Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 22:43

Mau taiòraa.

Taramo 27 Òhipa 1 : 12 - 14

Te maramarama e te ora. Te mau pîpî hoìraa i Ierutarema

Ààu faatura i te Atua. Te pureraa àmui

Tei faateiteihia. Te hoêraa

Te reo aroha.

E ta ù Atua, e ta ù Ora.

I Petero 4 : 13 – 16. Ioane 17 : 1 – 11.

Te òaòa o te taata faaroo. Te hora o te Metia.

E ao to tei faaìnohia i te iòa o Ietu. Te ìteraa i te Atua

Te hanahana o te Varua Moà. Te parau a te Atua tei haapaòhia.

Te pohe o te taata Teretetiano. Ia hoê te Metua, te Tamaiti i roto i te taata.

Te manaònaòraa o Ietu i te Etaretia.

Tumu parau : Te pure.

Ìrava tumu : ìrava 3 vm TEIE HOÌ TE ORA MURE ÒRE, IA ÌTE RÄTOU IA OE I TE ATUA MAU RA

Te niu o te parau teie ia : ìrava 1 vr E TA Ù METUA UA TAE I TE HORA, A HAAMAITAÌ MAI, e te ìrava 11 vr E TA Ù METUA MOÀ RA E, IA TIÀ IA OE.

Te tumu òhipa i teie mahana : TE ÒROÀ FAATUPURAA PARAU.

E tià ia parauhia ua patuhia ta tätou taiòraa i nia i te hanahana o te Metua, e to na anaè te hanahana ia ìtehia.

Ei faatuàtiraa.

Te mau parau ta tätou e farerei nei i roto i teie mau taiòraa o te tuàtiraa ia, i te mau haamaitaìraa e titauhia nei e te feia paieti. Ei faaìteraa ia i te mau àti e farereihia i te iòa o te Metia. Te faaravaìhia nei teie mau manaò, ma te faaara, ia tupu noa atu taua mau mea ra, ia haamanaò ia rätou e, ua faaìte – atea – hia e Ietu. I muri aè i to na faaitoitoraa i ta na mau pîpî. E pohe to òutou i teie nei ao, e faaitoito ra, ua riro te rë o teie nei ao ia ù. E te parau e faahitihia nei e te Taramo 27 E ta ù Atua, e ta ù Ora.

Te pene 17.

O te hoê ia pene taa ê no te Èvaneria a Ioane. Na te hoê taata faaroo no te 16 no te tenetere i maìri i te iòa no teie nei pene parau i te pure tahuà. E na teie pure i òpani i te farereiraa hopeà no Ietu e ta na mau pîpî, hou e taìrihia ai te Tiai mamoe e a purara atu ai te na na. Te òhipa e ravehia nei e Ietu i teie taime te haapäpuraa ia i te niu no te faaroo o te mau pîpî ia òre ia àueue i mua i te mau peu o teie nei ao.

Ua tano roa te parauraahia teie nei pure i te PURE TAHUÀ, no te mea, o te Tahuà Rahi no te Faufaa Àpi teie e pure nei. Te pure nei O ia no to na mau taata tei papaìhia to rätou iòa i roto i to na ààu, mai te Tahuà Rahi no te faufaa tahito tei pure no na òpu 12, ma to rätou mau iòa i papaìhia i nià i to na täpoì òuma ( Etoto 28 : 29 ). Ma te rave atoà i te pupuraa tutia taraèhara, e oia iho te Arenio, tei hopoì ê i te hara a to te ao nei.

Na te epitetore i te mau Hepera i tatara nehenehe maitaì i te òhipa a te Metia tei riro i te taime hoê, ei Tahuà e ei taraèhara, i te pene 4, 5, 7 e tae i te 10.

Te taiòraa.

Irava 1 e faaea i te 11.

E tià roa ia parauhia te vai nei e piti tuhaa i roto i teie mau ìrava.

  1. Te pure nei o Ietu no na iho irava 1 e tae i te 5.

I roto i teie tuhaa ta tätou i te haapäpuraa e, ua oti ia Ietu te òhipa ta te Metua i horoà mai na na e rave. Ia tià i te Atua, ia papaì roa O ia i teie parau, na roto i to na Varua Maitaì, i roto i to tätou ààu, ia ìte päpu tätou , ia faaroo e ia tiàturi e, ua oti mau ia Ietu te òhipa no te feia hara i te ao nei. Eiaha tätou ia faariro i te mau òhipa ta tätou e rave nei ei mea faufaa, i te mea àuaa tätou i tupu ai e e tupu ai te òhipa a te Atua. Mai te ani - òre i to tätou manaò, mai te titau – òre, e mai te ani – òre i ta tätou tauturu, ua faatupu te Atua i ta na òhipa i raro nei na roto i ta na Tamaiti.

