Mätaio 18.15-20. Toopiti, Tootoru

Tāpati 10 no Tetepa 2023.

Toopiti, Tootoru

Taramo 95

1 Tätou e himene i te Fatu, e himene hua tätou i te mato e ora ai tätou nei.

2 E haere tätou i mua i ta na aro mä te haamaitaì, e mä te taramo e himene hua atu ai ia na.

3 E Atua rahi hoì te Fatu E arii rahi i nià i te mau atua atoà ra.

4 Tei ta na rima te vähi hohonu o te fenua nei, e te teiteiraa o te mau mouà ra, no na ia.

5 Na na te tai, na na hoì i hämani, e na ta na rima i hämani i te repo marô.

6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu.

7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo:

8 Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra,

9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa.

10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau,

11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.»

Ètetiera 33.7-9

7 O òe hoì, e te tamaiti a te taata na, o òe tei haapaòhia e au ei tiaì i te ùtuafare o Ìteraèra; e tënä na, e faaroo mai òe i te parau i to ù nei vaha, a nä ô nei atu ai i te aò ia rätou.

8 Ua parau anaè au i te taata parau ìno e, e pohe mau ä òe; e aore aè ra òe i parau atu ei aò ia na i ta na ra parau ìno; e pohe ä taua taata parau ìno ra i ta na iho ra parau ìno; e tïtau mai ra vau i te hoo i to na toto i to òe ra rima.

9 Ia aò rä òe i taua taata parau ìno ra, ia faaruè o ia i taua ìno ra, e aore o ia i färiu mai i taua parau nä na ra, e pohe o ia i ta na iho hara; ua ora rä òe ia òe iho.

Röma 13.8-10

Te aroharaa i to na taata-tupu

8 Eiaha òutou ei àmutärahu na te taata atoà, âreà ia aroha atu te tahi i te tahi: o tei aroha atu hoì ia vëtahi ê ra, ua haapaò ia i te ture.

9 O teie hoì e: «Eiaha òe e faaturi, eiaha òe e täparahi noa i te taata, eiaha òe e èiä, eiaha òe ei ìte haavare, eiaha òe e nounou», e te vai nei te tahi ture, ua hope atoà ia i roto i teie nei parau e: «E aroha atu òe i to taata-tupu mai to aroha ia òe iho na.»

10 E òre roa te aroha e hämani ìno i te taata-tupu: te au ra maori te aroha i te ture.

Mätaio 18.15-20.

Faaâfaroraa au hoa noa

15 Ia hara noa atu to taeaè, e haere òe e faaìte atu ia na i ta na hapa, o ôrua anaè ra; e ia faaroo mai o ia ia òe ra, roaa iho ra ia to taeaè ia òe.

16 Ia òre rä o ia e faaroo ia òe ra, a arataì atoà atu òe i te hoê e ia toopiti hoì taeaè, «ia ravehia te faaotiraa o te òhipa i nià i te parau a nä ìte toopiti, e aore ia, tootoru.

17 E ia òre o ia e faaroo ia räua, a faaìte atu i te Ètärëtia; e ia òre rä o ia e faaroo i te Ètärëtia, ia riro ia o ia no òe mai te êtene e te taata òhi tute.

18 Òia mau ta ù e faaìte atu ia òutou nei: o ta òutou i täamu i nià i te fenua nei, e täamu-atoà-hia ia i nià i te raì; e ta òutou e tätara i nià i te fenua nei, e tätara-atoà-hia ia i nià i te raì.

A pure âmui

19 E faaìte faahou atu vau ia òutou: ia faaau e toopiti o òutou, i nià i te fenua nei, i ta räua e ani, e färiihia mai ia ta räua aniraa e ta ù Metua i te raì ra.

20 I te vähi e âmui ai e toopiti, e aore ia, e tootoru mä to ù nei iòa, tei röpü/rotopü atoà ia vau ia rätou i reira.

Manaò.

