Ioane 6,51-58

Täpati 19 no Âtete 2018.

ARERO

Taramo 34.10-15

10 A mataù i te Fatu, òutou te feiä moà no na ra. Aore hoì e èreraa to te feiä i mataù ia na ra. 11 Ua ère te mau riona âpï i te mäa, e te pohe ra i te poìa; âreà tei ìmi i te Fatu ra, e òre roa e ère i te maitaì. 12 A haere mai na, e te mau tamarii na, e faaroo mai ia ù; e haapii au ia òutou ia mataù i te Fatu. 13 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei.14 A täpeà i to arero i te ìno, e to vaha eiaha ia parau i te parau haavare. 15 E haapae i te ìno, e rave i te maitaì, e ìmi i te hau, e aruaru atu.

Mäteri 9,1-6

Tïtauraa a te Vahine Paari 1 Ua faatià te paari i to na fare e ua tarai hoì o ia i nä pou nehenehe e hitu nö na ra. 2 Ua pätia o ia i ta na mau puaa e ua ânoìhia ta na uaina; e ua faanahonaho o ia i ta na àmuraa. 3 Te tono nei i ta na mau vahine ei arataì mai i te mau taata; e te pii nei i te mau vähi teitei o te ôire. 4 O tei òre e ìte ra, e färiu mai o ia i ô nei; e te feiä maùa ra, te parau atu ra o ia, 5 E haere mai e àmu i ta ù nei mäa, e inu hoì i te uaina ânoìhia e au ra. 6 E faaruè i te maamaa, ia ora; e nä te èà haapaò maitaì i te haere.

Êfëtia 5,15-20

15 E tënä na, e ara ia tià to òutou haereà, eiaha mai ta te ìte òre ra, mai ta te feiä ìte rä, 16 mä te faaherehere mäite i te taime, no te mea e ànotau ìno teie. 17 E eiaha to òutou ei manaò òre, ia ìte rä òutou i to te Fatu ra hinaaro.18 E eiaha ia taèro i te uaina e tupu ai te taiàta ra, ia î rä òutou i te Värua, 19 e te paraparauraa te tahi i te tahi i te taramo, e te himene, e te tire a te Värua ra, i te himeneraa mä te au o te âau i te Fatu ra; 20 i te haamaitaìraa i to tätou Metua ra i te Atua i te mau mea atoà nei mä te faaea òre, i te iòa o to tätou Fatu ra o Ietu Metia; 21 mä te auraro mäite hoì òutou ia òutou iho mä te mataù i te Atua.

Ioane 6,51-58

51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao. 52 Ua märô anaè iho ra te âti-Iüta rätou rätou iho, ua nä ô aè ra, E aha teie taata e tià ai ia horoà mai i to na tino e àmu. 53 Ua parau mai ra Ietu ia rätou Âmene, âmene, e parau atu vau ia òutou ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou. 54 O të àmu i to ù tino e të inu i to ù toto, e ora-mure-òre to na, e na ù o ia e faatiàfaahou ia tae i te mahana hopeà ra. 55 E mäa mau to ù tino e e inu mau to ù toto. 56 O të àmu i to ù tino e të inu i to ù toto, e tià ia i te àtiraa mai ia ù, e e tià hoì au i te àtiraa atu ia na. 57 Mai te Metua hoì e ora ra, o tei tono mai ia ù nei ra, e te ora nei hoì au i te Metua; oia atoà të àmu ia ù nei, e ora ia ia ù. 58 O te päne teie no te raì mai eere mai te mäna i àmuhia e to òutou hui-metua ra, pohe atu ra hoì rätou. O të àmu i teie päne, e tià ia i te ora-mure-òre ra.

