Mātaio 3.13-17 A tuu.

Tāpati 12no Tënuare 2019.

ÔROÀ

A tuu.

Taramo 29

1 Taramo na Tävita. E tuu atu ia te Fatu, e te feiä püai e, e tuu atu ia te Fatu i te hanahana e te mana. 2 E tuu atu ia te Fatu i te hanahana e au i to na ra iòa. E haamori ia te Fatu mä te tura moà ra. 3 Tei nià tei te moana te reo o te Fatu. Te haruru mai ra te pätiri o te Atua hanahana ra o te Fatu, tei nià i te moana rahi ra.4 E püai rahi to te reo o te Fatu, e mana rahi to te reo o te Fatu. 5 Te reo o te Fatu tei haapararï i te mau âreti, Na te Fatu i haapararï i te mau âreti i Repanona. 6 E faaôuà o ia ia rätou mai te täfa, e o Repanona e o Tiriona mai te reema âpï ra.7 Na te reo o te Fatu i haapurara i te mau uira. 8 Na te reo o te Fatu i faaâueue i te mëtëpara  Na te Fatu i faaâueue i te mëtëpara ra o Tateta. 9 No te reo o te Fatu i fänau ai te mau àiri, e ua ôfenefene roa i te mau räau o te vähi ururäau ra. E te mau mea atoà i roto i to na ra fare, tei faaìte i te hanahana. 10 Te pärahi ra te Fatu i nià i te moana, te pärahi ra te Fatu ei arii, e a muri noa atu. 11 E horoà maite Fatu i te püai no to na ra taata; e haamaitaì maite Fatu i to na taata i te tuuraa mai i te hau ra.

Ìtaia 42.1-7

To te Metia haapaòraa maitaì i mua i to te ao nei. 1 A hiò na i ta ù tävini, tä ù e tauturu nei; i ta ù hinaaro, i mauruüru roa ai ta ù värua; ua tuuhia e au ta ù värua i nià ia na; e nä na e faaìte haere i te mau êtene i te parau tià. 2 E òre hoì o ia e pii hua, e òre e faatupu i te auë; e òre hoì e faaìte hua i to na reo i te aroä. 3 Te âèho paruparu ra e òre o ia e ôfati; e te vavai aore i àma maitaì ra e òre o ia e tinai. E faaìte haere o ia i te parau au ra e ia tupu atu. 4 E òre to na mana e iti e te paruparu, e ia haamauhia e ana te parau tià i te fenua nei; e tiaì mai hoì te mau fenua roa i te ture nä na. 5 Te nä ô mai ra te Atua ra, o te Fatu, o tei hämani i te mau raì, e nä na hoì i haamänina; o tei höhora hoì i te fenua e tei tupu i nià iho ra; o tei höroà mai i te aho no te mau taata i nià iho ra, e te värua no te feiä i hähaere i reira 6 o vau o te Fatu tei tii ia òe ei rave i te parau tià; e nä ù e mau i te rima e e tiaì hoì ia òe; ei höroà hoì au ia òe ei faufaa na te mau taata, e ei tiàrama ei haamäramarama i te mau fenua: 7 ei faaaraara i te mata o te matapö; ia tuua mai te tïtï i täpeàhia ra; e te feiä i pärahi i te pöuri, mai roto mai i te fare täpeàraa ra.

Òhipa 10.24-38

24 E ao aè ra hoì, tomo atu ra rätou i roto i Taitarea; te tiaì mai ra Torenerio ia rätou, ua oti hoì i te haaputuputuhia mai to na ra fëtii, e te mau hoa mau ra. 25 E tei te tomoraa atu Pëtero i roto ra, ua färerei mai ra Torenerio ia na, haamaìri iho ra i raro i ta na pae âvae, tähopu mai ra ia na. 26 Ua faatià atu ra rä Pëtero ia na, nä ô atu ra A tià, e taata atoà hoì au nei. 27 Ua paraparau iho ra räua, e haere atu ra i roto, roohia atu ra ua putuputu te taata e rave rahi. 28 Ua parau atu ra o ia ia rätou Ua ìte hoì òutou e, e òre te taata âti-Iüta e âmui atu, e e òre hoì e tomo i te fare o te taata o te hoê fenua ê ra. Ua faaìte mai rä te Atua ia ù e, eiaha vau e parau i te taata e, e viivii e te mä òre hoì. 29 I haere mai ai au i te tïpapa-raa-hia aè nei, aore au i märô. E teie nei, e ui atu vau, no te aha i tïpapa aè ai òutou ia ù nei? 30 Ua parau mai ra Torenerio A ruì maha aè nei te haapae ra vau i te mäa e tae aè ra i teie nei hora. E i te iva o te hora i pure ai au i roto i ta ù fare, e inaha, ua tià noa mai ra te hoê taata i mua ia ù mä te àhu ànaana, 31 e ua nä ô mai ra E Torenerio, ua faaroohia ta òe pure, e ua manaòhia to òe hämani maitaì i mua i te aro o te Atua ra. 32 E teie nei, e faatono òe i te taata i Iopa, e parau atu ia Timona e haere mai i ô nei o të parauhia ia Pëtero ra. E tià o ia i tähatai i te fare o Timona räpaau-ìri ra i te taòtoraa, e ia tae mai o ia ra, na na ia e paraparau mai ia òe. 33 I reira ra to ù tonoraa atu i te veà ia òe, e maitaì atu ra o òe i haere mai nei. E teie nei, teie anaè mätou tei mua i te aro o te Atua, ia ìte mätou i te mau parau atoà a te Atua i poroì iho ia òe ra.