Eere mai te faèhau, aore ra te feiä hoe vaa, tei ravehia te tahi faaineineraa taa ê no rätou, ia vï te tino, e ia òre ia ôtohe i mua i te mauiui, e te rohirohi. I roto i te faaineineraa, aore ra te faaitoitoraa i te tävini o te Atua, te vai ra te tuhaa a te taata, e tano e parau e, ta na te tuhaa rahi aè, te mea ia ta te Atua e ta Ietu e haamanaò pinepine noa ra  Eiaha e mataù, te vai atoà ra rä te tuhaa a te Atua, oia te òreraa e faaruè ia na. Ia au i te reira manaò, ia paruparu te taata, eere no te mea e püai aè te ènemi, no te mea rä ua haaparuparu ê na teie taata ia na iho, ua hiò ê na ia na i roto i te pau, e aita i haamanaò faahou e, no te mea na te Atua te òhipa ta na e rave ra, tei pïhaì noa ia te Atua ia na. Ua tuu ihoä paha te Atua i to na Värua i nià i teie taata, mai te peu rä ua apiapi ê na to na âau i te mataù, nä hea ia te Värua o te Atua e òhipa ai i roto ia na. Mai terä rii faaararaa ta te Atua ia Ètetiera : 7 O òe hoì, e te tamaiti a te taata na, o òe tei haapaòhia e au ei tiaì i te ùtuafare o Ìteraèra; e tënä na, e faaroo mai òe i te parau i to ù nei vaha, a nä ô nei atu ai i te aò ia rätou. Ia märamarama maitaì mai tätou i teie vähi, eere na te tävini teie àroraa, ia au i te parau o te faaitoito, eere atoà na te Atua, hinaaro rä te Atua i te taata ta na i mäìti ia tauturu ia na i te faatupuraa i to na hinaaro. Ia ìte atoà rä o ia e, te hanahana o te òhipa, eere no na, no te Atua rä. E taata noa ihoä paha te taata, te taata rä i haapaò i te hinaaro o te Atua, ua riro ia ei teòteòraa no te Atua, te auraa ia o teie reo to te Atua : e faahitihia nei e Ètetiera, eere ia no te hinaaro faanaìnaì i te tahi pae, a manaò atu ai rätou e, eita rätou e fäito rii noa aè ia na. I roto i te täviniraa, aita e parau to te rahi, aita e parau to te naìnaì, e hiòraa taata noa te reira, eere na te Atua te reira faanahoraa. Te mäìtiraa, eere te faanaìnaìraa, eere te haafaufaa-òre-raa i te feiä tei òre i mäìtihia, to te Atua rä te reira haapäpüraa i to na hinaaro i te tahi taata, i te tahi taime, no te rave i te tahi òhipa. Ua mäìti ihoä paha te Atua i te taata, eere rä te Atua i te Atua mäìtiìti i te taata. Nä ô ia tätou i te parau e : te mäìtiraa, te tiàmäraa ia o te Atua ; aita rä te reira i faaòre i te tiàmäraa o te taata. Ia au rii i te mea i orahia mai e te Mäòhi i te mätamua, i te tau no hui àito, ia hiòhia te parau o te àito, e tiàraa faaora to te àito ; no te huru rä o te fifi e orahia ra e te nünaa, te huru hoì o te ôpuaraa faaora a te Atua, i mäìtihia mai ai te tahi e te Atua ei àito. Parau-noa-hia ai rätou e àito, eere hoê ä òhipa ta te tahi e te tahi, eere hoê ä hinaaro to te Atua i te tahi e te tahi. Nä ô noa tätou : i roto i te tahi ùtuafare, ia faaue te tahi