Märeto 10, 35-45

                       ÈTÄRËTIA  POROTETANI MÄOHI 

                                                           Faanahoraa o te Taiòraa.

                        Taiòraa            Mareto            10 : 35 - 45     O vai to te pae aui e te pae àtau.

                        Ei manaò matamua.

                        E puòiraa teie taiòraa ta tätou no te mau irava 17 e tae i te  irava 31,tei nià noa ia o Ietu e ta na mau pîpî i te èà e haere nei i Ierutarema.E rave rahi mau òhipa e tupu i nià i teie èà,e tae noa atu te mau faaiteraa parau e horoàhia e Ietu,no te òhipa e tiai mai ra ia na i roto i te òire no te Ierutarema.E tià ra ia parauhia i roto i teie tuhaa ta tätou e hiò nei,e faaite te mau pîpî i te tahi huru to rätou,na roto ia Iatopo e o Ioane,i te aniraa e,ia tae o Ietu i roto i to na hanahana,ia parahi ia raua hoê i te pae àui e te tahi i te pae àtau.Ia ite ra te mau pîpî hoê àhuru  riri aè ra i teie mau manaò,ta rätou e faaroo nei.To na auraa ra te hinaaro nei rätou e haru i teie na parahiraa e piti.I to Ietu noa ia faaiteraa ia rätou e,e taparahi pohehia o ia,e tiàfaahou ra o ia i te ruì toru.E toru taime to Ietu faaiteraa i ta na mau pîpî,i teie òhipa,ia au i te pene 8 irava 31,i te pene 9 irava 31,e te pene 10 i te irava 34. I teie mau faaiteraa parau to Ietu riroraa ei tavini,i pohe ai O ia no te mau taata atoà,i te mea ai-ti-a te hoê fatu i pohe aè nei no te hoê tavini,te tavini-iho-a tei pohe  no to na fatu.O Ietu anaè ra te Fatu tei pohe no to na mau tavini.

                        Ta tuhaaraa o te taiòraa.

                        1) irava 35 - 37           Te aniraa a Iatopo e o Ioane

                                                           no te parahi te hoê o raua i na pae

                                                           e piti o Ietu,ia tae O ia i roto i to na ra hanahana.

                        2) irava 38 - 40           Te Papetitoraa o te Fatu

                                                           e àuà no te mauiui.

                        3) irava 41 - 45           E òre e tià ia faahepo

                                                           tei hinaaro ia hau ra ei

                                                           tavini ia e tià ai.

                        I roto i teie taiòraa Mareto 10 irava 35 e tae i te irava 45 te itehia nei ia te itotio o Iatopo e o Ioane i te aniraa i te Fatu ia tiàhia to raua hinaaro.Ia tae i te taime e parahi ai te Fatu i roto i to na hinuhinu,oia hoi to na hanahana.Ua manaò noa paha o Ioana e o Iatopo e,e hanahana maitihia e te taata e aore ra hanahana horoà noa,eita roa ia,ia haapaò maite anaè tätou i te manaò o Ietu te faahiti nei O ia e piti tau parau te faaite e hanahana mauiui rahi to na no te ao nei.

                        1) Te àuà,teie àua ta Ietu e parau nei,to na ia àti,tei roto te haaputuraahia te ìno o te ao,o te mauiui ia o te Fatu,àuà te reira atoà te haaputuraahia te mau hara atoà.

                        2) Te Papetitoraa,e Papetitohia ai o Ietu,e tapaò ia no to na paremoraa i roto i te hara a to te ao nei,oia to na pohe,e pohe no te horoà i te ora no te mau taata e rave rahi,eiaha no Ioane anaè, e aòre ra no Iatopo anaè,no te taatoàraa ra o te mau pîpî,e to te ao nei.Ua haere mai ra te Tamaiti a te taata nei,no te tavini,eiaha ra ia tavinihia.Te taraehara teie,tei haaparuparuhia i roto i te mauiui no te parautià.