To Pëtero ôreroraa i mua ia Torenerio mä

34 Ua parau atu ra te vaha o Pëtero Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haere-raa i te Parau Maitaì i te hau ra ia Ietu Metia o te Fatu no te mau mea atoà ra. 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua.

Mātaio 3.13-17

Te päpetitoraahia o Ietu

(Mär 1.9-11; Rut 3.21-22; hiò Ioa 1.29-34)

13 Ua tae mai ra Ietu mai Tarirea i Iörïtäna, ia päpetitohia o ia e Ioane. 14 Teie rä, pätoì atu ra Ioane, nä ô atu ra, O vau tërä e hinaaro ra ia päpetito mai òe ia ù, inaha, te haere mai nei òe ia ù ra 15 Ua pähono atu ra Ietu ia na A tuu noa mai i teie nei e nä reira hoì tätou i te faatupu hope roa i te parau tià atoà. Ua färii atu ra o Ioane. 16 Ia oti aè Ietu i te päpetitohia, haere mai ra o ia i nià, mai raro mai i te pape. E inaha, vetea aè ra te raì nö na, ìte aè ra o ia i te Värua o te Atua i te pouraa mai, mai te ûupa ra, e te tauraa i nià iho ia na. 17 E te hoê reo no te raì mai, i te nä-ô-raa mai e O ta ù Tamaiti here teie, ua mauruüru roa vau ia na.

Manaò

Taramo 29, 11 E horoà te Fatu i te püai e haamaitaì i to na taata i te tuuraa i te hau ra.

Ìtaia 42, 1 A hiò na i ta ù tävini, ta ù hinaaro, tei nià ta ù värua èi faaìte i te parau tià.

Òhipa 10, 38 ia Ietu no Nätareta, tei faatähinuhia e te Atua i te Värua Maitaì e te mana ra.

Mataio 3, 15 A tuu noa mai no te faatupu hope roa i te parau tià atoà.

E parau teie e haapäpühia nei e na taiòraa e maha i to tätou ihoä faahitiraa i teie mau ìrava, i to tätou atoà ia ìteraa e, òre noa atu ai tätou i anihia mai, ua ineine ê na ta tätou pähonoraa, mai teie te päpaì Taramo e faahiti ra 11 E horoà te Fatu i te püai e haamaitaì i to na taata i te tuuraa i te hau ra. No Ietu teie parau. Mai te tahi metua tei hinaaro i te faahitimahuta i ta na mau tamarii i te parauraa atu ia rätou e, e taoà huna ta na i faaineine na rätou, mai te tiàturi e, e haamata te tamarii i te ui maere, e tämata i te tämaì, e täparu mai hoì ia na e faaìte, e inaha te tià mai nei te tahi, i te parauraa mai e ua ìte au e aha. I reira noa, mutu roa te òaòa o te metua, e te faufaa òre ta na mau ìmiraa rii ia tupu te ànaanatae e te hitahita i roto i te tamarii. Ua ìte maitaì tätou e, te mäa tei faahinaarohia, tei ìmihia te räveà ia roaa, e tei rohirohihia, e hau aè to na âminamina i te mäa i horoà-noa-hia mai, tei òre paha i hinaarohia. No tätou nei, e tämata tätou i te tomo i roto i te värua no parau e maha nei. No te mea e rave rahi mau àma parau e toro i nià i te ôpuaraa faaora e faatupuhia nei e te Atua Nui Tumu Tahi. E horo vave noa to tätou manaò i te parauraa e o te Tämaïti fänau tahi a te Atua o Ietu. E tià ia tätou ia, na reira i te parau o Ietu no Nätareta to na hohoà aita tätou i ìte, ta na òhipa i faatupu o tätou i taiò i roto i te mau Parau Maitaì i päpaìhia.   

