Ioane 15.1-8 Tumu Räau

Tāpati 02  no Më 2021.

ÔROÀ

Tumu Räau

Mau täiòraa.

Taramo 22

1 Na te Mënätehe, i nià i te Àireta Tahara. Taramo na Tävita. 2 E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru? 3 E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe; 6 ua tiàoro rätou ia òe, e ua faaorahia; i tiàturi na ia òe, e aore i mäheahea. 7 E toè rä vau nei, eere i te taata, e faaìnoraa na te taata, e ta te taata ia tähitohitoraa. 8 Te feiä atoà e hiò mai ia ù nei,

te àta tähitohito mai ra ia ù; ua fäita i te ùtu, e ua ueue rätou i te upoo. 9 Te na ô mai ra rätou: Oia nei, te tiàturi nei ia i te Fatu, ia faaora o ia ia na; tii mai o ia e haru ia na. Inaha, e here hoì o ia na na 10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra. 11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine. 12 Eiaha e faaätea ê atu ia ù, ia fätata mai te àti ra; e aita atu e tauturu ia tauturu mai 13 E rave rahi te puaatoro e haaàti mai ia ù nei; te mau puaatoro àito o Pätäna teie e haaàti mai ia ù nei. 14 Te hämama mai ra to rätou mau vaha ia ù, mai te riona ûuru ra ia ìmi i te mäa.15 Mai te pape e niniihia ra vau, e ua paruparu ta ù mau ivi; mai te täpau nei ta ù âau, ua tärapape i roto i ta ù ôpü nei. 16 Ua marô to ù püai mai te àraea a te pötera ra; ua piri ta ù arero i ta ù taa; e ua tuu òe ia ù i raro i te repo pohe ra.17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou. 18 E taiò noa vau i o ù mau ivi. Te hiò mai ra rätou, te tiàtonu mai ra ia ù, 19 ua tufa rätou i ta ù mau àhu ra no rätou, e te haa-maìri-terero nei i ta ù pereue. 20 Eiaha òe, e te Fatu, e faaätea ê atu ia ù nei; e ta ù püai, ia peepee mai òe i te tauturu mai ia ù. 21 E faaora òe ia ù i te òè nei, eiaha vau ia riro i te püai o te ùrï. 22 Ia ora vau i te vaha o te riona, ua faaora hoì òe ia ù i te tara o te reema ra. Ua pähono mai òe ia ù: 23 E faaìte au i to iòa i to ù ra mau taeaè; ei rotopü i te âmuiraa ra e haamaitaì atu ai au ia òe: 24 O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na. 25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra. 27 E àmu te feiä haèhaa e ia paìa. O tei ìmi i te Fatu ra e haamaitaì rätou ia na, e vai ä te ànaanaea o to rätou âau. 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe. 29 No te Fatu hoì te Pätireia, e o ia te tävana i te mau fenua atoà. 30 E àmu te feiä taoà o te fenua nei, e e haamori; e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra. 31 Na te tahi pae huaai e faaroo ia na, e e parauhia ia ei taata no te Fatu: 32 e haere mai hoì rätou e faaìte i ta na ra parau tià i te tahi mau taata èê ra ia fänau mai, na na hoì teie i rave.

Òhipa 9.26-31

Tauro i Ierutarëma

26 E tae atu ra Tauro i Ierutarëma, ua tämata atu ra o ia i te täàti atu i te mau pipi ra, mataù anaè iho ra rätou ia na, aore i faaroo e, e pipi o ia. 27 Ua rave aè ra Paranapa i ta na rima, arataì atu ra ia na i te mau âpotetoro ra, ua faaìte atu ra ia rätou i to na ìteraa i te Fatu i te äratià ra, e ta na parauraa mai ia na ra, e ta na aòraa i Tamateto mä te iòa o Ietu aore roa i mataù ra. 28 Âmui atu ra o ia ia rätou i te haereraa atu i räpae, e te hoìraa mai i roto, i Ierutarëma ra. 29 E aò atu ra o ia i te iòa o te Fatu ra o Ietu mä te mataù òre, märô atu ra o ia i te mau Herëni ra, te tïtau mai ra hoì rätou ia na e täparahi. 30 E ìte aè ra te mau taeaè ra, arataì atu ra ia na i Taitarea, e ua tono atu ra hoì ia na i Tareto. 31 E hau atu ra to te mau Ètärëtia ra i reira e àti noa aè Iutea atoà e Tarirea, e Tämäria hoì; itoito atu ra, e te mataù hoì i te Fatu i to rätou haereà, e mä te aò hoì a te Värua Maitaì, rahi atu ra rätou.

