Ev.Ruta 3,1-20

Publié le 2 décembre 2012 par Mapuanga terai

Monire 31 no Titema 2012

Taiòraa: RUTA Ev. 3/1-20

Ia tae mai ai te parau a te Atua ia Ioane a Tätaria i te mëtëpara ra, haere atu ra ò ia na te mau vahi atoà i te pae i Ioritana ra, i te poro haereà i te päpetito tätarahapa ia faaòrehia te hara.

Tätou e färerei faahou nei â i teie pö hopeà no teie mätahiti 2012, ta te here e te aroha o te Atua i ärataì mai ia tätou. Te parau nei tatou i te Atua e: '' Mauruüru e mauruüru maitai", e te aroha atu nei ia tätou, la ora na tatou i te ora-horoà noa a te Tumu-Nui, ta tatou e fänaò nei. Ia haamaitaìhia te Atua, no to na maitaì òtià-ore, tei âpee noa ia tätou.

No teie âvàe Titema, ua tärenahia i roto ia na, mai tei mätauhia i roto i te oraraa o te Ètärëtia te tau no te Tiäìraan (te tiäìraa i te haereà mai o te Faaora, aore rä te tiäìraa i te fänauraa no te Faaora.

Te rave tämau nei tätou i teie täpura òhipa, o tei riro atoà èi tumu parau na te Ètärëtia i teie âvàe, e i te mau mätahiti atoà; Te ora nei tätou i roto i teie faanahoraa, eiaha no te mea e, àita ia te Metia te Faaora o to te ao i tae mai atu ra. Ua riro rä te òhipa o ta tätou e rave nei, èi haamanàoraa e èi faaäraraa ia tätou, i to tätou tauà-ore e to tätou ineine òre te ìteraa e te färiiraa ia tätou iho. Parau-mau, te färii nei tätou i te taata. Te ìte-atoà-hia nei rä, te paruparuraa te tahi pae to tätou, i te haapàoraa i teie faufaa-metua tei vaiihohia mai,òia hoi, te manào-färii i te taata.

Mauruüru atoà rä i tera huru maitaì, e vai àma noa ra i roto i te tahi mau motu to tätou, mau òire, mau ôpu fetii, mau ùtuafare, mau taata tätaì tahi no teie nünaa e no teie fenua Mäòhi.

Ia haamaitaìhia rä te Atua, i te fëia atoà tei färii e na te here e te aroha rätou e ärataì. Èi parau täutururaa ia tätou no teie Tapati tiäìraa toru, ua täpeàhia mai te vahi hopeà no te ìrava piti e te ìrava toru o tei na ô mai to na taiòraa e,

I te tau o Ioane, te ìtehia ra te àtuturaa teie parau hara e àti tià àè te fenua Itëraèra. E te riroraa teie parau i roto i te vaha e te manào taata, mai te tahi taoà tei faatupu i te mauruüru i roto i te tahi pae, e te peàpeà i roto i te tahi pae. Na roto i te hara, te ìte noa ra tätou te parau, no to te taata ätearaa i te Atua, na roto i to na faaätearaa ia na iho, te tahi i te tahi. Teie te tahi mau hiòraa,

-Na mua roa, ia òre Itëraèra ia haapaò faahou i te Ture, ua riro te reira èi hara na na i mua i to na Atua, e i roto i to na oraraa nünaa.

-A piti, ia tomo änaè te taata Itëraèra i roto i te oraraa e-te faanahoraa a te tahi nünaa-ê-atu; ua riro atoà te reira èi hara na na i mua i to na Atua, e i roto i to na oraraa nünaa. Haamanaò noa tätou te parau o te mau terona, o te tumu ia i piihia ai rätou te fëia rave hara, mai tei parau-atoà-hia no te mau vahine faaturi.

-A toru, ia faaruè änaè te tahi Faatere fenua i to na tiàraa tävini, e tei monohia mai e te tiàraa-täviri ua riro atoà te reira èi hara na na i mua i to na Atua, e i roto i to na oraraa nünaa. O tei na reira ra, ua hara ia i te Atua.

-A maha, ia riro änaè to na fenua i raro äè i te Faatereraa a te tahi nünaa ê, e parau-atoà-hia na e, ua hara te fenua, no te mea, e Ètene te Faatere ia na. E to na hoì fenua te fenua o te tapu e taoà-horoà ïa na to na Atua i te mau metua mai ia Âperahäma mai. O te tahi atoà ïa auraa parau, ua hara te fenua, e te nünaa taatoà i te Atua.