metua i te tahi tamarii e rave i te tahi òhipa, aore ra e haere i te tahi vähi, eere no te mea aita o ia i here, aita hoì i tiàturi i te tahi atu mau tamarii, aore ra no to na hinaaro faarahi i te parau o teie tamarii i mua i te tahi pae. Aita hoê mea e ôpani ra i te tahi pae i te rave-atoà-raa i te reira òhipa. I teie rä taime, ua tae te manaò o te metua i nià i te reira tamarii, te mea ia i òre ai o ia i faaau i te reira òhipa i te tahi pae, tirä rä. Ua päpü maitaì e, ia òre ia maitaì te òhipa i faauehia i te tahi, e taui te manaò o te metua, e faaue o ia i te tahi tamarii ê atu. Te huru ta tätou e ìte pinepine nei, te òaòa ia o te tamarii tei òre i topa mai te faaueraa a te metua i nià ia na, e te faatautau o te tamarii ta te metua i faaue i te òhipa. Ta tätou atoà i ìte, mea varavara te tamarii i te rave i te tahi òhipa e mauruüru ai to na metua, nä nià noa i to na manaò ; ia faauehia rä, e tano o ia e färii, e tano atoà rä e pätoì. Areà te parauraa e, ua tuu te Atua i to na Värua i nià ia na, eere no te mea eita te Värua o te Atua e au i te tahi pae, e nä ô rä tätou e, ua märamarama maitaì o ia i te mea ta te Atua e hinaaro ra ia na, e te reira atoà te mea e arataì ra ia na i roto i te òhipa ta na e rave atu. Ia haamata tätou i te manaò e, ua î te taata i mäìtihia i te Värua o te Atua, e òhie tätou i te manaò e, te Atua iho terä e òhipa ra i roto i te reira taata. Mai te àito, i mäìti ai te Atua i te tahi taata, eere no te mono ia na, i te faatupuraa i ta na òhipa nä roto i teie taata, na teie iho rä taata e rave i te òhipa no reira te Atua i mäìti ai ia na, na te Atua rä e tauturu ia na, ia au rii i te manaò ta te päpaì taramo e parau ra ia nä ô mai o ia e : 6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu.7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo, Te auraa, na teie ihoä taata e haere, to na ihoä te âvae e taahi i nià i te repo, aore ra to na iho te âvae e puta i te ôfaì, na te märamarama rä o te parau e faaòhie ia na i to na mau tuuraa âvae atoà. Eere no te mea ua mäìtihia te tahi taata no te rave i te tahi òhipa, i riro ai te mau mea atoà ei mea òhie no na, i mänina noa ai hoì to na èà, to na noa vähi hau, eiaha rä ia, to na rä vähi taa ê, te tiàturiraa ia ta te Atua i tuu i nià ia na. Te tanoraa mau, no te taata hoê te parau o te mäìtiraa, e no te mea na te Atua te mäìtiraa, te Atua anaè ia tei ìte i te tumu o ia i rave ai i te tahi taata, e i òre i rave ai i te tahi ; te òhipa rä, te vai noa ra ia. Mai te taime rä te tahi mäìtihia ai, ua faaea atoà o ia i te ìmi i to na iho maitaì, te faatupu i to na iho hinaaro, e te parau hoì i te parau no na iho, mai teie e haapäpühia mai nei e na ìrava e maha tei haapoto i ta tätou taiòraa no teie mahana :