1 Ioane 3.18-24

18 E a ù mau tamarii ra, eiaha to tätou te aroha vaha anaè e te aroha arero, ei aroha rave rä, ei mea mau.

Te âau hau i mua i te Atua

19 O te mea teie e ìte ai tätou e, no te parau mau tätou, e e mahoru ai to tätou âau i mua ia na ra. 20 Ia faahapa mai hoì to tätou âau ia tätou, e rahi te Atua i to tätou âau, e ua ìte o ia i te mau mea atoà nei. 21 E a ù mau here e, ia òre to tätou âau ia faahapa mai ia tätou ra, aore o tätou taiäraa i reira i te Atua ra. 22 E ta tätou e ani atu ia na ra, e noaa ia ia tätou, no te mea, te haapaò nei tätou i ta na parau, e te rave nei i te mau mea e mauruüru ai o ia ra. 23 Teie hoì ta na parau: e faaroo tätou i te iòa o ta na Tamaiti o Ietu Metia, e e aroha tätou ia tätou iho, mai ta na hoì i poroì mai ra. 24 E tei haapaò i ta na ra parau, te àti rä ia o ia ia na, e te àtihia mai ra o ia e ana. Teie te mea i ìte ai tätou e te àti mai ra o ia ia tätou, o te Värua ta na i horoà mai ia tätou nei.

Ioane 15.1-8

1 O vau te vine mau, e o ta ù Metua te faaàpu. 2 E te mau âmaa hotu òre atoà i roto ia ù nei ra, na na ia e täpü ê atu: e te mau âmaa hotu atoà ra, na na ia e tope ia maitaì, ia rahi atu ä te hotu. 3 Ua mä rä òutou i tënä na, i te parau ta ù i haapii atu ia òutou na. 4 A àti mai ia ù, e na ù e àti atu ia òutou: mai te âmaa eita e hotu noa o ia anaè ra, ia òre ia àti mai i te vine ra; e òre atoà òutou ia òre ia àti mai ia ù ra. 5 O vau te vine, o òutou te âmaa. O të àti mai ia ù ra, e o të àti atu vau ia na ra, o ia të hotu rahi. I taaê atu òutou ia ù ra, aore roa ia e mea e tià ia òutou. 6 O te taata e òre e àti mai ia ù ra, e faaruèhia ia mai te âmaa ra e marô atu ra ia. O të haaputuhia ia ei vahie e tähuhia atu ra. 7 I àti mai òutou ia ù ra, e ia vai mäite ta ù parau i roto ia òutou na, e ani noa ia òutou i ta òutou i hinaaro ra, e e horoàhia ia ia òutou. 8 O te mea ia e maitaì ai ta ù Metua, ia rahi to òutou hotu: e riro ia òutou ei pipi na ù i reira.

Manaò.

E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru?  E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho. Òe rä Tei Moà ra, e tei pärahi i roto i te haamaitaìraa a te Atua Nui Tumu Tahi. I tiàturi na to mätou hui metua ia òe, ua tiàturi rätou, e ua faaorahia rätou e òe; ua tiàoro rätou ia òe, e ua faaorahia; i tiàturi na ia òe, e aore i mäheahea.  

Te âau hau i mua i te Atua, O te mea teie e ìte ai tätou e, no te parau mau tätou, e e mahoru ai to tätou âau i mua ia na ra. Ia faahapa mai hoì to tätou âau ia tätou, e rahi te Atua i to tätou âau, e ua ìte o ia i te mau mea atoà nei. E a ù mau tamarii e, ia òre to tätou âau ia faahapa mai ia tätou ra, aore o tätou taiäraa i reira i te Atua ra. E ta tätou e ani atu ia na ra, e noaa ia tätou, no te mea, te haapaò nei tätou i ta na parau, e te rave nei i te mau mea e mauruüru ai o ia ra. Teie hoì ta na parau: e faaroo tätou i te iòa o ta na Tamaiti o Ietu Metia, e e aroha tätou ia tätou iho, mai ta na hoì i poroì mai ra. E tei haapaò i ta na ra parau, te àti rä ia o ia ia na, e te àtihia mai ra o ia e ana. Teie te mea i ìte ai tätou e te àti mai ra o ia ia tätou, o te Värua ta na i horoà mai ia tätou nei. Ia faaroo tätou i te haapotoraa no te mau taiòraa tei haapaòhia no teie mahana :

5. Taramo 22, 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra.
5. Òhipa 9, 31 E hau atu ra to te mau Ètärëtia ra i reira e àti noa aè Iutea atoà e Tarirea, e Tämäria hoì; itoito atu ra, e te mataù hoì i te Fatu i to rätou haereà, e mä te aò hoì a te Värua Maitaì, rahi atu ra rätou.
5. 1 Ioane 3, 24 E tei haapaò i ta na ra parau, te àti rä ia o ia ia na, e te àtihia mai ra o ia e ana. Teie te mea i ìte ai tätou e te àti mai ra o ia ia tätou, o te Värua ta na i horoà mai ia tätou nei.
5. Ioane 15, 1 O vau te vine mau, e o ta ù Metua te faaàpu.

5 O vau te vine, o òutou te âmaa.   

Tatararaa.