I mua i tera mau hiòraa-manaò e orahia ra i roto i te nünaa i tera tau. Te uiui noa ra te manào, E aha rä te huru te parauparau a te feiä mauruüru-ore tei òre i mauruüru i te feiä faatupu-ìno tei riro o rätou te tumu i fifi ai te fenua e te oraraa o te nünaa.

I ô tätou nei, mea rahi roa ta tätou huru-parauraa, i te feiä àita tätou i mauruüru. Päpü maitaì, àita roa ia hoê äè manào maitaì, ia faaroo-änaè-hia. Te faaroohia ra rä te taata ia parau e,

- Faaòre-roa te hohoà o tera mau taata

- Pupuhi tera mau taata

- Täui, faaâpï te Faatereraa

- Faautuà i tera mau taata

- Haere i te tiàmaraa

- Faaòre roa atu

- Manaò teòteò

- A hoì i te Atua ra…………. te vai, e te vai atu ra te huru-parauraa.

I te ômuaraa no teie pene 3 o ta Ruta i päpaì, te haapäpü maitaì ra ò ia i te täpura iòa no tera mau taata tei ärataì te fenua i roto i te ìno i roto i te hara. Òia hoì, mai te mau Faatere o te fenua e tae roa atu i te mau Faatere o te faaroo. Mai te mea ra o rätou te tumu, i rahi ai te fifi i te tupu i roto i te nünaa.

A tahi : àita te èà no te haereà o te Fatu i haamaitaìhia.

A piti : àita te peho i faaîhia.

A toru : àita atoà te mouà e te mau àivi i haapäpühia.

A maha : àita te èà piò i faatitiàifarohia.

A pae : àita atoà te èà puupuu i haamaninahia.

I mua i teie mau òhipa-oti-ore, tei òre roa i haapaòhia e teie mau taata mana i to rätou tau. Te ìte noa ra tätou te täupupuraa no te òhipa tei faauehia ia rätou e rave. E na te reira paruparu to rätou, i ärataì te fenua i roto i te ìno, e i töpa atoà ai te nünaa I roto i te fifi .

A uiui na ra i roto ia tätou tätaì tahi, - E aha te huru o ta ù, ta tätou) täviniraa.

-Àita änei hoì tätou e rave noa ra i te òhipa tei òre i faauehia ia tätou e rave.

- Àita änei hoì tätou e haapäu noa ra i to tätou taime, i nià i te mau mea rii faufaa-òre.

Haamanaò tätou e, e rave òhipa noa tätou, no te hoê taime poto.

Haamanaò tätou e, e mauhaa noa tätou i roto i te rima o te Atua.

No reira, i roto i teie oraraa poto noa to tätou, mea tïtauhia tätou ia riro noa èi mauhaa no te faatupu i te maitai, e te hinaaro o to tätou Atua. O te òhipa atoà ïa, tei ìtehia i nià ia Ioane i to na tau. No te oraraa fifi e faaruruhia ra e te nünaa i roto i to na àti. E no te ìno e te paruparu o te mau Faatere, tei òre i ìmi i te mau raveà no te tätara i to rätou fifi, i tae roa ai ta te Atua parau ia Ioane ra i te mëtëpara. O vai o Ioane, a hinaaro mai ai te Atua ia na, o te reo noa òia, te reo no te hoê tei poro haere i te mëtëpara 'e faaineine, e haamaitaì i te èà o te Fatu no to na haereraa mai. E parau teie tei tohuhia e Ìtaia perofeta, e tei tupu na roto ia Ioane o te hoê ia no te mau perofeta rarahi, no Itëraèra. E aha täua parau ra, tei tae mai ia Ioane ra, E parau tïtauraa na te Atua ia na,

E haere na te mau vahi atoà i te pae Ioritana, no te pororaa i te Päpetito tätarahapa ia faaòrehia te hara.

No te hara nei ä, no te huru ìno, no te huru teòteò, no te täivaraa te taata i te Atua, i topa ai te nünaa, te oraraa o te fenua i roto i te fifi. Te auraa ra, ua repohia te fenua, ua viivii. No te feiä tei tiàturihia, na rätou e àtuàtu, na rätou e tiàau, àita rätou i haapaò ta rätou òhipa. E aha ïa te òhipa e rave e täma ïa, i te repo. O te òhipa atoà ïa tei rävehia e te Atua te tämaraa i te repo, te faaòreraa i te hara. Àita rä òia i faaòhipa-rii-noa-äè i te raveà puai o te natura. Ua maìti noa rä ò ia ia Ioane, na na äè e täma i tera mau taata; na roto i te täumiraa ia rätou i raro i te päpe, ia tätarahapa rätou, e ia faaòrehia ta rätou hara.

