Ioane 1.1-18 Fänau tahi
Monirē 25 no Titema 2023.
ÔRO FÄNAU.
Fänau tahi
Mau taiòraa.
Taramo 84
1 Na te Mënätehe i nià i te Titita. E Taramo na te tamarii a Tora.
2 E mea pöpou rahi to òe ra mau tiàhapa, e te Fatu manahope.
3 Te hinaaro nei ta ù âau, te nounou nei, i te mau hëtere o te Fatu. Te òaòa nei ta ù âau e ta ù tino atoà i te Atua ora ra
4 Ua noaa hoì i te tefura te fare no na e i te ôpeà te ôfaaraa no na iho, ei fänauraa i to na ra pinia, ta òe ra mau fata, e te Fatu manahope, e ta ù arii, e ta ù Atua hoì.
5 E ao to te feiä i pärahi i to òe ra fare. E òre rätou e tuutuu i te haamaitaì ia òe. Tera.
6 E ao to te feiä o òe to rätou ètaèta ra, te manaò ra rätou i te mau èà tià ra.
7 Haere noa ä rätou nä te peho o Pata, e ö rä rätou i te pape pihaa i reira; e na te ua hoì e faaî i te mau âpoo ra.
8 E haere ä hoì rätou mä te ètaèta e ia noaa atu ä te ètaèta, e tae noa atu rätou atoà ra i te aro o te Atua i Tiona.
9 E te Atua manahope, e te Fatu, e faaroo mai i ta ù pure, e faaroo mai ia ù, e te Atua o Iatöpa e. Tera.
10 E te Atua to mätou päruru ra, a hiò mai na, a haapaò mai i tei Faatähinuhia e òe ra.
11 E maitaì rahi to te mahana hoê i roto i te mau hëtere no òe ra, i te mahana atoà e tautani noa atu i te tahi vähi ê E hinaaro rahi to ù i te tiaì i te ùputa i te fare o ta ù Atua, i te pärahi i te mau tiàhapa o te paieti-òre ra.
12 E mahana hoì e te päruru te Atua ra o te Fatu; e horoà mai te Fatu i te maitaì e te hanahana. E aore roa a ana maitaì e täpeà i te feiä haereà piò-òre ra.
13 E te Fatu manahope e, e ao to te taata i tiàturi ia òe ra.
Ìtaia 52.7-10
7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra o tei hopoi mai i te parau òaòa e te maitaì ra, o tei faaìte hua mai i te ora ra o tei parau mai ia Tiona, Tei to Atua ra te hau
8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona.
9 Ia püroro noa atu te òaòa; ia ûmere päatoà, e te mau vähi pararï i Ierutarëma ua haamähanahana hoì te Fatu i to na taata; ua faaora oia ia Ierutarëma.
10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.
Hëpera 1.1-6
Te parauraa mai te Atua nä roto i ta na Tamaiti
1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta,
2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na.
3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.
Te Tamaiti tei hau i te mau merahi
4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra.
5 O vai hoì to taua mau merahi ra ta te Atua i parau noa atu mai tahito mai ä e: «O ta ù Tamaiti òe, i naùanei òe i fänauhia ai e au «? E ta na hoì i nä ô ra e: Ei Metua vau no na, e ei Tamaiti o ia na ù.
6 E ia na hoì i faahoì faahou mai i te mätahiapo i te ao nei, nä ô aè ra o ia: «Ia haamori te mau merahi atoà a te Atua ia na.»
Ioane 1.1-18
Te Parau a te Atua te Ora.
1 I vai na te Parau i te mätamua ra, i te Atua ra hoì te Parau, e o te Atua hoì te Parau/o te Parau hoì te Atua. 2 I te Atua ra hoì o ia i te mätamua ra.
3 Na roto ia na i rahuhia ai te mau mea atoà nei, e te mau mea atoà i rahuhia, aore hoê aè tei òre i nä roto mai ia na i te rähuraahia.