-Taramo 95, 3 E Atua rahi hoì te Fatu E arii rahi i nià i te mau atua atoà ra.

-Ètetiera 33, 9 Ia aò rä òe i taua taata parau ìno ra, ia faaruè o ia i taua ìno ra, e aore o ia i färiu mai i taua parau nä na ra, e pohe o ia i ta na iho hara; ua ora rä òe ia òe iho.

-Röma 13, 10 E òre roa te aroha e hämani ìno i te taata-tupu: te au ra maori te aroha i te ture.

-Mätaio 18, 20 I te vähi e âmui ai e toopiti, e aore ia, e tootoru mä to ù nei iòa, tei röpü/rotopü atoà ia vau ia rätou i reira.

E toopiti, e tootoru te ïtiraa teie ta Ietu e faahiti nei èi faatupuraa i te hanahana o te Atua, I roto i teie tuhaa mätamua no te ômuaraa, na nià ihoä i te hiòraa i te mea o ta Ietu i ora mai, oia hoì, tei mua Ietu i te tahi mau faanahoraa ìtehia e te taata, färiihia e te taata, e te haere atu nei ò na e te tahi faanahoraa âpï. I parauhia ai e, e mea âpï, no te mea, aita i matauhia e ère ra te reira mau faanahoraa mai te mea ra e, te haafaufaa òre ra, aore ra, aita e ìte ra i te mea i orahia mai. Te hinaaro noa ra te reira mau manào ta Ietu e hinaaro ra e faaite e, eita paì te märamaramaraa o te parau e hope, eita atoà ra e tano ia haamauhia i nià i te taata. Te auraa ; teie mau parau mätamua, e mau manào faaineine, faaineine i nià i te tahi hiòraa i te parau o te faatupuraa hau i roto i te taata e te taata, te taata e te ìte, te taata e te âmuiraa taata. I ô nei raa rà, e haamata tätou i te faaineine atoà te taata i te ìteraa e, te vai ra ihoä tera mea i matauhia i te parau e toopiti, e tootoru. Te vai atoà ra te mea ta te märamaramaraa o te parau e faaite mai ra. Te tahi ae pae, e ìte atoà tatou e, te vai atoà ra ihoä te mea ta te taata i märamarama, ta na i mätau no nià i te auraa o te parau no te toopiti, e te tootoru  te vai atoà ra ta te Atua hiòraa i te reira parau. E mai te peu, te haapäpü ra Ietu, aita ò na i haere mai e faaòre i te mea i ravehia mai, ua ìte atoà mai tätou i te mau taime i maìri aè nei, i te mau manào hopeà e, aita atoà teie faanahoraa ta te Atua e tuu nei i mua i te taata, noa atu i te hiòraa mätamua e, te taui roa ra, aita atoà te Atua e faahuruê ra i tera faanahoraa i te parau no te toopiti, e te tootoru ta tätou i mätau i te parau e haere noa mai te Atua no te faaravaì. Te reira te manào e hinaarohia ra i teie too, e too ihoä i te taime e haamata ai i te faaära. Te tahi ra paha parau faufaa, tei roto ia i teie too tei püòi i te taiò mätamua, e tuàti atoà te reira i te mau manào o ta tatou i parau i te pae hopeà, oia hoì, te riroraa te reo ei türama, türama i te èà ta te parau e faatoro ra. Te too no te turaì ia tere ia haere i mua, i muri, te pae àui, te pae àtau.  I te haamataraa ihoä, ua haamata è na i te faaärahia, na te parau ihoä, na te märamarama o te parau e türama i te òhipa o ta tätou e rave, te èà e na reira tätou i te haere e te faanaho. Te reira te manào rii e parauhia ra i roto i te tuhaa mätamua. E au e, e faaineineraa tera no te mau parau e matara mai a muri aè. Te tahi noa paha manào i ô nei e tano ia faahitihia, no te mea, mea riàrià roa na te taata te parau no te täuiraa. No te taata, te täuiraa, e vävähiraa te reira, mai te tahi ôrureraa i te tahi hau. Ia faaroo anaèhia ra ta Ietu parau, 20 I te vähi e âmui ai e toopiti, e aore ia, e tootoru mä to ù nei iòa, tei röpü e aore ra rotopü atoà ia vau ia rätou i reira. Te auraa ; te parauraa, e türuì ihoä ò na i nià i te tahi mea e vai ra, ei reira ò na e tano ai e haere i mua. E ère te parau i te tahi vävähiraa, e türuì ihoä ò na i nià i te mea e vai ra e âfaì faahou atu ä i mua. Toopiti tootoru mä to ù iòa tei ropu vau ia rätou, Teie te mea âpï, no te mea te vai ra tera, e tano ai e turaì faahou atu ä te parau i mua te puai o te too i roto i te parauraa a Ietu. Te reira atoà te mea o ta tätou e hinaaro ra e haamata i roto i te haapiiraa, e ère rä i te tahi haafaufaa-òre-raa i te mau mea i orahia mai e aita e parau maitai tei òre i türuì i nià i te mea e vai ra. Te parau ìno te ra ia e türuì i nià i te aore, aita paì e türuì ra i nià i te mea e vai ra, mea âfaì noa mai. Tera ia ta tätou e ìte ra i teie tau i roto i to tätou oraraa, mea tärihia mai te mau manào, te mau parauraa, te mau peu, mea faauta noahia mai ia. Te mea rä ta tatou e hinaaro rä, aita ; türuì i nià i te mea e vai ra, faahaere i mua, haamaitaì. E ère te ope-noa-raa mai i te mau mea e paremo ai tatou. Türuì i nià i te mea e vai ra no te faanuu, no te too, no te pätoo, te reira te òhipa ta Ietu e rave ra. Ia tupu, te Faaâfaroraa au hoa noa, e A pure âmui.

Teraì òr. Faatura.