O vai ïa taata e ànaanatae te haere e rave i teie huru òhipa.

- na te tahi e fänaò ra, na ù ïa e faaruru.

- na te tahi e hamani-ìno ra, na ù ïa e tätaì.

- na te tahi e monamona ra, na ù ïa e àvaava.

- na te tahi e faarepo ra, na ù ïa e täma. Ati ra noa atu rä, èere te Atua, mai ia tätou ra.

No reira te Atua i tïtau ai ia Ioane, no te mea àita tera huru manào i roto ia na. E ua ìte atoà te Atua e, na teie tämaïti e faatupu i ta na ôpuaraa, no te faaineineraa i te èà o te Fatu, te haereà mai o te Metia, mai tei tohuhia e te perofeta ra e Ìtaia. Parau-mau, ua riri Ioane, èere rä to na i te riri tähoo. Te tiàoro nei òia i te nünaa ma te aò, eiaha rätou e türuì noa i nià i te tahi òhipa, tei òre i rohirohihia e rätou ; eiaha atoà e manaò e, e tämarii rätou na Âperahäma ra, ua ora ia rätou. Àita. Òia atoà tätou i teie mahana, eiaha tätou e manào e, e mau taata haere pure tätou, e mau taata ìte tätou te parau Pipiria, e mau taata horoà tätou, e mau tämarii tätou na te tiàtono, na te òrometua, ua ära ia tätou. Àita.

Te na ô ra ta Ioane pähonoraa : E nehenehe atoà te A tua e faariro i te mau ôfai, èi mau tämarii na Âperahäma.

Ua räve Âperahäma i ta na òhipa i to na tau, o na ia, e ta na utuà. Areà tätou i teie mahana o tätou ia, e ta tätou utuà. E rohi tätou e faaitoito. E au tätou i te mau raau hotu atoà .o te ô ra. Ia òre hoì tätou ia hotu mai i te huero maitaì ra, e riro tatou i te täpu-ê-hia, e te hurihia i roto i te auahi, èi vähie.

I te feiä atoà tei haere mai ia Ioane ra, e ia Päpetitohia rätou i te Päpetito tätarahapa no te faaòreraa i ta rätou hara.

- Teie ta Ioane parauraa ia rätou i te feiä atoà tei âmui mai :

Ua rahi roa to òe àhu, e te àhune ra ta òe mäa, A rave, a ôpere na tei ère.

- Teie atoà ta na parauraa i te mau terona:

Eiaha e ìmi i ta òutou âpï, i nià i tei òre i haapaòhia na òutou.

- Teie atoà ta na parauraa i te mau faèhau:

Eiaha e hamani-ìno i te taata; Eiaha e pari-haavare noa. Ia mauruüru hoì òutou i ta òutou utuà. I mua i teie mau faaäraraa o ta Ioane e poro-haere nei i te nünaa, e tuhaa òhipa teie tei au i te mau Faatere fenua e te mau Faatere faaroo, ia faanaho, ia faaära ia òre ia roaa te tahi pärahiraa no te ìno i roto pü ia rätou, ia tupu rä te maitaì i roto i te oraraa âmui o te fenua.

Te haapäpü nei Ioane i te feiä atoà tei âmui mai ia na ra :

- Ta ù Päpetito ta ù tämaraa ia òutou e tämaraa päpe noa ïa. Areà tera na muri mai ra ia ù, e mana rahi to na i to ù èita e tià ia ù ia tätara i te täpeà i ta na tämaa.

- Ta na Päpetito ta na tämaraa ia òutou e tämaraa Värua ïa e te auahi.

E hoa here mä, te vai nei ta tätou tämaraa na tätou ia e hiò atu i te tahi, e te vai atoà nei to tätou tämaraa na te parau ia a te Atua, tätou e hiò mai. Ua maìti te Atua ia Ioane no te haere e täuturu i to na nünaa, no te faatià faahou ia na, no te tämaraa ia na ia faaòrehia to na repo, ta na hara, ia tätarahapa rätou e ia Päpetitohia i te Päpetito tätarahapa ia faaòrehia te hara. E faaitoito atoà tätou to tätou pae, no te mea, ua ineine ê na te Atua i to na pae, no te pähonoraa ia tätou.

Èi ôpaniraa, e reo no Pauro i to Täratia, Täratia 5,11: E te na na e täpeà-tämau maite na i te tiàma ta te Metia i faatiàma mai ia tätou nei; eiaha e mau faahou i te tuto tävini ra .