4 Tei roto ia na te ora, e te ora, o te märamarama ia o te taata.
5 Te ànaana nei te märamarama i roto i te pöuri, aita rä te pöuri i färii atu ia na.
6 Te vai ra rä te hoê taata tei tonohia mai e te Atua, o Ioane te iòa.
7 I haere mai o ia ei ìte, e faaìte i te märamarama, ia faaroo/tiàturi te taata atoà na roto ia na.
8 Eere o ia i te märamarama, ua haere mai rä o ia no te faaìte i te märamarama.
9 O te Parau te märamarama mau, ua haere mai o ia i te ao nei no te türama/haamäramarama i te mau taata atoà.
10 I te ao nei o ia, e na roto ia na teie nei ao i te rähuraahia; e aita to te ao i ìte atu ia na.
11 I haere mai nei o ia io na iho ra, e aore to na iho ra mau taata i färii atu ia na.
12 I te feiä atoà rä tei färii atu ia na, tei tiàturi i to na ra iòa, ua horoà o ia i te mana ia riro rätou ei mau tamarii na te Atua.
13 Te feiä eere i to te toto i fänau ai ra, eere hoì i to te hinaaro o te tino eere hoì i to te hinaaro o te taata, no te Atua rä.
14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau-mau.
15 O Na ta Ioane i faaìte mai, ia na i pii ra: O ia teie ta ù i parau ra e: O të haere mai i muri iho ia ù nei, ua riro ia i mua ia ù, o mua ä hoì o ia ia ù.»
16 Oia mau, na roto i to na î, ua noaa ia tätou atoà nei te maitaì e au atoà i to na ra maitaì.
17 Na Möte hoì i tuu mai i te ture, âreà te maitaì e te parau-mau, na Ietu Metia ia.
18 Aore e taata i ìte i te Atua, o te Tamaiti fänautahi rä i nià i te ôuma o te Metua ra, o ia tei faaìte mai ia na.
Manaò.
I teie mahana haamanaò ai tätou i te ôroà fänau no te Tämaïti Faaora a te Atua, te faaora o te nei ao. Te türama nei te Taramo 84, tei turu-atoà-hia e te Taramo 85 i roto i te tahi mau huriraa, o te hoê ia päpaìraa pehepehe no roto mai i te Faaauraa Mätamua o te faaìte ra i te tiàturiraa i te aroha e te maitaì o te Atua. A faaroo mai na, e te Fatu, a pähono mai na, no te mea te veve nei au e te òto nei hoì. A tiaì mai ia ù, e ta ù Atua, ia faaora òe i to mau tamarii nei o te tiàturi ia oe na. E aroha mai òe ia ù, e te Fatu, o ta ù e parau atu nei i te mau mahana atoà ra. E te Fatu, a òaòa i to mau tamarii nei : te faateitei nei au i ta ù varua ia oe na. Outou o tei maitaì e o tei faaòre i te hapa, ua î i te here i te feiä atoà e pii mai ia mätou, a faaroo mai i ta mätou pure, e te Fatu, e faaroo mai i to mätou reo o te täparu nei ia mätou ia òe. Eiaha roa te hoê o te mau atua e au ia òe, e aore roa e mea e àifaïto i ta òe ra mau haamaitaì. E haere mai te mau fenua atoà ta òe i rähu, e e piò mai i raro i mua ia òe e e faahanahana i to òe iòa, e te Fatu, no te mea e nunaa rahi òe, e ua rave òe i te mau mea maere, o òe, e te Atua, hoê roa ia. A faaìte mai na òe i to òe mau haereà, e te Fatu, ia tià ia ù ia haere mai te au i ta òe ra parau mau ; ia hoê mai to mätou âau ia mätaù te reira i to òe iòa Moà. Te faaìte ra teie mau ìrava i te tiàturiraa i roto i te here e te faaoraraa a te Atua Nui Tumu Tahi, o te nehenehe e täaihia i te ôroà fänauraa o Ietu i te Noëra, ta te mau Teritetiano e hiò ra èi täpaò no te here o te Atua i te huitaata e te hoê parau täpü no te faaoraraa. Tera rä, E nehenehe te tätararaa o teie mau parau e täui ia au i te mau tiàturiraa a te taata tätaì tahi e te mau tütuuraa faaroo.