Te faatumu räau nei o Ietu ia Na èi faaìteraa i te hanahana o to na Metua, e haapäpüraa teie no to na tiàraa  tamarii no te fenua, i nià i te fenua e faatupu ai i te òhipa. Te haapäpü atoà ra o Ietu to na Metua te faaàpu, te faaàpu te vahi ia i reira te mau tumu raau i te tupuraa. Te faaìte nei o Ietu i te tahi taupupü no te tupu o teie tumu räau, te âmaa hotu òre e täpü ê, e mau âmaa teie e faataupupü nei te hotu, e aore rä mau âmaa, e haaparuparu nei te hotu o te tahi atu mau âmaa, e aore rä, e mau âmaa maa òre. Te mau âmaa hotu ra e topehia ia rahi te hotu, òia hoì te mau âmaa metua, e te paari te vaiihohia ia rahi te hotu. O vai teie e parauhia nei e täpü è, e tope, ìnaha hoì e o te Metua te faaàpu, o Ietu te vine. E tià ia parauhia e, na te taata tänu, te reira òhipa no te mea òia anaè tei ìte i te huru o ta na tumu raau i tänu. Âreà te mau âmaa ra te mau taata atoà tei tiàturi i te mau hinaaro o te Atua, te fenua, te Tämaïti faaora tei tiàfaahou.

Ia faaroo tätou i teie reo to Ietu i te parauraa e «O vau te vine mau, e o taù Metua te faaàpu, te faaìte noa mai ra te reira ia tätou te òhipa âmui tei tupu i roto i te Metua e te Tämaïti, to te Tämaïti haapaòraa i ta na tuhaa e te mau âmaa e te hotu, to te Metua tämau-maite-raa i te horoà i te ora i roto i te tumu, no te mea ò ia te faaàpu ta te fenua i färii i te faatupuraa ora, tei òre i hotu ra e täpuhia, ò ia tei òre i färii i te ora a te fenua e marô ia e riro ia èi vahie, tei färii i te ora a te fenua, e topehia ia, ia rahi atu ä te hotu. No reira, ia faaroo tätou i teie reo to Ietu i te ìrava 5 O vau te vine, o òutou te âmaa. O të àti mai ia ù ra, e o të àti atu vau ia na ra, ò ia të hotu rahi. No te mea ua àti päpü te tumu i te faaàpu, i te fenua i tià ai, ia Ietu i te parau mai teie te huru, o te tahi  atoà ia parau ta Ietu i faahiti na i roto i te pene 3 i te ìrava 12 i parau atu na vau ia òutou i te parau o te fenua nei, e aore òutou i faaroo, e aha òutou e faaroo ai ia parau atu vau ia òutou i te parau o te raì. Te auraa o teie parau, te ora o te taata tei roto i te tiàturiraa o te parau. Te ìte ra ia tätou e, te reo o te Fatu i nià i te parau, O të àti mai ia ù ra, e o të àti atu vau ia na ra, ò ia të hotu rahi. Te faaìte noa mai ra te reira i to tätou ère i te ora, ia haapotohia te parau, e nä ô ia tätou, to tätou pohe, to tätou ia tiàturi òre i te fenua. Ia na reira tätou i te parau ua topehia ia tätou e te fenua, ia òre ua täpuhia ia tätou e te fenua. E faaea tätou i te ìmi i te tahi hororaa no tätou, i te tahi pähonoraa e mauruüru ai to tätou manaò färii òre, i te na ôraa e, te tätauro o te Fatu te ora ia o te taata. Tätou rä i nä reira, te haavare noa rä tätou ia tätou iho, e te haavare ra i te taata, e i te faahopeàraa, te Atua iho ta tätou e haavare ra. No te aha. No te mea o Ietu iho te Tamaïti a te Atua, e faaìte mai nei i te vahi tätou i hapa ai. O Ietu anaè tei pou mai, mai te raì mai, ò ia anaè tei ìte i te Atua, e ò ia atoà ta te Atua i tono mai no to na hinaaro faaora i te taata. O te mea ta Ietu e tïtau i te taata ia àti ia na, ia tupu mau te ôpuaraa faaora a te Atua, no te aroha e te here, O të àti mai ia ù ra, e o të àti atu vau ia na ra, ò ia të hotu rahi.

I teie tau no te hinapaarae, e tau no na uì e hitu no te ôpu fetii, tamarii, mootua, hina, hina rere, hina tini, hina tau, hinapaarae, ua àti te taura e nati ra i te fetii, i teie mahana ua püpühia te fetii, e aore ua àmahamaha te tumu te parau no te fenua, te ume nei te tahi pae ta na ùmeraa, mutumutu roa ae ra te ôpu fetii, e hau roa te reira na te mau taata aita to rätou e àtiraa i nià i te fetii, e haafatu i te Mäòhi i to na fenua.

Ia faaroo ra tätou i te reo o Ietu i te ìrava 3 Ua mä rä òutou i tënä na, i te parau ta ù i haapii atu ia òutou na. E reo teie e tià i te ärataì ia tätou i roto i teie tau no te hinapaarae.

Teraì òr. Faatura.