                        Teie te hanahana o Ietu,eita i te hoê hanhana mamae òre,e hanahana mauiui ra,te huru tera no te hinaaro e parahi i na pae e piti o te Fatu,o ta Iatopo e o Ioane e hinaaro nei ia faatià o Ietu,te vai nei ra to na reni,e reni mauiui e te faaòromai.

                        I haapapu ai o Ietu e,aita òrua i ite i ta òrua e ani mai nei,e manaò itoito to teie na pîpî,te itehia nei to raua faaroo i roto i teie manaò onoono e parahi i na pae e piti o Ietu. E tià atoà ia maua ia inu,e ia färii i te Papetitoraa.Na teie atoà manaò e faaite papu e, te vai nei te hoê vahi no roto mai i te hohonuraa no te ààu o Ioane e o Iatopo i to raua tiàturi i te haapiiraa a Ietu no te patireia o te Atua.I te mea,hoê noa taime to Ioane,to Iatopo aniraa i te hoê vahi no to raua tiàraa i pihaiiho i te Fatu,ua maramarama raua i teie mau parau.

                        Ia au i te tahi mau tuatapaparaa,e tapeà o Ioane e o Iatopo i teie mau parau ta raua e tae noa atu i te taime haamuiuihia raua no te Fatu.I te mea o Iatopo te pîpî matamua e pohe i te iòa no Ietu,i Ierutarema i raro ae i te òe a Herota ( Òhipa 12 : 2) O Ioane ra i te faatîtîraa ia a Nero i nià i te motu no Patamo (Apotarupo 1 : 9).

                        Te heheuraa.

                        Teie te tahi huru no ta tätou heheuraa,i teie pene parau,mauti ra ia to tätou hiòraa i te mau irava tataitahi,ia matara mai te tahi irava tumu.Oia hoi,hoê teie heheuraa e vai nei i roto i te mau heheuraa atoà .Eiaha ra tätou ia manaò e,o teie anaè te faanahoraa,eita roa atu ia te vai atu ra.O teie ra te tahi heheuraa i roto i te mau heheuraa atoà e vai nei. Mai teie atu ra te huru.

            Ir 35 Te aniraa e te hinaaro o Iatopo e o Ioane.

            Ir 36 E aha to òrua hinaaro ia faatià atu vau.

            Ir 37 Ia noaa to oe hinuhinu,hoê i te àtau e te àui.

            Ir 38 Aita òrua i ite te vai nei te àuà e te Papetitoraa.

            Ir 39 E tià ia maua i te inu e te Papetitoraa.

            Ir 40 Te parahi i te àui e te àtau no tei haapaòhia.

            Ir 41 Faaroo aè ra na pîpî 10 riri aè ra.

            Ir 42 Te  faahepo nei te  hui mana.

            Ir 43 Tei faarahi ra ia riro ia ei tavini.

            Ir 44 Tei hau ra ei tavini ia no te taatoà

            Ir 45 Aita te Taamaiti a te taata i haere mai ia tavinihia ei tavini ra ei horoà i te ora.

                        Teie te tahi parau tumu ia au i teie heheuraa,eiaha ra tätou ia manaò e,aita atu ai e para tumu oia,mai te mea e taui  tätou i te heheuraa.E tanohia mai paha ia te irava 45 e aòre te tahi atu mau irava.Ia vai matara noa ra tätou i nià i te parau no te feruriraa i te mau hinaaro o te Atua.

                        Irava 40 Areà te parahi i tau rima àtau e ta ù rima àui,eita ia e tià ia ù,maori ra no te feia i haapaòhia.

                        Eita o Ietu i te hoê Fatu òpere parahiraa,e Fatu ra tei haere mai e faaineine i te mau parahiraa no roto i te Patireia o to na Metua.

                        Eita o Ietu i te hoê Fatu òpere parahiraa,e Fatu ra tei haapii e nahea ra i te parahiraa i nià-iho.

                        Eita o Ietu i te hoê Fatu faahepo no te parahi i nià-iho,e Fatu ra tei faatiàma i te taata ia ite i te parahi,oia mau tei parahi i na pae e piti o te Fatu,e òre roa e tià i te Fatu ia faataa o vai ra,no vai ra,maori no te feia ra i haapaòhia.