Manaò

Teie na parau e maha te faahiti nei i te paari no te hinaaro o te Atua Nui Tumu Tahi, te paari e parau-atoà-hia te mata î, tei ìte i te mau òhipa tei faatupu, tei rave ma te haapii i te tahi ia tae i nià i te maitaì i te oraraa âmui. Tei parauhia te vaamataèinaa fauraò turäma i te èà o te nünaa ia pühapa i roto i te märamarama i te tïtauraa a te fenua i te mea èita o ia e ôhumu,  èita o ia e amuamu, èita o ia e faaìno, e horoà noa o ia tei au i te hinaaro o te taata, ma te ài noa i te here ta te fenua e horoà ra. Tätou ra te taata te faaïti nei i te horoà a te fenua, tope te mau tumu ùru no te faaïti te hotu, tapu faaòre roa no te fiu i te päraù i te mau räuòre ta tätou e parau nei e pehu. Haapoto te mau tumu haari, no te faahaèhaa e tae roa atoà i te haamouraa no te mea te faaäpiäpi ra i te fenua. E te vai atu ra te mau haapahiraa ta tätou e faatupu ra no te tomo i roto i te hupehupe te faatau, te àihamu e te täparu. A faaroo mai na te mau manaò no taiòraa e maha ia au i teie mau faahitiraa,

-Taramo 34, 14 A täpeà i to arero i te ìno, e to vaha eiaha ia parau i te parau haavare.

-Materi 9, 6 E faaruè i te maamaa, ia ora e nä te èà haapaò maitaì i te haere.

-Èfetia 5, 21 mä te auraro mäite hoì òutou ia òutou iho mä te mataù i te Atua.

Ioane 6, 52 Ua märô anaè iho ra te âti-Iüta rätou rätou iho, ua nä ô aè ra, E aha teie taata e tià ai ia horoà mai i to na tino e àmu.

Te tahi parau tumu ia au na taiòraa e maha nei  te ARERO, a pana i nià, a tuu i raro, a haùti i te àui, a haùti i te àtau, a toro, ia paaìna to reo i te navenave o te mau areö, e te mau mataì, no te mau piapa Mäòhi. No te faaìte i te mau maitaì ta te rähu e faaìte noa ra i te hanahana o te Atua Nui Tumu Tahi, i te mea rave rahi mau faufaa e ìtehia nei tei àua haaàti nei i to tätou oraraa a te àru e òha noa nei i nià i te mau èà e taahihia e to tätou tau puè âvae. Ma te manaò òre e, te fenua te ra e mau ra ia tätou ia òre tätou ia hià i te mea te aroha e te here o te Atua o te Atua te rämepa ärataì. I te mea te tïtauraa ia a te Taramo, 14 A täpeà i to arero i te ìno, e to vaha eiaha ia parau i te parau haavare. No te mea te arero e fenua, te fenua ra e reo, ei reo to te fenua e âiàhia ai te hoê nünaa. Èita te fenua pähono i te ìno, èita e haavare, e horoà ra i ta te taata e hinaaro, ia tänu te taata i te tumu ùru, e horoà mai i te maa ùru, ia tänu i te tumu haari, e horoà mai i te maa haari, ia tänu i te maniota e horoà mai te maniota, ia tänu i te meià e horoà mai te tari meià. Te faatoro noa ra te fenua i te èà e tià i te taata ia haere ia maitaì i roto i te hanahana o te Atua e tae roa atu ai i te tuaraì tuatinitini, te mau maa i raro i te fenua e nänä rätou i te tuaraì, te mau maa tumu e nänä rätou i te fenua e haapäpü noa mai ra te reira ia tätou te tupuraa te ôpuaraa faaora a te Atua no te taata. I teie parauraa a te Materi, 6 E faaruè i te maamaa, ia ora e nä te èà haapaò maitaì i te haere. Teie haere e parauhia nei, eere ia no te tuuraa âvae noa ta te taata e faatano ra i nià i te vähi ta na e tïtau ra, e haamanaòraa noa rä i te taata e, eere o ia te mea faaea tumu mai, e rätere noa o ia, i roto rä i to na tere, te hinaaro nei te Atua e, räua aè ia haere. Ia päpü maitaì rä tätou i te manaò o Materi, eere te tiàraa âpee noa, aore ra te âpiti o te taata ta te Atua e hinaaro nei, te hinaaro nei rä te Atua ia ìte te taata e, eita to na parau e tano ia faataa-ê-hia i to te Atua. No reira, aita te Atua i âmui noa mai i roto i te tere o te taata, aita hoì te taata i haere noa e te Atua, i haere rä o ia e to na Atua. Te hinaaro nei te Atua ia märamarama te taata i te auraa âpï ta na e hinaaro nei i te haamau i roto ia na e te taata. Te papaìraa ia a Pauro i to Èfetia, 21 mä te auraro mäite hoì òutou ia òutou iho mä te mataù i te Atua. Te mataù, te mea te reira e haaparuparu i te manaò taata, òre atu ai o ia e òhie i te haereraa i mua. I mua i te fifi, te tämata ra te manaò taata i te fäito i te püai, aore ra te itoito e vai ra i roto ia na no te faarururaa, aore ra no te faaüraa. Te manaò, te mana òhipa te reira i roto i te taata na te âau e ôpua, na te manaò e faanaho i te tupuraa o te òhipa ta te taata e rave atu. Ia itoito te manaò, te itoito atoà ra te taata âreà ia paruparu te manaò, te taata atoà terä e paruparu ra. Te auraro rä, oia te tuuraa te taata i to na âau i raro, e tano ia hiòhia ei täpaò no te rahi o te hoê taata, inaha ua noaa ia na te haapae i te ìmiraa i to na iho maitaì, to na hoì hanahana, aore ra ei täpaò no to na paruparu, te mea e, no te mataù i te fifi, aore ra te ènemi, i tuu ai o ia ia na i raro, i faanaìnaì ai hoì ia na. Ia faaroo tätou i te reo o te mau Âti-Iüta i teie huru parauraa, 52 Ua märô anaè iho ra te âti-Iüta rätou rätou iho, ua nä ô aè ra, E aha teie taata e tià ai ia horoà mai i to na tino e àmu. Ia parau o Ietu e, 51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao. I märô ai te taata no te mea ia ua àramoinahia te parau fänau püfenua, te fenua ra tei faaìte ia i te ora, taua ora to te taata ia märamarama. E aha o Ietu e täno ai e parau e àmu i to na tino, e täno atoà ia parau e täno anei o Ietu ia Parau ò na te färaoa o na te uaina, e ia manaò òutou e täno o Ietu ia parau ò na te maa. Te tahi hiòraa ia tanu tätou i te taro, te parau nei te taata tänu ta ù te reira i tanu èi faaàmuraa i te ùtuafare tamarii o to ù ia hou, päpü maitaì ia tätou e te maa taro te àmu eiaha te taata tänu. O ia atoà ia te parau a Ietu o ta Ù pane ta te fenua i horoà mai, to Ù ia tino tei fänau püfenuahia mai e Tämaïti na te fenua. Te auraa e ère te pü o te märamarama. ta tätou e hiò, te vahi ra ta te märamarama e faatoro ra te vahi ta na e faaìte mai ra ia tätou, e aha ta te märamarama faaìte mai ra te fenua e to na î, te tai e to na î, te raì e to na î, te auraa tera ora ta te Atua i faaherehere no te taata, òia hoì te täpaò no to na aroha e to na here, o Ietu ua parau ò na o ta Ù tino tenä e aha te aura o te ra parau ta Ù. Te märamarama ia ta te Atua i faatupu e aha ta na e turäma ra, òia hoì e täpaò no to na aroha e to na here, tera märamarama tei riro te Atua èi tumu te faaìte noa ra i to na aroha e to na here i te taata o Ietu i te haereraa mai. Te haamanaò mai nei te Taramo e, 14 A täpeà i to arero i te ìno, e to vaha eiaha ia parau i te parau haavare. 15 E haapae i te ìno, e rave i te maitaì, e ìmi i te hau, e aruaru atu.

Teraì òr. Faatura.