Ruta èv. 2,41-52

31 no Titema 2016.

Parau pö mätähiti.

Ruta èv. 2,41-52

Te mau parau mätamua a Ietu i roto i te hiero

41 E haere a nä metua no na ra i Ierutarëma i te ôroà ra i te Päta, aore e mätahiti i tuua. 42 E tae aè ra i te àhuru mä piti i to na mätahiti, haere atu ra rätou i Ierutarëma i te haapaòraa i te peu i taua ôroà ra. 43 E hope aè ra taua puè mahana ra, hoì mai ra räua, pärahi atu ra rä te tamaiti o Ietu i muri i Ierutarëma, aore Iotëfa e ta na metua vahine i ìte. 44 Haere mai ra räua e ruì hoê mai ra i te haereà, parau aè ra räua tei roto o ia i taua tiàâ ra, ìmi atu ra räua ia na i roto i to rätou iho fëtii e i te mau taata-tupu ra. 45 E aore aè ra o ia i ìteä, hoì atu ra räua i Ierutarëma i te mäìmiraa ia na. 46 E ruì toru aè ra, ìte atu ra räua ia na i roto i te hiero ra, te pärahi ra i röpü i te mau òrometua, te faaroo atu ra e te ui atu ra ia rätou. 47 Maere anaè iho ra te feiä atoà i faaroo ia na ra, i to na ìte e ta na parau. 48 E ìte atu ra räua ia na, hitimaùe atu ra räua. Ua parau atu ra ta na metua vahine ia na «E taù tamaiti, e aha òe i nä reira mai ai ia mäua? Inaha, i ìmi noa na mäua o to metua täne ia òe mä te òto. 49 Ua parau mai ra o ia ia räua «E aha òrua i ìmi ai ia ù. Aita òrua i ìte, e ia haapaò vau i ta taù metua e tià ai 50 Aita rä räua i ìte i te parau ta na i parau mai ia räua ra. 51 Hoì mai ra räua e o ia atoà ra i Nätareta, faaroo atu ra ia räua; vaiiho mäite iho ra rä ta na metua vahine i taua mau mea atoà ra i roto i to na âau. 52 Tupu atu ra Ietu i te rahi e te paari, e te herehia mai e te Atua e te taata atoà.

Parau tumu i manaòhia mai, teie ia päpaìraa a Ruta èvaneria i te parau no te Metia i te pene 2 i te vahi hopeà no te ìrava 41 i te naòraa e Aore e mätahiti i tuua.

O ia mau maite mau mätahiti atoà te faahanahana nei tätou i te Atua Nui Tumu Tahi.

Te rä mai â te parau no te aroha ia òutou tei âmui mai i teie nei pö hopeà roa no teie nei mätahiti 2016 ta tätou i rätere mai, mai te âvaè Tënuare 2016 e tae roa mai i teie nei âvaè Titema. I roto noa tau hora rii, e huri ai tätou i te àpi parau no te mätahiti 2016 no te tomo i roto i te hoê â mätahiti àpi oia hoì, te mätahiti 2017. Mai ta Ìtaia i faahiti na i te pene 66, i te ìrava 23 e riro hoì mai te märama âpï, i tae noa atu i te tahi märama âpï, e mai te täpati âpï, e tae i te tahi täpati, o te haereà mai ia o te taata atoà e haamori ai i mua i ta ù aro, te parau mai ra te Atua Nui Tumu Tahi.

Mai tei mataro-noa-hia, e taime rii hopeà teie e faaroo faahou ai tätou i te tahi mau tià faatere o to tätou fenua e na reira atoà i te tahi mau tià faatere faaroo, ia horoà mai i ta rätou mau poroìraa, mau manaònaòraa, mau òpuaraa, mau täpura òhipa, mau àveià, no teie mätahiti âpï e haerehia atu nei e tätou i te pae no te faatereraa Hau Fenua, te tiàturi nei o ia i nià i ta na iho mau raveà, i to na iho puai, no te faatupu i te mau òpuaraa ta na i faanaho ma te faataa atoà i te mau täpura faufaa no te faatupuraa i taua mau òpuaraa ra o tei niuhia i nià i te rä manaò e, ia maitaì te oraraa o te huiraatira i Mäòhi Nui. Te vai ra te mau òpuaraa tei tae i nià i to na fäito âreà vëtahi, tei roto noa ä ia i te hiòhiòraa e nahea ia faatupu.

I to na pae, ua faataa atoà te Etärëtia i te hoê taime no na no te feruri, no te tauà parau e no te faaoti i te tahi mau parau o ta na e manaò rä, ei maitaì no te nünaa na roto ia i ta na Âpooraa Rahi Âmui, te Apooraa hopeà no teie mätahiti 2016. I mua i te rau o te mau parau tei hiòhia, no te oraraa ùtuafare e aore ia te oraraa âmuiraa, paroita e aore ia âmaa òhipa a te Etärëtia, ua faaìte atoà te Etärëtia i to na mau manaònaòraa i mua i te mau òhipa e tupu ra i roto i to tätou oraraa vaamataèinaa mäòhi i te pae no te oraraa tivira e aore ia te oraraa faaroo. Hoê o te mau tumu parau o te tià roa ia tätou ia täpeà mai o te parau ia no te faaineineraa, e te haapiiraa.

Tätou ra parau, Aore e mätahiti i tuua.

Mai te peu te vai ra te tahi uiraa e tano tätou e ui ei haapotoraa i ta te taata märamaramaraa i to na oraraa i teie mahana, tei ia : Te haere nei tätou i hea. Aita te manaò o teie uiraa i mau noa i nià i te parau o te vähi, oia to te taata hinaaroraa i te ìte i te hopeàraa o te tere ta na i âmui mai, e tano atoà rä tätou e täpiri mai i te auraa o teie tere, oia te tumu i rave ai te taata i te tahi òhipa. No reira, e haamanaò e te nünaa Mäòhi e, tätou e te fenua, hoê ä ia ; te fenua e te Atua, o te ora ia. Mai te Atua tei ineine i te âpee ia tätou i roto i te ora, ua ineine atoà te fenua i te tautururaa ia tätou i te fänaòraa i te ora. Ia here tätou ia tätou, ia here tätou i to tätou fenua, ua here ia tätou i te Atua ; e ua here hoì tätou i te Atua ra, eita ia e moèhia ia tätou te haapaò i te òhipa a Te Tumu Nui, e te hiò i tei ravehia e tana rima, inaha to na te reira aroha e to na here ia tätou.

Ia ora na i te mätahiti âpï

Teraì òr faatura.