                        Ei tuatapaparaa.

                        Eita te parahiraa i te mea faufaa roa i roto i ta tätou taiòraa i te mea eita te reia i te mea matamua,te mea matamua ra ia papu te tiàraa tavini na mua roa,ia ite te tavini i te taime oia e òhipa ai no te haafaufaaraa o ia i ta na tareni,ta na tuhaa,e ta na hopoià.Te reira te haafaufaa na mua roa i te parahiraa,te parahiraa no te haamaha noa ia i to tätou rohirohi,i muri aè i te haaraa ua oti atu ai.

                        Te vai atoà-nei-hoi te tahi mau òhipa mea faufaa atoà ia parahi i reira e haa ai,oia ia. E manaò tià roa ia te reira,no te mea ua tano ia te òhipa i nià i te faanahoraa e parahi noa ai.Te manaò ia o Ietu i te irava 42 Ua ite outou e,te faahepo nei te hui mana o te mau fenua i to ratou,e te feia rarahi ra te mana ra ia i nià-iho ia ratou.

                        Oia hoi,e haru te parahiraa na roto i te mau raveà puai atoà,ia parahi i reira e òhipa ai,te parau nei ra o Ietu i te mau pîpî eita ra e tià ia na reira i roto ia outou,o te hinaaro e na reira,e  faarahi ia riro ia ei tavini e tià ai.

                        Teie te taaêraa ta te Atua i te taata,ta te taata e parahi na mua,a rave i te òhipa ta te Atua ra na mua te tavini i reira e hau ai no te parahi i te vahi hanahana,na te òhipa hoi ia e faaite te tiàraa,eiaha ra na te parahiraa,mea pohe te parahiraa,mai te peu eita e parahihia e te hoê taata ora i nià-iho,o ta Ietu e hinaaro nei e haapii i te mau pîpî,e tavini na mua roa,a parahi atu ai,

                        Aita atoà hoi te Tamaiti a te taata nei i haere mai ia tavinihia to na ei tavini ra,e ia horoà i to na ora ei hoo no te taata e rave rahi ir 45.

                        Teie te hanahana o te parahiraa no te Tamaiti a te Atua,tavini,horoà,ora, hoomai to raro aè i te tîtîraa a te hara.E tatauro te parahiraa o te Fatu i te ao nei,e terono ia to te mau arii o te ao nei,e ateni te parahiraa o te Fatu i te ao nei,e pereoo puaahorofenua to te arii o te ao nei,e vairaa maa na te puaa,na mua roa te parahiraa o te Tamaiti a te Atua ta to te ao nei i faainene,areà te mau tamarii o te ao nei tei te vahi nehenehe ia  i te parahiraa.

                        O Iatopo e o Ioane,aita raua i ani i te mana no te faatere,te hinaaro noa nei ra raua e faaite te faufaaraa no te honuhonuraa o to raua faaroo e te tiàturiraa i te Fatu.Eita anei te reira i te hoê hiaairaa i roto i te taviniraa.Aita ra o Ietu i patoì noa atu i teie manaò to Ioane e o Iatopo.Ua haafaufaa ra O ia ma te horoà i te tahi mau manaò faaitoito,no te faahiòraa i nià i te hinaaro o te Atua.E tapaò faaìte teie,te Atua ta tätou e haamaori nei,e haamaitai nei,e Atua ia tei hinaaro ia àparau tamau tätou Ia na na roto i te pure no te aniraa i te tauturu.Teie nei ua ìte ia o Ioane e o Iatopo i te hinaaro o te Atua,tei parahi i te pae àtau,e te pae àui o Ietu maori ra no te feia ia i haapaòhia.Te parahiraa ta Ioane,e o Iatopo e hinaaro nei te mana ia o te ao nei.Te parahiraa ra ta Ietu e faaite nei te Tatauro ia,te mana ia te reira no te Etaretia.

                                                                                                                      Terai orometua.