Mea maitaì ia päpü maitaì to tätou manaò i teie-nei-raa ra e, eere te parau o te tävini, aore ra te täviniraa ta tätou e ìmi atu, mai te mea e au to na parau no te mau tävini atoà, aore ra te mau taata atoà e hinaaro nei i te tävini i te Atua. Ia parau mai te Atua e, A hiò na i taù tävini, ua ìte atoà ia tätou e, hoê te tävini o te Atua, te auraa, no na noa ihoä to na parau. No reira, to na te parau ta tätou e faaitoito atu i te haamataratara, mai te ìte maitaì e, te mau mea faufaa atoà, aita te reira i horoàhia i te mata te hiò, ua horoàhia rä i te âau. No te tauturu ia tätou, tano maitaì teie manaò ta Ìtaia e parau nei, 1 A hiò na i ta ù tävini, ta ù hinaaro, tei nià ta ù värua èi faaìte i te parau tià. E òhipa teie e tïtauhia ra ia tätou ia ìte ma te òre i te faatütonu noa i mua, aita hoì tätou i ìte i te mea e hiò, e ia maoro te hiò-noa-raa i te tahi vähi, e riro te mata i te mohimohi, e te òre e päpü faahou te mea e hiòhia ra. Ia hiò tätou i te tahi mea, eiaha ia moèhia ia tätou e, o òe terä e hiò ra, e i roto i te reira hiòraa, te ìte rii noa atoà ra ia tätou, to tätou mau vähi paruparu, te ärea e vai ra i roto ia tätou e te mea ta tätou e hiò ra, e tauturu te reira ia tätou i te ìteraa i te mea e hinaarohia ra ia tätou ia ìte. Ua ìte atoà ia tätou e, te mau mea atoà ta tätou i faariro ei mea faufaa, e riro e, mea taa ê ta te Atua e tiaì mai ra ia tätou ia rave. Te fifi te reira e pinepine i te tupu ia òre te taata ia faaea noa i nià i te mea i anihia ia na, e ia faahaere i ta na hiòraa, to na manaò i mua, aore ra ia faariro i te mea ta na e hiò ra ei faatanoraa ia na.

No reira, i roto i te mau òhipa atoà tei anihia te taata e rave, o na ihoä paha to na fifi mätamua roa, o na atoà rä to na tauturu maitaì aè. Mea maitaì te taata ia faaea rii i te faanaìnaì noa ia na, ia haamätau atoà i te uruaì i nià ia na iho, ia tiàturi hoì ia na iho. Inaha te fenua, te ùputa ia o te raì, oia te vähi te taata e märamarama ai i te parau o te Atua, e fenua hoì te taata, e riro te tiàturiraa ia na iho e i te fenua, i te tauturu ia na i te ìteraa i te auraa o teie aniraa ta te Atua. i teie faahitiraa a Pauro 38 ia Ietu no Nätareta, tei faatähinuhia e te Atua i te Värua Maitaì e te mana ra. Te parau ta tätou e täpeà mai ei faaitoitoraa na tätou, no roto mai ia i ta Ietu pähonoraa ia Ioane Päpetito i te päpe no Iörïtäna, 15 Ua pähono atu ra Ietu ia na A tuu noa mai i teie nei e nä reira hoì tätou i te faatupu hope roa i te parau tià atoà. Ua färii atu ra o Ioane. Te faahiroàroà noa mai ra te reira ia tätou e, i roto i te faatupuraa i te hinaaro o te Atua, eita te hiò e tano ia faataa-ê-hia i te faaroo, oia te mea i parauhia. Hiò noa ai te mata, na te parau e arataì ra i te taata i te ìteraa i te mea ta te Atua e hinaaro ra ia ìte o ia. No te mea e Värua te Atua, te märamarama noa ra tätou e, eere te mata o te taata ta te Atua e tïtau ra, to na rä värua, e to na âau, ia òre te taata ia hämani i te tahi hohoà no te tävini. Aita atu mea e anihia ra ia na maoti rä, ia vai iho ia na ia ärataìhia e te parau, mai te ìte maitaì e, eere to na parau ta na e ìte atu, e riro rä te reira parau i te tauturu ia na i te haere-atoà-raa i te vähi ta te parau e arataì ra ia na. Ua ìte o Ioane o te Fatu teie i mua ia na, teie parau a Ioane O vau tërä e hinaaro ra ia päpetito mai òe ia ù, inaha, te haere mai nei òe ia ù ra, ua hiò, ua ìte, e ua faaroo, ua pähono o Ietu, A tuu noa mai i teie nei e nä reira hoì tätou i te faatupu hope roa i te parau tià atoà. Ua färii atu ra o Ioane.  E reo faatupu ora teie no Ietu i te mau taata atoà e pee ia na, e tiàturi ta na mau haapiiraa. Te färii nei o Ietu i te päpetitoraa tätarahapa tei faataahia no te taata tei tïtau i te faaòreraa hara a te Atua. Te ìte atoà nei ra o Ietu i ta na hopoià e faatupu no te parau tià. Te parau tià ta Ietu e faahiti nei mauti ra ia te mau ture ia a te Atua, te ture no te ora e te hau te tià e ärataì i te mau taata atoà na te èà märamarama. Òia hoì, te türama nei teie reo to Ietu ia tätou te aroha e te parau mau tei tuu ia tätou i mua i te Atua, tei faariro ia tätou èi tupuraa no te mau ôpuaraa ora, tei ìmi tämau i te maitaì, taua maitaì ra, o to tätou ia òaòa.

Teraì òr. Faatura.