua ôire ra, pärahi noa iho ra rä i te mau vähi moèmoè ra, e ua haere mai ra rätou ia na ra no te mau vähi atoà e àti noa aè.

Manaò

Te färerei nei tätou i teie mahana haamoriraa te taata pure tei roohia o ia e te àti teimaha, i roto i te òto te ninii o ia i to na taiä i mua i te Atua Nui Tumu Tahi. Mai te hoê taata tei tiàturi e ua ätea te Atua ia na, e ua piri te mau ùputa mea na reira te parau i te tomo no te faaroo i ta na pure. E ua mohimohi te mau vahi e türama ra te ìteraa i to na mauiui. E ìnaha hoì te Atua Tumu Nui Tahi e Atua ìte roa te huru o te taata ta na i hämani èi tane e èi vahine, i hii i roto i te aroha e te here. Ia täìrihia te âau o te taata maì, i te maì teimaha e tià ia parauhia e ôriorio te tino mai te tiare Maurua ra te huru, e moè roa i te àmuraa mäa. I roto i ta tätou Taramo no teie mahana te faatià nei teie taata maì i to na manaò te teimaha o to na faaòromaì teie taua mau manaòraa.

-6 Ua piri taù mau ivi i to ù nei ìri i to ù autä-noa-raa.

-7 Mai te tata o te mëtëpara ra vau, e manu naìnaì teie, e manu upoo ìore.

- e mai te tuta o te vähi ano ra, e manu atoà teie mata rarahi aita i o tätou nei.

Teie mau faaäuraa no te faaìte ia i to na itoito i te rautï i to na maì ma te ämo i ta na tuhaa o te mea te àmu ra  o ia i te rehu auahi mai te mäa ra, e ua ânoì i ta na e inu ra i te roimata. Te faaìte nei teie taata i to na haèhaa i mua i te Atua ma  te fäì i to na faaroo i te parauraa e Âreà òe, e te Fatu, e tià ia i te vai-mäite-raa e a muri noa atu, e te manaòraa ia òe e ia hope noa atu te mau uì atoà ra. Na taiòraa e maha nei e tià i te turäma ia tätou nahea i te ìteraa i te huru maì e tupu ra e te faaitoitoraa ia maru e maì. Teie haapotoraa o na taiòraa e  mahana nei.

-Taramo 102, 27 E marau rätou mai te àhu, e haapaehia rätou e òe mai te àhu ra.

-Revitito 13, 2 e ärataìhia te reira taata i te tahuà ra.

-1 Torinetia 10, 32 e te Ètärëtia atoà a te Atua.

-Märeto 1.44 E haere rä e faaìte ia òe iho i te tahuà.

Te haamanaò mai nei teie mau taiòraa hoê parau, te huru e te hohoà o te Atua. Oia mau ia maìhia te taata e huruê te huru e te hohoà e mauhia ra e te taata. I to tätou faarooraa i te mau parau i roto i te mau taiòraa te faaroohia nei te reo o te taata i te piiraa e, viivii e viivii eiaha te taata ia haafatata ia rätou, àita o Ietu i tiàvaru i te hoê rëpera i haere mai ia na ra, tuu mai ra i te turi i raro i mua ia na, mä te parau maitaì mai ia na, nä ô mai ra. Ia tià ia òe ra, e mä vau ia òe. Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra Ua tià ia ia ù, ia mä òe. Te mea faufaa i roto i teie färereiraa ta te Atua ia ôpuaraa, eere te huru e te hohoà mata o te taata tätaì tahi, te huru rä e te hohoà o te Atua tei hinaarohia i te taata ia faaìte. Te reo o Ietu E haere rä e faaìte ia òe iho i te tahuà no te aha, no te mea ia ìte te mau tahuà i te here i te feiä maì, e ia ìte atoà tei taata mai te here ia na iho. Nä ô noa na tätou, te hereraa ia na iho, eere ia te òreraa e ìte, te òreraa hoì e färii i te tahi i roto i to na maì, to òe rä te reira haapäpüraa e, te mea e au no òe, e au atoà ia no te tahi ; e te mea hoì të òre e au no òe ra, eita atoà ia e au no te tahi. Ua faatiàmä o Ietu i teie taata i to na  rëpera i te hinaaro o te Atua i te faaìteraa a te Revitito i te 13, i te ìrava 2 e ärataìhia te reira taata i te tahuà ra. Te fifi rä, te mea ia e, ua moèhia i teie taata i te färii ia ärataìhia o ia i te hinaaro o te Atua i huruhia ai i hohoàhia ai o ia, ua faanahohia e Ietu ta na òhipa ta na e rave, ia haere, e haere i te vahi e parauhia ra, teie rä ua moèhia i te taata to na parau, aore ra aita o ia e hinaaro ra e haamanaò. Te mea e tauturu i te taata i mua i teie fifi, te tütonu-tämau-raa ia to na manaò, to na âau i nià i teie parau e  ua hämani te Atua i te taata i to na huru e to na hohoà. I roto i teie ìrava, E haere rä e faaìte ia òe iho i te tahuà tei nià te manaò i te òhipa i ravehia e te Atua, Ua faaìtehia i teie taata i te maitaì no te mea te parau âfaro nei te Atua i te taata, Te mea faufaa i ô nei, eere te taata na na te òhipa i rave, aore ra te räveà i faaòhipahia no te faaìteraa i te taata i te reira parau, nä reira hoì te taime, aore ra te vähi i ravehia ai te reira òhipa, te mea rä e, e òhipa oti teie i ravehia e Ietu. I roto i te mau hinaaro o te Atua i te taata, teie ia te hiroà-maitaì-raa i te taata maì i to na tino, ia ìte o ia e, te vai ra o ia, ia färii e ia here ia na iho. Ia ìte atoà rä o ia i te faanaho i to na ao, i te vähi ta na e tià ra, nä reira te mau mea ta na e ìte ra, ia päpü maitaì o ia tei hea te vähi e parauhia ra ia na. I òaòa ai te Atua Nui Tumu Tahi i ta na iho ra òhipa, no te mea änei mea ìno, aore ra no te mea, mea maitaì, e te faahoì ra i te haamaitaìraa i te Atua ra. Eie o Ietu e parau nei, a faaìte ia òe iho i te mea maitaì, èie tätou e tïtorotoro nei i te ìteraa mea nä hea te tupuraa te mea maitaì, mea nä hea ta terä. No reira ia färerei tätou i te feiä maì eiaha ia moèhia e to na Huru to ù ia Huru, to na Hohoà to ù ia Hohoà no  te Atua Nui Tumu Tahi.

Teraì òr. Faatura.