E aha teie òhipa ta na e parau nei e, UA OTI ? Taua òhipa ra, teie ia, ua haamaitaì au i to iòa i te ao nei. E òhipa rahi taua òhipa ra, e òhipa oti – òre i te taata. Ua haamaitaì Ietu i te iòa o to na Metua na roto i to na haapaeraa i to na vahi Moà, no te haere mai i roto i teie nei ao na roto i te huru o te taata nei. I te mau tuuraa àvae atoà no na, i te mau mahana tataì tahi, e tae noa atu i to na aho hopeà, ua faaìte noa O ia i nià i te fenua nei, i te Atua ìte – òre – hia e te mata. Hou O ia a àmu ai i te hoê tapu faraoa, ua faateitei i to na mata i nià no te haamaitaì i te Atua. E ua ànaana noa i te mau mahana atoà na roto ia Ietu, te hanahana no te Atua i rotopu i te mau taata o te ao nei. I te mau vahi atoà, ua haamaitaì O ia i te iòa o te Atua, i rotopu i te mau matapö, te mau pirioì, te mau repera, te feia taoà e te feia veve e i rotopu hoì i te feia pohe. I roto i teie nei ao tei maìri i roto i te hara, tei tapoìhia e te pöuri e te ìte – òre, teie nei ao tei tapeàhia i roto i te manaò – òre e te tairoiro i te Atua, teie nei ao tei òre i faaèa i te faaìno e i te haaviivii i te iòa o te Atua, ua haamaitaì e ua haamoà Ietu i te iòa o te Metua, e ua haapii mai ia tätou e, e naò òutou ia pure ‘’ E to mätou Metua i te ao ra, ia raa to Òe iòa………… Ua haamaitaì Ietu i te iòa o te Atua na roto i te haapaòraa i ta na mau faaueraa tei òre i maaraa i te taata i te haapaò, e ua faatura O ia i to na hinaaro na roto i te au – raro – maite – raa e tae noa atu ra i te pohe tatauro. Ua na reira O ia ia noaa ia tätou te ora mure òre. I teie nei ra, ua oti taua òhipa ra, te tià nei O ia i mua i te Atua mai te hoê tavini te huru, e te parau nei ‘’ Ua haamaitaì au i to iòa i te ao nei, ua oti ia ù te òhipa ta òe i ho mai na ù e rave.’’

  1. Te pure nei o Ietu no te mau pîpî.( irava 6 e faaèa i te 11.)

Teie tuhaa e moti ia i te ìrava 19, ua faataahia ra no teie tuatapaparaa e faaoti i te irava 11, i te mea tei teie mau ìrava to Ietu haapuaìraa i te faaìte i to na hinaaro i te Metua no te mau pîpî.

I te òmuaraa i ta na òhipa i te fenua nei, ua titau Ietu i te hoê mau taata ia pee mai ia na. Ua faaruè rätou i te mau mea atoà e ua àmui mai ia na. I roto i teie nei mau pîpî tataì tahi tei pee mai ia na te ìte ra o Ietu i te reira mai te hoê horoà no o mai i te Metua ra. Aita Ietu e tiàturi nei e ua roaa mai rätou ia na na roto i ta na iho titauraa, no te Atua ra rätou, e na na i horoà mai ia rätou no na. I teie taime, 11 noa iho rätou, ua reva ê te tahi. I ta tätou hiòraa, e mea iti roa. Àreà Ietu te haamaitaì nei O ia i te Atua no taua àmuiraa iti, oia hoì te tano ia parauhia, te òteo nei te hoê faaroo àpi tei parauhia te ÈTARETIA niuhia i nia i te TIAFAAHOURAA E TE ORA MURE ÒRE. Ua ìte O ia e, te päpu nei ta na òhipa i teie nei, no te mea, na te Atua rätou i horoà mai no na. I te vahi tei reira hoê noa taata, tei vehihia ra i te mana o te Atua, e noaa i taua taata ra te mano – tini- raa te taata e tiàturi i te Atua.

No te aha o Ietu i pure ai mai teie te huru ?

Ia ìtehia te Atua mau, te feia atoà e ìte no te Atua e noaa ia rätou te ora mure òre. O ta Ietu e haapäpu nei i te irava 3, TEIE HOÌ TE ORA MURE ÒRE, IA ÌTE RÄTOU IA ÒE I TE ATUA MAU RA, E IA IETU I TE METIA I TA ÒE I TONO MAI. Te manaò atoà ia i faahitihia na e Ieremia i te pene 31 i te ìrava 34 vh. Ia ìte hoì òutou ia Iehova, e ìte paatoà hoì rätou ia ù o tei haehaa e o tei rahi, te parau maira Iehova ; e faaòre hoì au i ta rätou hara, e òre au e manaò faahou i ta rätou ìno.

Terai or.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens