Ioane 19/1-5 Mahana toru 13 no Èperera 2022
Mahana toru 13 no Èperera 2022
Taiòraa : Ioane 19/1-5
Ìrava tumu : 3 vähi ropu « …Ia ora na e te Arii o te âti Iuta, e ua moto atu ra hoì i ta na mata ».
Aroharaa :
E te mau Tama o te Mä, i parauhia ai tätou e, te Tama Mäòhi, te mau Ohi Mä, aita atu ta na e täpura òhipa maitaì roa aè, te òhi tämauraa i te mea mä, IA ORA NA i roto i teie Hepetoma Moà na tätou, mai tei mätauhia tätou i te parau. Te Aroha Nui i to tätou Papa, tei tämau i te mataära i nià i te oraraa o ta na mau Tama i roto i to na rauraa. To tätou Metua Vahine Faatupu Ora, tei mama noa i te mäa, ia òre ta na i fänau ia puunena. Ia tui-mäite-hia tätou i roto i te Here e te Aroha tuatau o to tätou nä Metua i te Papa Nià e te Papa Raro.
Faaitoitoraa :
« …Ia ora na e te Arii o te âti Iuta, e ua moto atu ra i to na mata ». E parau teie no to Ietu haaväraahia e te taata, Pirato, te mau tahuà rarahi, te mau taata tiàraa teitei e tae noa atu i te Nünaa täatoà, oia hoì te Nünaa âti Iuta ia. O rätou teie e riro nei èi haavä, e èi ìte i te òhipa o ta Ietu i rave mai, e o tei riro èi faahaparaa na rätou ia Ietu. Te mea ia ta te âti Iuta e parau ra e : « E ture ta mätou, e e pohe o ia i taua ture ra o ia i parau e, e Tamaiti o ia na te Atua… » Te auraa, te ture o te Here e te Aroha ta te Atua i höroà i teie Nünaa na roto i to na tävini ia Möte, te tanoraa mau e ture te reira tei faaìte i te faufaa o te faatura e te auraro i te taata, te faarirohia iho nei rä èi ture no te pohe. Aita teie parau to tätou e taa-ê roa ra i te tahi òhipa tei tupu i nià ia Ietu, te arataìraahia o ia i te metepara e faahemahia ai, te na ô ra te faahema : « Faariro i te ôfai èi faraoa », oia hoì, ìmi i te mau räveà atoà, ia ìno terä ta te Atua i faatupu èi mäa. Oia hoì, e parau i nià i te òhipa o ta te Atua i rave no te taata e ta te Atua hoì e parau ra e, « mea maitaì roa », èi « mea ìno ». Te auraa e parau i te maitaì a te Atua èi ìno, e e parau i te ìno èi maitaì. Te mea mau hoì ia ta te päpaì taramo i faahiti na e : « Te parau ra te maamaa i roto i to na âau e, aita e Atua, ua ìno roa to rätou àau… »
A tae atu ai hoì i te fäìraa a te mau faèhau : « …Ia ora na e te Arii o te âti Iuta, e ua moto atu ra i to na mata ». Te ìteraa e te färiiraa ia Ietu èi arii, aita to reira e fifi, ua na reira atoà to te Nünaa âti Iuta i te färiiraa ia Ietu èi arii e ta rätou e fäì ra e, te tamaiti teie a Tavita tei haere mai e amo i te tiàraa arii o Tavita no te faaora ia rätou i te mau faatïtïraa a te mau Nünaa i haere mai e àro ia rätou. Ua faahotana arii atoà rätou ia Ietu, e i teie nei, mai rätou atoà ra, te pii atoà ra te mau faèhau i te piiraa i ravehia mai na e te nünaa no reira Ietu i te püraa mai i te ao nei. E i teie taime, te âti Iuta mai te mau faèhau atoà ra, ua faahuru ê ia i ta rätou fäìraa… Ua moto te faèhau i te mata o Ietu, ua täìri, ua faahei i te räau taratara, na reira atoà no te mau âti Iuta, te pii ra i teie taime, « a faatatauro atu … »
Te nä hea ra te reo o Pirato, i muri aè i te reo faaue a te Nünaa : « …A hiò mai na i taua taata nei ». O te tahi tuhaa teie o te taata teie e tïtauhia ra ia faaòhipa mäite, te mata.
- Te mata : Te mea ia i mätara mai i te ômuaraa ra. Te mata, o te märamarama ia, ta na tuhaa e hiò ia ìtehia te märamarama… Te tahi ia reo i te faahiti-raa-hia i roto i te Mataio pene 2/22, 23, te faufaa rahi o te mata, te na ô ra : « Te mata to te tino nei ramepa, te maitaì ra to òe mata, e märamarama ia te täatoà o to òe tino. Ia ìno rä to òe mata, e pöiri ia te täatoà o te tino. E ia riro hoì terä märamarama i roto ia òe ra èi poiri, e aha te fäito o te reira poiri i te rahi ».
- Te hiò : No te tïtau ia i te ìte, e te ìte hoì ra, te mea mau ia ta te Atua e tiàturi ra e, e roaa i te taata te märamarama e te ora, no te mea, te mau ùputa atoà o ta te Atua i ìriti, i ìritihia e te Atua na roto i te ùputa o te märamarama…
Haamanaò tätou i te parau o te vahine Tämäria, i te hiòraa ia Ietu, ua ìte, aita rä i märamarama te auraa o teie taata e tià atu ra i mua ia na. Na Ietu rä i tauturu ia na, i märamarama ai o ia, o te taata mau teie o ta tätou rätou e tiaì ra, e to na atoà ia haereraa e faaìte i to Tämäria.
E aha te tahi manaò e tano e tuu i ô nei, no tätou i teie mahana, te huru àti e färereihia ra e Ietu, te uiraa, aita atoà änei hoì teie Nünaa Mäòhi, e amo atoà ra i teie huru àti. Oia hoì, aita änei te mata o teie Nünaa e moto-noa-hia ra, haafifiraa i to na maramaramaraa i to na iho parau. Te ìteraa teie Nünaa e, te ärato-noa-hia ra o ia i roto i te faanahoraa e topa ai o ia i roto i te pau. To na parau taata Mäòhi, èi ìmiraa moni na vêtahi, te morohi noa atu ra te auraa mau e, « i to na parau e vai noa ai to na täàmuraa i te Atua », no te mea, « na te Atua iho teie höroà ia na ». Ia ora na.
Òrometua no Tahaa
Terorotua Rita Mahine.V