Ta Ìtaia ia e faaìte nei i te pene 52 i te mau ìrava 7 e tae i te ìrava 10 o te hoê ia mau parau i roto i te mau parau tohu no teie Tämaïti te faaora o eie nei ao, o te parau nei no nià i te faaoraraa e te faaoraraa a te Atua. Teie te tahi tätararaa no teie mau parau :
-Ìrava 7: Te faataa nei Oia i te nehenehe o te mau veà tono o te àfaì mai i te parau âpï maitaì, o te poro i te hau e te faaoraraa, e o te poro nei e, te faatere nei te Atua. E hohoà ia no te òaòa e te tämarüraa ia tae anaè mai te parau âpï no te faaoraraa i te taata.
-Ìrava 8 e te 9: E ìte te feiä tiaì no Ierutarëma i te hoìraa mai o te Fatu i Tiona, e e piihua rätou i te òaòa. Ua piihia te mau vahi paparari no Ierutarëma ia òaòa no te mea ua tämahanahana te Atua i to na nunaa e ua faaora o ia ia Ierutarëma.
Ìrava 10: Te poro ra o ia e ua faaìte te Atua i to na moàraa i te mau nunaa atoà, e e ìte te mau hopeà atoà o te fenua i te faaoraraa a te Atua.
E taiò-pinepine-hia nei teie mau ìrava i te puè tau no Noëra, ei täpaò no te taeraa mai o te faaoraraa na roto i te fänauraa o Ietu Metia. No te hoê tuatapaparaa hohonu aè no nià i teie mau ìrava, e hinaaro paha tätou e haafatata i te mau tatararaa e höroàhia e teie mau ìrava e aore rä, te tahi atu mau tätararaa faahapa e te haamäramarama. E nehenehe i teie mau raveà e höroà mai i te tahi atu ä mau hiòraa e te hoê ìteraa hau atu no te mau papaìraa. E pinepine teie mau ìrava a Ìtaia i te täaihia i te Noëra no te mea te faahiti ra te reira i te pororaa i te parau âpï maitaì e te faaoraraa, o tei riro ei tumu no te ôroà Noëra.
Te parau âpï maitai : Te Noëra o te taime ia e faahanahana ai te mau Teretetiano i te fänauraa o Ietu Metia, tei faarirohia ei parau âpï òaòa maitaì no te taata nei. Te faahiti ra te ìrava 7 i te nehenehe o te âvae o te feiä e hopoi mai i te parau âpï òaòa maitai, o te nehenehe e täaihia i te parau faaìte no nià i te fänauraa o Ietu i te mau tiaì mämoe i roto i te Èvaneria päpaìhia e Ruta.
Te faaoraraa a te Atua: Te hiò nei tätou i te reira e te nünaa Mäòhi i te fänauraa o Ietu mai te faaâpïraa na te Atua ta na ôpuaraa faaora tei haapäpü te Atua no te faaoraraa i te huitaata ia tupu te hau. Te faahiti ra te ìrava 10 i te faaìteraa o te faaoraraa a te Atua i te mau hopeà atoà o te fenua nei, o te nehenehe e hiòhia mai te hoê parau tohu no nià i te faahopeàraa o te taeraa mai o Ietu na te ao atoà nei. E parau ia tätou i Mäòhi Nui nei, àue te nehenehe te tere o te pähi ama òre o Tärapu i nià i te Moana Nui a Hiva tei uta mai i te mau veà tono a te Tumu i tei iòa o te Metia.
No reira, noa atu e ua päpaìhia teie mau ìrava no te tau hou Ietu Metia a fänauhia ai, e taiò-pinepine-hia te reira i te tau Noëra no ta tätou tumu parau o te pororaa i te parau âpï maitai e te faaoraraa, o tei riro ei tumu no te ôroà Noëra. Naò paì ia tätou i te parauraa, Àue te nehenehe o te mau taahiraa âvae i nià i te mau mouà no na o te àfaì mai i te parau òaòa, o tei poro i te hau, o te àfaì mai i te parau òaòa, o te poro haere i te faaoraraa, e o te haere mai e parau ia tätou i te faatereraa arii a te Atua.
