Ioane 5:26-27 ; e te pene 16 :12-15 Te faaitoitoraa a te Metia.

Täpati 20 no Më 2018.

ÔROÀ PENTETÖTE

Taramo 104

Òhipa 2.1-11 Te ùtuafare o te Atua

Taramo  104 Te òaòa ia Iehova. 

Taratia  5:16-25 Te peeraa i te Värua.

Ioane   5:26-27 ; e te pene 16 :12-15 Te faaitoitoraa a te Metia.

Ei parau tumu Ioane   15:16-17 ; 16:12-15    Te faaitoitoraa a te Metia.

Ei ìrava tumu  Ioane   15:13

Ia tae mai ra te Värua Parau Mau ra, na na ia e ärataì ia òutou i te parau mau atoà ra e òre hoi ta na parau e riro na             na iho o ta na ra i faaroo ra, o ta na ia e parau mai, e na na hoì e faaìte mai ia òutou i te mau mea e tupu a muri ätu ra.

Ia ora na tatou i te Aroha o te Atua Nui Tumu Tahi i to tätou färereiraa i teie ôroà Penetetote.

Ta tatou parau no teie mahana tei roto ia i te mau parau hopeà ta te Fatu i parau i ta na mau pipi hou O ia a vaiiho mai ai ia rätou no te haere tià ätu i te ao o to na Metua. Te faaära ra te Fatu i ta na mau pipi e rave rahi o ta rätou e farerei ätu. Eita e òre, e ua ìte te Fatu e te pärahi ra ta na mau pipi i roto i te hepohepo no teie vai-iho-raa no na ia rätou a taa noa ätu ai te mau fifi e färereihia ätu, te vai atoà ra teie vai-iho-raa mai. O vai ia taata eita e hepohepo. Eita ihoä e òre no tätou, te riro nei te taaêraa o te tahi taata faufaa roa ia tätou mai te tahi òhipa teimaha roa. Hau roa ätu teie, te Fatu iho tera e vaiiho ra i ta na mau pipi. I te rahiraa o te taime, te manaò noa ra tatou e aita ta tatou e raveà.

E inaha e rave rahi mau haapiiraa ta te Fatu i tuu i roto i te mau pipi. E rave rahi atoà mau òhipa ta te Fatu i faaìte ia rätou. Te tiàturi nei au e, aita teie taaêraa to te Fatu e riro ra ei raveà na na no te faatamarii i ta na mau pipi. Te riro ra teie taaêraa ei raveà e taata paari ai te mau pipi oia hoi i reira rätou e faaea ai i te turu noa i nià i te Fatu. I reira atoà ai e ìmi ai i te mau raveà atoà i roto i ta rätou faaìteraa. I reira mau rätou e ìte ai i te faufaa no te mau haapiiraa, te mau òhipa ta te Fatu i faaìte ia rätou e teie taaêraa no na ia rätou.

Hau roa ätu, teie te tahi parau faufaa roa ta te Fatu e parau ra ia rätou:

Ia tae mai ra te värua Parau mau ra na na ia e ärataì ia òutou i te mau parau mau atoà ra; e òre hoì ta na e riro na na iho ; o ta na ra i faaroo ra o ta na ia e parau mai e na na hoì e faaìte mai ia òutou i te mau mea e tupu  a muri ätu ra.

I mua i te mau parau ta te Fatu i faaära i te mau pîpî mai te mau fifi o ta rätou e farerei ätu e tae noa ätu i teie taaêraa no na ia rätou, te riro nei teie parau no te Värua ei parau òaòa e ei parau te faaitoito ia rätou. Ia hiò änaè tatou i te huru o te Fatu i nià i ta na mau pipi, e ìte tätou i to na manaònaò rahi ia rätou. Aita O ia e vaiiho òtare nei ia rätou i roto i teie haereraa no na. Te faaära nei O ia i te haereraa mai no te Värua parau mau. Ua tià roa ia na te Atua Tamaiti tei parau e, O vau te èà te parau mau e te ora i te färii ma te haehaa o te âau e ua oti ta na tuhaa. I teie nei te haere nei o ia i te Metua ra, na te Värua ätu ra e tauturu i te mau pipi i roto i ta rätou mau òhipa.

Teie Värua ta te Fatu e parau ra e ère ia te tahi Värua ò na änaè to na faanahoraa. No te mea te mau parau ta na e faaìte mai i te mau pipi, e ère ia e mau parau na na e mau parau ra tei horoàhia mai ia na ra te auraa, te vai ra te tüàtiraa i rotopü te Atua Metua e teie Värua. I faaära ai te Fatu i te parau o te Värua, e täpaò faaìte e ua horoàhia te reira ìte i roto ia na. Eita tätou e hape, ia parau tätou e te vai ra te tüàtiraa i roto pu i te Atua Metua, te Värua e te Atua Tämaïti. I roto i te faaäraa a te Fatu no te Värua, te haapäpü ra o ia e Värua Parau Mau. Te auraa, aita te parau no te  Parau Mau i horoà-no-hia i te Fatu, ua fänaò atoà te Värua i te reira. Te ìte atoà ra tätou, e ia haere änaè te Fatu i te Atua Metua ra na te Värua ia e tauturu i te mau pipi i roto i ta rätou òhiparaa.

E 2 tuhaa rahi ta te Värua e rave,

1) te ärataìraa i te mau pîpî i roto i te taatoàraa o te Parau Mau.

2) te faaìteraa i te mau pipi i te mau òhipa te tupu a muri aè.

E tuhaa ärataì ta te Värua, te auraa, e àfaì o ia i te mau pipi na nià i te èà e päpü ai ta rätou faaìteraa i te mau òhipa atoà ta rätou i ora na muri i te Fatu. E haere noa mai te Värua no te haapäpü i te mau pipi i te mau òhipa e te mau parau i faaìtehia mai e Ietu. Te ra tätou i te tuhaa a te Värua e ère ia i te òhipa taa-ê-roa i ta te Fatu e püòiraa ra no te òhipa i ravehia mai e Ietu.

Te tahi atoà tuhaa a te Värua o te faaìteraa i te mau òhipa te tupu a muri aè. Ua päpü maitaì ia Ietu, e färerei ätu te mau pipi i te mau huru fifi atoà i ta rätou òhiparaa. E te tauturu rahi ia rätou i taua mau taime ra o te faaìteraa ia a te Värua. I roto i na tuhaa e ravehia e te Värua òia hoi te ärataìraa e te faaìteraa, te ìte noa ra tätou i ta na tauturu rahi i te mau pipi i roto i ta rätou òhiparaa e to rätou vai-ära-noa-raa i nià i te tahi mau òhipa te tupu mai.

Te tiàturi nei tätou e ua ìte te mau pîpî i te tauturu rahi a te Värua. Ua päpü atoà ia tätou e, e ïti mai tera hepohepo to rätou e òre roa ätu. Ua mataro noa tätou te Penetetote, te pouraa mai te Värua Maitai i nià i te mau pipi. Na roto i te parau a te Fatu ta tätou i hiò mai, e ere ua ära tätou i te parau o te Värua na roto i te Fatu. E te hoperaa te tuhaa a te Fatu, ua haamata mai ia te tuhaa a te Värua. Te auraa, ua faaìte mai te Atua i to na Aroha ia tätou na roto i te tonoraa mai i ta na Tamaiti. E te haereraa mai no te Värua tei faaärahia e Ietu, ua riro atoà ei täpaò no te Aroha o te Atua. Te Penetetote, te taime te reira i faaìte faahou ai te Atua i to na Here e to na Aroha ia tätou na roto i te parau o te Värua.

No te Âpotetoro ra o Pauro aita o ia i haaparuparu i te reira tiàturiraa e te reira tiaì-turu-raa, ia riro ei niu e òre ai e huru ê te maitaìraa o te oraraa faaroo o te Ètärëtia i tö na tau. Ua itoito ra i te faaìte na roto i te èpitetore i to Roma i te pene 1 i te ìrava 16 Aore hoì au i haamä i te Èvaneria o te Metia ra, no te mea o te mana ia o te Atua, ia ora te feiä atoà i faaroo ra te âti-Iüta na e te Herëni atoà hoì. 17 Tei reira hoì te parau-tià a te Atua i te faaroo i te faaìte-raa-hia mai ei faarooraa, mai tei päpaìhia ra eTe feiä parau-tià i te faaroo ra, e ora ia.

Ia ora na.