Märeto 6.30-34

Täpati 22 no  Tiurai 2018.

Taramo 23

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. 3 E faahoì o ia i taù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi ua faatävai òe i ta ù upoo; e te î nei taù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Ieremia 23.1-6

Te nana tei faaruèhia i roto i te rima o te tahi pae

1 E te mau tiaì, e tei täparahi e ua haapurara i te mau mämoe tä ù i faaàmu nei, të nä reira mai ra te Fatu. 2 Te nä ô mai ra te Atua o Ìteraèra, o te Fatu, i te mau faaàmu tei faaàmu i to ù ra mau taata, ua haapurara i tä ù ra mau nana, e ua tiahi-ê-hia e òutou, e aore òutou i tiaì noa atu ia rätou inaha, teie au a tähoo atu ia òutou i te ìno ta òutou i rave të nä reira mai ra te Fatu. 3 E haaputu mai rä vau i te toeà o ta ù nana, i te mau fenua atoà i tïahihia atu ai rätou e au ra, e faahoì mai au ia rätou i ta rätou iho ra âua, e riro rätou i te tupu e rahi noa atu ra. 4 E tuu hoì au i te tiaì i nià iho ia rätou, ei faaàmu ia rätou ra. E òre atu ra rätou e mataù faahou, e òre e horuhoru, e òre hoì rätou e nä reira-faahou-hia te parau mai ra te Fatu. 5 Te nä ô mai ra te Fatu inaha, te fätata mai ra te tau, e faatupu ai au i te tahi âmaa parau-tià no Tävita, e riro hoì te hoê taata ei arii e te haapaò i te parau maitaì, e te faatupu hoì i te parau au e te parau-tià i te fenua nei. 6 Ia tae i to na ra tau, e ora ia Iüta,  e pärahi noa hoì Ìteraèra mä te ora e teie hoì te iòa e maìrihia nö na, O te Fatu ta tätou parau-tià ra.

Èfetia 2.13-18

13 I teie nei rä, i te Metia nei ia Ietu, o òutou o te feiä i te ätea ê i mütaa iho ra, ua haafatatahia mai ia i te toto o te Metia nei. 14 Oia hoì to tätou hau o tei faariro ia tätou ei hoê, e ua huri hoì i raro i te patu faataa ê i röpü ra. 15 Ua oti hoì i te faaòrehia te au òre i to na iho ra tino, oia te ture parau faaue no te mau ôroà ra, ia riro taua piti ra ei taata âpï hoê ia na iho, a hau atu ai ra 16 e ei faafaite ia räua atoà i te âmuiraa hoê i te Atua, i te tätauro ra, o te au òre i faaòrehia i te reira. 17 E ua haere mai ra hoì, ua aò haere i te Parau Maitaì ra o te hau ia òutou i to te ätea ê ra, e ia rätou hoì tei fätata. 18 No na hoì tätou atoà nei e ö atu ai i te Värua hoê i te Metua ra.

Märeto 6.30-34

Te faaàmuraa Ietu i nä taata e pae tautani

(Mät 14,13-21; Ruta èv 9,10-17; Ioane 6,1-14)

30 E putuputu mai ra te mau âpotetoro ra, ua faaìte mai ra ia Ietu i ta rätou i rave, e ta rätou i haapii ra. 31 Ua parau atu ra o ia ia rätou A haere mai òutou anaè iho, tätou i te hoê vähi moèmoè e faaea iti noa aè. Aita hoì o rätou e taime no te tämaa i te rahi o te taata i te haereà mai e te haereraa atu. 32 Hoe huna atu ra rätou nä nià i te poti i te tahi vähi moèmoè. 33 Ua ìte rä te taata ia rätou i te fanoraa, e rave rahi hoì tei ìte e o vai rätou, e ua horo atu ra nä uta mai roto atu i te mau ôire atoà, e ua tae na mua ia rätou. 34 E tei te täpaeraa atu Ietu ra, hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Manaò.

E maha toro aa e vai nei i roto i teie mau taiòraa tei faaìte i te puai o te parau tei òre e maheàheà to na rau ta tumu e mau nei ma te àueue òre i nià i te fenua. Ia faaroo tätou i te mau parau e faahitihia ra ia au ta te faaäuraa mätamua parauraa, e ta te faaäuraa âpï faaìteraa e ìtehia te puai o te värua ia parau.

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

- Ieremia 23, 6 O te Fatu ta tätou parau-tià ra.

-Èfetia 2, 16 e ei faafaite ia räua atoà i te âmuiraa hoê i te Atua,

-Märeto 6, 33 e ua horo atu ra nä uta mai roto atu i te mau ôire atoà, e ua tae na mua ia rätou.

Teie te mau aa metua o te tumu o te parau ta te fenua e faaàmu nei ia puai te tupu e ia hotu i te mau taime  atoà, e òre roa  oia e fifi i te huru o te täuiuiraa o te reva i te mea te mau ra te fenua i te mau aa tei horoà i te ora. Naò ia tätou i te parauraa te tumu o te parau teie ia ìrava, E riro ä te maitaì e te aroha o te parau tià te faafaite ia tätou i te haapiiraa a te Fatu. Èita e òre e ônevaneva e te uiui tätou i teie huru hämaniraa parau no te mea aita e iòa i faaroohia, eita ihoä ia tätou e maere ia ônevaneva te taata i te ìmiraa i te haapäpüraa ia òre o ia ia hape i te pähonoraa i te tahi parau tei òre i haapaòhia no na. Mea haamä atoà hoì ia parauhia mai e, eere o òe terä e parauhia mai ra. E òhie tätou i te märamarama i teie huru to te taata. Te tanoraa mau, ia faahitihia teie huru parau, e hiò te taata parau i te taata ta na e parau ra, mata e mata, vaha e tarià, mai te peu eita o ia e tüòu mai, eita hoì e faatoro roa mai i te rima, òe, no reira, eita te taata e faaroo mai ra e rahi roa te hape. No te tautururaa ia tätou ia òhie i te tomoraa i roto i te märamarama o te parau, ia faaroo tätou i te taata Taramo  ia parau e, E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana. To na tiàturiraa te vaha o te Atua  Nui Tumu Tahi tei roto i te fare teie fare, fare pure, âmuiraa, fare maehaa, fare toa, aita e haapäpüraa, te Ìnitia taina ia hinaaro rätou i te ìte te fätatara rätou i te nohoraa e tuu rätou i te päpärià i nià i te fenua no te faaroo, ia oti e hiò i te mahana no te faaìte ia te piri mai  ra te pühapa. Te piti o te hiòraa teie ia huru o te taata i te faaìteraa a Märeto, e ua horo atu ra nä uta mai roto atu i te mau ôire atoà, e ua tae na mua ia rätou. No te mea ua ätea to rätou tärià i te vaha o Ietu, ua hinaaro teie mau taata i faaroo to na iho parau mai roto mai i te tumu o te ora. Mai te reira rii atoà te auraa ta te Atua e hinaaro nei i te haamau i roto ia na e o òe, òrua anaè tei ìte i ta òrua faanahoraa, aita e taata ê atu e ö mai i roto. Mai ia tätou e parau nei e, aita e piti mai te Atua ; e tano atoà tätou e parau e, aita e piti mai ia òe, e o òe ta te Atua e hinaaro ra. E au teie parau no te taata hoê, e no te nünaa, ia au i te mea ta teie reo e parau nei E riro ä te maitaì e te aroha o te parau tià te faafaite ia tätou i te haapiiraa a te Fatu. I roto i te manaò e faahitihia ra, e parau hoê to te haapiiraa e te taata, eita te tahi e tano ia faataahia i te tahi, eita atoà rä to räua parau e tano ia faataa-ê-hia i to te Atua no na i parauhia ai to te taata e na na hoì i hämani i te taata. Teie ua haamauhia te ôtià no te vähi i reira te taata e ìte ai, i reira hoì e faaìte ai i taua maitaì ra i faaìtehia ia na. Eita e òre tätou i te maere i teie huru parauraa e, te vähi i reira te taata e ìte ai, âreà te Atua te nä ô mai ra ia e ua haapii au ia òe. E au teie parau i te tahi haamanaòraa i te mea ta tätou i faahiti aè nei, e ia parau hoì tätou e, e  riro, no te tahi ia mea tei òre ä i noaa i te taata, te tahi mea e hinaarohia ra ia noaa mai i roto i to na manaò. Te tumu, no te mea te manaò, te mana òhipa te reira o te taata. E tano ai tätou e parau e, te manaò i haamätauhia i te maitaì, ua faarave ia i te taata i te maitaì ta to na âau e àtuàtu noa ra ; âreà te manaò i haamätauhia i te ìno, ua faarave ia i te taata i te ìno ta to na âau e àtuàtu noa ra. E tano atoà rä tätou e parau e, te manaò të òre e au i te tahi parau, e òhie atoà o ia i te haamoè i te reira parau ia òre te reira taata ia haapeàpeà-noa-hia. I haamanaòhia ai rä te taata, no te mea ia ua ìte te Atua i hämani ia na e, teie ta na e rave nei, aita ia e au ra i ta na i ôpua no te taata. Ia ìte maitaì mai tätou, aita te Atua i horoà i te mea ìno na te taata, aita hoì o ia i hämani i te taata no te faatupu i te ìno, e aha rä i maraa ai i te taata te parauraa i te mea maitaì e, mea ìno ; e te mea ìno ra, mea maitaì ia. Te taata noa teie e manaò nei e, ta na te tuhaa ìno, e eita o ia e ora i te mea i horoàhia na na. Eere rä e, te reira anaè, ua tae roa atoà o ia i te manaòraa e, eita to na parau e tià ia faahitihia. Tätou e te Mäòhi te mea püai roa i roto i teie manaò hape, e te tämau noa nei te mau arataì o te faaroo i te àtuàtu i te reira hape, te mea ia tätou i tupu hoìoìo noa ai. I roto i te parau o te haapiiraa, e tano ia parauhia e, te papa o te haapiiraa, tei te hiroà-maitaì-raa ia te tamarii i to na tino, ia ìte o ia e, te vai ra o ia, ia färii e ia here ia na iho. Ia ìte atoà rä o ia i te faanaho i to na ao, i te vähi ta na e tià ra, nä reira te mau mea ta na e ìte ra, ia päpü maitaì o ia tei hea te vähi e parauhia ra, o mua, o muri, o nià, o raro, te àtau, te àui. Ua ìte ê na te Mäòhi i te faufaa o te reira mau haapiiraa ta tätou e ìte ra i roto i te mea e parauhia nei e, paripari fenua. Ia haapoto hoì tätou i teie mau parau, e nä ô ia tätou, ia ìte òe ia òe e to òe fenua, ia hiroà maitaì òe i te täamuraa e vai ra i roto ia òe e to òe fenua (Turo a Raapoto), ua äteatea atoà te èà ta òe e rave atu i roto i te oraraa, e òhie atoà òe i te ìteraa i te mea maitaì e parauhia nei.

 Teraì òr. Faatura.