Faufaa o te Pîpîria
Teuteronomi 11, 18 – 19.
E teie nei e vaiiho òutou i taua pärau na ù nei i roto i to òutou àau, e i roto i to òutou värua, e taamu hoì i nià iho i to òutou rima èi täpaò, e ia riro hoì mai te haamaòraa i mua i to òutou na mäta. E haapii hoì òutou i ta òutou mau tämarii i teie nei mau pärau, i te pärapärauraa i te reira ia parahi noa òe i roto i to fare, e ia haere noa òe na te èà tià, e ia taòto òe i raro, e ia tià òe i nià.
- ÈI HIÒRAA MÄTAMUA.
Te pipiria e àpaparaa puta ia tei àmuihia èi hoê puta, oia hoì e 66 puta i roto i te 1. Ua papaìhia ia teie mau puta e te mau taata e rave rahi. E mau taata ia tei uruhia e te värua o te Atua, tei faaìte i to te Atua tïtauraa ia rätou i roto i te tau e tera tau. To na auraa rä, ua rau ia te manaò e vai rä i roto i te mau puta o te pipiria. Noa atu ä teie rauraa, hoê rä manaò teie e poroìhia nei i roto, i te Aroha e te here o te Atua. Na teie tumu parau i horoà i te mau taata i te itoito i te parahi fatataraa i te reo o te Atua, e tià atu ai ia rätou ia faaìte i te huru no te Atua i te mau nunaa atoà e tiàturi nei i teie òpuaraa.
O teie te tahi fufaa e vai nei i roto i te pipiria, tei faaìte i te hoê tau i maìri, te hoê tau i teie mahana, e te hoê tau e a muri atu. Ia hiò maite – anaè – hia te òhipa e tupu nei i roto i te pipiria, mauti rä ia te puòiraa te mau tavini o te Atua i te mau òhipa i tupu na, e te tupu atu – ä. To na auraa, eita te Atua e faaea i te tïtau i te taata ia riro èi tavini no na. E täpaò teie, aita te Atua e hinaaro nei e faatea ia na i te taata, to na rä manaò tumu, ia riro atoà o ia èi tauà no to na mau tavini. O te tahi ia hiòraa teie no te pipiria e te òhipa ta te Atua e heheu nei i te taata. Mea maitaì atoà rä ia tätou ia päpü e, te mau taata i papaì teie mau puta, aita rätou i haapaò noa i to rätou manaò.
Te hinaaro rä o te Atua ta rätou i haapaò, ì faaìteraa i te tiàturi päpüraa o te feiä papaì i te fafauraa pärau a te Atua, ia òre hoì ia ruri – ê – hia te òpuaraa a te Atua, i te mea eita i te mea òhie i te haapaòraa i te hinaaro o te Atua.
Te vahi faufaa rä, ua noaa i te feiä papaì i te haapaò i te mau parau a te Atua, tei riro èi faufaa no teie mahana. Te pipiria, e parau tumu ia no te mau hinaaro o te Atua i to na mau tavini tei faaìtehia i roto i te faufaa tähito e te faufaa âpï..
E) TE MAU TUHAA O TE PIPIRIA.
Mau taiòraa
Tenete 12, 1 – 3
Taramao 127
Amota 5, 21 – 24
Mareto 1, 14 – 15
Òhipa 1, 1 – 3
Tito 3, 3 – 8
Àpotarupo 1, 8 – 11
Te pipiria, e 66 rahiraa puta tei àmuihia i roto e piti vairaa, tei parauhia te faufaa tähito e te faufa âpï . E ua papaìhia teie mau puta i roto i te mau mätahiti e rave rahi. Ua vai purara noa teie mau puta, i te mea e rave rahi mau taata i papaì i te mau parau o te pipiria, to tera e tera mätahiti. Teie atu ra to na faanahoraa.
Te faufaa tähito
- Te puta ture
E pae ia puta tei faaìte e mea nahea to te Atua heheuraa IA NA i roto i ta na rahuraa.