I roto i te hiòraa o teie mahana, e nehenehe te reira e tätarahia èi faufaa no te feiä e haa nei no te hau e no te maitaì i roto i te ao nei. Te feiä e hopoi mai i te parau âpï maitaì, o te poro i te hau e te faaoraraa, e au ia rätou mai te mau veà i nià i te mouà, te faataeraa i te tiàturiraa e te òaòa i te taata. Te haamanaò nei te reira i te mau taata atoà e noa atu te mau tämataraa e te mau fifi, te vai noa ra te tiàturiraa e te mau raveà no te hau e no te faaoraraa. E nehenehe atoà e ìtehia te reira mai te hoê piiraa ia tätou tätaì tahi ia riro ei mau veà no te hau e no te faaoraraa i roto i to tatou iho oraraa, ma te haa no te parau tià, no te hau e no te maitaì o te taatoàraa. Ia na reira tätou, e nehenehe ia tätou e faatupu i te ôrama o te hoê ao hau e te faaoraraa. Teie paha te tahi no te hoê tätararaa o teie mau parau, mea faufaa rä ia täpaò e e nehenehe te Pîpîria e tätarahia na roto i te mau raveà taa ê ia au i te huru tupuraa o te taata.
-Taramo 84, 10 E te Atua to mätou päruru ra, a hiò mai na, a haapaò mai i tei Faatähinuhia e òe ra.
-Ìtaia 52, 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.
-Hepera 1, 5 O vai hoì to taua mau merahi ra ta te Atua i parau noa atu mai tahito mai ä e: «O ta ù Tamaiti òe, i naùanei òe i fänauhia ai e au «? E ta na hoì i nä ô ra e: Ei Metua vau no na, e ei Tamaiti o ia na ù.
-Ioane 1, 14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau-mau.
Teie te parauraa a Ioane pene 1 i te mau ìrava 1 e tae i te ìrava 18 èi haamanaòraa i te Ôroà Fänauraa te Tämaïti a te Atua o te parau ia e faaìtehia nei e te Èvaneria. Te faaìte nei o ia ia Ietu Metia ei Parau e aore rä, èi Roto tei vai na i pïhaì iho i te Atua i te mätamua ra o te Atua te Parau. Na Na i rähu te mau mea atoà nei, e aore roa e, e ère O ia i te hoê mea i Rähuahia. Ua faataahia te reira mai te tumu no te ora e te märamarama o te taata.
Ua faaìtehia mai o Ioane Päpetito èi ìte tei tonohia mai e te Atua no te faaìte päpü i teie märamarama ia nehenehe i te mau taata atoà ia tiàturi na roto ia na. Te haapäpü ra te mau parau e e ère o Ioane te märamarama, ua haere mai rä o ia no te faaìte i te märamarama. Te faaìte atoà ra te mau parau e mea nahea te Logo i te taeraa mai i roto i te ao nei, aita rä to te ao nei i ìte atu ia na. Ua haere mai o ia i to na iho nünaa, aita rä rätou i färii ia na. Area rä, i te feiä tei färii ia Na e tei tiàturi i to Na ra iòa, ua höroà mai O ia i te tiàraa ia riro ei mau tamarii na te Atua. I te pae hopeà, te faaoti ra te mau parau na roto i te haapäpüraa e, ua riro mai te Parau ei tino iò e ua pärahi i rotopü ia tätou, tei î i te maitaì e te parau mau. Ua ìte tätou i to na hanahana, te hanahana o te hoê Tämaïti fänau tahi no ô mai i te Metua ra. Ua faaìte päpü o Ioane Päpetito ia na e ua faaìte e o o ia o te haere mai i muri iho ia na ua rave ia o ia i to na pärahiraa i mua ia na, no te mea tei mua oia ia na.
Na roto i to Na îraa ua färii tätou päatoà i te aroha i nià i te aroha. Na Mote i horoà mai i te ture, tera rä, ua tae mai te maitaì e te parau mau na roto ia Ietu Metia. Aore roa e taata i ìte i te Atua, maori rä te Tämaïti Fänau Tahi, tei piri roa i te Metua, tei faaìte ia Na.
