Papa Haamori Tāpati 9 no Âtete 2020.
Tāpati 9 no Âtete 2020.
Papa Haamori.
Ômuaraa.
I te tau hou te püraa mai te mau mea atoà mai roto mai i te parau a te Atua, tei te mau vähi atoà te vai, e no te vai te parau. Ua riro atoà rä te ìteraa i te reira huru ei haapäpüraa mai e, te vai ra te vai. A rahu te Atua, a ìte-atoà-hia te mau mea ta te parau i heheu mai, e ua riro te ìteraa i taua mau mea âpï atoà ra i pü mai, ei haapäpüraa e, te vai mau ra taua mau mea ra. No reira, te märamarama atoà ra paha ia tätou e, te manaò tumu ta te taò vai e mau ra, te riroraa ia ei haapäpüraa mai e, ua ìtehia te mea e parauhia ra, te auraa, e au te reira i te tahi fäìraa. No te mea i parau te Atua, i ìtehia ai e, te vai ra te Atua ; e te iòa hoì o te Atua, i muri aè i to na faaìteraa ia na ia Möte, teie ia : Te Vai nei au o vau e Vai nei. I roto i te rahu, i te taime te parau i faaìte ai e, te vai ra te Atua, ua faaìte atoà mai te reira parau e, te vai ra te vai, oia te pape. Te ìte ra tätou e, i roto i to na mau faaòhiparaa atoà, te haapäpü noa mai ra te taò vai e, ua ìtehia te tiàraa o te tahi mea, e parau to na i teie nei. Haamaitaì tätou i te Atua i te hoê reo himene. E tià mai tätou.
Himene.
Pärahi tätou.
Teie tätou Taramo èi faateiteiraa i te Atua Nui Tumu Tahi, Taramo 85 1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri.5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra? 7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau tià e te hau, ua hohoì räua. 12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua. 14 E nä mua ia na te parau tià i te haere, e na te reira e faaìte mai i to na haereà. E te Atua e aroha mai ia mätou te taata hara nei.
Himene tätarahapa.
E faaroo tätou i teie nei i ta te Atua faaitoitoraa ia Èria, ia ua te faaìteraa a Te mau Arii hoê i te pene 19 i te mau ìrava 9 e tae i te ìrava .13 9 Tae atu ra o ia i reira i roto i te hoê ana, e ua taòto iho ra i reira; e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria? 10 Ua parau atu ra o ia, itoito noa na vau i e te Atua Täpäota i te Fatu: ua faaruè te tamarii a Ìteraèra i ta òe parau, e ua huri i ta òe fata i raro, ua täparahi i te mau perofeta na òe i te òè; e o vau nei, o vau anaè nei tei toe: e te ìmi mai nei rätou ia ù nei ia pohe. 11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haapararïraa i te mouà, e te vävähiraa i te mato i mua i te aro o te Fatu; aita rä te Fatu i roto i taua mataì ra; e mure aè ra te mataì, o te âueue fenua iho; aita rä te Fatu i roto i taua âueueraa fenua ra: 12 e oti aè ra te âueueraa fenua, e auahi; aita rä te Fatu i roto i taua auahi ra: e oti aè ra te auahi, e reo iti haìhaì mai ra, tei reira te Fatu. 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria? Haamaitaì tätou i te Atua no teie mau parau e tià ai,
Himene òaòa.
Teie te parau ra a Pauro i to Rōma, e ia tätou i teie mahana ia ua i te faaìteraa a te pene 9 i te mau ìrava 1 e tae i te ìrava 5 i Te Atua e te nünaa ta na i mäìti, 1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e ta ù âau ia ù: 2 e e òto rahi to ù, e te mäuiui tuu òre i roto i ta ù âau. 3 E tià hoì ia ù ia ànatemahia vau e taa ê atu vau i te Metia ra, i ta ù mau taeaè, to ù ra fëtii i te haapaòraa i te tino nei. 4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra. 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.
Pärahi tätou, haamaitaì tätou i te Atua i te hoe reo himene.
Himene.
Pure
Pure tätou i te Atua, te Atua te ineine nei mätou i te taiò i te parau i faataahia no teie mahana. Ia türama ia mätou i ta òe ôpuaraa faaora i reira òe te tïtauraa mai ia mätou. Âmene.
Te parau tätou e taiò ua päpaìhia e Mātaio i te pene 14 i te mau ìrava 22 e tae i te ìrava 33.
To Ietu haereraa nä nià i te miti
(Mär 6.45-52; Rut 6.16-21)
22 I muri mai, ua faaue atu ra Ietu i ta na mau pipi e paìùma i nià i te poti e e fano nä mua ia na i te tahi pae roto, a faahoì noa ai o ia i taua tiàa rahi ra. 23 E oti aè ra te tiàa rahi i te faahoìhia, paìùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira. 24 Ua huru ätea hoì te poti i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì. 25 E tae aè ra i te maha o te äraraa o te ruì ra, ua haere mai ra o ia ia rätou ra i nä nià i te àre. 26 I te taime i ìte atu te mau pipi ia na i te haereraa mai nä nià i te àre, riàrià roa aè ra rätou, nä ô aè ra: E tüpäpaù E ua auë anaè iho ra i te mataù. 27 Ua parau atu ra rä Ietu ia rätou i reira ra, nä ô atu ra: A faaitoito, o vau teie, eiaha e mataù 28 Ua pähono mai ra Pëtero ia na: E te Fatu, mai te peu e o òe tënä, a faaue mai ia haere atu vau ia òe na nä nià i te àre. 29 Ua parau atu ra Ietu: A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre. 30 Ia ìte rä o ia i te ûàna o te mataì, mataù iho ra, e haamata iho ra i te mure i raro, ua tuö atu ra: E te Fatu, a faaora ia ù 31 Ua faatoro mai ra Ietu i ta na rima i reira ra, haru mai ra ia na, nä ô mai ra: E teie nei taata faaroo haraìni/täpetepete, e aha òe i feàa ai? 32 E ia tae räua i nià i te poti, faaea iho ra te mataì. 33 E te feiä i roto i te poti, tähopu/haamori mai ra ia i mua ia na, nä ô mai ra: Òia mau, o te Tamaiti mau ä òe a te Atua.
Pure
Pure tätou i te Atua, 11 O te aroha e te parau mau, ua färerei ia räua; o te parau tià e te hau, ua hohoì räua. 12 E tupu mai te parau mau no roto i te fenua, e hiò mai hoì te parau tià mai te raì mai, ua maitaì roa ia. Âmene.
Himene.
Faaitoitoraa
Himene.
Parau faaära
Püpüraa moni.
Pure Ärai.
E te Atua Metua, te äni atu nei mātou ia òe, a tauturu mai ia mātou i te tāmāraa i ta mātou mau hara, e tià atu i mua ia òe ma te tiàmā. Tauturu mai òe to mātou faaroo, ia papahia te reira i nià i te faufaa no te ora, te riro hoì te rahu ei ìte, e ei tāpaò. Ia aa-faahou-hia ta òe parau tei mau-māite-hia mai e te mau tupuna i roto i to mātou mau âau, ia tià faahou ia mātou ia faariro i te rahu ei täuaro no mātou. I teie mahana, eere te rahu noa terā e fifi ra, o mātou atoà rā. Ta mātou peu, te iho, te hīroà tumu e to mātou iho reo, ua riro atoà ia i roto i te ôpape o teie tau hepohepo ; o mātou iho hoì te tumu. Te òaòa nei rā te âau, no te faaroo o te feiā e pātoì noa nei ia òre te turaraa o te taata no Māòhi Nui nei ia taataahihia. E te Atua Metua e, a faariro ia mātou ei mauhaa no te faatupuraa i ta òe ôpuaraa no te ora o teie nūnaa i Māòhi Nui nei, a fārii mai i ta mātou pure. Amene
Himene âmui.
Pure a te Fatu.
E to mätou Metua i te ao ra.
Ia raa to òe iòa
Ia tae to òe ra hau.
Ia haapaòhia to òe hinaaro
I te fenua nei mai tei te ao atoà na.
Ho mai i te mäa
E au ia mätou i teie nei mahana
E faaòre mai i ta mätou hara
Mai ia mätou atoà e faaòre nei
I tei hara ia mätou nei
E eiaha e faaruè ia mätou
Ia roohia-noa-hia na e te àti,
E faaora rä ia mätou i te ìno
No òe hoì te hau, e te mana,
E te hanahana, e a muri noa atu. Amene.
Faaitoitoraa.
31 Ua faatoro mai ra Ietu i ta na rima i reira ra, haru mai ra ia na, nä ô mai ra: E teie nei taata faaroo haraìni/täpetepete, e aha òe i feàa ai?
Haamaitaìraa.
7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. Âmene.
Teraì òr. Faatura.