Rahu iho rä O ia i te ao nei na roto i te märamarama. Maìti iho rä i te hoê nunaa èi faatupuraa i ta na òpuaraa, ma te horoà i te hoê reni arataì tei pärauhia te TURE 10.
- Eiaha roa ia òe èi Atua ê atu ia ù nei.
- Eiaha roa ia òe e hamani i te ìtoro tarai no òe
- Eiaha roa ia òe e faahiti faufaa – òre noa i te iòa o to Atua rä o Iehova.
- E haamanaò i te mähana täpati ia haamoàhia ia.
- Faatura atu i to metua tane e to metua vahine.
- Eiaha roa òe e täparahi noa i te taata.
- Eiaha roa òe e faaturi.
- Eiaha roa òe e èia.
- Eiaha roa òe e pari haavare ia vetahi ê
- Eiaha roa e nounou.
(Te haapotoraa teie no te Etoto 20, 1 – 17.)
NA PUTA E PAE
- Tenete Te faanahoraa a te Atua no te Ora.
- Etoto Te faatiàmaraa a te Atua i to na nunaa
- Revetito Te faaineineraa i te haamoriraa
- Numera Iteraèra i roto i te metepara
- Teuteronomi Te piiraa a te Atua ia faatura.
2)Te mau puta tuatapaparaa, 12.
Tei roto i teie tuhaa te faaìteraahia te oraraa o te nunaa Iteraèra. To na oraraa vaamataeinaa, porotita e tae noa atu i to na tuàtiraa i te Atua, tei faanahohia mai teie te huru.
- Iotua Te fenua o te tapu
- Te mau tavana Te fifi i te fenua o te tapu
- Ruta Te here mau
- I Tamuera E patireia o Iteraèra
- II Tamuera Tavita, e arii no Iteraèra
- I Arii Toromona, te fare o te Atua e te àmaharaa
- II Arii Te àmaharaa te patireia o Iteraèra, te mau perofeta
- I Parereipomeno Te tiàturi o te Atua i to na nunaa
- II Pareipomeno Te hiàraa o Iteraèra
- Etera Te faaoraraa e te faaâpïraa
- Nehemia Te faatiàfaahouraahia o Ierutarema
- Etetera To na itoito i te faaoraraa i te mau àti – Iuta.
- Te mau hatiotarafa, e 5 ia puta.
E mau pehepehe, mau himene teie na te feiä paari tei parahi tamau noa i pihaiiho i te Atua, ma te faaìte i to rätou huru i mua i te Atua e i mua atoà i to rätou ora. Ua rahi aè to rätou nonou i te òhipa a te Atua, te fifi, te hepohepo, te pohe, e riro ia te reira èi haapäpüraa i to rätou faaroo i te Atua. To rätou tiàturiraa, tei roto ia i te faanahoraa a te Atua.
- Iopa Te mau mauiui o te taata o te Atua
- Taramo Te himene, te pure, te pehepehe a te taata faaroo
- Materi Te oraraa
- Tohereta Te here i te ao
- Tire a Toromona Te himene o te here
- Te mau perofeta
Mau taata ia teie tei piihia e te Atua no te hoê òhipa päpü maitaì. E reo rätou no te Atua i roto i te nunaa, ta te Atua e heheu i roto ia rätou e ta rätou ia e pärau. E faaìte rätou i te mau pärau i tupu, ma te tohu atoà i te mau tau e a muri atu. Te vai nei te faahaparaa e te vai atoà nei rä te parau fafau no te tiaìtururaa. Te parau rahi rä ta te perofeta e tohu nei, o te Metia ia te Tamaiti a te Atua, ia tupu te hoê tauàtiraa âpï i rotopu te taata e te Atua. Teie taua mau perofeta rä, 17.
- Itaia Te tiaìtururaa
- Ieremia Te hepoheporaa
- Te òto a Ieremia Te pehepehe no te mauiuiraa
- Etetiera Te hanahana o te Atua
- Taniera E tiàturi i te Atua
- Hotea Te aroha
- Ioera Te mahana o te Atua
- Amota Te parau tià
- Opatia Te haavaraa hopeà
- Iona Te tatarahaparaa
- Mita Faaâpï te mau òhipa atoà
- Nahuma Te horoàraa
- Hapatuta Te maere e te faaroo
- Tefania Te haavaraa
- Hatai Te faatahinuraa
- Tataria Te faaâpïraa ia Iteraèraa
- Marati Te tiaì a Iteraèra.
Te faufaa âp
- Te mau Èvaneria
E maha papaì Èvaneria te tià e faafaìte i to Ietu haereraa mai i roto i te taata nei. Ua papaì rätou i te mau òhipa ta rätou i ìte, e tei faaroohia. E ua ìte päpü rätou i roto ia Ietu, te Metia a te Atua, tei faatià i te mau parau fafau a te faufaa tahito. Teie taua mau papaì Èvaneria.
- Mataio Ietu, te Metia i fafauhia
- Mareto Ietu, Te tavini
- Èv. Ruta Ietu, e taata mau
- Ioane Ietu, e Atua mau.
- Te puta Òhipa
Hoê puta Òhipa, tei faaìte ia i te rauraa o te òhipa i tupu mai to Ietu tiàfaahouraa. E te tupuraa te Ètärëtia i te mau vahi atoà e ua tae roa i ö te mau ètene.
- Te puta Òhipa Te Ètärëtia, tefaaìteraa i te faaora tei tiàfaahou.
- Te mau epitetore
Teie mau epitetore, ua papaìhia i te mau Ètärëtia, te mau taata e tae noa atu i te mau pupu taata faaroo,tei horoà i te hoê hohoà ora i nià i te mau teretetiano e tei faaìte atoà te uànaraa te òhipa e te mau haapiiraa a te mau Àpotetoro, tei aro i te tahi mau peu tià òre, tei òree au i te Ètärëtia. O ta te epitetore ia e hinaaro nei e faaìte.
- Roma Haapäpüraa, e òhiparaa te parau tià moà
- I Torinetia Te fifi o te hoê Ètärëtia
- II Torinetia Te òhipa a te Ètärëtia
- Taratia Te Èvaneria e te ture àti Iuta
- Efetia Te tuàtiraa te Metia e te èEtÄrëtia
- Firipi Te aroha e te tiaìtururaa o te Ètärëtia
- Torota Ietu i faahanahanahia
- I Tetaronia Faaitoitoraa i te feiä faaroo
- II Tetaronia Te hoìraa mai o Ietu
- I Timoteo Te Ärataìraa a te Ètärëtia
- II Timoteo Faaitoitoraa i te mau òrometua
- Tito Te faaòromaì o te taata teretetiano
- Firemona Te fatu o te taata tîtî
- Hepera Te hanahana o te Metia
- Iatopo Te faaroo ora
- I Petero Te auraa no te mauiui o te Ètärëtia
- II Petero Ia ära te Ètärëtia
- I Ioane Te haapäpüraa i te Atua
- II Ioane Faaitoito i te faaìteraa i te parau mau
- III Ioane E òhipa te faaitoitoraa.
- Iuta Faahaparaa i te feiä e faaruè i te faaroo.
- Te Àpotarupo
Te puta hopeà teie no te Pipiria, te faaìte i te tahi mau òrama o ta te Àpotetoro Ioane i ìte. Te ìte nei o ia i te hoê àroraa rahi i ropu i te feiä faaroo e te feiä aita e faaroo, o tei haafifi roa te mau faanahoraa a te Atua. Teie ra, te vai nei te pärau hopeà a te Atua i nià i te puai o te ìno.
Te Àpotarupo Te upootiàraa te Atua i nià i te ìno.
Èi hiòraa àmui.
Te Pipiria, e mau papaì tähito roa ia, tei tià e ärataì i te oraraa o te taata, e te tauturu i roto i te mau tau atoà. Ma te faaìte i te muai o te Atua, tei òre i faaruè noa i te taata o ia anaè, tei ärataì rä. E na roto ia Ietu to na faaìteraa i to na aroha e te haehaa.
Ia riro noa ia te Pipiria èi tauturu i te mau taata atoàtei hinaaro e ìte i te huru o te Atua, te Tamaiti e te Varua Maitaì.
Terai òr