E mau parau àraaraa teie o te haapäpü ra i te iho taata o Ietu, to na tiàraa faaora, te pähonoraa a teie nei ao i to na taeraa mai, e ta Na òhipa faaìteraa i te Atua Metua.
Te ômuaraa no te èvaneria a Ioane, e taiò-pinepine-hia te reira i roto i te mau ôroà no te Mahana Noëra no te mea te parau nei te reira no te Tiàraa Atua, oia hoì, ua riro mai te Parau Ietu Metia èi tino iò e ua pühapa mai i rotopü ia tätou. Teie te tähi mau manaò tauturu e nahea òutou ia faaòhipa i teie ìrava no te mahana noëra.
-Te feruri-hohonu-raa e te manaò-hohonu : A rave i te taime no te fëruri i teie ìrava e no te fëruri i nià i to na auraa. A fëruri na mea nafea te Logo i te riroraa mai èi taata e i pühapa ai i rotopü ia tätou. Nahea te reira e ìtehia ai i roto i to òutou oraraa ? E nafea òe e färii popou ai i te Parau i roto i to òe oraraa i te mau mahana atoà?
-Te ùtuafare e aore rä te püpü tauturu : A faaìte i teie mau ìrava i to tätou ùtuafare e aore rä i te oire. A täuàparau no nià i to na auraa e to na faufaaraa. E nafea te reira e tauturu ai ia tätou ia märamarama e ia haafaufaa i te mau vahi ìte-òre-hia o te Noëra.
Te pure e te ârueraa: A faaòhipa i teie mau ìrava i roto i ta tätou pure e ârueraa. Mauruüru i te Atua no te höroà o Ta na Tämaïti e no to Na pärahi-tämau-raa i roto i to tätou oraraa.
-Parau poroì no te Noëra : Mai te mea e höroà òutou i te hoê parau poroì no te Noëra, e nehenehe ta tätou e faaòhipa i teie mau ìrava èi niu no ta tätou parau poroì. Te höroà ra te reira i te hoê hiòraa hohonu no nià i te auraa o te Noëra e o vai mau na o Ietu.
-Te tämahanahanaraa e te tiàturiraa : E nehenehe teie mau ìrava e höroà mai i te tämahanahanaraa e te tiàturiraa, no te feiä ihoä rä e faaruru nei i te mau taime fifi. Te haamanaò mai nei te reira ia tätou e ua haere mai te Atua no te faaìte i to tätou huru taata e tei pïhaì iho noa oia ia tätou.
A haamanaò, e ère te Noëra i te hoê noa haamanaòraa i te hoê òhipa i tupu i mütaa-iho-ra. Teie te mahana e tae mai ai te Atua i rotopü ia tätou. Ia faaî teie parau mau ia tätou i te òaòa e te hau i teie mahana noëra.
Pehepehe : NOËRA.
I roto i te maru o te pö hou o noëra.
I te vahi e ànaana ai te mau fetià.
Mai te mau taoà piru ra te huru.
E faaea ai te ao nei, no täpeà i to na aho.
No te färii i te Parau, te ö faufaa roa.
Ua riro mai te Logo ei taata.
E ua pärahi mai i rotopü ia tätou nei.
I roto i te hoê fare vairaa puaa.
Haehaa, i raro aè i teie raì marü.
Aita O ia i haere arii mai.
Mai te hoê rä àiü, püfenua
Èi faaìte ia tätou i te here hanahana.
Àue ia te aroha hanahana.
Te himene ra te mau merahi.
Ua maere te mau tiaì mämoe,
E hopoi mai te mau arii i te mau ö.
E faaära i te mau värua.
No te mea i taua âruì moà ra,
Ua fänauhia mai te tiàturiraa,
I roto i te hoê ao e tiaì noa ra.
Ma te türamahia e te mau fetià.
E Noëra, E Noëra, àue ia te faahiahia,
Atua i pïhaì iho ia tätou, i roto ia Mäòhi Nui.
Ia faaî teie parau mau i to tätou âau i te òaòa,
I teie mahana Noëra, tei pïhaì iho te Atua ia tätou.
A faatupu i te Ôroà Noëra te feiä atoà e naeàhia e teie pehepehe.
Teraì òr. Faatura.